ଇସ୍ହାକ୍ କାଜିଂ ଡକ୍ରି
1 ହେ ୱେଡ଼ାଲିଂ ଅବ୍ରାହାମ୍ ବେସି ବୁଡ଼୍ହି ମାଚାନ୍, ଆରେ, ନିତ୍ରେମାପ୍ରୁ ଅବ୍ରାହାମ୍ତି ସବୁ ବିସ୍ରେ ଆର୍ସିବାଦ୍ କିଜ଼ିମାଚାନ୍ । 2 ଲାଗିଂ ଅବ୍ରାହାମ୍ ତା ଇଞ୍ଜିନି ସବୁ କାମାୟ୍କିନି ମୁଣିକା ବୁଡ଼୍ହି ଆଡ଼ିଏନିଂ ଇଚାନ୍, "ଆନ୍ ଗୱାରି କିଦ୍ନାଙ୍ଗା, ଏନ୍ ନା କୁଟାତ କେଇ ଇଟା; 3 ଆନ୍ ସାର୍ଗେ ମଇତ୍ନି ଉବ୍ଜାଣ୍କାରିୟା ନିତ୍ରେମାପ୍ରୁ ଇସ୍ୱର୍ତି ତରଦାଂ ମିଙ୍ଗେଙ୍ଗ୍ ପାର୍ମାଣ୍ କିଇକିଦ୍ନାଂ ଜେ, ଇମ୍ଣି କିଣାନିୟ ମାନାୟାର୍ ବିତ୍ରେ ଆନ୍ ବାହା କିନାଙ୍ଗା, ଏନ୍ ହେୱାର୍ ବିତ୍ରେତାଂ ନା ମାଜ଼ିନି ବିବା କାଜିଂ ଇମ୍ଣାକାପା ଗାଚ୍କୁକାଂ ମାନ୍କିଉନ୍; 4 ମତର୍, ଏନ୍ ମା ଦେସ୍ନି ଗସ୍ଟିନିକାର୍ ଲାଗାୟ୍ ହାଲ୍ଜି ନା ମାଜ଼ି ଇସ୍ହାକ୍ କାଜିଂ ଗାଡ଼୍ ତାହିୱାନାନ୍ ।" 5 ହେଏଚେକାଡ଼୍ଦ ହେ ଆଡ଼ିଏନ୍ ହେୱାନିଂ ଇଚାନ୍, "ଜଦି ଇମ୍ଣାକାପା ଗାଡ଼୍ଚେ ନା ଲାହାଂ ଇ ଦେସ୍ତ ୱାନି କାଜିଂ ରାଜି ଆୱିତିସ୍, ତେବେ ଇମ୍ଣି ଦେସ୍ତାଂ ଏନ୍ ୱାତାୟ୍ନା, ହେ ଦେସ୍ତ କି ନି ମାଜ଼ିଙ୍ଗ୍ ଅସିହାନାଙ୍ଗ୍ ?"
6 ହେବେ ଅବ୍ରାହାମ୍ ଇଚାନ୍, "ଜାଗ୍ରତ୍; ନା ମାଜ଼ିଙ୍ଗ୍ ଇନାୱେଡ଼ାଙ୍ଗ୍ ପା ହେବେ ଅସି ହାଲୁୟ୍ ।" 7 ଇନେକିଦେଂକି ଇମ୍ଣି ସାର୍ଗେନି ଉବ୍ଜାଣ୍କାରିୟା ନିତ୍ରେମାପ୍ରୁ ଇସ୍ୱର୍ ନାଙ୍ଗେଙ୍ଗ୍ ଆକର୍ ଇଲ୍ ଆରି ଜଲମ୍ଆତି ଦେସ୍ ବିତ୍ରେତାଂ ତାହିୱାତ୍ତାନ୍ନା ଆରି ନା ଲାହାଂ କାତାବାର୍ତା କିତ୍ତାନ୍ନା, ଆରେ, ଆପ୍ ମି ବଁସ୍ତିଂ ଇ ଦେସ୍ ହିନାପ୍ ଇଞ୍ଜି ପାର୍ମାଣ୍ କିତାନ୍ନା, ହେୱାନ୍ ମି ଆଗେ ଜାର୍ ଦୁତ୍ ପକ୍ତାନାନ୍; ହେବେଣ୍ଡାଂ ଏପ୍ ନା ମାଜ଼ିନି ବିବା କାଜିଂ ହେବେତାଂ ରଞ୍ଜାଙ୍ଗ୍ ଗାଡ଼୍ ତାହିୱାନାନ୍ । 8 ଜଦି ହେ ଦେସ୍ତାଂ ଇମ୍ଣାକାପା ଗାଡ଼୍ ୱାଦେଂ ରାଜି ଆୱିତିସ୍, ତେବେ ଏନ୍ ନା ଇ ପାର୍ମାଣ୍ତାଂ ମୁକ୍ଡ଼ା ଆନାୟ୍; ମତର୍ ଏନ୍ ନା ମାଜ଼ିଙ୍ଗ୍ ହେ ଦେସ୍ତ ଅସି ହାଲୁୟ୍ । 9 ହେବେତାଂ ହେ ଆଡ଼ିଏନ୍ ଜାର୍ ମାପ୍ରୁ ଅବ୍ରାହାମ୍ତି କୁଟାତ କେଇ ଇଡ଼୍ଜି ହେ ବିସ୍ରେ ପାର୍ମାଣ୍ କିତାନ୍ ।
