1 ଇସ୍ରାଏଲ୍‌ ଜାକୁବ ଆରି ହିମ୍‌ଣାଙ୍ଗ୍‌ ୱିଜ଼ାର୍‌ ଜାର୍‌ ଜାର୍‌ କୁଟୁମ୍‌ତିଂ ଆସ୍ତି ଜାକୁବ୍‌ ଲାହାଙ୍ଗ୍‌ ମିସର୍‌ ଦେସ୍‌ତ ୱାତାର୍‌, ହେୱାର୍‌ତି ତର୍‌; 2 ରୁବେନ୍‌, ସିମିୟନ୍‌, ଲେବି, ଆରି ଜିହୁଦା; 3 ଇସାକର, ସବୁଲୁନ୍‌, ଆରି ବିନ୍ୟାମିନ୍‌; 4 ଦାନ୍‌ ଆରି ନପ୍ତାଲି; ଗାଦ ଆରି ଆସେର୍‌ । 5 ହେୱାଡ଼ାଲିଂ ଜାକୁବ୍‌ ତାଂ ଉବ୍‌ଜାତି ଲାତ୍ରା ସତୁରି ପାରାଣିଂ ମାଚିକ୍‌; ମତର୍‌ ଜସେପ୍‌ ଆଗେ ମିସର୍‌ତ ମାଚାନ୍‌ । 6 ଇଦାଂପାଚେ ଜସେପ୍, ତା ଲାତ୍ରା ଆରି ହେ ସମୁତ ୱିଜ଼ାର୍‌ ଲକ୍‌ ହାତାର୍‌ । 7 ଆତିସ୍ପା ଇସ୍ରାଏଲ୍‌ ଲାତ୍ରା ହେନି, ବାଡାତାର୍‌ ଆରି ବେସିହେନି ଆଜ଼ି ହେନି ଆତାର୍‌, ଆରେ, ହେୱାର୍‌ କାଜିଂ ମିସର୍‌ ଦେସ୍‌ ବାର୍ତି ଆତାତ୍‌ । 8 ଇଦାଂପାଚେ ଇନେନ୍‌ ଜସେପ୍‌ତିଂ ପୁନ୍‌ୱାଦାଂ ମାଚାନ୍‌, ଏଲେଙ୍ଗ୍‌ ର ପୁନି ରାଜା ମିସର୍‌ ଦେସ୍‌ତ ଆତାନ୍‌ । 9 ହେୱାନ୍‌ ଜାର୍‌ ଲକ୍‌ବାକ୍‌ତିଂ ଇଚାନ୍‌, "ହୁଡ଼ାଟ୍‌, ଇସ୍ରାଏଲ୍‌ ମାଜ଼ିର୍‌ତି ଲାତ୍ରା, ବପୁତ ଆରି ଲମର୍‌ତ ମାଙ୍ଗେଙ୍ଗ୍‌ତାଂ ବେସି ଆତାର୍‌ନା । 10 ହେୱାର୍‌ ଇନେସ୍‌କି ବାଡା ଆଉର୍‌, ଆରେ, ଜୁଜ୍‌ ଗିଟାଆତ୍‌ତିସ୍‌, ମାଙ୍ଗେଙ୍ଗ୍‌ ସାତ୍ରୁ ପାକ୍ୟା ଆଜ଼ି ମା ଲାହାଂ ଜୁଜ୍‌ କିଦୁର୍‌ ଆରି ଇ ଦେସ୍‌ତାଂ ହଣ୍‌ଗା ୱାଉର୍‌, ଇଦାଂକାଜିଂ ୱାଡୁ, ଆସେଙ୍ଗ୍‌ ହେୱାର୍‌ ଲାହାଂ ଜାଗ୍ରତ୍‌ ଆଜ଼ି ବେବାର୍‌ କିନାସ୍‌ ।" 11 ଇଦାଂପାଚେ ହେୱାର୍‌ ବଜ୍‌ପିଣ୍ଡ୍‌ନି କାଜିଂ ହେୱାରିଂ କସ୍ଟ ହିନି କାଜିଂ ହେୱାର୍‌ ଜପି କାମାୟ୍‌ କିନାକାରିଂ ବାଚି କିତାର୍‌, ଆରେ ହେୱାର୍‌ କାଜିଂ ପାର ମୁଡ଼୍‌ଦାକାନ୍‌ କାଜିଂ ଗାଦ୍ୟାନି ଇଲ୍‌, ଗାଡ଼୍‌, ଇଚିସ୍‌, ପିତମ୍‌ ଆରି ରାମିସେସ୍‌ ରଚି କିତାର୍‌ । 12 ମତର୍‌ ହେୱାର୍‌ ହେୱାରିଂ ଏଚେକ୍‌ ଆଦିକ୍‌ କସ୍ଟ ହିତାର୍‌, ହେୱାର୍‌ ହେଏଚେକ୍‌ ଆଦିକ୍‌ ବାଡାତାର୍‌, ଆରେ, ହେଏଚେକ୍‌ ଆଦିକ୍‌ ୱିଣ୍‌ତାର୍‌ । ଏଲେଙ୍ଗ୍‌ ଆଜ଼ି ଇସ୍ରାଏଲ୍‌ନି ହିମ୍‌ଣାଂ କାଜିଂ ହେୱାର୍‌ ଆଦିକ୍‌ ପାଣ୍ଡ୍ରା ଆତାର୍‌ । 