ଆଦି 47

ଗସନ୍‌ତ ଦେସ୍‌ତ ଜାକ୍‌ବତି କୁଟୁମ୍‌

1 ଇଦାଂପାଚେ ଜସେପ୍‌ ହାଲ୍‍ଜି ପାରଙ୍ଗ୍‌ କାବୁର୍‌ ହିଜ଼ି ଇଚାନ୍‌ "ମାଞ୍ଜ୍‌ବା ଆରି ଟଣ୍ଡାର୍‌ କିଣାନ୍‌ ଦେସ୍‌ତାଂ ତା କଡିଂମେଣ୍ଡାଙ୍ଗ୍‌ ମାନ୍ଦା ସବୁ ଆସ୍ତି ୱାତାର୍ଣ୍ଣା; ହୁଡ଼ା, ହେୱାର୍‌ ଗସନ୍‌ ରାଜିତ ମାନାର୍‌ ।" 2 ଆରେ, ଜସେପ୍‌ ତା ଟଣ୍ଡାହିର୍‌ ବିତ୍ରେତାଂ ପାଞ୍ଚ୍‌ଜାଣ୍‌ତିଂ ଅଜ଼ି ପାରତି ଲାହାଂ ମେହାୟ୍‌ କିୟ୍‌କିତାନ୍ । 3 ତାପାଚେ ପାର ଜସେପ୍‌ ଟଣ୍ଡାହିରିଙ୍ଗ୍‌ ୱେନ୍‌ବାତାନ୍‌, "ମିଦାଂ ଇମ୍‌ଣି ବେପାରିର୍‌ ?" ହେୱାର୍‌ ପାରଙ୍ଗ୍‌ ଇଚାର୍‌, "ନି ଇ ଆଡ଼ିୟାର୍‌ ଆକର୍‌ଦାଦିର୍‌ତାଂ ପସୁ ପହାକିନାକାର୍‌ ।" 4 ହେୱାର୍‌ ପାରଙ୍ଗ୍‌ ଆରେ ଇଚାର୍‌, "ଆପେଙ୍ଗ୍‌ ଇ ଦେସ୍‌ତ ବାହା କିଦେଂ ୱାତାପ୍‌ନା; ହେଦାଂକାଜିଂ ନିଦାଂ ଇ ଆଡ଼ିୟାରିଂ ପସୁମାନ୍ଦା କାଜିଂ ମୁଡ଼୍‌କେ ଚାରା ହିଲୁତ୍‌; କିଣାନ୍‌ ଦେସ୍‌ତ ବେସି ଜବର୍ କାତାର୍‌ ଆର୍ତାତ୍‌ନା; ଇଦାଂକାଜିଂ ଗୱାରି କିଦ୍‌ନାପା, ଏନ୍‌ ଇ ଆଡ଼୍‌ୟାରିଙ୍ଗ୍‌ ଗସନ୍‌ ରାଜିତ ବାହା କିଦେଂ ହିୟାଟ୍‌ ।"

5 ତାପାଚେ ପାର ଜସେପ୍‌ତିଂ ବଲ୍‌ ହିତାନ୍‌ "ନି ଲାତ୍ରାଦି ଆରି ଟଣ୍ଡାଦିର୍‌ ନି ଲାଗାୟ୍‌ ୱାତାର୍ଣ୍ଣା, 6 ମିସର୍‌ ଦେସ୍‌ ମି ମୁମ୍‌ଦ ମାନାତ୍‌; ଦେସ୍‌ନି ୱିଜ଼େନିହାର୍ଦି ବାହାତ ମିଞ୍ଜ୍‌ବା ଆରି ଟଣ୍ଡାଦିରିଂ ବାହା କିୟ୍‌କିଆ; ଗସନ୍‌ ରାଜିତ ହେୱାର୍‌ ବାହା କିଏର୍‌; ଆରେ, ହେୱାର୍‌ ବିତ୍ରେତାଂ ଇନେରିଂ ଇନେରିଂ ଆଡ୍‍ନାକାର୍‌ ଲଗୁ ଇଞ୍ଜି ପୁନାୟା, ହେୱାରିଙ୍ଗ୍‌ ମା ପସୁମାନ୍ଦାନି ମୁଣିକା ପାଦ୍‌ତ ବାଚି କିଆ ।"