10 ଇଦାଂପାଚେ ହେ ଆଡ଼ିଏନ୍ ଜାର୍ ମାପ୍ରୁତି ଉଟ୍କୁ ବିତ୍ରେତାଂ ଦସ୍ଗଟା ଉଟ୍ ଆରି ଜାର୍ ମାପ୍ରୁତି ସବୁବାନି ହାର୍ଦି ଜିନିସ୍ କେଇଦ ଆସ୍ତି ହାଜ଼ିଆସ୍ତି ଅରାମନହରୟିମ୍24:10 ମେସପଟାମିୟା ଦେସ୍ନି ନାହର୍ ଗାଡ଼୍ଦ ହାଚାର୍ । 11 ଇଦାଂପାଚେ ମ୍ଡିକାହାରେସ୍, ଇମ୍ଣି ସମୁତ ଗାଡ଼୍ଚେକ୍ ଏଜ଼ୁଙ୍ଗ୍ ଜେଲ୍ଦେଂ ୱାନିକ୍, ହେ ସମୁତ ହେ ଗାଡ଼୍ନି ବାର୍ତ କୁଇ ଲାଗାୟ୍ ଉଟ୍କୁକାଂ ରୁଣ୍ଡାୟ୍ କିଜ଼ି କୁଚିକିତାନ୍ । 12 ଆରେ, "ଇ ପାର୍ତନା କିତାନ୍, ଏ ନା ମୁଣିକା ଅବ୍ରାହାମ୍ତି ନିତ୍ରେମାପ୍ରୁ ଇସ୍ୱର୍, ଗୱାରି କିଦ୍ନାଙ୍ଗା, ନେଞ୍ଜେଙ୍ଗ୍ ନା ମୁମ୍ଦ ଜଗ୍ପାଡ଼୍ ଏକି କିଦା, ଆରେ ନା ମାପ୍ରୁ ଅବ୍ରାମ୍ତି କାଜିଂ ଦୟା କିଦା । 13 ହୁଡ଼ା, ଆନ୍ ଇ କୁଇ ଲାଗାୟ୍ ନିଲ୍ତାଂନା, ଆରେ ଇ ଗାଡ଼୍ନି ଗାଡ଼୍ଚେକ୍ ଏଜ଼ୁଙ୍ଗ୍ ଅଦେଂ କାଜିଂ ୱାନିକା; 14 ହେୱେକ୍ ବିତ୍ରେତାଂ ଇମ୍ଣି ଗାଡ଼୍ଚେଂ, ଏପ୍ ଜାର୍ ଗାଗ୍ରି ଗେକ୍ଚି ନାଙ୍ଗେଙ୍ଗ୍ ଏସ୍ ଉଟ୍ପି କିଦା, ଇ କାତା ଇଚିସ୍ ହେ ଗାଡ଼୍ଚେ ଜଦି ଇଞ୍ଜ୍ନାତ୍, ଉଣା, ଆନ୍ ନି ଉଟ୍କୁକାଂ ପା ଉଟ୍ପି କିନାଙ୍ଗ୍, ତେବେ ହେଦେଲ୍ ନି ଆଡ଼ିଏନ୍ ଇସ୍ହାକ୍ କାଜିଂ ନି କିତି ଗାଡ଼୍ଚେ ଆଏତ୍; ହେବେଣ୍ଡାଂ ଏପ୍ ନା ମାପ୍ରୁତି କାଜିଂ ଉପ୍କାର୍ କିତ୍ତାୟ୍ନା, ଇଦାଂ ଆନ୍ ପୁନାଙ୍ଗ୍ ।"