13 ତାପାଚେ ମିସର୍‌ନି ଲକୁ ଦୟାହିଲ୍‌ୱି ବାବ୍ରେ ଇସ୍ରାଏଲ୍‌ ମାଜ଼ିରିଂ ଆଡ଼ିୟା କାମାୟ୍‌ କିୟ୍‌କିତାର୍‌ । 14 ଆରେ, ଚିକ୍‌ଲା, ଇଟା ଆରି ଜମିନି ସବୁ କାମାୟିଙ୍ଗ୍‌ କସ୍ଟ ଆଡ଼୍‌ୟା କାମାୟ୍‌ ହୁଦାଂ ହେୱାର୍‌ତି ଜିବୁନ୍‌ତିଂ ରିସା କିଦେଂ ଲାଗାତାର୍‌ । ହେୱାର୍‌ ଇମ୍‌ଣି ସବୁ ଆଡ଼୍‌ୟାକାମାୟ୍‌ କିୟ୍‌କିତାର୍‌; ହେ ସବୁ ହେବା ବାବ୍ରେ କିୟ୍‌କିତାର୍‌ । 15 ଇଦାଂପାଚେ ମିସର୍‌ନି ରାଜା, ସିପ୍ରା ଆରି ପୁୟା ତର୍‌ନି ରିଣ୍ଡେକ୍‌ ଏବ୍ରିୟା ପୁଣେଲ୍‌ବୁଡିଆକାଂ ଇ କାତା ଇଚାନ୍‌, 16 "ଇମ୍‌ଣି ସମୁତ ଏପେଙ୍ଗ୍‌ ଏବ୍ରିୟା କଗ୍‌ଲେକ୍‌ତି ପୁଣେଲ୍‌ବୁଡିଆ କାମାୟ୍‌ କିନାଦେର୍‌ ଆରି ହେୱେକ୍‌କାଂ ଜଲମ୍‌କିନି ବାହାତ ହୁଡ଼୍‌ନାଦେର୍‌; ହେ ୱେଡ଼ାଙ୍ଗ୍‌ ଜଦି ମାଜ଼ି ଜଲମ୍‌ ଆନାନ୍‌, ତେବେ ହେୱାନିଂ ଅହ୍‌ନାଦେର୍‌; ଆରେ ଜଦି କଇ ଆନାତ୍‌, ତେବେ ହେଦେଲିଂ ଜିବୁନ୍‌ ଇଟ୍‌ନାଦେର୍‌ ।" 17 ମତର୍‌ ହେ ପୁଣେଲ୍‌ବୁଡିଆକ୍‌ ପର୍‌ମେସ୍ୱର୍‌ତିଂ ପାଣ୍ଡ୍ରୁ ଆନି କାଜିଂ ମିସର୍‌ନି ରାଜାତି ବଲ୍‌ ଇସାବ୍ରେ କିୱାଦାଂ ମାଜ଼ିରିଂ ଜିବୁନ୍‌ ଇଟ୍‌ତାର୍‌ । 18 ଲାଗିଂ ମିସର୍‌ନି ରାଜା ପୁଣେଲ୍‌ବୁଡିଆକାଂ କୁକ୍‌ଚି ଇଚାର୍‌, "ଏପେଙ୍ଗ୍‌ ଏଲେଙ୍ଗ୍‌ କାମାୟ୍‌ ଇନାକିଦେଂ କିନାଦେରା ? ମାଜ଼ିରିଂ ଇନାକିଦେଂ ଜିବୁନ୍‌ ଇଟ୍‌ନାଦେରା ?" 19 ତାପାଚେ କଗ୍‌ଲେକ୍‌ ପାରଙ୍ଗ୍‌ ଇଚିକ୍‌, "ଏବ୍ରିୟା କଗ୍‌ଲେକ୍‌ ମିସରିୟାନି କଗ୍‌ଲେକ୍‌ ଲାକେ ଆକାୟ୍‌; ହେୱେକ୍‌ ବାଡ଼୍‌କାସ୍‌, ହେୱେକ୍‌ ଲାଗାଂ ପୁଣେଲ୍‌ବୁଡିଆକ୍‌ ୱାୱି ଆଗେ ହେୱେକ୍‌ ଜଲମ୍‌ କିନିକ୍‌ ।" 20 ଆରେ, ପର୍‌ମେସ୍ୱର୍‌ ହେ ପୁଣେଲ୍‌ବୁଡିଆକ୍‌ ମଙ୍ଗଲ୍‌ କିତାତ୍‌, ତାପାଚେ ମାନାୟାର୍‌ ବେସି ବାଡାଆଜ଼ି ବେସି ବାପୁ ଆତାର୍‌ । 21 ହେ "ପୁଣେଲ୍‌ବୁଡିଆକ୍‌ ପର୍‌ମେସ୍ୱର୍‌ତିଂ ପାଣ୍ଡ୍ରା ଆନିକାଜିଂ ହେୱାନ୍‌ ହେୱାର୍‌ ଲାତ୍ରା ବାଡାୟ୍‌ କିତାନ୍‌ । 22 ତାପାଚେ ପାର ଜାର୍‌ ୱିଜ଼ାର୍‌ ପାର୍ଜାରିଂ ଇ ବଲ୍‌ ହିତାନ୍‌, ଏପେଙ୍ଗ୍‌ ପୁନିଜଲମ୍‌କିତି ୱିଜ଼ାର୍‌ ଏବ୍ରିୟ ମାଜ଼ିରିଂ ନାଗୁଡ଼୍‌ତ ତୁହିହିୟାଟ୍‌, ମତର୍‌ ୱିଜ଼ୁ କୈକାଂ ଜିବୁନ୍‌ ଇଟାଟ୍‌ ।"