1 ହେଏଚେକାଡ଼୍‌ଦ ଜସେପ୍‌ ତା ଲାତ୍ରାହିତି ମୁମ୍‌ଦ ମୁମ୍‌ କିଜ଼ି ଆଡ଼୍‌ବିସ୍‌ ଡନ୍‌ଞ୍ଚାନ୍‌ । 2 ଆରେ, ଜସେପ୍‌ ତା ଲାତ୍ରାହିତି ମାଡ଼ାତିଂ ବାସ୍‌ନା ଜିନିସ୍‌ କିନି କାଜିଂ ତା ଆଡ଼ିଏନ୍‌ ଡାଗ୍‌ଦରାରିଂ ବଲ୍‌ ହିତାନ୍‌; ତାପାଚେ ଡାଗ୍‌ଦରାରିଂ ଇସ୍ରାଏଲ୍‌ତି ମାଡ଼ାତିଂ ବାସ୍‌ନା ଜିନିସ୍‌ ମେହାୟ୍ କିତାର୍‌ । 3 ତା କାଜିଂ ଚାଲିସ୍‌ ଦିନ୍‌ ଲାଗାତାତ୍‍; ଇନେକିଦେଂକି ବାସ୍‌ନା ଜିନିସ୍‌ ମେହାୟ୍‌ କିଦେଂ ଚାଲିସ୍‌ ଦିନ୍‌ ଲାଗାନାତ୍‌; ଆରେ, ମିସ୍ରିୟ ଲକୁ ତା କାଜିଂ ସତୁରି ଦିନ୍‌ ପାତେକ୍‌ ଦୁକ୍ କିତାର୍‌ ।

4 ହେ ଦୁକ୍‌ ଦିନ୍‌ ହାଚିଲେ, ଜସେପ୍‌ ପାରତି ଲକ୍‌ବାକ୍‌ତିଂ ଇଚାନ୍‌, "ଜଦି ଆନ୍‌ ମି କାଣ୍‌କୁତ ଉପ୍‌କାର୍‌ ପାୟାଜ଼ି ମାଚିସ୍‌, ତେବେ ଗୱାରି କିଦ୍‌ନାଙ୍ଗା, ପାରଙ୍ଗ୍‌ କାବୁର୍‌ ଇ କାତା ଇନାଟ୍‌," 5 ମାଞ୍ଜ୍‌ବା ନାଂ ପାର୍ମାଣ୍‌ କିୟ୍‌କିଜ଼ି ମାଞ୍ଚାନ୍‌, ହୁଡ଼ାଟ୍‌, ଆନ୍‌ ହାତିସ୍‌, କିଣାନ୍‌ ଦେସ୍‌ତ ଜାର୍‌ କାଜିଂ ଇମ୍‌ଣି ଦୁଗେର୍‌ କାର୍ତାପ୍‌ନା, ହେବେ ମାଂ ମୁଚ୍‌ଚାନାୟ୍‌ । ଲାଗିଂ ନଂ ନାଂ ହାଞ୍ଜେଙ୍ଗ୍‌ ହିଦାଟ୍‌, ଆନ୍‌ ଆବାଂ ମୁଚ୍‌ଚି ଆରେରଗ ୱାନାଙ୍ଗ୍‌ । 6 ତାପାଚେ ପାର ଇଚାନ୍‌, "ହାଲା, ନି ଆବା ନିଂ ଇମ୍‌ଣି ପାର୍ମାଣ୍‌ କିୟ୍‌ କିତ୍‌ତାନ୍ନା, ଏନ୍‌ ତା ଇସାବ୍ରେ ତାଂ ମୁଚା ।"

