1 ଇଦାଂପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏନ୍‌ ପାର ଲାଗାଂ ହାଲା; ଇନାକିଦେଂକି ଆନେଙ୍ଗ୍ ଇନେସ୍‌ ମାନାୟାର୍‌ ବିତ୍ରେ ଇ ସବୁ ଚିନ୍‌ ଚଚ୍‍ନାଙ୍ଗ୍‌, 2 ଆରେ, ଆନେଙ୍ଗ୍ ମିସ୍ରିୟର୍‌ତି କାଜିଙ୍ଗ୍ ଇନା ଇନାକା କିତାପ୍‌ନା ଆରି ହେୱାର୍‌ ବିତ୍ରେ ଜାର୍‌ତି ଚିନ୍‌ ଇସାବ୍ରେ ଇମ୍‌ଣି ଇମ୍‌ଣି କାମାୟ୍‌ କିତାପ୍‌ନ୍ନା, ହେସବୁ ବେକାର୍‌ ଏନ୍‌ ଇନେସ୍‌ ଜାର୍‌ ମାଜ଼ି ଆରି ନାତିନି କିତୁଲ୍‌ତ ଇନାଦେର୍‌, ଆରେ, ଆନ୍‌ ଜେ ନିତ୍ରେମାପ୍ରୁ ଇଦାଂ ପୁନାନ୍‌, ଇଦାଂ କାଜିଙ୍ଗ୍ ଆନ୍‌ ପାର ଆରି ତା ଆଡ଼୍‌ୟାରିଂ ୱାସ୍କି ଆଟ୍‌ୱା କିତାପ୍‌ ।" 3 ହେପାଦ୍‌ନା ମସା ଆରି ହାରଣ୍‌ ପାର ଲାଗାଂ ହାଲ୍‌ଜି ଇଚାର୍‌, "ଏବ୍ରିୟର୍‌ତି ନିତ୍ରେମାପ୍ରୁ ପରମେସ୍ୱର୍‌ ଇନାନ୍‌, ଏପେଙ୍ଗ୍‌ ମା ମୁମ୍‌ଦ ହୁଦାର୍‌ ଆଦେଂ ଏଚେ କାଡ଼୍‌ ମୁନା କିନାଦେର୍‌ ? ମା ହେବା କିନି କାଜିଂ ମା ମାନାୟାରିଂ ହାଞ୍ଜେଙ୍ଗ୍‌ ହିଦାଟ୍‌ । 4 ମତର୍‌ ଜଦି ନା ମାନାୟାରିଂ ହାଞ୍ଜେଙ୍ଗ୍ ମୁନା କିନାଦେର୍‌, ଲାଗିଂ ହୁଡ଼ାଟ୍‌, ଆନେଙ୍ଗ୍ ୱିଗାଲିଂ ମି ନାସ୍‌କୁକାଂ ପାମିଂ ପକ୍ତାନାଙ୍ଗ୍‌ । 5 ହେୱାର୍‌ ଜମିନି ୱେଇ ଏଲେଙ୍ଗ୍‌ ଡାବାୟ୍‌ କିନାର୍‌ ଜେ, ଇନେର୍‌ ହେଦାଂ ହୁଡ଼୍‌ଦେଂ ଆଡୁର୍‌; ଆରେ, ଆଞ୍ଜ୍‌ଗା ବାର୍‌ହାତାଂ ଇଡ଼୍‌ତାକା ଆରି ବାକି ଇନାକା ଅଲପ୍‌ ମିଦାଂ ମାନାତ୍‌, ହେଦାଂ ହେୱାଙ୍ଗ୍‌ ତିନିକ୍‌, ଆରେ, ମିଦାଂ ଜମିନି ୱିଜ଼ୁ ମାର୍‌କୁ ତିନିକ୍‌ । 