15 ଇ କାତା ଇନୁ ଇନୁ ଅବ୍ରାହାମ୍ତି ନାହର୍ ତର୍ନି ଟଣ୍ଡେନ୍ନି ଡକ୍ରି ମିଲ୍କାର୍ ମାଜ଼ି ଇନେନ୍ ବତୁୟେଲ୍, ତା ଗାଡ଼୍ହି ରିବିକା ନିପିତ ଗାଗ୍ରି ଆସ୍ତି ହସି ୱାତାତ୍ । 16 ହେ ଗାଡ଼୍ଚେ ବେସି ହଲ୍ନାକା ଆରି ୱାଟାଜିପଲି, ଆରେ ଇମ୍ଣି ଆଣ୍ଡ୍ରେନ୍ ଲାହାଂ ମେହା ଆୱାଦାଂ ମାଚାତ୍ । ହେଦେଲ୍ କୁଇ ବିତ୍ରେ ହାଲ୍ଜି ଗାଗ୍ରି ବାର୍ତି କିଜ଼ି ନିଂଜି ୱାନାତା, 17 ଏଲେଙ୍ଗ୍ ସମୁତ ହେ ଆଡ଼ିଏନ୍ ହନ୍ଚି ହାଲ୍ଜି ତା ଲାହାଂ ବେଟ୍ ଆଜ଼ି ଇଚାନ୍, "ଆନ୍ ଗୱାରି କିଦ୍ନାଙ୍ଗା, ନି ଗାଗ୍ରିତାଂ ନାଂ ଇଚୁଡ଼ିଙ୍ଗ୍ ଏସ୍ ଉଣ୍ଡେଙ୍ଗ୍ ହିଦା ।"
18 ହେବେଣ୍ଡାଂ ମାପ୍ରୁ ଇଚାତ୍, "ମାନିନି, ଉଣା" ଇଦାଂ ଇଞ୍ଜି ହେଦେଲ୍ ବେଗି ଗାଗ୍ରି କେଇଦାଂ ଜୁତ୍ତି ହେୱାନିଙ୍ଗ୍ ଉଣ୍ଡେଙ୍ଗ୍ ହିତାତ୍ । 19 ଆରେ, ତାଙ୍ଗେଙ୍ଗ୍ ଉଟ୍ପିତି ପାଚେ ଇଚାତ୍, "ଆରେ ପା ଉଟ୍ ସବୁ ଏଜ଼ୁଙ୍ଗ୍ ଉଣ୍ଡେଙ୍ଗ୍ ୱିଜ଼୍ନି ପାତେକ୍ ଆନ୍ ଏଜ଼ୁଙ୍ଗ୍ ଜେଲ୍ନାଙ୍ଗ୍ ।" 20 ହେବେଣ୍ଡାଂ ହେଦେଲ୍ ବେଗି କୁଇତ ଗାଗ୍ରିତାଂ ଏଜ଼ୁଙ୍ଗ୍ ବକ୍ଚି ଆରେ ଏଜ଼ୁଙ୍ଗ୍ ଜେଲ୍ନି କାଜିଂ କୁଇ ଲାଗାଂ ହନ୍ଚିହାଲ୍ଜି ସବୁ ଉଟ୍ କାଜିଂ ଏଜ଼ୁଙ୍ଗ୍ ଜେଲ୍ତାତ୍ । 21 ହେବେଣ୍ଡାଂ ହେ ଆଡ଼ିଏନ୍ ହେଦେଲ୍ କାଜିଂ ତିର୍ କାଣ୍କୁତ ହୁଡ଼୍ଜି ମାଚାନ୍; ଆରେ, ନିତ୍ରେମାପ୍ରୁ ତା ହାଜ଼ିହାନାକା ପୁରା କିନାନ୍ କି ଆକାୟ୍, ହେଦାଂ ପୁନି କାଜିଂ ଚିମ୍ରାସି ମାଚାନ୍ ।
22 ଆରେ, ଉଟ୍କୁ ଏଜ଼ୁଙ୍ଗ୍ ଉଟି ପାଚେ ହେ ମାନାୟ୍ ତା କାଜିଂ ଅଦବରି ଆଦାତୁଲା ହନା ନାତ ଆରି ତା କେଇ କାଜିଂ ଦସ୍ତୁଲା ରି ହନା ବାଡ଼ା ଅଜ଼ି ଇଚାନ୍, 23 ଗୱାରି କିଦ୍ନାଙ୍ଗା, "ଏନ୍ ଇନେର୍ ଗାଡ଼୍ହିତି, ନାଂ ୱେଚ୍ଚା । ମିଞ୍ଜି ଆବାର୍ ଇଞ୍ଜ ଆପେଙ୍ଗ୍ ନାଣା ହୁଞ୍ଜେଙ୍ଗ୍ କି ବାହା ମାନାତ୍ ?" 24 ହେବେ ହେଦେଲ୍ ଉତର୍ ହିତାତ୍, "ନାହର୍ନି ନେର୍ତାଂ ମିଲ୍କାତାଂ ଗାଟାତି ମାଜ଼ି ଜେ ବତୁୟେଲ୍, ଆନ୍ ତା ଗାଡ଼୍ହିତଂ ।" 25 ହେଦେଲ୍ ଆରେ ଇଚାତ୍, "ମାଦାଂ ପିରି ଆରି (ଦଣାଙ୍ଗ୍) ଜବର୍ ମାନିକ୍, ନାଣା ହୁଞ୍ଜେଙ୍ଗ୍ ପା ବାହା ମାନାତ୍ ।" 