7 ତାପାଚେ ଜସେପ୍‌ ତା ଲାତ୍ରାହିଂ ମୁଚ୍‌ଚେଙ୍ଗ୍‌ ହାଚାନ୍‌; ହେବେ ପାରତି ଆଡ଼୍‌ୟାର୍‌ ଆରି ତା ଇଞ୍ଜିନି ମୁଡ଼୍‌ ମାନାୟାର୍‌ ଆରି ମିସର୍‌ ଦେସ୍‌ନି ମୁଡ଼୍‌ ଲକୁ, 8 ଆରେ, ଜସେପ୍‌ତି ସବୁ କୁଟୁମ୍‌ ଆରି ତା ଟଣ୍ଡାର୍‌ ଆରି ତା ଆବାକୁଟୁମ୍‌ ତା ଲାହାଂ ହାଚାର୍‌: ଗସନ୍‌ ରାଜିତ ହେୱାର୍‌ କେବଲ୍‌ ମି ହିମ୍‌ଣାଙ୍ଗ୍‌ ଆରି ମେଣ୍ଡାମାନ୍ଦା ଆରି କଡିଂ ମାନ୍ଦା ପିସ୍ତି ହାଚାର୍‌ । 9 ତା ଲାହାଂ ଗଡ଼ାଗାଡ଼ି ଆରି ଗଡ଼ାଦୁମ୍‌ନାକାର୍‌ ହାଚାର୍‌; ହେବେ ବେସି ଗଅଁଲି ଆତାତ୍ ।

10 ଇଦାଂପାଚେ ହେୱାର୍‌ ଜର୍ଦନ୍‌ ଆନ୍‌ଟିପାଡ଼୍‍କା ଆଟଦର କଟେର୍‌ତ ଏକାତାର୍‌, ହେବେ ବେସି ଦୁକ୍ କିଜ଼ି ଆଡ଼୍‌ବାତାର୍‌; ଜସେପ୍‌ ହେବେ ତା ଲାତ୍ରାହିତି କାଜିଂ ସାତ୍‌ ଦିନ୍‌ ପାତେକ୍‌ ଦୁକ୍‌ କିତାନ୍‌ । 11 ଆରେ, ହେ ଦେସ୍‌ନିକାର୍‌ କିଣାନିୟ ଲକୁ ଆଟଦର କଟେର୍‌ତ ହେୱାର୍ତି ଇମୁମ୍‌ ଦୁକ୍‌କିନାକା ହୁଡ଼୍‌ଜି ଇଚାର୍‌, "ମିସ୍ରିୟାର୍‌ତି ଇ ବେସି କସ୍ଟନି ଦୁକ୍‌," ହେଦାଂକାଜିଂ ଜର୍ଦନ୍‌ ଆନ୍‌ଟିପାଡ଼୍‌କାନି ହେ ବାହା ଆବେଲ ମିସର୍‌* ତର୍‌ଦ ଡାକ୍‌ପୁଟା ଆତାତ୍‌ ।

12 ଇଦାଂପାଚେ ଜାକ୍‌ବ ତା ମେହିରିଂ ଇନେସ୍‌ ବଲ୍‌ ହିଜ଼ି ମାଚାନ୍‌, ହେୱାର୍‌ ତା କାଜିଂ ତା ଇସାବ୍ରେ କିତାର୍‌; 13 ଇଚିସ୍‌, ତା ମେହିର୍‌ ତାଂ କିଣାନ୍‌ ଦେସ୍‌ତ ଅଜ଼ି ମକ୍‌ପେଲା ଜମିତ ମାଦ୍‌ଣି ପାରାତ ମୁଚ୍‌ଚାର୍‌ ହିତାର୍‌; ହେ ପାରା ମମ୍ରିନି ମୁମ୍‍ଦିନି ଜମି ଲାହାଂ ଦୁଗେର୍‌ ବାହା ଆଦିକାର୍‌ କାଜିଂ ହିତିୟ ଇପ୍ରଣତାଂ ଅବ୍ରାହାମ୍‌ତି ହୁଦାଂ କଡ଼୍‌ୟାଜ଼ି ମାଚାତ୍‌ । 14 ଜସେପ୍‌ ତା ଲାତ୍ରାହିଂ ମୁଚ୍‌ଚି ପାଚେ ହେୱାନ୍‌ ଆରି ଟଣ୍ଡାହିର୍‌ ୱିଜ଼ାର୍‌ ଏଚେକ୍‌ ଲଗୁ ତା ଲାତ୍ରାହିତି ଦୁଗେର୍‌ ହିଦେଂ ତା ଲାହାଂ ହାଲ୍‍ଜି ମାଚାର୍‌, ୱିଜ଼ାର୍‌ ମିସର୍‌ତ ମାସ୍‌ଦି ହାଚାର୍‌ ।