6 ଆରେ, ହେୱାର୍‌ତି ଦୁୱେର୍‌ ମି ଇଲ୍‌, ମି ଆଡ଼ିୟାର୍‌ତି ଇଲ୍‌ ଆରି ସବୁ ମିସ୍ରିୟ ମାନାୟାର୍‌ ଇଲ୍‌ ବାର୍ତି ଆନାତ୍‌; ଇ ଦେସ୍‌ତ ମି ଆକର୍‌ଦାଦିର୍‌ତି ଆରି ହେୱାର୍‌ତି ଆକର୍‌ଦାଦିର୍‌ତି ଜଲମ୍‌ଆତାକା ନେଜେଙ୍ଗ୍‌ ପାତେକ୍‌ ଇନାୱାଡ଼ାଙ୍ଗ୍‌ ଏଲେଙ୍ଗ୍‌ ଚଞ୍ଜ୍‌ୱାତାତ୍‌ନା ।" ପାଚେ ମସା ମୁମ୍‌ ତାରେନ୍‌ କିଜ଼ି ପାର ଲାଗାଂତାଂ ହସି ହାଚାନ୍‌ । 7 ଇଦାଂପାଚେ ପାରତି ଆଡ଼ିୟାର୍‌ ତାଙ୍ଗେଙ୍ଗ୍‌ ଇଚାର୍‌, "ଇ ମାନାୟ୍ ଏଚେକ୍‌ କାଡ଼୍‌ ମା ଡ଼ୁକା ଇସାବ୍ରେ ଆଜ଼ିମାନ୍‌ଗାନାତ୍‌ ?" ଇ ମାନାୟାର୍‌ତି ନିତ୍ରେମାପ୍ରୁ ପରମେସ୍ୱର୍‌ତି ହେବା କିନି କାଜିଂ ଇୱାରିଂ ହାଞ୍ଜେଙ୍ଗ୍ ହିଆଟ୍‌; ମିସର୍‌ ଦେସ୍‌ ଜେ ନସ୍ଟ ଆତାତେ, ଇଦାଂ କି ଏନେଙ୍ଗ୍ ନଙ୍ଗ୍‌ ପାତେକ୍‌ ବୁଜାଆଉଦେରା ? 8 ଲାଗିଂ ମସା ଆରି ହାରଣ୍‌ ଆରେରଗ ପାର ଲାଗାଂ ହାଚିଲେ, ହେୱାନ୍‌ ହେୱାରିଂ ଇଚାନ୍‌, "ହାଲାଟ୍‌, ମି ନିତ୍ରେମାପ୍ରୁ ପରମେସ୍ୱର୍‌ତି ହେବା କିୟାଟ୍‌; ମତର୍‌ ଇନେର୍‌ ଇନେର୍‌ ହାନାର୍‌ ?"

9 ହେବେ ମସା ଇଚାନ୍‌, "ଆପେଙ୍ଗ୍‌ ଜାର୍‌ ଜାର୍‌ କାଡ଼୍‌ଦେ ଆରି ବୁଡ଼୍‌ହି ୱିଜ଼ାରିଂ ରଚେ ଅସି ହାନାପ୍‌ ଆରି ଜାର୍‌ ଜାର୍‌ ମାଜ଼ିର୍‌ଗାଡ଼୍‌କୁକାଂ, ଆରେ, କଡିଙ୍ଗ୍‌ ମାନ୍ଦା ପା ରଚେ ଅନାପ୍‌, ଇନେସ୍‌କି ନିତ୍ରେମାପ୍ରୁତି ଉଦେସ୍‌ତ ମା ପାର୍ବୁ ପାଲି କିନାକା ମାନାତ୍‌ ।"

10 ଲାଗିଂ ପାର ହେୱାରିଂ ଇଚାନ୍‌, "ଆୟେତ୍‌, ନିତ୍ରେମାପ୍ରୁ ମି ହାଂ ଆଏନ୍‌, ଆପେଙ୍ଗ୍‌ ତ ମିଙ୍ଗେଙ୍ଗ୍‌ ଆରି ମି କାଡ଼୍‌ଦେରିଂ ହାଞ୍ଜେଙ୍ଗ୍ ହିଦ୍‌ନାଂ; ଜାଗ୍ରତ୍‌, ମଙ୍ଗଲ୍‌ଆୱାକା ମି ମୁମ୍‌ଦ ମାନାତ୍‌ । 