1 Ke mbee ãndɔɔ omɔ̃, Mfam osueel ayio ɛ̃kuun-nsiaan ye buaal (72) akyam. Ndɛ bu atam bɔ me buaal a buaal, kwɛn bɔ atsɔɔn onse ãbviil y’ãla mam mbueel m’ékeyi ndɛ. 2 Ndɛ olieel bɔ bubu: «Nsia eli bibi onse nguun, kɛn asal b’aka yɔ k’ali bibi wɛ. Eluɔɔn ola nga-nguun ayuɔɔl asal akyam bvool, m’oyeka o yɔ. 3 Eyi! Mɛ̃ ntam byɛ onge baan b’emɛmɛɛ̃ onse angɔ. 4 Ebee eluɔ si ngemɔ̃ obiri, ekal nzi, ekal ɔ̃paa, ekal asimpal. Ebee me nkuul oyiil me ndɔɔ yi ebio baal. 5 Ŋ’èsam byɛ onse nzɔ ngamɔ̃, ŋ’ɛ̃kwel ebio anga-yɔ wɛn: "Yɔɔl kwɛn opi okal ye baal a nzɔ yi!" 6 Okɛɛn mbuul wu odzii opi akal onse nzɔ oyɔ, opi o byɛ òkal ye ndɛ. Okɛɛn k’obobɔ wɛ, bɔ òkɔɔl ola byam. 7 Ekal onse nzɔ oyɔ, edza bvool enywã bvi àbuun byɛ. Ke ngwel wɛ, ɔ̃sal ebvaan abɔɔ furu li ɔ̃sal a ndɛ. Ebee me nzɔ bwɛn a nzɔ obwel. 8 Onse bviil lam lueel li èsam byɛ, okɛɛn baal b’oŋɔ̃ ayɔɔ byɛ, edza bvi àbuun byɛ. 9 Eboo baal b’ali y’ãluu oŋɔ̃, bvool eyɛɛn baal bam bueel bubu: "Okwɛn o Nziã osyel tsotsoo a byɛ!" 10 Kɛn onse bviil lam lueel li èsam byɛ, okɛɛn baal b’oŋɔ̃ k’ayɔɔ byɛ wɛ, epal nkal abal-bal, bvool eyɛɛn baal bueel bubu: 11 "Onkyam ɔ̃fel a bviil e byɛ wu ondɛɛl me ntaã e bee, bee ekweel ndɛ, me ndɔɔ yi ebveel byɛ ndɛ! Kɛn a byɛ ebvaan eyɛɛ kwɛn Okwɛn o Nziã osyel tsotsoo a byɛ!" 12 Mɛ̃ eyɛɛn byɛ wɛn, me tsoo li ekieel etsiil Nziã ãndɔɔ ã baal, fool li baal b’ola obɔ, ekieel enduru li baal ba Sodom.»

13 «Ãwua ola yɛ, bviil li Koladzin! Ãwua ola yɛ, bviil li Betesayida! Ke ngwel wɛ, emwã bvi nsi mɛ̃ ola byɛ, okɛɛn mɛ̃ ési bvɛ ke Tiil ye Sidɔ̃, kɛn baal b’okɔ olɔ ákaalaal angɔrɔ, bvool ákaakel efuru me nzuru, me ndɔɔ yi asuo kwɛn bɔ akaal ɛ̃kwal! 14 Obɔ otsɛn bɛn, me tsoo li ekieel etsiil Nziã ãndɔɔ ã baal, fool li byɛ ekieel enduru li baal ba Tiil ye Sidɔ̃. 15 Me b’otal yɛ, yɛ wu bviil li Kapelanahum, yɛ atsam kwɛn àndɛɛl yɛ tiil ke ywel? Mfya, Nziã akieel akweel yɛ tiil k’ola o b’ákwi-ákwi!» 16 Yeso bvool olieel ayio a ndɛ ndiri: «Mbuul wu oyoo byɛ, wu oyoo mɛ̃. Mbuul wu otiɔ byɛ eboo, ŋ’atiɔ mɛ̃ hɛ̃ eboo. Mbuul wu otiɔ mɛ̃ eboo, ŋ’atiɔ wu atam mɛ̃ eboo hɛ̃.»