15 ଆରେ ତା ଲାତ୍ରାହି ହାତାନ୍‌ନା, ଇଦାଂ ହୁଡ଼୍‌ଜି ଜସେପ୍‌ତି ଟଣ୍ଡାର୍‌ ଇଚାର୍‌, "ଇନେସ୍‌କି ଜସେପ୍‌ ମାଂ ଗିଣ୍‌ କିଦ୍‌ନାନ୍‌, ଆରେ, ଆସେଙ୍ଗ୍‌ ତାଦାଂ ଜେ ୱିଜ଼ୁ ବାନ୍ୟା କିତାପ୍‌ନା ହେବେନି ପୁରା ପାତିପାଡ଼୍‌ ମାଂ ହିଦ୍‌ନାନ୍‌ ।" 16 ଇଦାଂକାଜିଂ ହେୱାର୍‌ ଜସେପ୍‌ତି ଲାଗାୟ୍‌ ଇ କାତା ଇଞ୍ଜି ପକ୍ତାର୍‌, "ମିଞ୍ଜ୍‌ବା ହାନି ଆଗେ ମାଂ ଇଦାଂ ଇଞ୍ଜିମାନ୍‌ଞ୍ଚାନ୍‌, ଏପେଙ୍ଗ୍‌ ଜସେପ୍‌ତିଂ ଇ କାତା ଇନାଦେର୍‌, 17 ନି ଟଣ୍ଡାର୍‌ ନିଦାଂ ବାନ୍ୟା କିତାର୍ଣ୍ଣା; ମତର୍‌ ଏନ୍‌ ଉପ୍‌କାର୍‌ କିଜ଼ି ହେୱାର୍ତି ହେ ଅଦରମ୍‌ ଆରି ପାପ୍‌ କେମା କିନାୟ୍‌; ଇଦାଂକାଜିଂ ଆପେଙ୍ଗ୍‌ ଗୱାରି କିଦ୍‌ନାପା, ମି ଆକର୍ତି ଇସ୍ୱର୍‌ତି ଆଡ଼୍‌ୟାର୍‌ ଅଦରମ୍‌ କେମା କିଆ । ହେୱାର୍‌ ଇ କାତା ଇନି ୱେଡ଼ାଲିଂ" ଜସେପ୍‌ ଆଡ଼୍‌ବେଦେଂ ଲାଗାତାନ୍‌ ।

18 ଇଦାଂପାଚେ ତା ଟଣ୍ଡାହିର୍‌ ତା ଆଗେ ହାଲ୍‍ଜି ଜୱାର୍‌ କିଜ଼ି ଇଚାର୍‌, "ହୁଡ଼ା, ଆପେଙ୍ଗ୍ ନି ଆଡ଼ିୟାକାପ୍‌ ।" 19 ପାଚେ ଜସେପ୍‌ ହେୱାରିଙ୍ଗ୍‌ ଇଚାନ୍‌, "ଏପେଙ୍ଗ୍‌ ମୁଡ଼େ ପାଣ୍ଡ୍ରା ଆମାଟ୍‌, ଆନ୍‌ ଇନାକା ଇସ୍ୱର୍‌ତି ବାହାତ ଅସିହାଞ୍ଜ୍‌ନାଂ ? 20 ଏପେଙ୍ଗ୍‌ ନା ବିରୁଦ୍‌ତ ବାନ୍ୟା ହାନ୍ଦାୟ୍‌ କିଜ଼ିମାଚାଦେର୍‌ ପାର୍‌ମାଣ୍‌, ମତର୍‌ ଇସ୍ୱର୍‌ ହେଦାଂ ମଙ୍ଗଲ୍‌ନି ହାନ୍ଦାୟ୍‌ କିତାନ୍‌; ନଂ ଇନେସ୍‌ ହୁଡ଼୍‌ନାଦେରା, ହେଲାକେ ଆଦେକ୍‌ ମାନାୟାର୍‌ ପାରାଣ୍‌ ରାକ୍ୟା କିଦେଂ ହେୱାନ୍ତି ଇଚା ମାଚାତ୍‌ । 21 ଇଦାଂକାଜିଂ ଏପେଙ୍ଗ୍‌ ନଂ ପାଣ୍ଡ୍ରା ଆମାଟ୍‌, ଆନ୍‌ ମିଙ୍ଗେଙ୍ଗ୍‌ ଆରି ମି ହିମ୍‌ଣାକାଂ" ପହାପାଲି କିନାଙ୍ଗ୍‌ । ଇ ବାନି ଜିବୁନ୍‌ ଦୁକ୍‌ନି କାତା ଇଞ୍ଜି ହେୱାନ୍‌ ହେୱାରିଙ୍ଗ୍‌ ଦୁକ୍‌ସାରାୟ୍‌ କିତାନ୍‌ ।