26 ହେଏଚେକାଡ଼୍ଦ ହେ ମାନାୟ୍ କାପ୍ଡ଼ା ହିଗ୍ଜି ନିତ୍ରେମାପ୍ରୁତି ଉଦେସ୍ତ ଜୱାର୍ କିଜ଼ି ଇଚାନ୍, 27 "ନା ମୁଣିକା ଅବ୍ରାହାମ୍ତି ନିତ୍ରେମାପ୍ରୁ ମାପ୍ରୁ ଦନ୍ୟ ଆୟେନ୍, ଇନେକିଦେଂକି ହେୱାନ୍ ନା ମୁଣିକା କାଜିଂ ଉପ୍କାର୍ ଆରି ହାତ୍ପା ବେବାର୍ କିନିତ ଚିମ୍ରା ଆୱାତାନ୍ନା; ଆରେ, ନିତ୍ରେମାପ୍ରୁ ନାଙ୍ଗେଙ୍ଗ୍ ନା ମୁଣିକାନି ଗିୟାନି କୁଟୁମ୍ନି ଇଞ୍ଜି ହାଜ଼ି କାଡାୟ୍ କିଜ଼ି ତାହିୱାତ୍ତାନ୍ନା ।"
28 ଆରେ ହେ ଗାଡ଼୍ଚେ ହଞ୍ଚି ହାଲ୍ଜି ତା ତେହି ଇଞ୍ଜ ମାନି ମାନାୟ୍ତିଂ ଇ କାତା ୱେଚ୍ଚାତ୍ । 29 ଆରେ ରିବିକାଂ ରୱାନ୍ ଟଣ୍ଡେନ୍ ମାଚାନ୍, ହେୱାନ୍ତି ତର୍ ଲାବନ, ହେ ଲାବନ ହେ ମାନାୟ୍ କାଜିଂ କୁଇ ଲାଗାୟ୍ ହନ୍ତାନ୍ । 30 ଆରେ, ହେ ମାନାୟ୍ ନାଂ ଇ ଇ କାତା ଇଞ୍ଚାନ୍, "ତା ତଣ୍ଦେହି ରିବିକା ୱେଇଦାଂ ଇଦାଂ ୱେନ୍ଜି ଆରେ ତଣ୍ଦେଲ୍ତି ନାତ ଆରି କେଇନି ବାଡ଼ା ହୁଡ଼୍ଜି ହେ ମାନାୟ୍ ଲାଗାୟ୍ ହାଚାନ୍," ଆରେ, ତାଙ୍ଗେଙ୍ଗ୍ କୁଇ ଲାଗାଙ୍ଗ୍ ଉଟ୍କୁ ଲାହାଂ ନିଲ୍ଚି ମାନାକା ହୁଡ଼୍ଜି ଇଚାନ୍, 31 "ଏ ନିତ୍ରେମାପ୍ରୁତି ଆର୍ସିବାଦ୍ନି ଲଗୁ, ବିତ୍ରେ ୱା, ଏନ୍ ଇନେକିଦେଂ ବାର୍ତ ନିଲ୍ତାୟ୍ନା ? ଆନ୍ ତ ଇଲ୍ ଆରି ଉଟ୍କୁ କାଜିଂ ବାହା ଜାଲ୍ଦି କିତାଂନା ।"
32 ହେବେଣ୍ଡାଂ ହେ ମାନାୟ୍ ଇଞ୍ଜ ହଣ୍ଜି ଉଟ୍କୁତି ହାଜଙ୍ଗ୍ ରିକ୍ତିଲେ, ହେୱାନ୍ ହେୱାକାଂ ପିରି ଆରି ଦଣାଙ୍ଗ୍ ହିତାନ୍, ଆରେ, ତାଦି ଆରି ତା ହାଙ୍ଗ୍ୱାର୍ତି ପାନା ନୁଜ଼୍ଦେଂ କାଜିଂ ଏଜ଼ୁଙ୍ଗ୍ ହିତାନ୍ । 33 ଇଦାଂପାଚେ ତା ମୁମ୍ଦ ତିନି ଜିନିସ୍ ଇଟ୍ୟାତାତ୍; ମତର୍ ହେୱାନ୍ ଇଚାନ୍, ନିୟମ୍ କାତା ଇଞ୍ଜ୍ୱିତିସ୍ ଆନ୍ ତିନୁଙ୍ଗ୍ । ହେବେ ଲାବନ ଇଚାନ୍, "ଇଞ୍ଜା ।"
