1 ବେଲ୍‌ଟସତ୍ସର୍‌ ରାଜାନି ରାଜ୍‌ନି ତିନ୍‌ ବାର୍ହୁତ ଆନ୍‌ ଦାନିୟେଲ୍‌ ପର୍‌ତୁମ୍‌ ଦର୍‌ସନ୍‌ନି ପାଚେ ଆରେ ରଞ୍ଜାଙ୍ଗ୍‌ ଦର୍‌ସନ୍ ପାୟାତାଂ । 2 ଆରେ, ଆନ୍‌ ଦର୍‌ସନ୍‌ ଦାଡ଼ିରେ ହୁଡ଼୍‌ତାଂ; ଆନ୍‌ ହୁଡ଼ୁ ହୁଡ଼ୁ ହୁଡ଼୍‌ତାଂ ଜେ, ଆନ୍‌ ଏଲମ୍‌ ରାଜିନିକା ସୁସନ୍‌ ରାଜାଇଞ୍ଜ ମାନାଂ; ଆରେ, ହେ ଦର୍‌ସନ୍‌ତ ଆନ୍‌ ହୁଡ଼୍‌ତାଂ ଜେ, ଆନ୍‌ ଉଲୟ ନାଗୁଡ଼୍‌ ଲାଗାୟ୍‌ ମାନାଂ । 3 ହେବେ ଆନ୍‌ କାଣ୍‌ଗା ଜେସି ହୁଡ଼୍‌ତାଂ ଜେ, ହୁଡ଼ାଟ୍‌, ନାଗୁଡ଼୍‌ ମୁମ୍‌ଦ ର ମେଣ୍ଡା ନିଲ୍‌ତାତ୍‌ନା, ତାଦି ରିଣ୍ଡି କମଙ୍ଗ୍‌ ଆରି ହେ ରିଣ୍ଡି କମଙ୍ଗ୍‌ ପାନ୍ତାକା; ମତର୍‌ ର କମ ବିନାତାଂ ଉଚା ଆରି ଇମ୍‌ଣାକା ଉଚା; ହେଦାଂ ପାଚେ ଉପ୍‌ଜା ଆତାତ୍‌ । 4 ଆନ୍‌ ହେ ମେଣ୍ଡାତିଂ ୱେଡ଼ାହାନିନିପ, ଦିଗ ଆରି ପାଲ ଦିଗ୍‌ତ ତିଗ୍‌ଜି ତଗ୍‌ନାକା ହୁଡ଼୍‌ତାଂ; ଆରେ, ଇମ୍‌ଣାକାପା ପସୁ ତା ମୁମ୍‌ଦ ନିଲ୍‍ତେଂ ଆଡ୍‌ୱିତିକ୍‌, କିବା ତା କେଇଦାଂ ଉଦାର୍‌ କିଦେଂ ଇନେର୍‌ ହିଲ୍‌ୱାତାର୍‌: ମତର୍‌ ହେୱାନ୍‌ ଜାର୍‌ମାନ୍‌ କାମାୟ୍‌ କିଜ଼ି ଜାର୍‍ତି ମାନ୍‌ ହପ୍‌ତାନ୍‌ । 5 ଆରେ, ଆନ୍‌ ଇ ବିସ୍ରେ ବାବି କିଉ କିଉ ହୁଡ଼୍‌ତାଂ ଜେ, ହୁଡ଼ାଟ୍‌, ର ଅଡା ୱେଡ଼ାହାନି ଦିଗ୍‌ତାଂ ସବୁ ପୁର୍ତି ନାସି ୱାତାତ୍‌ ଆରି ହେଦାଂ ମେଦ୍‌ନି ଡୁୱାତାତ୍‌; ଆରେ, ହେ ଅଡାନି ରି କାଣ୍‌ଗା ବିତ୍ରେ ର ଅସୁବ୍‌ କମ ମାଚାତ୍‌ । 6 ଆରେ, ଆନ୍‌ ଇମ୍‌ଣି ରି କମଙ୍ଗ୍‌ମାନି ମେଣ୍ଡାତିଂ ନାଗୁଡ଼୍‌ ହାଣ୍‌କୁ ନିଲ୍‌ତାକା ହୁଡ଼୍‌ତାଂ, ହେ ନିପ ହେଦାଂ ୱାଜ଼ି ଜାର୍‌ ସାକ୍ତିନି ହନ୍‌ପେଲ୍‌ତ ତା ଜପି ହନ୍ତାତ୍‌ । 