11 ଏଲେଙ୍ଗ୍‌ ଆଉତ୍‌, ଏପେଙ୍ଗ୍ ଏଚେକ୍‌ ଆଣ୍ଡ୍ରାଂ ମାନାଦେର୍‌, ହାଲାଟ୍‌, ନିତ୍ରେମାପ୍ରୁତି ହେବା କିୟାଟ୍‌; ଇନାକିଦେଂକି ଇଦାଂ ନେ ଏପେଙ୍ଗ୍ ଇଚାକିନାଦେର୍‌ ।" ଇଦାଂପାଚେ ହେୱାର୍‌ ପାରତି ତାକେଣ୍ଡାଙ୍ଗ୍‌ ଲେଉଟା ଆତାର୍‌ । 12 ଇଦାଂପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏପେଙ୍ଗ୍ ପାମିଙ୍ଗ୍‌ କାଜିଂ ମିସର୍‌ ଦେସ୍ ଜପି ଜାର୍‌ କେଇ ଲାମାୟ୍‌ କିୟା, ହେବେ ହେୱାର୍‌ ମିସର୍‌ ଦେସ୍‌ତ ୱାଜ଼ି ଆଞ୍ଜ୍‌ଗା ବାର୍‌ହାନି ବାକି ଜମିନି କାଚ୍ରା କୁଚା ୱିଜ଼ୁ ତିନିକ୍‌ ।" 13 ପାଚେ ମସା ମିସର୍‌ ଦେସ୍ ଜପି ଜାର୍‌ ବେଡ୍‌ଗା ଲାମାୟ୍‌ କିତିଲେ, ନିତ୍ରେମାପ୍ରୁ ହେ ୱିଜ଼ୁ ୱେଡ଼ାନାଣା ଦେସ୍ତ ପୁର୍ବେନି ଦୁକା କିୟ୍‌କିତାନ୍‌; ନାଣାଙ୍ଗେ ଆତିଲେ, ପୁର୍ବେନି ଦୁକା ହୁଦାଂ ପାମିଙ୍ଗ୍‌ ଏକିତିକ୍‌ । 14 ପାଚେ ସବୁ ମିସର୍‌ ଦେସ୍‌ତ ପାମିଙ୍ଗ୍‌ ମେଙ୍ଗ୍‌ତିକ୍‌, ମିସର୍‌ନି ସବୁ ନାସ୍‌କୁକାଂ ପାମିଙ୍ଗ୍‌ ଆର୍‌ତିକ୍‌; ହେୱାଙ୍ଗ୍‌ ବେସି ବଇଁକାର୍‌ନିକିଂ ମାଚିକ୍‌; ହେ ଲାକେ ପାମିଙ୍ଗ୍‌ ଆଗେ ଇନେୱାଡ଼ାଙ୍ଗ୍‌ ପା ଆୱାଦାଂ ମାଚିକ୍‌, କି ଆରେ ଇନେୱାଡ଼ାଙ୍ଗ୍‌ ଆଉକ୍‌ । 15 ହେୱାର୍‌ ସବୁ ବୁମିତ ଡାବାତିକ୍‌ ଆରି ହେୱାଙ୍ଗ୍‌ କାଜିଙ୍ଗ୍ ଦେସ୍‌ ମାଜ୍‌ଗା ଆତାତ୍‌, ବୁମିନି ଜେ କାଚ୍ରା କୁଚା ଆରି ମାର୍‌କୁନି ଜେ ପାଡ଼୍‌ ଆଞ୍ଜ୍‌ଗା ବାର୍‌ହାତାଂ ରାକ୍ୟା ପାୟାଜ଼ି ମାଚାତ୍‌; ହେଦାଂ ହେୱାଙ୍ଗ୍‌ ଚିଚିକ୍‌; ପାଚେ ସବୁ ମିସର୍‌ ଦେସ୍‌ତ ଇମ୍‌ଣି ମାର୍‌ କି ଜମିନି କାଚ୍ରା କାଚାପାତ୍ରିୟା ବାନି ଅଲପ୍‌ ପା ହିଲାତାତ୍ । 