1 ସାରାତି ସହେ କଡ଼େ ସାତ୍‌ ବାର୍ହୁ ମାଚାତ୍‌; ସାରାତି ଆୟଁସ୍‌ ଏଚେକ୍‌ ବାର୍‌ହୁ ଜିଜ଼ି ମାଚାତ୍‌ । 2 ଇଦାଂପାଚେ ସାରା କିଣାନ୍‌ ଦେସ୍‌ତ କିରିୟତ୍‌-ଅର୍ବତ, ଇଚିସ୍‌, ହିବ୍ରଣତ ହାତାତ୍‌ । ଲାଗିଂ ଅବ୍ରାହାମ୍‌ ସାରା କାଜିଂ ଦୁକ୍‌ କିଜ଼ି ଆରେ ଆଡ଼୍‌ବାତାନ୍‌ ।

3 ଇଦାଂପାଚେ ଅବ୍ରାହାମ୍‌ ଜାର୍‌ ହାତି ଡକ୍ରି ଲାଗାଂ ନିଙ୍ଗ୍‌ଜି ହାଲ୍‌ଜି ହେତର୍‌ ମେହିରିଂ ଇଚାନ୍‌, 4 "ଆନ୍‌ ମି ବିତ୍ରେ ବିଦେସିୟାତାଂ ବାହାକିତାକାଂ ଆତାଂନା; ମି ବିତ୍ରେ ନାଙ୍ଗ୍‌ କ୍ଡଇ ବାହାନି କାଜିଂ ଅଲପ୍‌ ଜମି କଡ଼୍‌ଦେଂ ହିଦାଟ୍‌ । ହେବେ ଆନ୍‌ ନା ହାତି ଡକ୍ରିଂ କବର୍‌ ହିନାଂ ।"

5 ହେବେ ହେତର୍‌ନି ମେହିର୍‌ ଅବ୍ରାହାମ୍‌ତିଂ ଉତର୍‌ ହିଜ଼ି ଇଚାର୍‌, 6 "ଏ ମାପ୍ରୁ, ମା କାତା ୱେନା; ଏନେଙ୍ଗ୍‌ ମା ବିତ୍ରେ ସାକ୍ତିନି ରାଜା ଆନାନ୍‌; ନଙ୍ଗ୍‌ ମା ହାର୍‌ଦି ଦୁଗେର୍‌ ବାହା ବିତ୍ରେ ନା ହାତି ଡକ୍ରିଙ୍ଗ୍‌ ମୁଚ୍‌ଚି ହିଦାଟ୍‌; ମା ବିତ୍ରେ ଇନେର୍‌ ଜାର୍‌ ଦୁଗେର୍‌ତ ଜାର୍‌ ହାତି ଡକ୍ରିଙ୍ଗ୍‌ ଇଡ଼୍‌ଦେଂ କାଜିଂ ମୁନା କିଉୟ୍‌ ।"

7 ହେଏଚେକାଡ଼୍‌ଦ ଅବ୍ରାହାମ୍‌ ନିଙ୍ଗ୍‌ଜି ହେ ଦେସ୍‌ନି ଲକୁରିଂ, ଇଚିସ୍‌, ହେତର୍‌ ମେହିରିଂ ଜୱାର୍‌ କିତାନ୍‌ । 8 ଆରେ, କାତାବାର୍ତା କିଜ଼ି ଇଚାନ୍‌, "ନା କାଣ୍‌କୁନି ବାର୍‌ତ ନା ହାତି ଡକ୍ରିଙ୍ଗ୍‌ ଦୁଗେର୍‌ତ ଇଡ଼୍‌ଦେଂ ଜଦି ମିଦାଂ ରାଜି ଆତିସ୍‌, ତେବେ ନା କାତା ୱେନାଟ୍‌; ଏପେଙ୍ଗ୍‌ ନା କାଜିଂ ସହର୍‌ନି ମାଜ଼ି ଇପ୍ରଣ ଲାଗାଂ ଗୱାରି କିୟାଟ୍‌ । 9 ହେୱାନ୍‌ ମି ବିତ୍ରେ ନା ଦୁଗେର୍‌ ବାହା ଆଦିକାର୍‌ କାଜିଂ ମକ୍‌ପେଲାତ ତା ଜମିନି ବାଟାତ ମାନି ପାରା ନାଙ୍ଗେଙ୍ଗ୍‌ ପ୍ରତାଟ୍‌, ହେବେ ଏଚେକ୍‌ ମଲ୍‌ ଆନାତ୍‌, ହେଦାଂ ଅୱାଟ୍‌ ।"

10 ହେଏଚେକାଡ଼୍‌ଦ ଇପ୍ରଣ ହେତର୍‌ ମେହିର୍‌ ବିତ୍ରେ କୁଚ୍‌ଚି ମାଚାର୍‌; ଲାଗିଂ, ହିତିୟ ଇପ୍ରଣ ଜାର୍‌ତି ଗାଡ଼୍‌ ଦୁୱାର୍‌ତ ହଣାକାନ୍‌ ହେତର୍‌ ମେହି ୱିଜ଼ାର୍‌ ମୁମ୍‌ଦ ଅବ୍ରାହାମ୍‌ତି ଉତର୍‌ ହିତାନ୍, 11 "ମାପ୍ରୁ, ହେ ଲାକେ ଆମେତ୍‌, ନା କାତା ୱେନା, ଆନ୍‌ ନିଙ୍ଗେଙ୍ଗ୍‌ ହେ ବାହା ଆରି ତା ତାରେନ୍‌ନି ପାରା ହିତାଙ୍ଗ୍‌; ଆନ୍‌ ଜାର୍‌ ବଁସ୍‌ନି ମେହିର୍‌ତି ମୁମ୍‌ଦ ହେଦାଂ ନିଙ୍ଗେଙ୍ଗ୍‌ ହିତାଂ, ଏନେଙ୍ଗ୍‌ ଜାର୍‌ ଡକ୍ରିନି ହାତି ମାଡ଼ାତିଂ ମୁଚିକିୟା ।"