7 ଇଦାଂପାଚେ ଜସେପ୍‌ ତା ଲାତ୍ରାହି ଜାକୁବତିଂ ପାରତି ଲାଗାଂ ଏକି କିତାନ୍‌; ପାଚେ ଜାକ୍‌ବ ପାରଙ୍ଗ୍‌ ଆର୍ସିବାଦ୍‌ କିତାନ୍‌ । 8 ହେଏଚେକାଡ଼୍‌ଦ ପାର ଜାକୁବତିଂ ୱେନ୍‌ବାତନ୍‌, "ନି ଆୟଁସ୍‌ନି ଦିନ୍‌ ଏଚେକ୍‌ ?"

9 ଜାକୁବ ପାରଙ୍ଗ୍‌ ଇଚାନ୍‌, "ନା ବାହା କିତି ଦିନ୍‌ ସଏ ତିରିସ୍‌ ବାର୍ହୁ; ନା ଜିନାକ ଆୟଁସ୍‌ ଅଲପ୍‌ ଆରି କସ୍ଟତାଂ ବାଚାନାଙ୍ଗା; ଆରେ, ନା ଆକର୍‌ଦାଦିର୍‌ତି ବାହାକିନି ଆୟଁସ୍‌ ଦିନ୍‌ ଲାକେ ଆକାୟ୍ ।" 10 ଇଦାଂପାଚେ ଜାକୁବ ପାରଙ୍ଗ୍‌ ଆର୍ସିବାଦ୍‌ କିଜ଼ି ତା ଲାଗାଂତାଂ ହାଚାନ୍‌ । 11 ପାଚେ ଜସେପ୍‌ ପାରତି ବଲ୍‌ଇସାବ୍ରେ ମିସର୍‌ ଦେସ୍‌ନି ୱିଜ଼଼େତିଂହାର୍ଦି ନିପ, ଇଚିସ୍, ରାମିସେସ୍‌ ରାଜିତ ଆଦିକାର୍‌ ହିଜ଼ି ତା ଲାତ୍ରାହି ଆରି ଟଣ୍ଡାହିରିଂ ବାହା କିୟ୍‌କିତାନ୍‌ । 12 ଆରେ, ଜସେପ୍‌ ତା ଲାତ୍ରାହି ଆରି ଟଣ୍ଡାହିରିଙ୍ଗ୍‌ ଆରି ୱିଜ଼ାର୍‌ କୁଟୁମ୍‌ତିଂ ଜାଣ୍‌କେନି କୁଟୁମ୍ଇସାବ୍ରେ ତିନି କାଦି ହିଜ଼ି ପହାପାଲି କିତାନ୍ ।

କାତାର୍‌

13 ହେ ସମୁତ ବେସି କାତାର୍ ଆତିଲେ ସବୁ ଦେସ୍‌ତ କାଦିପିଦିନି ଅବାବ୍‌ ଆତାତ୍‌; ତାପାଚେ ମିସର୍‌ ଦେସ୍‌ନିକାର୍‌ ଆରି କିଣାନ୍‌ ଦେସ୍‌ନିକାର୍‌ କାତାର୍‌ କାଜିଂ ବେସି ନାଦାର୍‌ ଲାକେ ଆଦେଂ ଲାଗାତାର୍‌ । 14 ଆରେ ମିସର୍‌ ଦେସ୍‌ତ ଆରି କିଣାନ୍‌ ଦେସ୍‌ତ ଏଚେକ୍‌ ରୁପା ମାଚାତ୍‌, ମାନାୟାର୍‌ ହେଦାଂ ହିଜ଼ି ତାସ୍‌ କଡ଼୍‌ତିଲେ ଜସେପ୍‌ ହେସବୁ ରୁପା ରୁଣ୍ଡାୟ୍‌ କିଜ଼ି ପାରତି ଇଞ୍ଜ ତାହିୱାତାନ୍‌ । 15 ଇଦାଂପାଚେ ମିସର୍‌ ଦେସ୍‌ତ ଆରି କିଣାନ୍‌ ଦେସ୍‌ତ ରୁପା ଡାବୁଙ୍ଗ୍‌ ଅବାବ୍‌ ଆତିଲେ, ମିସ୍ରିୟ ଲକୁ ୱିଜ଼ାର୍‌ ଜସେପ୍‌ ଲାଗାୟ୍‌ ୱାଜ଼ି ଇଚାର୍‌, "ମାଂ କାଦିସବୁ ହିଦା, ମା ରୁପା ଡାବୁଙ୍ଗ୍‌ ୱିସ୍ତିକ୍‌ନା ଇଞ୍ଜି ଇନେକିଦେଂ ଆପେଙ୍ଗ୍‌ ନି ମୁମ୍‌ଦ ହାନାପ୍‌ ?"