16 ପାଚେ ପାର ବେଗି ମସା ଆରି ହାରଣ୍‌ତିଂ କୁକ୍‌ଚି ଇଚାନ୍‌, "ଆନ୍‌ ମି ନିତ୍ରେମାପ୍ରୁ ପରମେସ୍ୱର୍‌ତି ଆରି ମି ବିରୁତାଂ ପାପ୍‌ କିତାଂନା । 17 ଗୱାରି କିଦ୍‌ନାଙ୍ଗା, କେବଲ୍‌ ଇ ମାଡ୍‌ ମା ପାପ୍‌ କେମା କିଜ଼ି ମା ତାକେଣ୍ଡାଂ ଇ ହାକି ଇସାବ୍ରେ ଦେହା କିନି କାଜିଂ ମା ନିତ୍ରେମାପ୍ରୁ ପରମେସ୍ୱର୍‌ତି ଲାଗାଂ ପାର୍ତାନା କିୟାଟ୍‌ ।" 18 ପାଚେ ହେୱାନ୍‌ ପାର ଲାଗାଂତାଂ ହାଲ୍‌ଜି ନିତ୍ରେମାପ୍ରୁ ଲାଗାଂ ପାର୍ତାନା କିତିଲେ, 19 ନିତ୍ରେମାପ୍ରୁ ବେସି ୱେଡ଼ାହାନି ଦିଗ୍‌ନି ଦୁକା ପକ୍‌ଚି ଦେସ୍‌ତାଂ ପାମିକାଂ ନିକ୍‌ଚି ଅଜ଼ି ସୁପ ହାମ୍‌ଦୁର୍‌ତ ତୁହି ହିତାନ୍‌; ତା ପାଚେ ମିସର୍‌ନି ଇମ୍‌ଣି ନାସ୍‌କୁକାଂ ରଞ୍ଜାଙ୍ଗ୍‌ ପା ପାମିଙ୍ଗ୍‌ ମାନ୍‌ୱିତିକ୍‌ । 20 ମତର୍‌ ନିତ୍ରେମାପ୍ରୁ ପାରତି ୱାସ୍କି ଆଟ୍‌ୱା କିତାନ୍‌, ଆରେ, ହେୱାନ୍‌ ଇସ୍ରାଏଲ୍‌ ମାଜ଼ିରିଂ ହାଞ୍ଜେଙ୍ଗ୍ ହିୱାତାନ୍‌ ।

21 ଆରେ ନିତ୍ରେମାପ୍ରୁ ମସାଂ ଇଚାନ୍‌, "ଏନେଙ୍ଗ୍ ଆକାସ୍‌ ନିପ କେଇ ଲାମାୟ୍‌ କିୟାଟ୍‌; ପାଚେ ମିସର୍‌ ଦେସ୍‌ତ ମାଜ୍‍ଗା ଆନାତ୍‌ ଆରି ମାଜ୍‌ଗା କାଜିଙ୍ଗ୍ ମାନାୟାର୍‌ ଟାମ୍‌ଣ୍ଡା ଆନାର୍‌ ।" 22 ଇଦାଂପାଚେ ମସା ଆକାସ୍‌ ନିପ କେଇ ଲାମାୟ୍‌ କିତିଲେ, ତିନି ଦିନ୍ ପାତେକ୍‌ ମିସର୍‌ ଦେସ୍‌ନି ସବୁ ବାହାତ ଏଲେଙ୍ଗ୍‌ ବେସି ମାଜ୍‌ଗା ଆତାତ୍‌ ଜେ, ଇନେର୍‌ ହାରିତିଂ ହୁଡ଼୍‌କାଆଦେଂ ଆଡ୍‌ୱାତାର୍‌ । 23 ଆରି ତିନି ଦିନ୍‌ ପାତେକ୍‌ ଇନେର୍‌ ଜାର୍‌ ବାହାତାଂ ନିଙ୍ଗ୍‍ଦେଂ ଆଡ୍‌ୱାତାର୍‌; ମତର୍‌ ଇସ୍ରାଏଲ୍‌ ମାଜ଼ିର୍‌ତି ୱିଜ଼ୁ ମାନି ବାହାତ ଅଜଡ଼୍‌ ମାଚାତ୍ ।