17 Ayio ange-ɛ̃kuun-nsiaan ye buaal ayebvool. Bɔ aluul m’esɛ, bvool ayɛɛn ndiri: «Mfam, onkyam ɛ̃fel mi ɛ̃bi-ɛ̃bi ɛ̃lweel bee, me lio li eketswɛɛl bee myɛ̃ me nkuũ a yɛ!» 18 Yeso obveel bɔ ndiri: «Mɛ̃ ekemwɛn k’efa Ɔ̃pfu ywel abva me nsie onge ɔ̃bɛɛn-a-nzyel*. 19 Etal! Mɛ̃ ngwi byɛ okwɛn b’edziaal antaal y’angiɛ̃-miin, ye b’enyam waan lam lueel li Ɔ̃pfu wu ɔ̃taal a bia-byɛ, eluɔ si ngemɔ̃ k’ekoo k’etuaal byɛ mpal wɛ. 20 Kɛn a byɛ ebee mpaa osia me ndɔɔ yɛn ɛ̃fel mi ɛ̃bi-ɛ̃bi ɛ̃lweel byɛ, esia mpaa me ndɔɔ yɛn Nziã amaaswɛn ãnkuũ ã byɛ ke ywel!»

21 Kɛn a me lio olɔ, Yeso oluul m’esɛ ki ewi Ɔ̃fel wu Ɔ̃nsensal. Ndɛ olieel ndiri: «Taal, Mfam a ywel ye nsie, mɛ̃ mveel yɛ ãtuɛɛn, ke ngwel wɛ yɛ alwɔɔn ãndɔɔ mã ol’anga-ãyal ye baal b’ali y’ɛ̃nkaan. Kɛn a yɛ suo mɔ̃ ola baal b’ali onge baan b’abwee. Taa-taa Taal, yɛ ádzii kwɛn ekal obobɔ.»

22 Ndɛ bu alieel b’áli oŋɔ̃ ndiri: «Tal a mɛ̃ owi mɛ̃ eluɔ bvam bvieel. Mbuul si ngɔmɔ̃ k’ayɛɛ Muaan wɛ, okɛɛn ke Taal wɛ, mbuul hɛ̃ si ngɔmɔ̃ k’ayɛɛ Taal wɛ, okɛɛn ke Muaan wɛ. Kɛn a Muaan odzii k’asuo Taal ola baal bakyɛ, kwɛn bɔ hɛ̃ ayɛɛ ndɛ.»

23 Ke mbee oŋɔ̃, Yeso osɔɔn ayio a ndɛ, bu ayɛɛn kɛn a ye bɔ bubu: «Esɛ ola baal b’amwɛn ãndɔɔ m’emwɛn byɛ mã! 24 Ke ngwel wɛ, mɛ̃ ngyɛɛn byɛ wɛn aliaal-ɛ̃kiɛɛn a Nziã bibi y’akwɛn ba tsɔɔn ádzii k’amwɛn m’emwɛn byɛ, kɛn a bɔ k’ámwɛn mɔ̃ wɛ! Bɔ ádzii k’ayoo m’eyoo byɛ, kɛn a bɔ k’áyoo mɔ̃ wɛ!»

25 Ɔ̃yiool-ãngel ngɔmɔ̃, me ndɔɔ yi akie Yeso, oyefuul ndɛ ndiri: «Ɔ̃tee, mɛ̃ bwɛn esa, me ndɔɔ yɛn mɛ̃ mbɔɔ elaã li ɔ̃bu bwɛn ɔ̃bu?» 26 Yeso obveel ndɛ bubu: «Onse ãngel ã Moyize, ákel ndiri emã? Yɛ mɔ̃ otsɛn bwɛn-a-bwɛn abekwaal?» 27 Mbuul ondɛ obveel bubu: «Yɛ àdzii Mfam Nziã a yɛ m’ɔ̃kwal a yɛ ndyam wueel, m’elaã e yɛ lam lueel, me mpɛn a yɛ yam yueel, m’ãtsam ã yɛ mam mbueel. Yɛ àdzii ngaburu-mbuul onge b’edzii yɛ nzuru a yam✝.» 28 Obobɔ, Yeso olieel ndɛ ndiri: «Yɛ bveel ngesɛ. Sa obobɔ, yɛ olɔ bɔɔ elaã.» 29 Kɛn a onge bɛn ɔ̃yiool-ãngel odzii k’abɔɔ ɔ̃dzoo, ndɛ obveel Yeso ndiri: «Taa-taa! Ke ngamburu-mbuul a mɛ̃ nã?»

