ଟଣ୍ଡାରିଙ୍ଗ୍ ଜସେପତି ଜାଣାଚିଣା ହିନାକା
1 ଇବେଣ୍ଡାଙ୍ଗ୍ ଜସେପ୍ ତା ଲାଗାୟ୍ ନିଲ୍ତି ମାନାୟ୍ ମୁମ୍ଦ ଜାର୍ତି ସାମାଲି କିଦେଂ ଆଡ୍ୱାଦାଂ ଗାଜାକାଟାତାଂ ଇଚାନ୍, "ନା ମୁମ୍ଦାଂ ସବୁ ମାନାୟ୍ତିଂ ହପାଟ୍ ।" ପାଚେ ଇନେର୍ ପା ତା ଲାଗାୟ୍ ହିଲ୍ୱିତିଲେ, ଜସେପ୍ ଟଣ୍ଡାହିର୍ତି ମୁମ୍ଦ ତା ଜାଣାଚିନା ହିଦେଂ ଲାଗାତାନ୍ । 2 ହେୱାନ୍ ଗାଜାକାଟ୍ତାଂ ଏଲେଙ୍ଗ୍ ଆଡ଼୍ବାତାନ୍ ଜେ, ମିସ୍ରିୟର୍ ଆରି ପାରତି ଇଞ୍ଜିନି ମାନାୟାର୍ ହେଦାଂ ୱେଞ୍ଜେଙ୍ଗ୍ ଆଡ଼୍ତାର୍ । 3 ଜସେପ୍ ତା ଟଣ୍ଡାରିଙ୍ଗ୍ ଇଚାନ୍, "ଆନ୍ ଜସେପ୍; ମାଞ୍ଜ୍ବା ଇନାକା ନେଞ୍ଜେଙ୍ଗ୍ ପାତେକ୍ ଜିତାନ୍ନା ?" ଇବେଣ୍ଡାଙ୍ଗ୍ ତା ଟଣ୍ଡାହିର୍ ତା ମୁମ୍ଦ ପାଣ୍ଡ୍ରାତିଲେ ମୁଡ଼୍କେ ଉତର୍ ହିଦେଂ ଆଡ୍ୱାତାର୍ । 4 ଇଦାଂପାଚେ ଜସେପ୍ ତା ଟଣ୍ଡାହିରିଂ ଇଚାନ୍, "ଗୱାରି କିଦ୍ନାଙ୍ଗା," ନା ଲାଗାୟ୍ ୱାଡ; ହେବେଣ୍ଡାଂ ହେୱାର୍ ଲାଗାଂ ହାଚିଲେ, ହେୱାନ୍ ଇଚାନ୍, "ଆନ୍ ମି ଟଣ୍ଡେନ୍ ଜସେପ୍, ଇନେରିଙ୍ଗ୍ ଏପେଙ୍ଗ୍ ମିସର୍ତମାନି ମାନାୟାର୍ତିଂ ପ୍ରସିମାଚାଦେର୍ । 5 ମତର୍, ଏପେଙ୍ଗ୍ ନାଂ ଇବେ ୱାନି କାଜିଂ ପ୍ରତ୍ତାଦେର୍ ଇଞ୍ଜି ନଂ ଦୁକ୍ ଆରି ଜାର୍ ଜାର୍ କାଜିଂ କାକ୍ରି ଆମାଟ୍; ଇନେକିଦେଂକି ଇସ୍ୱର୍ ପାରାଣ୍ ଜିପ୍ତିନି କାଜିଂ ମି ଆଗେ ନାଂ ପକ୍ତାତାନ୍ । 6 ହୁଡ଼ାଟ୍, କେବଲ୍ ରି ବାର୍ହୁ ଆତାତ୍ ଦେସ୍ତ କାତାର୍ ଆତାତ୍ନା; ଆରେ ପାଞ୍ଚ୍ ବାର୍ହୁ ବାକି ମାନାତ୍, ଇ ବିତ୍ରେ ତାସ୍ କି ପାଚି ତ୍ରେସ୍ୟା ଆଉତ୍ । 