1 Tsoo ngelemɔ̃, Yeso ákebuɛɛn ke mboo ngamɔ̃. Ŋ’eman ndɛ obuɛɛn, ɔ̃yio a ndɛ ngɔmɔ̃ olieel ndɛ ndiri: «Mfam, yiool bee hɛ̃ emfa ki abuɛɛn, onge b’eyiool Dzaã ayio a ndɛ.» 2 Yeso olieel bɔ bubu: «Byɛ eboobuɛɛn, eyɛɛn wɛn:
"Tal a bee,
yɔɔl nkuũ a yɛ ekal ye nsia11.2 Ŋ’ayɛɛn ndiri baal ayɛɛ kwɛn Nziã oli ɔ̃nsensal, bvool alweel yɔ.,
yɔɔl Okwɛn o yɛ oya!
3 Wa bee tsoo bwɛn a tsoo bvi-odza bvi ekoo me ndɔɔ a bee!
4 Dzeel ãbi ã bee,
onge b’edzeel bee hɛ̃ b’asi bee obi!
Oyɛɛ ke yɔɔl kwɛn bee ebva m’ɔ̃mbio wɛ!"»
5 Yeso bvool olieel bubu: «Emeeyoo ndɔɔ yi: Okɛɛn ngɔmɔ̃ onse byɛ oli ye ndoo: Nkal a kuku, ndoo ondɛ oyi oyeluɔɔn ola ndɛ ndiri: "Ndoo a mɛ̃, suɔɔn mɛ̃ nsuɔ tyel. 6 Ke ngwel wɛ, ndoo a mɛ̃ wukyɛ ofi odzuu, oyi ola mɛ̃. Kɛn a mɛ̃ ke ndi ye ki ebuun ndɛ wɛ." 7 Ŋɛn, nga-ndoo wu amaasam nzɔ, obveel ndɛ onse mwiĩ okɔ ndiri: "Yɔɔl mɛ̃ nkal pi, mɛ̃ emeewɔɔl nzɔ, mɛ̃ ye baan eyii me twal: Mɛ̃ ke nkoo k’ebesiool, me ndɔɔ yi ewa yɛ nsuɔ wɛ." 8 Obobɔ, mɛ̃ eyɛɛn byɛ wɛn: Onkyam ŋɛn ndɛ k’atɛɛn me ndɔɔ yi ayewa ndɛ yɔ me ndɔɔ yɛn ndɛ oli ndoo a ndɛ wɛ, ndɛ olɔ otɛɛn oyewa ndɛ bvi esɔɔ ndɛ, me ndɔɔ ɔ̃tɛɛ̃ a nga-ndoo ondɛ. 9 Obɔ otsɛn bɛn, mɛ̃ eyɛɛn byɛ wɛn: Ebesɔɔ, àwa byɛ. Ebebii, byɛ èbɔɔ. Ebebɛɛl nzɔ, àdzweel byɛ yɔ. 10 Ke ngwel wɛ, mbuul wu abesɔɔ, abewa ndɛ. Mbuul wu abebii, abebɔɔ. Mbuul wu abebɛɛl nzɔ, abedzweel ndɛ yɔ. 11 Ondɛ tal nã wɛn muaan asɔɔ nswi ola ndɛ, ndɛ owi ndɛ ntaal ke mboo a nswi? 12 Wuo, ndɛ asɔɔ bi ola ndɛ, ndɛ owi ndɛ ngiɛ̃-miin? 13 Okɛɛn byɛ baal b’abi eyɛɛ k’ewa baan a byɛ eluɔ bvi ngesɛ, bvel-bvel Tal a byɛ wa ke ywel hɛ̃ àwa Ɔ̃fel wu Ɔ̃nsensal ola baal b’asɔɔ ndɛ ola ndɛ!»