7 ଆରେ, ଆନ୍‌ ହୁଡ଼୍‌ତାଂ ଜେ, ହେୱାନ୍‌ ହେ ମେଣ୍ଡା ଲାଗାୟ୍‌ ୱାତାନ୍‌ ଆରି ତା ଜପି ବେସି ରିସାତ କେଦ୍‌ଦି ହେ ମେଣ୍ଡାତିଂ ଇଡ଼୍‌ତାନ୍ ଆରି ତା ରି କମଙ୍ଗ୍‌ ଡ୍ରିକ୍‌ଚି ତୁହିତାନ୍‌ ଆରି ତା ମୁମ୍‌ଦ ନିଲ୍‍ତେଂ କାଜିଂ ହେ ମେଣ୍ଡାନି ଆରେ ସାକ୍ତି ମାନ୍‌ୱାତାତ୍‌; ମତର୍‌ ହେ ଅଡା ହେଦେଲିଂ ମେଦ୍ନିତ ତୁହିଜି ପାନାତ ୱିସ୍‌ତାତ୍‌, ଆରେ ତା କେଇଦାଂ ହେ ମେଣ୍ଡାତିଂ ଉଦାର୍‌ କିନି କାଜିଂ ଇନେର୍‌ ହିଲ୍‌ୱାତାର୍‌ ।

8 ଇଦାଂପାଚେ ହେ ଅଡା ଜାର୍‌ତି ବେସି ଗରବ୍‌ କିତାତ୍‌ ଆରି ହେଦାଂ ବାଡ଼୍‌କାସ୍‌ ମାଚି ୱେଡ଼ାଲିଂ ତାଦି ଗାଜା କମ ଡ୍ରିଂତାତ୍‌; ଆରେ, ହେବେନି ବାଦୁଲ୍‌ତ ଆକାସ୍‌ନି ଚାର୍‌ଦିଗ୍‌ ନିପ ଚାର୍‌ ଅସୁବ୍‌ କମ ଉପ୍‌ଜା ଆତାତ୍‌ । 9 ଆରେ, ହେ କମଂନି ରଞ୍ଜାଙ୍ଗ୍‌ ବିତ୍ରେତାଂ ରଞ୍ଜାଙ୍ଗ୍‌ ହାରୁ କମ ଉପ୍‌ଜା ଆଜ଼ି ୱେଡ଼ାହାନିନିପ ଆରି ୱେଡ଼ାହନିନିପ ରମ୍ୟ ଇସ୍ରାଏଲ୍‌ ଦେସ୍‌ ନିପ ବେସି ବାଡା ଆତାତ୍‌ । 10 ଆରେ, ହେଦାଂ ସାର୍ଗେନି ମେଲ୍ୟାର୍‌ ପାତେକ୍‌ ନେ ବାଡା ଆତାତ୍‌ ଆରି ହେ ହେନି ଆରି ହୁକାଙ୍ଗ୍‌ନି କେତେକ୍‌ତିଂ ମେଦ୍‌ନିତ ତୁହିଜି ହେୱାକାଂ ପାନା ତାରେନ୍‌ ୱିସ୍‌ତାତ୍‌ । 11 ଆଁ, ହେ ମେଲ୍ୟାର୍‌ନି ଆଦିକାରି ବିରୁଦ୍‌ତ ଜାର୍‌ନି ଗରବ୍‌ କିଜ଼ି ହେୱାନ୍ତିତାଂ ନିତ୍ରେ ହମ୍‌ନିକା ପୁଜା ଚରି କିତାତ୍‌ ଆରି ତାଦି ଦରମ୍‍ବାହା ନିପାତ୍‌ ଆତାତ୍‌ । 12 ଆରେ, ବଲ୍‌ ଉଡ଼ାତି କାଜିଂ ନିତ୍ରେ କାଟ୍‌ପୁଜା ଲାହାଂ ମେଲ୍ୟାର୍‌ ତା କେଇଦ ସାର୍ପି ଆତାତ୍‌ ଆରି ହେ କମଙ୍ଗ୍‌ ହାତ୍‌ପାତିଂ ବୁଇଁତ ତୁହିତାତ୍‌, ଆରେ ଜାର୍‌ମାନ୍‌ କାମାୟ୍‌ କିଜ଼ି ହାର୍‌ପାଡ଼୍‌ ଲାବ୍‌ କିତାନ୍ । 13 ଇଦାଂପାଚେ ଆନ୍‌ ର ପୁଇପୁୟା ମୁଣିକା କାତା ଇନାକା ୱେଚାଙ୍ଗ୍‌; ଆରେ, ଇନେନ୍‌ କାତା ଇଚାନ୍‌, ତାଂ ବିନ୍ ର ପୁଇପୁୟା ମୁଣିକା ୱେନ୍‌ବାତାନ୍, ନିତ୍ରେ ହମ୍‌ପୁଜା ଆରି ନାସ୍‌କାର୍‌ଆ ବଲ୍‌ ଉଡ଼ାନାକା ଆରି ୱିସ୍ତି ଆନି କାଜିଂ ଦରମ୍‌ବାହାନି ଆରି ହେନି ହେଲାୟ୍‌ ଆନି ବିସ୍ରେନିକା ଇମ୍‌ଣି ଦର୍‌ସନ୍‌, ହେଦାଂ ଏଚେ କାଡ଼୍‌ ପାତେକ୍‌ ଆନାତ୍ ? 