1 «Mɛ̃, mɛ̃ ndi ɔ̃ti a bvine wa taa-taa, bvool Tal a mɛ̃ oli ɔ̃kwɛn a ɔ̃ti ondɛ. 2 Ndɛ atsiil pɔɔ̃ lueel li eli me mɛ̃, lɛn k’eburu nsia wɛ. Kɛn a ndɛ afaal pɔɔ̃ lueel li eburu nsia ŋ’ewɛɛ ndɛ lɔ, kwɛn lɔ bvool eburu nsia bibi. 3 Endɔɔ li ntee mɛ̃ byɛ emeesuul byɛ eyii tsɛtsɛ. 4 Oŋɔ̃ ekuru nzuru me mɛ̃, onge be nkuru yɔ me byɛ. Emfa kyɛn pɔɔ̃ k’ekoo k’eburu nsia me lam wɛ, okɛɛn lɔ k’ekuru nzuru m’ɔ̃ti a lɔ wa bvine wɛ, emfa kiki hɛ̃, okɛɛn byɛ k’ekuru nzuru me mɛ̃ wɛ, byɛ k’ekoo k’eburu nsia wɛ. 5 Mɛ̃, mɛ̃ ndi ɔ̃ti a bvine, byɛ, byɛ eli ãmpɔɔ̃. Mbuul wu akuru nzuru me mɛ̃, wɛn mɛ̃ hɛ̃ nkuru nzuru me ndɛ, mbuul ondɛ aburu nsia bibi. Ke ngwel wɛ, okɛɛn mɛ̃ pyɛ, byɛ k’ekoo k’asa ndɔɔ si ngamɔ̃ wɛ. 6 Mbuul wɛn k’akuru nzuru me mɛ̃ wɛ oli onge pɔɔ̃, li àta pfɛɛ onkwel-a-nzi bvool ekɛɛ. Ãpɔɔ̃ m’ãkɛɛ-ãkɛɛ, atwal mɔ̃ bvool atyal mɔ̃ onse mbaa, oŋɔ̃ mɔ̃ bu ãdzio. 7 Ŋɛn byɛ ekuru nzuru me mɛ̃, bvool ŋɛn ãndɔɔ ã mɛ̃ hɛ̃ ãkal onse byɛ, esɔɔ bvieel bvi edzii byɛ, byɛ èbɔɔ bvɛ. 8 Emfa ki emɔɔn lweel e Tal a mɛ̃ kyɛ ki: Ŋɛn byɛ eburu nsia bibi, bvool esuo kwɛn byɛ eli ayio a mɛ̃. 9 Onge b’edzii Taal mɛ̃, mɛ̃ hɛ̃ nzii byɛ. Ekal onse dzii e mɛ̃. 10 Okɛɛn byɛ ekieel ãngel ã mɛ̃, byɛ èkal onse dzii e mɛ̃, onge b’ebekiaal mɛ̃ ãngel ã Taal, bvool ndi onse dzii e ndɛ.»

11 «Mɛ̃ ngyɛɛn byɛ obobɔ, kwɛn esɛ e mɛ̃ ekal onse byɛ bvool kwɛn esɛ e byɛ ekal ɔ̃koo. 12 Ngel a mɛ̃ yɔ bu: Edzii bakyɛ, onge b’ebedzii mɛ̃ byɛ. 13 Dzii li enduru ɔ̃ndel lɛn mbuul okoo k’asuo, li ekab ndɛ elaã e ndɛ me ndɔɔ andoo a ndɛ. 14 Byɛ, byɛ eli andoo a mɛ̃ okɛɛn byɛ esa bɛn mɛ̃ ndyam ntam byɛ osa. 15 Mɛ̃ k’ebeta byɛ m’ankyal wɛ, ke ngwel wɛ ɔ̃nkyal k’ayɛɛ m’esa mfam a ndɛ wɛ. Mɛ̃ nti byɛ m’andoo, ke ngwel wɛ mɛ̃ nsuo byɛ mbueel me ngyoo mɛ̃ ola Tal a mɛ̃. 16 Byɛ ke baal b’esueel mɛ̃ wɛ, mɛ̃ mbuul wu nsueel byɛ, bvool ngwi byɛ ontam, kwɛn byɛ, byɛ eyi, byɛ eburu nsia, bvool kwɛn nsia e byɛ eyiil. Obobɔ, Taal àwa byɛ bvieel bvi esɔɔ byɛ ola ndɛ me nkuũ a mɛ̃. 17 Ndɔɔ yi ntam mɛ̃ byɛ osa, yɛn byɛ edzii bakyɛ.»

18 «Ŋɛn ɔ̃kiri oli ye byal e byɛ, eyɛɛ wɛn ndɛ abyel mɛ̃ ɛ̃kwel ɛ̃ byɛ. 19 Okɛɛn byɛ eli baal b’ɔ̃kiri, kɛn ɔ̃kiri akaadzii ba ndɛ. Kɛn onge bɛn byɛ k’eli b’ɔ̃kiri wɛ, bvool me ndɔɔ yɛn mɛ̃ nsueel byɛ onse ɔ̃kiri, obɔ otsɛn bɛn ɔ̃kiri oli ye byal e byɛ. 20 Ebee ãndɔɔ m’elieel mɛ̃ byɛ mã odzɛɛn: "Ɔ̃nkyal k’anduru mfam wɛ." Okɛɛn bɔ atueel mɛ̃ mpal, bɔ akieel atuaal byɛ hɛ̃ mpal. Okɛɛn bɔ akwee Endɔɔ e mɛ̃, bɔ àkwɛɛ li byɛ hɛ̃. 21 Bɔ àsa byɛ ãndɔɔ omɔ̃ mbueel me nkuũ a mɛ̃, ke ngwel wɛ bɔ k’ayɛɛ wu ayuɔɔl mɛ̃ wɛ. 22 Mɛ̃ al’okɛɛn k’eyi wɛ, bvool okɛɛn mɛ̃ k’eyɛɛn ye bɔ wɛ, kɛn bɔ k’akaakal y’obi wɛ. Kɛn a meba, bɔ k’abɔɔ odzeel me ndɔɔ obi o bɔ wɛ. 23 Wu obyel mɛ̃, obyel Tal a mɛ̃ hɛ̃. 24 Okɛɛn mɛ̃ k’esi ɛ̃sal myɛn mbuul ɔ̃kyam si ɔ̃mɔ̃ wu osi myɛ̃ pyɛ, kɛn bɔ k’akekal y’obi wɛ. Kɛn a meba, okyam ŋɛn bɔ amwɛn ɛ̃sal omyɛ̃, bɔ awɛɛl mpɛn m’obyal o mɛ̃ ye Tal a mɛ̃. 25 Kɛn eli me ndɔɔ yi asa m’ákel onse ngel a bɔ bubu: "Bɔ abyel mɛ̃ ngwel✝15.25 Ãnz 35.19; 69.5."»

26 «Ŋ’ekieel eya Ntwel, wu ekieel eyuɔɔl mɛ̃ byɛ, fa ola Taal, ndɛ wu Ɔ̃fel wu otaa-taa wu afa ola Taal, ndɛ wu akieel atsweel mɛ̃. 27 Byɛ, byɛ hɛ̃ ekieel etsweel mɛ̃, ke ngwel wɛ byɛ eli ye mɛ̃ fa obɛɛn.»