14 Tsoo ngelemɔ̃, Yeso átswɛɛl ɔ̃fel wu ɔ̃bi-ɔ̃bi wu ákesuul mbuul ngɔmɔ̃ nkɛn. Ŋ’epal ɔ̃fel onse nkɛn ondɛ, mbuul ondɛ obvi oyɛɛn, embuul ki éli oŋɔ̃ ekam bibi. 15 Kɛn a baal bakyɛ ayɛɛn ndiri: «Mpɛn yi ebetswɛɛl ndɛ ɛ̃fel mi ɛ̃bi-ɛ̃bi yi ewi Beledzebul wu mfam a ɛ̃fel mi ɛ̃bi-ɛ̃bi!» 16 Bakyɛ bvool atam ndɛ k’asa eliĩ ki esuo kwɛn ndɛ ofi ola Nziã, me ndɔɔ yi akie ndɛ. 17 Kɛn onge bɛn Yeso ákeyɛɛ ãtsam ã bɔ, ndɛ oyɛɛn bɔ ndiri: «Okɛɛn baal b’okwɛn ngɔmɔ̃ adzwaan bam-a-bam, okwɛn obɔ obva, bvool ãnzɔ ã bɔ ãbva yɛn nkal a yɛn. 18 M’emfa kiki, okɛɛn Ɔ̃pfu adzwaan ye ndyam, okwɛn o ndɛ otɛɛn bwɛn a bwɛn? Ke ngwel wɛ, byɛ etɔ me mɛ̃ oyɛɛn wɛn, mɛ̃ wu etswɛɛl ɛ̃fel mi ɛ̃bi-ɛ̃bi me mpɛn yi ewa Beledzebul wu mfam ɛ̃fel mi ɛ̃bi-ɛ̃bi. 19 Okɛɛn mpɛn yi etswɛɛl mɛ̃ ɛ̃fel mi ɛ̃bi-ɛ̃bi yi ewa Beledzebul mɛ̃, k’ayio a byɛ, bɔ myɛ̃ me mpɛn a nã abetswɛɛl? Obɔ otsɛn bɛn bɔ k’àwa byɛ ɔ̃dzoo wɛ. 20 Onge bɛn mɛ̃ etswɛɛl ɛ̃fel mi ɛ̃bi-ɛ̃bi me mpɛn a Nziã, ŋ’esuo kwɛn Okwɛn o Nziã oyi ola byɛ.
21 Ŋ’ekiaal mbuul a mpɛn bvool wu li y’ãta nzɔ a ndɛ, eluɔ e ndɛ k’awal bvɛ wɛ. 22 Okɛɛn mbuul wu onduru ndɛ mpɛn oyedzwaan ye ndɛ, bvool obvel ndɛ, mbuul ondɛ awɛɛl nga-mpɛn ondɛ ãta m’eketa ndɛ kaã me mɔ̃, bu akab opfel o ndɛ.11.22 Nga-mpɛn wu eyɛɛn Yeso ŋã, eli Ɔ̃pfu, wu bvel mpɛn eli ndyam wu Yeso.
23 Mbuul wɛn k’ali ye mɛ̃ wɛ, ɔ̃taal a mɛ̃ ali. Mbuul hɛ̃ wɛn k’abvool baal ye mɛ̃ wɛ, wu atsal.»
24 «Ŋɛn ɔ̃fel wu ɔ̃bi-ɔ̃bi opal onse mbuul, ndɛ ayi ayebii mboo yi awuun onse ɔ̃baan wa kɛɛ-kɛɛ. Ndɛ okɛɛn k’abɔɔ yɔ wɛ, ndɛ ayɛɛn ndyam-a-ndyam ndiri: "Mɛ̃ èbvool onse nzɔ yi epal mɛ̃ onse yɔ tsɔɔn." 25 Ŋ’ebvool ndɛ, ndɛ oyebɔɔ yɔ amaakuɔɔn, bvool amaafaal eluɔ ngesɛ-ngesɛ. 26 Obobɔ, ndɛ akɔɔl ayebii ɛ̃fel ɛ̃kyam nsiaan mi ɛ̃nduru ndɛ obi. Ndɛ abiri myɛ̃, ɛ̃yesam onse nzɔ oyɔ. Elaã e mbuul ondɛ enduru li eli tsɔɔn me fool.»
27 Me lio li ékeyɛɛn Yeso obobɔ, ɔ̃kaal ngɔmɔ̃ onse baal obiool ndɛ ndiri: «Esɛ ol’ɔ̃kaal wu ábiri yam e yɛ, bvool áwi yɛ ãbiaal!» 28 Kɛn a Yeso obveel bubu: «Esɛ ndoo ola baal b’ayoo Endɔɔ e Nziã, bvool alweel lɔ!»