14 ହେବେ ହେୱାନ୍‌ ନାଂ ଇଞ୍ଚାନ୍, ରି ହାଜାର୍‌ ତିନ୍‌ ସ ମ୍ଡିକାହାରେସ୍‌ ଆରି ନାଡ଼ିସ୍‌ ପାତେକ୍‌; ତାପାଚେ ପୁଇପୁୟା ବାହା ନିର୍ମଲ୍‌ ଆନାତ୍‌ ।

15 ଇଦାଂପାଚେ ଆନ୍‌ ଦାନିୟେଲ୍‌ ଇ କ୍ଡେଚ୍‌କଣ୍‌ ପାୟାତି ପାଚେ ହେଦାଂ ବୁଜାନି କାଜିଂ ସେସ୍ଟା କିତାଂ; ଆରେ ହୁଡ଼ାଟ୍‌, ମାନାୟ୍‌ବାର୍ତି ର ମୁଣିକା ମୁମ୍‍ଦ ନିଲ୍‌ତାନ୍ । 16 ଆରେ, ଉଲୟ ନାଗୁଡ଼୍‌ ବିତ୍ରେତାଂ ଆନ୍‌ ମାନାୟ୍‌ତି କାଟ୍‌ ୱେଚାଙ୍ଗ୍‌, ହେୱାନ୍‌ କୁକ୍‌ଚି ଇଚାନ୍‌, "ଏ ଗାବ୍ରିଏଲ୍‌, ଇ ମାନାୟ୍‌ତିଂ ଦର୍‌ସନ୍‌ନି ଅରତ୍‌ ବୁଜାୟ୍‍କିଜ଼ି ହିଆ ।" 17 ହେବେ ଆନ୍‌ ଇମ୍‌ଣି ବାହାତ ନିଲ୍‌ଚି ମାଚାଙ୍ଗ୍‌, ହେ ବାହାନି ଲାଗାୟ୍‌ ହେୱାନ୍‌ ୱାତାନ୍‌; ଆରେ, ହେୱାନ୍‌ ୱାତିଲେ, ଆନ୍‌ ପାଣ୍ଡ୍ରା ଆତାଂ ଆରି ମୁମ୍‌ ଇଡ଼୍‌ଜି ଗୁର୍‌ତାଂ; ମତର୍‌ ହେୱାନ୍‌ ନାଂ ଇଞ୍ଚାନ୍‌, ଏ ମାନାୟ୍‌ ହିମ୍‌ଣା, ବୁଜା; ଇନାକିଦେଂକି ଇ ଦର୍‌ସନ୍‌ ହାରିହାରା କାଡ଼୍‌ ବିସ୍ରେନିକା । 18 ହେୱାନ୍‌ ନାଂ କାତା ଇଞ୍ଜୁ ଇଞ୍ଜୁ ଆନ୍‌ ବୁଇଁ ନିପ ମୁମ୍‌ କିଜ଼ି ବେସି ହାତିହାରା ହୁଞ୍ଚାଙ୍ଗ୍‌; ମତର୍‌ ହେୱାନ୍‌ ଡୁଜ଼ି ନାଂ ନିଲି କିୟ୍‌କିତ୍‌ତାନ୍‌ । 19 ଆରେ, ହେୱାନ୍‌ ନାଂ ଇଞ୍ଚାନ୍‌, ହୁଡ଼ା, ରିସ୍‌ନି ପାତିପାଡ଼୍‌ନି ସମୁତ ଇନାକା ଗିଟାନାତ୍‌, ହେଦାଂ ଆପ୍‌ ନିଂ ୱେଚ୍‌ଚାନାପ୍‌; ଇନାକିଦେଂକି ଇଦାଂ ତିର୍‌କିତି ହାରିହାରା କାଡ଼୍‌ନି କାତା ।