7 ଇଦାଂକାଜିଂ ଇସ୍ୱର୍ ପୁର୍ତିତ ମିଙ୍ଗେଙ୍ଗ୍ ବାକିନିକାରିଂ ଲାକେ ରାକ୍ୟା କିଦେଂ ଆରି ବେସି ଉଦାର୍ କାଜିଂ ମିଂ ପାରାଣ୍ ବାଚାୟ୍ କିଦ୍ଦେଂ ମି ଆଗେ ନାଂ ପକ୍ତାତାନ୍ନା । 8 ଇଦାଂକାଜିଂ ଏପେଙ୍ଗ୍ ଜେ ନାଂ ଇ ବାହାତ ପକ୍ତାତାଦେର୍ଣ୍ଣା, ହେଦାଂ ଆକାୟ୍, ଇସ୍ୱର୍ ପକ୍ତାତାନ୍ନା; ଆରେ, ହେୱାନ୍ ନାଂ ପାର ଲାତ୍ରାହି ଆରି ତା ଇଲ୍ନି ମାପ୍ରୁ ଆରି ୱିଜ଼ୁ ମିସର୍ ଦେସ୍ନି ମୁଣିକା କିତ୍ତାନ୍ନା ।
9 ଲାଗିଂ ଏପେଙ୍ଗ୍ ବେଗି ମାଞ୍ଜ୍ବା ଲାଗାୟ୍ ହାଲ୍ଜି ମାପ୍ରୁ ଇନାଟ୍, ନି ମାଜ଼ି ଜସେପ୍ ଏଲେଙ୍ଗ୍ ଇଞ୍ଚାନ୍ନା, ଇସ୍ୱର୍ ନାଂ ୱିଜ଼ୁ ମିସର୍ ଦେସ୍ନି ସାସନ୍କାର୍ୟା କିତ୍ତାନ୍ନା; ଏପ୍ ନା ଲାଗାୟ୍ ୱାଡ, ମାଲାମାଟ୍ । 10 ଏପ୍ ମାଜ଼ି, ନାତିର୍ ଆରି କଡିଂ ମେଣ୍ଡାଙ୍ଗ୍ ସବୁ ଲାହାଂ ଗସନ୍ ରାଜିତ ବାହା କିଜ଼ି ନା ଲାଗାଂ ଆନାଦେର୍ । 11 ହେ ବାହାତ, ଆନ୍ ମିଂ ଜାତୁନ୍ ଅଦେଂ ଆଡ୍ନାଙ୍ଗ୍; ଇନେକିଦେଂକି ପାଞ୍ଚ୍ ବାର୍ହୁ କାତାର୍ ମାନ୍ଗାନାତ୍; ନଲେ ମିଦାଂ ଆରି ମି କୁଟୁମ୍ ୱିଜ଼ୁ ଅର୍କିତ୍ ଦସା ଗିଟାନାତ୍ ।
12 ହୁଡ଼ାଟ୍, ନା ମୁମ୍ ମିଂ ଇ କାତା ଇଞ୍ଜ୍ନାଙ୍ଗା, ଇଦାଂ ମି କାଣ୍କୁ ଆରି ନା ଟଣ୍ଡେନ୍ ବିନ୍ୟାମିନ୍ତି କାଣ୍କୁ ହୁଡ଼୍ନିକା । 13 ଲାଗିଂ ଏପେଙ୍ଗ୍ ଇ ମିସର୍ ଦେସ୍ତ ନା କାବାନିକା ଇନା ଇନାକା ହୁଡ଼୍ନାଦେରା, ହେ ୱିଜ଼ୁ ମାଞ୍ଜ୍ବାଂ ୱେଚ୍ଚି ବେଗି ଇବେ ତାହିୱାନାଦେର୍ ।"