29 Me lio li edzii embuul Yeso, ndɛ obvi baal oyɛɛn ndiri: «Baal ba lio li ali baal b’abi-abi: Bɔ abii eliĩ ki esuo kwɛn wu oyuɔɔl mɛ̃ Nziã, k’eli y’eliĩ ekyam ki asuo bɔ wɛ, eliĩ ki asuo bɔ kɛn a ki Dzonas. 30 Taa-taa bam, emfa ngemɔ̃ kyɛn Dzonas áli eliĩ me ndɔɔ a baal a Ninibve, emfa kiki hɛ̃, Muaan a mbuul àkal eliĩ me ndɔɔ a baal ba lio li. 31 Me tsoo li ekieel etsiil Nziã ãndɔɔ ã baal, ɔ̃kwɛn wu ɔ̃kaal wu ɔ̃kiri wa Seba akieel atɛɛn, me ndɔɔ yi afɛn baal ba lio li, ke ngwel wɛ ndɛ áfi lela me ndɔɔ yi ayeyoo ãndɔɔ m’ékeyɛɛn Salomɔ̃ y’ãyal. Etal, ŋã eli ye mburu wu onduru Salomɔ̃11.31 Ɔ̃kwɛn wa Seba afɛn bɔ, ke ngwel wɛ bɔ abee k’ayoo Yeso.. 32 Me tsoo li ekieel etsiil Nziã ãndɔɔ ã baal, Baal ba Ninibve akieel atɛɛn me ndɔɔ yi afɛn baal ba lio li, ke ngwel wɛ bɔ ákaal ɛ̃kwal ke mbee ãtee ã Dzonas. Etal, ŋã eli ye wu onduru Dzonas.11.32 Baal ba Ninibve afɛn bɔ, ke ngwel wɛ ŋ’eyoo bɔ Yeso, bɔ k’aswɛɛl ɛ̃kwal wɛ.»
33 «Mbuul andɛɛl mbunda, k’akoo k’alwɔɔn ndɛ wɛ, wuo k’akoo k’apfeel ndɛ saan wɛ. Kɛn a ndɛ andɔɔl ndɛ ke ywel a misa, kwɛn baal b’asam onse nzɔ amwɛn kal-a-kal. 34 Mviil ã yɛ hɛ̃ ãli mbunda a nzuru a yɛ: Okɛɛn mviil ã yɛ ãli ngesɛ, nzuru a yɛ yam yueel hɛ̃ eli onse okal-a-kal. Kɛn a ŋɛn mviil ã yɛ ãli ãbi-ãbi, nzuru a yɛ yam yueel hɛ̃ eli onse empeel. 35 Obobɔ, kal y’onkyab, kwɛn okal-a-kal b’oli onse yɛ obee empeel okɔɔl. 36 M’emfa okyɛ, okɛɛn nzuru a yɛ yam yueel eli onse okal-a-kal, epie si emɔ̃ onse empeel pyɛ, yɔ yam yueel èkal onse okal-a-kal, onge me lio li ebeyɛɛl mbunda yɛ.»
37 Me lio li ékeyɛɛn Yeso, Ɔ̃falisaye ngɔmɔ̃ oti ndɛ mbel, me ndɔɔ yi ayedza ola ndɛ. Yeso osam onse nzɔ a ndɛ bvool owel mboo m’odza. 38 Ɔ̃falisaye okam ŋ’emwɛn ndɛ kwɛn Yeso k’asuɔɔl mviɔɔl wɛ ye k’edza ndɛ11.38 Ol’Afalisaye, osuɔɔl o mviɔɔl éli eliĩ ki okal tsɛtsɛ, m’emfa ki ɛ̃kiri ɛ̃ bɔ.. 39 Mfam olieel ndɛ bubu: «Byɛ b’Afalisaye ebesuɔɔl mbiɔ ye saan onkwel-a-nzi, kɛn a onse ɛ̃kwal, byɛ eluul m’emfua e pfuul ye ki osa b’obi! 40 Ewool e baal! Eyɛɛ ngesɛ kwɛn Nziã wu ási ãnzuru ã byɛ, oli hɛ̃ wu ási amwiĩ a byɛ!11.40 Yeso ŋã odzii k’asuo ndiri Nziã odzii kwɛn nzuru wuo ɛ̃sal ɛ̃ mbuul, ãtsam ã mbuul wuo lelaã e ndɛ, bvieel ebvaan ekal tsɛtsɛ. 41 Ekab aywal eluɔ bvi eli onse ãmbiɔ y’asaan a byɛ, obobɔ, ãndɔɔ ã byɛ mbueel ãkal dzu.11.41 Emfa ekyam ki akwaal otsɛn o ndɔɔ oyɔ kyɛ bu: Ekab aywal ɔ̃kwal ngɔmɔ̃, ke me ndɔɔ yɛn baal atal byɛ wɛ.