16 ପାଚେ ଜସେପ୍‌ ଇଚାନ୍‌, "ମି ପସୁ ମାନ୍ଦା ହିଦାଟ୍‌; ଜଦି ରୁପା ଡାବୁଙ୍ଗ୍‌ ୱିଜ଼ିମାଚିସ୍‌, ତେବେ ପସୁ ବାଦୁଲ୍‌ ଆପ୍‌ ମିଂ ତାସ୍‌ ହିଦ୍‌ନାପ୍‌ ।" 17 ପାଚେ ହେୱାର୍‌ ଜସେପ୍‌ ଲାଗାୟ୍‌ ଜାର୍‌ ଜାର୍‌ ପସୁ ତାହିୱାତାର୍‌; ପାଚେ ଜସେପ୍‌ ଗଡ଼ା ଆରି ମେଣ୍ଡା ଆରି କଡିଂମାନ୍ଦା ଆରି ଗଦ ସବୁ ବାଦୁଲ୍‌ ଅଜ଼ି ହେୱାରିଙ୍ଗ୍‌ କାଦି ହିଦେଂ ଲାଗାତାନ୍‌; ଇ ବାନି ଜସେପ୍‌ ପସୁ ବାଦୁଲ୍‌ ହେୱାରିଙ୍ଗ୍‌ ତିନାକା ହିଜ଼ି ହେ ବାର୍ହୁ ଚାଲାୟ୍‌ କିଜ଼ି ଅତାନ୍‌ । 18 ଆରେ, ହେ ବାର୍ହୁ ପୁରା ଆତିଲେ, ଜେତି ବାର୍ହୁତ ହେୱାର୍‌ ଜସେପ୍ ଲାଗେ ୱାଜ଼ି ଇଚାର୍‌, "ମାଦାଂ ୱିଜ଼ୁ ରୁପା ୱିସ୍ତାତ୍‌ନା; ହେଦାଂ ମାପ୍ରୁ ତାକେ ଡ଼ୁକୁପ୍‌; ଆରେ, ମାଦାଂ ୱିଜ଼ୁ ପସୁଦନ୍‌ ପା ହାଉକାର୍‌ ଆତାତ୍‌ନା; ନଙ୍ଗଙ୍ଗ୍‌ ମାପ୍ରୁ ମୁମ୍‌ଦ ମା ଗାଗାଡ଼୍‌ ଆରି ବୁଇଁ ପିସ୍ତି ଆରେ ଇନାକାପା ବାକି ହିଲୁତ୍‌ । 19 ଇଦାଂକାଜିଂ ଆପେଙ୍ଗ୍‌ ଆରି ମାଦାଂ ବୁଇଁ ରିଣ୍ଡି ଇନେକିଦେଂ ନି ମୁମ୍‌ଦ ହାନାପ୍‌ ? ଏନ୍‌ କାଦି ହିଜ଼ି ମାଂ ଆରି ମା ବୁଇଁ କଡ଼୍‌ଜି ଅୱା, ପାଚେ ଆପେଙ୍ଗ୍‌ ଆରି ମା ବୁଇଁ ପାରତି ଆଡ଼ିୟାର୍‌ ଆନାପ୍‌; ତା ପାଚେ ମାଙ୍ଗେଙ୍ଗ୍‌ ବିୟାନ୍‌ ହିଦା, ହେବେ ଜିନାପ୍‌; ନଲେ ଆପେଙ୍ଗ୍‌ ହାନାପ୍‌, ଆରେ, ବୁଇଁ ପା ନସ୍ଟ ଆନାତ୍‌ ।"