34 ତେବେ ହେୱାନ୍ ଇଚାନ୍, "ଆନ୍ ଅବ୍ରାହାମ୍ତି ଆଡ଼ିଏନ୍ ।" 35 ନିତ୍ରେମାପ୍ରୁ ନା ମୁଣିକାଂ ବେସି ଆର୍ସିବାଦ୍ କିତାନ୍ନା, ଲାଗିଂ ହେୱାନ୍ ବେସି ଦନ୍ଆର୍ଜା ଆତାନ୍ନା; ଆରେ ନିତ୍ରେମାପ୍ରୁ ତାଂ ମାନ୍ଦା ମାନ୍ଦା କଡିଙ୍ଗ୍ ମେଣ୍ଡାଙ୍ଗ୍ ଆରି ରୁପା ହନା ଆରି ଆଡ଼ିଏନ୍ ଆଡ଼ିୟାଣିକ୍, ଆରେ ଉଟ୍ ଗଦ ହିତାନ୍ନା । 36 ଆରେ, ନା ମାପ୍ରୁ ଡକ୍ରି ସାରା ହାତାନ୍ ୱେଡ଼ାଲିଂ ତା କାଜିଂ ର ହିମ୍ଣା ଗାଟା ଆତାତ୍ନା ଆରି ହେଦେଲ୍ ତାଙ୍ଗେଙ୍ଗ୍ ତାଦି ସବୁଦନ୍ ହିତାତ୍ନା । 37 ଆରେ, ନା ମାପ୍ରୁ ନାଂ ପାର୍ମାଣ୍ କିୟ୍କିଜ଼ି ଇଞ୍ଚାନ୍, "ଆସ୍ ଇମ୍ଣାକାର୍ ବିତ୍ରେ ବାହା କିନାସା, ଏନ୍ ମା ମାଜ଼ିନି ବିବା କାଜିଂ ହେ କିଣାନିୟ ଦେସ୍ନି ମାନାୟାର୍ ବିତ୍ରେତାଂ ଇମ୍ଣି ଗାଡ଼୍ଚେଂ ମାନ୍କିଉନ୍; 38 ମତର୍ ମା ଆକର୍ତି କୁଟୁମ୍ନି ମାନାୟାର୍ ଲାଗେ ହାଲ୍ଜି ମା ମାଜ଼ି କାଜିଂ ଗାଡ଼୍ ତାହିୱାନାୟ୍ ।" 39 ହେଏଚେକାଡ଼୍ଦ ଆନ୍ ମାପ୍ରୁଙ୍ଗ୍ ଇଚାଙ୍ଗ୍, "ଇନେସ୍କି ଇମ୍ଣାକାପା ଗାଡ଼୍ ନା ଲାହାଂ ୱାୱିତିସ୍ ।" 40 ହେବେଣ୍ଡାଂ ହେୱାନ୍ ଇଚାନ୍, "ଆପ୍ ଇମ୍ଣି ନିତ୍ରେମାପ୍ରୁତି ମୁମ୍ଦ ବୁଲାଚାଲା କିନାପ୍, ହେୱାନ୍ ମି ଲାହାଂ ତା ଦୁତ୍ତିଂ ପକ୍ଚି ମି ହାଜ଼ିହାନାକା ପୁରା କିଦ୍ନାନ୍; ହେବେ ଏନ୍ ମା ଲକ୍ତାଂ, ନା ଆବା କୁଟୁମ୍ତାଂ ମା ମାଜ଼ି କାଜିଂ ଗାଡ଼୍ ତାହିୱାନାୟ୍; 41 ଆରେ ଏନ୍ ମା କୁଟୁମ୍ନି ମାନାୟାର୍ ଲାଗାୟ୍ ହାଚିସ୍ ଇ ପାର୍ମାଣ୍ତାଂ ମୁକ୍ଡ଼ା ଆନାୟ୍; ଜଦି ହେୱାର୍ ଗାଡ଼୍ ହିଦ୍ୱିତିସ୍, ଆତିସ୍ପା ପାର୍ମାଣ୍ତାଂ ମୁକ୍ଡ଼ା ଆନାୟ୍ ।" 