20 ଏନ୍‌ ଇମ୍‌ଣି ମେଣ୍ଡା ହୁଡ଼୍‌ତାୟ୍‌, ତାଦି ରି କମଙ୍ଗ୍‌ ମାଦିୟ ଆରି ପାରସ୍ୟ ରାଜା । 21 ଆରେ, ହେ ତେମୁଲ୍‌ନିକା ଅଡା ଗ୍ରିସ୍‌ ଦେସ୍‌ନି ରାଜା ଆରି ତା ରି କାଣ୍‌ଗାନି ମାଦ୍‌ଣି ବାହାତ ମାନାକା ଗାଜା କମ ପର୍‌ତୁମ୍‌ ରାଜା । 22 ଆରେ, ଇମ୍‌ଣି କମ ଡ୍ରିଂଜି ତା ବାହାତ ଜେ ଚାର୍‌ କମଂ ଉପ୍‌ଜା ଆତାତ୍‌, ଇବେ ହେ ଦେସ୍‌ନିକାର୍‌ତି ବିତ୍ରେତାଂ ଚାର୍‌ ରାଜି ଉପ୍‌ଜା ଆନାକା ପୁନାଦେର୍‌, ମତର୍‌ ସାକ୍ତିତ ତା ଲାକେ ଆଉର୍‌ । 23 ଆରେ, ହେୱାର୍‌ତି ରାଜିନି ପାତିପାଡ଼୍‌ ସମୁ ଏଚେକାଡ଼୍‌ଦ ବଲ୍‌ ଉଡ଼ାନାକାରିର୍‌ ବଲ୍‌ ଉଡ଼ାନାକା ପୁରା ଆନାତ୍‌, ହେଏଚେକାଡ଼୍‌ଦ ବୟଙ୍କାର୍‌ ମୁମ୍‌ ଆରି ବିତ୍ରି କାତା-ଗିୟାନି ର ରାଜା ଉପ୍‌ଜା ଆନାନ୍ । 24 ହେୱାନ୍‌ ବାଡ଼୍‌କାସ୍‌ତ ବାଡା ଆନାନ୍‌, ମତର୍‌ ତା ନିଜ୍‌ ବଡ଼୍‌କାସ୍‌ତ ଆକାୟ୍‌; ଆରେ, ହେୱାନ୍‌ କାବା ଲାକେ ନାସ୍‌ କିନାନ୍ ଆରି ମାଜାନ୍ ଆଜ଼ି ଜାର୍‌ମାନ୍‌ କାମାୟ୍‌ କିନାନ୍; ଆରେ, ହେୱାନ୍‌ ସାକ୍ତିନିକାରିଂ ଆରି ପୁଇପୁୟା ଲକାରିଂ ନାସ୍‌ କିନାନ୍‌ । 25 ଆରେ, ଜାର୍‌ ହୁତୁର୍‌ ହୁଦାଂ ତା କେଇଦ ବାନ୍ୟା ପୁରା ଆନାତ୍‌ ଆରି ହେୱାନ୍‌ ଜାର୍‌ ୱାସ୍କିତ ନିଜ୍‌ତିଂ ଗରବ୍‌ କିନାନ୍‌ ଆରି ହେୱାରିଂ ବିପତିଆୱି କାଡ଼୍‌ଦ ଆଦେକ୍‌ତିଂ ନାସ୍‌ କିନାନ୍; ଆରେ, ହେୱାନ୍‌ ଆଦିକାରିରିଂ ଆଦିକାର୍‌ ହେୱାନ୍‌ ବିରୁଦ୍‌ତ ନିଙ୍ଗ୍‌ନାନ୍‌; ୱାରି କେଇଦାଂ ଡ୍ରିଂନାନ୍‌ । 26 ଆରେ, ମ୍ଡିକାହାରେସ୍‌ ଆରି ନାଡ଼ିସ୍‌ ବିସ୍ରେ ଇଚି ଦର୍‌ସନ୍‌ ହାତ୍‌ପା; ମତର୍‌ ଏନ୍‌ ଇ ଦର୍‌ସନ୍‌ ମୁଦ୍‌ କିଆ; ଇନାକିଦେଂକି ହେଦାଂ ୱାନି ବେସି ଦିନ୍‌ନି କାତା । 27 ଇଦାଂପାଚେ ଆନ୍ ଦାନିୟେଲ୍‌ ୱାସ୍‌ତାଂ ଆରି ବେସି ଦିନ୍‌ ପାତେକ୍‌ ବେମାର୍‌ ଆତାଂ; ତାପାଚେ ଆନ୍‌ ନିଂଜି ରାଜା ହିଜ଼ିମାନ୍‌ଚି କାମାୟ୍‌ କିତାଂ; ଆରେ, ଆନ୍‌ ହେ ଦର୍‌ସନ୍ତ କାବା ଆତାଂ, ମତର୍‌ ଇନେର୍‌ ହେୱାନ୍‌ ଦର୍‌ସନ୍‌ ବୁଜା ଆୱାତାର୍‌ ।