22 ଇଦାଂପାଚେ ଜସେପ୍‌ ଆରି ତା ଆବାକୁଟୁମ୍‌ ମିସର୍‌ତ ବାହା କିଜ଼ି ମାଚାର୍‌; ଜସେପ୍‌ ସହେ ଦସ୍‌ ବାର୍ହୁ ଜିଜ଼ି ମାଚାନ୍‌ । 23 ଜସେପ୍‌ ଇପ୍ରୟିମ୍‌ନି ତିନ୍‌ ହୁଡ଼୍‌ନିମାନାୟ୍‌ ପାତେକ୍‌ ହିମ୍‌ଣାୱାକ୍‌ଡ଼ା ହୁଡ଼୍‌ତାନ୍‌; ଆରେ, ଜସେପ୍‌ ମନଃସିନି ମାକିର୍‌ ତର୍‌ନି ମାଜ଼ିତି ହିରୁହିମ୍‌ଣାକାଂ ୱାକ୍ତ ଆସ୍ତାନ୍ । 24 ଇଦାଂପାଚେ ଜସେପ୍‌ ଟଣ୍ଡାରିଙ୍ଗ୍‌ ଇଚାନ୍‌, "ଆନ୍‌ ହାନାଙ୍ଗା, ମତର୍‌ ଇସ୍ୱର୍‌ ଆତିସ୍ପା ମିଦାଂ ଆକ୍ରା କିଦ୍‌ନାନ୍‌, ଆରେ, ଇ ଦେସ୍‌ତାଂ ମିଂ ହପ୍‌ଚି ଇମ୍‌ଣି ଦେସ୍‌ ହିଦ୍‌ନି କାଜିଂ ଅବ୍ରାହାମ୍‌, ଇସ୍‌ହାକ୍‌ ଆରି ଜାକୁବତି ଲାଗାୟ୍‌ ପାର୍ମାଣ୍‌ କିତାନ୍ନା, ହେ ଦେସ୍‌ତ ମିଙ୍ଗେଙ୍ଗ୍‌ ଅସି ହାଞ୍ଜ୍‌ନାନ୍‌ ।" 25 ଆରେରଗ ଜସେପ୍‌ ଇସ୍ରାଏଲ୍‌ତି ହିମ୍‌ଣାକାଂ ଇ ପାର୍ମାଣ୍‌ କିୟ୍‌କିଜ଼ି ଇଚାନ୍‌, "ଇସ୍ୱର୍‌ ଆତିସ୍ପା ମିଦାଂ ଆକ୍ରା କିଦ୍‌ନାନ୍‌, ହେ ୱେଡ଼ାଙ୍ଗ୍‌ ଏପେଙ୍ଗ୍‌ ଇ ବାହାତାଂ ନା ପ୍ଡେନ୍‌ ଅନାଦେର୍‌ ।" 26 ଇ ବାନି ଜସେପ୍‌ ସହେ ଦସ୍‌ ବାର୍ହୁ ବଁୟିସ୍‌ତ ମିସର୍‌ ଦେସ୍‌ତ ହାତାନ୍‌; ପାଚେ ହେୱାର୍‌ ତା ମାଡ଼ାତିଂ ମୁଚ୍‌ନି ଜିନିସ୍‌ ମେହାୟ୍‌ କିଜ଼ି ମିସର୍‌ ଦେସ୍‌ତ ର ପେଡ଼ି ବିତ୍ରେ ଇଡ଼୍‌ତାର୍‌ ।