20 ଇଲାକେ କାତାର୍‌ ହେୱାର୍‌ କାଜିଂ ବେସି ହୁଞ୍ଜ୍ୟାୱିତିଲେ, ମିସ୍ରିୟର୍‌ ଜାଣ୍‌କେ ଜାର୍‌ ଜାର୍‌ ବୁଇଁ ପ୍ରତାର୍‌: ପାଚେ ଜସେପ୍‌ ପାର କାଜିଂ ସବୁ ବୁଇଁ କଡ଼୍‌ତାନ୍‌; ଲାଗିଂ ୱିଜ଼ୁ ବୁଇଁ ପାରତି ଆତାତ୍‌ । 21 ପାଚେ ଜସେପ୍‌ ହେୱାନ୍‌ ମିସର୍‌ନି ର ହାନ୍ଦିତାଂ ବିନ୍‌ ହାନ୍ଦି ପାତେକ୍‌ ଗାଡ଼୍ ଗାଡ଼୍‌ଦ ଲକ୍‌ତିଂ ବାହା କିୟ୍‌ କିତାନ୍‌ । 22 ହେୱାନ୍‌ କେବଲ୍‌ ମାପ୍ରୁହେବାକିନାକାର୍ତି ବୁଇଁ କଡ଼୍‌ୱାତାନ୍‌; ଇନେକିଦେଂକି ମାପ୍ରୁହେବାକିନାକାର୍‌ ପାରତାଂ ବୁତି ପାୟାତାର୍‌: ଲାଗିଂ ପାର ହିତି ବୁତି ହୁଦାଂ ହେୱାର୍ତି ଜିଦେଂ ଆତିଲେ ହେୱାର୍‌ ଜାର୍‌ ଜାର୍‌ ବୁଇଁ ପ୍ରୱାତାର୍‌ । 23 ଇଦାଂପାଚେ ଜସେପ୍‌ ଲକୁକାଂ ଇଚାନ୍‌, "ହୁଡ଼ାଟ୍‌, ଆପ୍‌ ପାରତି କାଜିଂ ମିଂ ଆରି ମି ବୁଇଁ ସବୁ କଡ଼୍‌ତାଙ୍ଗ୍‌; ନଂ ଇ ବିୟାନ୍‌ ଅଜ଼ି ବୁଇଁତ ୱିତାଟ୍‌ । 24 ହେବେଣ୍ଡାଂ ଇନାକା ଉବ୍‌ଜାନାତ୍‌, ତା ପାଞ୍ଚ୍‌ ବାଗ୍‌ତାଂ ର ବାଗ୍‌ ପାରଙ୍ଗ୍‌ ହିନାଦେର୍‌, ଆରେ, ଚାର୍‌ ବାଗ୍‌ ବୁଇଁନି ବିୟାନ୍‌ କାଜିଂ ଆରି ଜାର୍‌ ଜାର୍‌ ଲକୁ ଆରି ହିମ୍‌ଣାଙ୍ଗ୍‌ କାଜିଂ ଇଟ୍‌ନାଦେର୍‌ ।"