30 Yeso bu abveel ndɛ ndiri: «Tsoo ngelemɔ̃, mbuul áfi Yelusalem, ákeyi Dzeliko. Edzyal esiin ndɛ, ewɛɛl ndɛ eluɔ bvam bvieel bvi éli a ndɛ, bvool epfel ndɛ ɔ̃dzii. Bvɛ bu esiin nkuul eyɛn li bam, esiil ndɛ ɔ̃kwa-akwa. 31 Ŋ’esa oŋɔ̃, ngaa-a-Nziã ngɔmɔ̃ ákebwel me nkuul oyɔ. Ŋ’emwɛn ndɛ mbuul ondɛ, ndɛ obwel me pyɛ, bu ayɛn li ndyam. 32 Emfa kiki, ɔ̃sal ngɔmɔ̃ wa nzɔ a Nziã otɔ ke mboo oyɔ, omwɛn mbuul ondɛ, oswɛɛl nkuul, bu ayɛn li ndyam. 33 Kɛn Ɔ̃samalia ngɔmɔ̃ wu ákebwel m’olɔ, atɔ oŋɔ̃, omwɛn mbuul ondɛ, ndɛ nyiĩ a ndɛ bu ebɔɔ yam bibi. 34 Ndɛ osyel tsotsoo a ndɛ, olɔ mbaal ye mbal kal ãbwɔɔ ã ndɛ, bu akuru ndɛ mɔ̃ m’ɛ̃pa mi ekɔ. Ke mbee oŋɔ̃, ndɛ ondɔɔl ndɛ nkal a nyam a ndɛ, bvool bu abiri ndɛ ke nzɔ a anzii. Okɔ, ndɛ oboo ndɛ ngesɛ-ngesɛ. 35 Ela esiool, ndɛ opaal nzi yuaal yi ãbvieel. Owi yɔ ola nga-nzɔ oyɔ, bvool oyɛɛn ndɛ bubu: "Boo mɛ̃ mbuul wu ngesɛ. Ŋɛn yɛ tsal nzi nkyam me ndɔɔ a ndɛ, myam mbuul wu efuru yɛ yɔ, me lio li èbvool mɛ̃ me li.*"»

36 Ŋ’eman Yeso mboo oyɔ ota, ndɛ ofuul ɔ̃yiool-ãngel ondɛ ndiri: «M’ãtsam ã yɛ, onse baal ange-atyel obɔ, wu owel mbuul wu epfel edzyal ɔ̃dzii onge ngamburu-mbuul a ndɛ nã?» 37 Ɔ̃yiool-ãngel obveel ndiri: «Eli mbuul wu osi ndɛ obvɛ ondɛ.» Obobɔ, Yeso olieel ndɛ ndiri: «Yi, sa hɛ̃ obobɔ!»

38 Ŋ’éli Yeso me nkuul y’ayio a ndɛ, ndɛ osam onse ola ngɔmɔ̃. Ɔ̃kaal ngɔmɔ̃ wɛn nkuũ Maate oyɔɔ ndɛ onse nzɔ a ndɛ. 39 Ndɛ áli ye mvɔɔl wu ɔ̃kaal wɛn nkuũ Mali. Ndɛ wu Mali oyebva nsɛn ke mviil ɛ̃ Mfam, bu abvi ãtee ã ndɛ oyoo. 40 Ŋ’esa oŋɔ̃, Maate ákefel y’ɛ̃sal ɛ̃ nzɔ ndyam. Ndɛ osyel tsotsoo a Yeso, bvool oyɛɛn ndɛ bubu: «Mfam, k’esa yɛ mpal wɛ kwɛn mvɔɔl a mɛ̃ oyɔɔl mɛ̃ ebefel y’ɔ̃sal myam sii? Oŋɔ̃, meyɛɛn ndɛ ayewuaal a mɛ̃!» 41 Mfam obveel ndɛ ndiri: «Maate, Maate, yɛ atuaal nzuru mpal m’ãtsam y’ãndɔɔ m’emfa bwɛn emfa. 42 Ndɔɔ kɛn a ngamɔ̃ eli y’ɔ̃bvɛn: Mali osueel ndɔɔ yi ngesɛ, yɛn k’akoo k’ambaal ndɛ yɔ wɛ.»