24 ପାଚେ ପାର ମସାଂ କୁକ୍‌ଚି ଇଚାନ୍‌, "ଏପେଙ୍ଗ୍ ନିତ୍ରେମାପ୍ରୁତି ହେବା କିଦେଂ ହାଲାଟ୍‌; କେବଲ୍‌ ମିଦାଂ କଡିଙ୍ଗ୍‌ ମାନ୍ଦା ମାନେକ୍‌; ମି କାଡ଼୍‌ଦେର୍‌ ପା ମି ହୁଦାଂ ହାଲେର୍‌ ।"

25 ପାଚେ ମସା ଇଚାନ୍‌, "ଆସେଙ୍ଗ୍‌ ଜାର୍‌ତି ନିତ୍ରେମାପ୍ରୁ ପରମେସ୍ୱର୍‌ତି ଉଦେସ୍‌ତ ଇମ୍‌ଣି ପୁଜା ଆରି କାଟ୍‌ପୁଜାକିନାପ୍‌, ହେଦାଂ ପା ମା କେଇଦ ନିଙ୍ଗେଙ୍ଗ୍‌ ହିଦ୍‌ନାକା ମାନାତ୍‌ । 26 ମା ପସୁଙ୍ଗ୍‌ ମା ହୁଦାଂ ୱାନିକ୍‌, ରଞ୍ଜାଙ୍ଗ୍‌ ପା ବାକି ମାନ୍‌ଗୁତ୍‌; ଇନେକିଦେଂକି ମା ନିତ୍ରେମାପ୍ରୁ ପରମେସ୍ୱର୍‌ତି ହେବା କାଜିଙ୍ଗ୍ ହେୱାଙ୍ଗ୍‌ ବିତ୍ରେତାଂ ପୁଜା ଅନାକା ମାନାତ୍‌; ଆରେ, ଇନାକା ହିଜ଼ି ନିତ୍ରେମାପ୍ରୁତି ହେବା କିନାକା ମାନାତ୍‌, ହେଦାଂ ହେବେ ଏକିୱିତିସ୍‌, ଆପେଙ୍ଗ୍‌ ପୁଞ୍ଜେଙ୍ଗ୍‌ ଆଡୁପ୍‌ ।"

27 ମତର୍‌ ନିତ୍ରେମାପ୍ରୁ ପାରତି ୱାସ୍କି ଆଟ୍‌ୱା କିତାନ୍‌, ଆରେ, ହେୱାନ୍‌ ହେୱାରିଂ ହାଞ୍ଜେଙ୍ଗ୍ କାଜିଂ ଇଚା କିୱାତାନ୍ । 28 ଲାଗିଙ୍ଗ୍ ପାର ତାଙ୍ଗେଙ୍ଗ୍ ଇଚାନ୍‌, "ମା ଲାଗାଂତାଂ ଦେହା ଆ, ଜାର୍‌ ବିସ୍ରେ ଜାଗ୍ରତ୍‌ ଆ, ମା ମୁମ୍‌ ଇନେୱାଡ଼ାଙ୍ଗ୍‌ ହୁଡ଼୍‌ଦା ମାଟ୍‌; ଇମ୍‌ଣି ଦିନ୍‌ ମା ମୁମ୍‌ ହୁଡ଼୍‌ଦାନାଦେର୍‌, ହେ ଦିନ୍ ହାନାଦେର୍ ।" 29 ପାଚେ ମସା ଇଚାନ୍‌, "ଏନେଙ୍ଗ୍ ହାର୍‌ ଇଚାୟ୍‌, ଆନ୍ ଆରେ ଇନେୱାଡ଼ାଙ୍ଗ୍‌ ନି ମୁମ୍‌ ହୁଡ଼୍‌ଦୁଙ୍ଗ୍‌ ।"