14 ଇଦାଂପାଚେ ହେୱାନ୍ ତା ଟଣ୍ଡାହିତି ହାକ୍ ଆସ୍ତି ଆଡ଼୍ବାତାନ୍, ଆରେ, ବିନ୍ୟାମିନ୍ ତା ହାକ୍ ଆସ୍ତି ଆଡ଼୍ବାତାନ୍ । 15 ଆରେ, ଜସେପ୍ ବିନ୍ ଟଣ୍ଡାରିଙ୍ଗ୍ ପା ଡଞ୍ଚାନ୍ ଆରି ହେୱାରିଙ୍ଗ୍ ଆସ୍ତି ଆଡ଼୍ବାତାନ୍ । ଇଦାଂପାଚେ ତା ଟଣ୍ଡାର୍ ତା ଲାହାଂ ବେଣ୍ କିଦେଂ ଲାଗାତାର୍ ।
16 ଆରେ ଜସେପ୍ ଟଣ୍ଡାହିର୍ ୱାତାର୍ଣ୍ଣା ଇଞ୍ଜି, ମାନାୟାର୍ ପାରତି ଇଞ୍ଜ ୱେଚିଲେ, ପାର ଆରି ତା ଆଡ଼୍ୟାର୍ ୱିଜ଼ାର୍ ସାରି ଆତାର୍ । 17 ଆରେ, ପାର ଜସେପତିଂ ଇଚାନ୍, "ଏନ୍ ନି ଟଣ୍ଡାରିଂ ୱେଚା, ଏପେଙ୍ଗ୍ ଇ କାମାୟ୍ କିୟାଟ୍; ଜାର୍ ଜାର୍ ପସୁଙ୍ଗ୍ ଜପି ତାସ୍ ଲାଦିକିଜ଼ି କିଣାନ୍ ଦେସ୍ତ ହାଲାଟ୍, 18 ଆରେ, ଆବାଙ୍ଗ୍ ଆରି ଜାର୍ ଜାର୍ ସବୁ କୁଟୁମ୍ତିଂ ଅଜ଼ି ମା ଲାଗାୟ୍ ୱାଡ; ଆପ୍ ମିଂ ମିସର୍ ଦେସ୍ନି ହାର୍ଦି ଜିନିସ୍ ହିନାପ୍, ଆରେ, ଏପେଙ୍ଗ୍ ଦେସ୍ନି ୱିଜ଼େତିଂ ହାର୍ଦି ବିସ୍ରେ ବଗ୍ କିନାଦେର୍ । 19 ନଙ୍ଗୟ୍ ମା ବଲ୍ ଇସାବ୍ରେ ଇ କାମାୟ୍ କିୟାଟ୍, ଏପେଙ୍ଗ୍ ଜାର୍ ଜାର୍ ହିମ୍ଣାକାଂ ଆରି ଡକ୍ରିକାଂ କାଜିଂ ମିସର୍ ଦେସ୍ତାଂ ଗାଡ଼ି ଅୱାଟ୍, ଆରେ, ମି ଆବାଙ୍ଗ୍ ତାହିୱାଡ । 20 ଆରେ ଜାର୍ କାଜିଂ ଜିନିସ୍ ବିସ୍ରେ ବାବି କିମାଟ୍; ୱିଜ଼ୁ ମିସର୍ ଦେସ୍ନି ନେକ୍ରି ଜିନିସ୍ ମିଦାଂ ଆନାତ୍ ।" 21 ପାଚେ ଇସ୍ରାଏଲ୍ତି ମାଜ଼ିର୍ ହେଲାକେ କିତାର୍; ଆରେ, ଜସେପ୍ ପାରତି ବଲ୍ଇସାବ୍ରେ ହେୱାରିଂ ଗାଗାଡ଼୍ ଆରି ହାଜ଼ିତ ତିନି କାଦି ହିତାନ୍ । 