25 ହେବେ ହେୱାର୍‌ ଇଚାର୍‌, "ମାପ୍ରୁ ମା ପାରଣ୍‌ ରାକ୍ୟା କିତ୍‌ତାୟ୍‌: ନିଦାଂ ଉପ୍‌କାର୍‌ କିତିସ୍‌, ଆପେଙ୍ଗ୍‌ ପାରତି ଆଡ଼ିୟାର୍‌ ଆନାପ୍‌ ।" 26 ପାଞ୍ଚ୍‌ ବାଗ୍‌ତାଂ ର ବାଗ୍‌ ପାର ପାୟାନାନ୍‌, ମିସର୍‌ନି ୱିଜ଼ୁ ବୁଇଁ ବିସ୍ରେ ଜସେପ୍‌ତି କିତି ଇ ନିୟମ୍‌ ନେଞ୍ଜେଙ୍ଗ୍‌ ପାତେକ୍‌ ଚାଲାନାତା; କେବଲ୍‌ ମାପ୍ରୁହେବାକିନାକାର୍ତି ବୁଇଁ ପାରତି ଆୱାତାତ୍‌ ।

ଜାକ୍‌ବତି ହାରିହାରା ଗୱାରି

27 ହେ ୱେଡ଼ାଲିଂ ଇସ୍ରାଏଲିୟାର୍‌ ମିସର୍‌ନି ଗସନ୍‌ ରାଜିତ ବାହା କିତାନ୍‌, ଆରେ, ହେବେ ହେୱାର୍‌ ଆଦିକାର୍‌ ପାୟାଜ଼ି ପିଲ୍‌ବାଡାସି ଆରି ବେସି ବଁସ୍‌ ଆତାର୍‌ । 28 ଜାକୁବ ମିସର୍‌ ଦେସ୍‌ତ ସତ୍ର ବାର୍ହୁ କାଡ଼୍‌ ପାତେକ୍‌ ବାହା କିତାନ୍‌, ତାଦି ଆୟଁସ୍‌ ଦିନ୍‌ ସଏ ଚାଲିସ୍‌ ସାତ୍‌ ବାର୍ହୁ ମାଚାତ୍‌ । 29 ଇସ୍ରାଏଲ୍‌ତି ହାକି ଦିନ୍‌ ଲାଗାୟ୍‌ ଆତିଲେ ହେୱାନ୍‌ ତା ମେହି ଜସେପ୍‌ତିଂ କୁକିକିଜ଼ି ଇଚାନ୍‌, "ଆନ୍‌ ଜଦି ନି ମୁମ୍‌ଦ ଉପ୍‌କାର୍‌ ପାୟାତାଂ, ତେବେ ଗୱାରି କିଦ୍‌ନାଙ୍ଗା, ଏନ୍‌ ନା କୁଟାତ କେଇ ଇଟା; ଆରେ, ନା କାଜିଂ ଦୟା ଆରି ହାତ୍‌ପା ବେବାର୍‌ କିଜ଼ି ଇ ମିସର୍‌ ଦେସ୍‌ତ ନାଂ ଦୁଗେର୍‌ କିଦ୍‍ମା । 30 ମତର୍‌ ଆନ୍‌ ନା ଆକର୍‌ଦାଦିର୍‌ ଲାହାଂ ହୁଞ୍ଚିସ୍‌, ଏନ୍‌ ନାଂ ଇ ମିସର୍‌ ଦେସ୍‌ତାଂ ଅସିହାଲ୍‌ଜି ହେୱାର୍ତି କବର୍‌ ବାହାତ କବର୍‌ କିଦା ।" ହେବେ ଜସେପ୍ ଇଚାନ୍‌, "ନି ବଲ୍‌ ଇସାବ୍ରେ କିନାଙ୍ଗ୍‌ ।" 31 ପାଚେ ଜାକୁବ ଜସେପ୍‌ତିଂ ପାର୍ମାଣ୍‌ କିଦେଂ ଇଚିଲେ, "ହେୱାନ୍‌ ତା ଲାଗାୟ୍‌ ପାର୍ମାଣ୍‌ କିତାନ୍‌ ।" ହେଏଚେକାଡ଼୍‌ଦ ଇସ୍ରାଏଲ୍‌ ଟାଟିନି କାପ୍‌ଡ଼ା ନିପ ଜୱାର୍‌ କିତାନ୍‌ ।