42 ହେଦାଂକାଜିଂ ନେଞ୍ଜେଙ୍ଗ୍ ଆନ୍ ଇ କୁଇ ଲାଗାୟ୍ ଏକିସ୍ ଇ ପାର୍ତାନା କିତାଂ, ଏ ନା ମୁଣିକା ଅବ୍ରାହାମ୍ତି ନିତ୍ରେମାପ୍ରୁ ଇସ୍ୱର୍, ଏନ୍ ନା କିତି ହାଜ଼ିନିକା ପୁରା କିଦା, 43 ତେବେ ହୁଡ଼ା, ଆନ୍ ନଂ ହର୍ଦିଏସ୍ କୁଇ ଲାଗାୟ୍ ନିଲ୍ତାଂନା । ହେବେ ଏସ୍ ଜେଲ୍ଦେଂ ୱାତି ଇମ୍ଣାକାପା ଗାଡ଼ିଂ ଜଦି ଆନ୍ ଇନାଂ, ନି ଗାଗ୍ରିତାଂ ନାଙ୍ଗେଙ୍ଗ୍ ଅଲପ୍ ଏସ୍ ଉଣ୍ଡେଙ୍ଗ୍ ହିଦା; 44 ଆରେ, ହେ ଗାଡ଼୍ ଏଚେକାଡ଼୍ଦ ଇଞ୍ଜ୍ନାତ୍, ଏନ୍ ଉଣା ଆରି ନି ଉଟ୍କୁ କାଜିଂ ପା ଏଜ଼ୁଙ୍ଗ୍ ଉନ୍ଦି ହିନାଙ୍ଗ୍; ତେବେ ହେଦେଲ୍ ନା ମୁଣିକାତି ମାଜ଼ି କାଜିଂ ନିତ୍ରେମାପ୍ରୁତି ହୁଦାଂ ବାଚିକିତି ଗାଡ଼୍ ଆୟେତ୍ । 45 ଇ କାତା ଆନ୍ ମାନେ ମାନେ ଇଞ୍ଜି ମାଚାଙ୍ଗ୍, ଇ ବିତ୍ରେ ରିବିକା ନିପିତ ଗାଗ୍ରି ଆସ୍ତି ବାର୍ତ ୱାତାତ୍ । ଆରେ, ହେଦେଲ୍ କୁଇ ବିତ୍ରେ ହାଲ୍ଜି ଏଜ଼ୁଙ୍ଗ୍ ଉନ୍ତିଲେ ଆନ୍ ଇଚାଙ୍ଗ୍, "ଗୱାରି କିଦ୍ନାଙ୍ଗା, ନାଙ୍ଗେଙ୍ଗ୍ ଏସ୍ ଉଟ୍ପା ଆଦା ।" 46 ହେବେ ହେଦେଲ୍ ବେଗି ନିପିତାଂ ଗାଗ୍ରି ଗେକ୍ଚି ଇଞ୍ଚାତ୍, "ଉଣା, ଆରେ, ଆନ୍ ନି ଉଟ୍କୁକାଂ ପା ଉଟ୍ପାନାଙ୍ଗ୍; ହେବେ ଆନ୍ ଉଟାଙ୍ଗ୍, ଆରେ, ହେଦେଲ୍ ଉଟ୍କୁକାଂ ଉଟ୍ପାତାତ୍ ।" 47 ଇଦାଂପାଚେ ଆନ୍ ହେଦେଲିଂ ୱେନ୍ବାତାଂ, "ଏନ୍ ଇନେର୍ ଗାଡ଼୍ହିତି ?" ହେବେ ହେଦେଲ୍ ଇଞ୍ଚାତ୍, "ନାହର୍ନି ନେତେର୍ତ ମିଲ୍କାର୍ ମାଜ଼ି ଜେ ବତୁୟେଲ୍, ଆନ୍ ତା ଗାଡ଼୍ହି ।" ହେବେ ଆନ୍ ତା ମୁଙ୍ଗେଲ୍ତ ନାତ ଆରି କେଇଦ ବାଡ଼ା ତୁଜ଼ିକିତାଂ । 48 ଆରେ ଆନ୍ କାପ୍ଡ଼ା ଟଡ଼୍ଜି ନିତ୍ରେମାପ୍ରୁତି ଉଦେସ୍ତ ପାର୍ମାଣ୍ କିତାଂ, ଆରେ, ଜେ ନା ମୁଣିକାଂ ମାଜ଼ି କାଜିଂ ତା ଟଣ୍ଡେନ୍ ଗାଡ଼୍ ଇଡ଼୍ଦେଂ ନାଙ୍ଗେଙ୍ଗ୍ ହାତ୍ପା ହାଜ଼ି କାଡାୟ୍ କିଜ଼ି ତାହିୱାତ୍ତାନ୍, "ନା ମୁଣିକା ଅବ୍ରାହାମ୍ତି ହେ ନିତ୍ରେମାପ୍ରୁ ଇସ୍ୱର୍ତିଂ ଦନ୍ୟବାଦ୍ କିତାଂ । 49 ଇଦାଂକାଜିଂ ଏପେଙ୍ଗ୍ ଜଦି ନା ମାପ୍ରୁତି ଲାହାଂ ଦୟା ଆରି ହାତ୍ପା ବେବାର୍ କିଦେଂ ରାଜି ଆତିସ୍, ତେବେ ହେଦାଂ ଇନା; ଆରେ ଜଦି ଆୱିତିସ୍, ହେଦାଂ ପା ଇନା; ହେବେଣ୍ଡାଂ ଆନ୍ ତିନାନିପ କି ଡେବ୍ରି ନିପ ମାଜ଼୍ଦି ହାନାଙ୍ଗ୍ ।"