22 ଆରେ, ଜାଣ୍କେ ଜାଣ୍ତିଂ ର ର ହଲ୍ ହେନ୍ଦ୍ରା ହିତାନ୍, ମତର୍ ବିନ୍ୟାମିନ୍ତିଂ ତିନ୍ସ ସେକଲ୍ ରୁପାଟାକାଂ ଆରି ପାଞ୍ଚ୍ ହଲ୍ ହେନ୍ଦ୍ରା ହିତାନ୍ । 23 ଆରେ, ଲାତ୍ରାହି କାଜିଂ ମିସର୍ ଦେସ୍ନି ହାର୍ଦି ହାର୍ଦି ଜିନିସ୍ତ ଲାଦିକିନି ଦାସ୍ ଗଦଂ ଆରି ଲାତ୍ରାହି କାଦି କାଜିଂ ତାସ୍ ଆରି ରୁଟି ସବୁ ତିନି ଜିନିସ୍ ଲାଦିକିନି ଦାସ୍ ଗଦଂ ପକ୍ତାନ୍ । 24 ଇଲାକେ ଜସେପ୍ ତା ଟଣ୍ଡାହିରିଂ ପକ୍ତିଲେ, ହେୱାର୍ ହାଚାର୍; ଆରେ, ହେୱାନ୍ ହେୱାରିଙ୍ଗ୍ ଇଚାନ୍, "ଜାଗ୍ରତ୍, ହାଜ଼ିତ ଗଣ୍ଡ୍ଗଲ୍ କିଉଦେର୍ ।"
25 ଇଦାଂପାଚେ ହେୱାର୍ ମିସର୍ ଦେସ୍ତାଂ ହାଲ୍ଜି କିଣାନ୍ ଦେସ୍ତ ତା ଲାତ୍ରାହି ଜାକୁବ ଲାଗାଂ ଏକାତାର୍ । 26 ଆରେ, ହେୱାର୍ ତାଂ ଇଚାର୍, "ଜସେପ୍ ନେଞ୍ଜେଙ୍ଗ୍ ପାତେକ୍ ଜିତାନ୍ନା, ଆରେ ହେ ସବୁ ମିସର୍ ଦେସ୍ନି ମୁଣିକା ଆତାନ୍ନା ।" ଇବେଣ୍ଡାଙ୍ଗ୍ ଜାକୁବତି ଜିବୁନ୍ ତ୍ରିଗ୍ତାତ୍, ମତର୍ ହେୱାନ୍ ହେୱାରିଙ୍ଗ୍ ପାର୍ତି କିୱାତାନ୍ । 27 ଆରେ, ଜସେପ୍ ଏଚେକ୍ କାତା ହେୱାରିଙ୍ଗ୍ ଇଞ୍ଜିମାଚାନ୍, ହେ ସବୁ କାତା ହେୱାର୍ ତାଂ ଇଚାର୍ । ମତର୍ ହେୱାନ୍ ଏଚେକାଡ଼୍ଦ ତାଙ୍ଗ୍ ଅନି କାଜିଂ ଜାକୁବତିଂ ପକ୍ତି ଗାଡ଼ି ସବୁ ହୁଡ଼୍ତାନ୍, ହେଏଚେକାଡ଼୍ଦ ହେୱାର୍ତି ଲାତ୍ରାହି ଜାକ୍ବତି ଜିବୁନ୍ ଆରେଜିନାକା ଆତାତ୍ । 28 ତାପାଚେ ଇସ୍ରାଏଲ୍ ଇଚାନ୍, "ସାରି; ନା ମାଜ଼ି ଜସେପ୍ ନେଞ୍ଜେଙ୍ଗ୍ ପାତେକ୍ ଜିତାନ୍ନା; ଆନ୍ ହାନାଙ୍ଗ୍, ହାନି ଆଗେ ହୁଡ଼୍ନାଙ୍ଗ୍ ।"
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)