12 ମାତର୍‌ ଅବ୍ରାହାମ୍‌ ହେ ଦେସ୍‌ନି ମାନାୟାରିଂ ଜୱାର୍‌ କିତାନ୍‌ । 13 ଆରେ, ହେ ଦେସ୍‌ନି ମାନାୟାର୍‌ତି ମୁମ୍‌ଦ ଇପ୍ରଣତିଂ ଇଚାନ୍‌, "ଏନେଙ୍ଗ୍‌ ଜଦି ନାଙ୍ଗେଙ୍ଗ୍‌ ହେଦାଂ ହିଦ୍‌ନାଦେର୍‌, ତେବେ ଗୱାରି କିଦ୍‌ନାଙ୍ଗା, ନା କାତା ୱେନାଟ୍‌; ଆନ୍‌ ଜମିନି ଟାକାଂ ହିଦ୍‌ନାଙ୍ଗା, ଏନେଙ୍ଗ୍‌ ହେଦାଂ ଇଟା; ତାପାଚେ ଆନ୍‌ ହେ ବାହାତ ନା ଡକ୍ରିନି ହାତି ମାଡ଼ାତିଂ ମୁଚିକିନାଙ୍ଗ୍‌ ।"

14 ହେବେ ଇପ୍ରଣ ଅବ୍ରାହାମ୍‌ତିଂ ଉତର୍‌ ହିଜ଼ି ଇଚାନ୍‌, 15 "ମାପ୍ରୁ, ନା କାତା ୱେନା; ବୁମି ତ ଇଚୁକ୍‌ତିଂ ମଲ୍‌ ଚାର୍‌ସ ରୁପା ଡାବୁଙ୍ଗ୍‌, ମିଦାଂ ଆରି ମା ବିତ୍ରେ ହେଦାଂ ଏଚେକ୍‌ ମତର୍‌ ? ଇଦାଂକାଜିଂ ଏନ୍‌ ଜାର୍‌ ଡକ୍ରିଙ୍ଗ୍‌ ହାତି ମାଡ଼ାତିଂ ମୁଚିକିୟା ।" 16 ଇପ୍ରଣତି ଇ କାତା ୱେନ୍‌ଞ୍ଜି ଅବ୍ରାହାମ୍‌ ହେତିୟ ମେହିର୍‌ ମୁମ୍‌ଦ ଇପ୍ରଣ ହୁଦାଂ ଲେକାତି ଲମର୍‌ ଇସାବ୍ରେ ହେକାଡ଼୍‌ନି ବେପାରିର୍‌ ବିତ୍ରେ ଚାଲାନି ଚାର୍‌ସ ରୁପା ଡାବୁଙ୍ଗ୍‌ ଗାଣା କିଜ଼ି ଇପ୍ରଣତିଂ ହିତାନ୍‌ ।

17 ଇଦାଂକାଜିଂ ମମ୍ରିନି ଆଗେନିକା ମକ୍‌ପେଲାତ ଇପ୍ରଣନି ଇମ୍‌ଣି ଜମି ମାଚାତ୍‌, ହେ ଜମି ଆରି ତା ତାରେନ୍‌ନି ପାରା ଆରି ହେବେ ଚାର୍‍ହାନ୍ଦିମାନି ମାର୍‌କୁ ସବୁ ଅବ୍ରାହାମ୍‌ତି ଆତାତ୍‌, 18 ଇ ସବୁତ ହେତର୍‌ ମେହିର୍‌ ମୁମ୍‌ଦ, ଇଚିସ୍‌, ତା ଗାଡ଼୍‌-ଦୁୱେର୍ତ ହଣାକାର୍‌ ୱିଜ଼ାର୍‌ ମୁମ୍‌ଦ ଅବ୍ରାହାମ୍‌ତି ଆଦିକାର୍‌ ତିର୍‌ କିତାର୍‌ ।

19 ଇଦାଂପାଚେ ଅବ୍ରାହାମ୍‌ ମମ୍ରିନି ଆଗେନିକା ମକ୍‌ପେଲା ଜମିନି ପାରାତ ଜାର୍‌ ଡକ୍ରୁହି ସାରାଙ୍ଗ୍‌ ମୁଚ୍‌ଚାର୍‌ । ହେ ବାହା କିଣାନ୍‌ ଦେସ୍‌ନି ହିବ୍ରଣ । 20 ଇଲାକେ ଦୁଗେର୍‌ ବାହାନି ଆଦିକାର୍‌ କାଜିଂ ହେ ଜମି ଆରି ତା ତାରେନ୍‌ନି ପାରାତ ଅବ୍ରାହାମ୍‌ତି ଆଦିକାର୍‌ ହେତର୍‌ ମେହିର୍‌ ହୁଦାଂ ତିର୍‌ ଆତାତ୍‌ ।