50 ହେଏଚେକାଡ଼୍ଦ ଲାବନ ଆରି ବତୁୟେଲ୍ ଉତର୍ କିତାର୍, "ନିତ୍ରେମାପ୍ରୁ ତାଂ ଇ ଗଟ୍ଣା ଆତାତ୍ନା, ଇବେ ଆପେଙ୍ଗ୍ ହାର୍ କି ବାନ୍ୟା ମୁଡ଼୍କେ ଇଞ୍ଜେଙ୍ଗ୍ ଆଡୁପ୍ । 51 ହୁଡ଼ା, ରିବିକା ମି ମୁମ୍ଦ ମାନାତ୍, ହେଦେଲିଂ ଅଜ଼ି ହାଲା, ନିତ୍ରେମାପ୍ରୁତି ବଚନ୍ ଇସାବ୍ରେ ହେଦେଲ୍ ମି ମୁଣିକା ମାଜ଼ିନି ଡକ୍ରି ଆୟେତ୍ ।" 52 ହେଏଚେକାଡ଼୍ଦ ଅବ୍ରାହାମ୍ତି ଆଡ଼ିଏନ୍ ହେୱାର୍ତାଂ ଇ କାତା ୱେନି ଦାପ୍ରେ ନିତ୍ରେମାପ୍ରୁତି ଉଦେସ୍ତ ନାକ୍ମୁଣ୍ଡି ଜୱାର୍ କିତାନ୍ । 53 ଇଦାଂପଚେ ହେ ଆଡ଼ିଏନ୍ ରୁପା ଆରି ହନାନି ପ୍ଡାକ୍ୟାନାକା ଆରି ହେନ୍ଦ୍ରା ହପ୍ଚି ରିବିକାତିଂ ହିତାନ୍; ଆରେ, ତା ଟଣ୍ଡେନ୍ ଆରି ତେହିଂ ପା ବେସିମଲ୍ନି ଦନ୍ ହିତାନ୍ ।
54 ହେବେଣ୍ଡାଂ ହେୱାନ୍ ଆରି ତା ହାଂଦାକାର୍ ତିନାଉଣା କିଜ଼ି ହେବେ ନାଣା ହୁଞ୍ଚାର୍; ଇଦାଂପାଚେ ହେୱାର୍ ନାଡ଼ିହିଙ୍ଗ୍ ନିଙ୍ଗ୍ତିଲେ, ହେ ଆଡ଼ିଏନ୍ ଇଚାନ୍, "ନା ମାପ୍ରୁ ଲାଗାୟ୍ ହାଞ୍ଜେଙ୍ଗ୍ ନାଂ ହେଲ ହିଦାଟ୍ ।" 55 ହେବେ ରିବିକାତି ଟଣ୍ଡେନ୍ ଆରି ତେହି ଇଚାର୍, "ଇ ଗାଡ଼୍ଚେ ମା ଲାଗାୟ୍ ଅଲପ୍ ଦିନ୍, ର ଆଟ୍ କି ଦସ୍ ଦିନ୍ ମାନେତ୍, ତା ପାଚେ ହେଦେଲ୍ ହାନାତ୍ ।"
56 ମତର୍ ହେୱାନ୍ ହେୱାରିଙ୍ଗ୍ ଇଚାନ୍, "ନାଂ ମାଲାୟ୍ କିଦ୍ମାଟ୍, ଇନେକିଦେଂକି ନିତ୍ରେମାପ୍ରୁ ନା ହାଜ଼ିହାନାକା ପୁରା କିତ୍ତାନ୍; ନଂ ଜାର୍ ହାଉକାର୍ ଲାଗାୟ୍ ହାଞ୍ଜେଙ୍ଗ୍ କାଜିଂ ନାଙ୍ଗେଙ୍ଗ୍ ହେଲ ହିଦାଟ୍ ।"
57 ହେବେ ହେୱାର୍ ଇଚାର୍, "ଆସେଙ୍ଗ୍ ଗାଡ଼୍ଚେଙ୍ଗ୍ କୁକ୍ଚି ହେଦେଲିଂ ମୁମ୍ଦ ୱେନ୍ବାନାସ୍ ।" 58 ଇଦାଂପାଚେ ହେୱାର୍ ରିବିକାତିଂ କୁକ୍ଚି ଇଚାର୍, "ଏନ୍ କି ଇ ମାନାୟ୍ ଲାହାଂ ହାନାୟ୍ ?" ହେବେ ହେଦେଲ୍ ଇଚାତ୍, "ଆଁ ଆନ୍ ହାନାଙ୍ଗ୍ ।"