42 Ãwua ola byɛ b’Afalisaye! Ke ngwel wɛ, byɛ ebembaal Nziã boo ngemɔ̃ onse ãboo kuun m’eluɔ bvam bvieel bvi ekwɛn byɛ onse ãnguun, onkyam li ãsɔɔ m’ãwa bvi-odza ãkiin. Kɛn a byɛ ebedzɛɛn k’esa bakyɛ ãndɔɔ m’emfa ki dzu y’odzii o Nziã: Omɔ̃ ãndɔɔ mɛn ebvaan byɛ ekeesa, m’ãsiil odzɛɛn wɛ.
43 Ãwua ola byɛ b’Afalisaye! Ke ngwel wɛ, byɛ onse ãnzɔ m’ãbuɛɛn edzii k’ebva nsɛn k’ãmboo mã nkwel, bvool byɛ hɛ̃ edzii kwɛn abio byɛ k’ãmboo m’ebvɔɔn baal. 44 Ãwua ola byɛ! Ke ngwel wɛ, byɛ eli onge ãmpiɛɛn mɛn k’amwɛn wɛ, bvool mɛn baal k’ayɛɛ kwɛn bɔ ŋã ke ywel a mɔ̃ abedzuul wɛ.»
45 Obobɔ, ɔ̃yiool-ãngel ngɔmɔ̃ wu áli oŋɔ̃ ofuul Yeso bubu: «Ɔ̃tee, ŋ’eyɛɛn yɛ obobɔ, yɛ oŋɔ̃ mpii bee ɛ̃tswɛ too hɛ̃!» 46 Yeso obveel ndɛ ndiri: «Ãwua ola byɛ hɛ̃, byɛ b’ayiool b’ãngel! Ke ngwel wɛ, byɛ ebewa baal ãpfuũ m’ãli ye mpal m’obiri, kɛn a byam k’edzii k’enywɛn a mɔ̃ si ekal m’ɔ̃liɛɛn wɛ. 47 Ãwua ola byɛ! Ke ngwel wɛ, byɛ ebeboo ãmpiɛɛn m’aliaal-ɛ̃kiɛɛn a Nziã, b’ábam bɔ ankiɔɔn a byɛ. 48 Byɛ ŋ’esuo kwɛn byɛ etuɛɛn m’ési ankiɔɔn a byɛ. Ke ngwel wɛ, bɔ ábam aliaal-ɛ̃kiɛɛn a Nziã, bɛn byɛ b’eboo ãmpiɛɛn ã bɔ! 49 Obɔ otsɛn bɛn, Nziã m’ãyal ã ndɛ, áyɛɛn ndiri: "Mɛ̃ ekieel eyuɔɔl baan b’Isalayel aliaal-ɛ̃kiɛɛn y’antam, bɔ akieel abam bakyɛ, atuaal bakyɛ fool." 50 Obobɔ, etsob èbva nkal a baal ba nonɔ̃ ba, me ndɔɔ aliaal-ɛ̃kiɛɛn a Nziã b’ábam-ábam bɛɛn k’ábuo ɔ̃kiri, 51 fa obam b’Abɛl tiil bo Dzakali, wu ábam mpɛ̃-a-mpɛ̃ a nkiin yi awa Nziã ãkab ye Nzɔ a Nziã11.51 Obɛ 4.8; 2Ãl 24.20-21. Taa-taa bam, mɛ̃ eyɛɛn ye byɛ wɛn etsob okyɛ èbva nkal a baal ba nonɔ̃ ba!
52 Ãwua ola byɛ b’ayiool b’ãngel! Ke ngwel wɛ, byɛ ekuru nkuul yi ebiri baal ola Nziã. Byam bam hɛ̃ k’etwel nkuul oyɔ wɛ, b’adzii k’atwal yɔ, byɛ hɛ̃ ekii bɔ.»
53 Ŋ’epal Yeso onse nzɔ oyɔ, ayiool b’ãngel y’Afalisaye ayi mpuru kokɔ ye ndɛ, bu abvi ndɛ ɛ̃mfuul ofuul m’ãndɔɔ bibi: 54 Bɔ ákeywiin ndɛ abɛɛ, me ndɔɔ yi abii ndɛ m’elyal onse ãyɛɛn ã ndɛ.
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)