59 ହେଏଚେକାଡ଼୍ଦ ହେୱାର୍ ତା ତଣ୍ଦେହି ରିବିକା ଆରି ତା ହାଂଦାକାଦିଂ, ଆରେ, ଅବ୍ରାହାମ୍ତି ଆଡ଼୍ୟାର୍ ଆରି ତା ମାନାୟାରିଂ ହେଲ ହିତାର୍ । 60 ଆରେ, ରିବିକାତିଂ ଆର୍ସିବାଦ୍ କିଜ଼ି ଇଚାର୍, "ଏନ୍ ମା ତଣ୍ଦେଲ୍ତି, ହାଜାର୍ ହାଜାର୍ ମାନାୟାରିଂ ତାଡ଼ିୟା; ନି ବଁସ୍ ଜାର୍ ସତ୍ରୁର୍ତି ଗାଡ଼୍ ଆଦିକାର୍ କିଏର୍ ।" 61 ଇଦାଂପାଚେ ରିବିକା ଆରି ତା ଆଡ଼ିୟାଣିକ୍ ନିଙ୍ଗ୍ଜି ଉଟ୍ ଜପି ଦୁମ୍ଜି ହେ ମାନାୟାର୍ ପାଚେ ପାଚେ ହାଚିକ୍ । ଇଲାକେ ହେ ଆଡ଼ିଏନ୍ ରିବିକାଂ ଅଜ଼ି ହାଚାନ୍ । 62 ହେ ସମୁତ ଇସ୍ହାକ୍ ୱେଡ଼ାହାନି ଦିଗ୍ ଦେସ୍ତ ବାହା କିଜ଼ି ମାଚିଲେ ବେର୍-ଲହୟ-ରୟି ତର୍ନି ବାହାତ ହାଲ୍ଜି ମାସ୍ଦି ୱାଜ଼ି ମାଚାନ୍ । 63 ଆରେ, ମ୍ଡିକାହାରେସ୍ ଇସ୍ହାକ୍ ବୁଲାନି କାଜିଂ ଜମିତ ହାଲ୍ଜି ମାଚାନ୍; ଇ ବିତ୍ରେ କକ୍ଚି ଉଟ୍କୁକାଂ ୱାନାକା ହୁଡ଼୍ତାନ୍ । 64 ହେଏଚେକାଡ଼୍ଦ ରିବିକା କକ୍ଚି ହୁଡ଼୍ତାତ୍ ଇସ୍ହାକ୍ତିଂ ହୁଡ଼୍ଜି ଉଟ୍ ଜପିତାଂ ଜୁତାତ୍ । 65 ଆରେ, ଆବ୍ରାହାମ୍ ହେ ଆଡ଼ିଏନିତିଂ ୱେନ୍ବାତାତ୍, "ମା ଲାହାଂ ବେଟ୍ ଆଦେଂ ଜେ ଜମିତାଂ ୱାନାନା, ହେ ଆଣ୍ଡ୍ରେନ୍ ଇନେର୍ ?" ହେବେ ଆଡ଼ିଏନ୍ ଉତର୍ କିତାନ୍, ହେୱାନ୍ ନା ମାପ୍ରୁ; ଲାଗି ରିବିକା ଗୁଗୁର୍ମୁଗ୍ନାକା ଆସ୍ତି ନିଜେ ପ୍ଡାକ୍ୟା ଆତାତ୍ ।
66 ଇଦାଂପାଚେ ହେ ଆଡ଼ିଏନ୍ ଇସ୍ହାକ୍ତିଂ ଜାର୍ କିତି କାମାୟ୍ନି ୱିଜ଼ୁ କାତା ୱେଚ୍ଚାନ୍ । 67 "ହେଏଚେକାଡ଼୍ଦ ଇସ୍ହାକ୍ ରିବିକାଂ ହୁଡ଼୍ଜି ଜାର୍ ତେହି ସାରା ତୁମ୍ଦ ଅସି ହାଲ୍ଜି ହେଦେଲିଂ ବିବା କିତାନ୍; ଆରେ, ହେୱାନ୍ ହେଦେଲିଂ ଜିଉନତାନ୍ ।" ହେବେ ଇସ୍ହାକ୍ ତେହିନି ହାକି ଜିଉତାଂ ସାନ୍ତି ଗାଟାତାନ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)