1 ଲାଗିଙ୍ଗ୍ ନିତ୍ରେମାପ୍ରୁ ମସାଂ ଇଚାନ୍, "ହୁଡ଼ା, ଆନେଙ୍ଗ୍ ନିଙ୍ଗେଙ୍ଗ୍‌ ପାର ଲାଗାଂ ମାପ୍ରୁ ଲାକେ କିଜ଼ି ବାଚି କିତ୍‌ତାପ୍‌ ଆରି ନି ଟଣ୍ଡେନ୍‌ ହାରଣ୍‌ ମି ବେଣ୍‌ବାକ୍‌ଣାୟ୍‌କିନାକାନ୍‌ ଆନାନ୍‌ । 2 ଆନେଙ୍ଗ୍ ମିଙ୍ଗେଙ୍ଗ୍ ଇନା ଇନାକା ବଲ୍‌ ହିଦ୍‌ନାଙ୍ଗ୍‌, ହେଦାଂ ସବୁ ଏପେଙ୍ଗ୍ ଇନାଦେର୍‌; ଆରେ, ନି ଟଣ୍ଡେନ୍‌ ହାରଣ୍‌ ଇସ୍ରାଏଲ୍‌-ମାଜ଼ିରିଂ ଜାର୍‌ ଦେସ୍‌ତାଂ ପିସ୍ତି ହାଞ୍ଜେଙ୍ଗ୍‌ ପାରଙ୍ଗ୍‌ ଇନାଟ୍‌ । 3 ଆରେ, ଆନେଙ୍ଗ୍ ପାରତି ୱାସ୍କି ଆଟ୍‌ୱା କିନାଙ୍ଗ୍‌, ଆରେ, ମିସର୍‌ ଦେସ୍ତ ମା ଚିନ୍‌ ଆରି କାବା କାମାୟ୍‌ ବେସି ଲମର୍‌ କିନାପ୍‌ । 4 ଆତିସ୍ପା ପାର ମି କାତାତ ମାନ୍‌ ହିଉନ୍‌; ଇଦାଂ କାଜିଂ ଆନେଙ୍ଗ୍ ମିସର୍‌ ଦେସ୍‌ ଜପି ଜାର୍‌ କେଇ ଇଡ଼୍‌ଜି ବେସି ଡାଣ୍ଡ୍‌ ହୁକେ ମିସର୍‌ତାଂ ଜାର୍‌ ମେଲ୍ୟାର୍‌, ମା ଲକୁ ଇସ୍ରାଏଲ୍‌-ମାଜ଼ିରିଂ ହପ୍‌ଚି ତାହିୱାନାସ୍‌ । 5 ଆରେ, ଆନେଙ୍ଗ୍ ମିସର୍‌ ବିରୁତାଂ ଜାର୍‌ କେଇ ଲାମାୟ୍‌ କିଜ଼ି ହେୱାର୍‌ ବିତ୍ରେତାଂ ଇସ୍ରାଏଲ୍‌ ମାଜ଼ିରିଂ ହପ୍‌ଚି ତାହିୱାନିହିଂ ଆନେଙ୍ଗ୍ ଜେ ନିତ୍ରେମାପ୍ରୁ, ହେଦାଂ ହେୱାର୍‌ ପୁନାର୍‌ ।" 6 ଇଦାଂ ପାଚେ ମସା ଆରି ହାରଣ୍‌ ହେ ଲେକେ କିତାର୍‌; ନିତ୍ରେମାପ୍ରୁତି ବଲ୍‌ ଇସାବ୍ରେ ହେୱାର୍ କାମାୟ୍‌ କିତାର୍‌ । 7 ପାର ହୁଦାଂ କାତାବାର୍ତା କିନି ୱେଡ଼ାଙ୍ଗ୍ ମସାଂ ଅସି ଆରି ହାରଣ୍‌ତିଂ ତେୟାଅସି ବାର୍ହୁ ଆଜ଼ି ମାଚାତ୍‌ ।

8 ଆରେ ନିତ୍ରେମାପ୍ରୁ ମସା ଆରି ହାରଣ୍‌ତିଂ ଇଚାନ୍, 9 "ଏପେଙ୍ଗ୍ ଜାର୍‌ କାଜିଂ ର ଚିନ୍ ଚଚ୍‌ଚାଟ୍‌ ଇଞ୍ଜି ଜଦି ପାର ମିଙ୍ଗେଙ୍ଗ୍ ଇଞ୍ଜ୍‌ନାନ୍‌, ଏନେଙ୍ଗ୍‌ ହାରଣଙ୍ଗ୍‌ ଇନା, ନି ବେଡ୍‌ଗା ଅଜ଼ି ପାର ମୁମ୍‌ଦ ତାରେନ୍‌ ଇଟା; ହେବେ ହେ ବେଡ୍‌ଗା ରାଚ୍‌ ଆନାତ୍ ।" 10 ପାଚେ ମସା ଆରି ହାରଣ୍‌ ପାର ଲାଗାଂ ହାଲ୍‌ଜି ନିତ୍ରେମାପ୍ରୁତି ବଲ୍‌ ଇସାବ୍ରେ କାମାୟ୍‌ କିତାନ୍‌; ଆରେ, ହାରଣ୍‌, ପାର ଆରି ତା ଆଡ଼୍‌ୟାରିଂ ମୁମ୍‍ଦ ଜାର୍‌ ବେଡ୍‌ଗା ତାରେନ୍‌ ଇଡ଼୍‌ତିଲେ, ହେଦାଂ ରାଚ୍‌ ଆତାତ୍ । 11 ଲାଗିଂ ପାର ଜାର୍‌ ପଣ୍ଡିତ୍‌ ଆରି ଗୁଣିୟାରିଂ କୁକ୍ତାର୍‌, ହେବେ ମିସ୍ରିୟର୍ ଚୁଟ୍‌କିୟା ପା ଜାର୍‌ତି ମାୟାତ ହେ ଲାକେ କିତାର୍ । 12 ଇଚିସ୍‌, ହେୱାର୍ ୱିଜ଼ାକାର୍ ଜାର୍‌ ଜାର୍‌ ବେଡ୍‌ଗାଂ ତୁହିତାର୍‌, ହେୱାଙ୍ଗ୍‌ ରାଚ୍‌କୁ ଆତିକ୍; ମତର୍‌ ହାରଣ୍‌ତି ବେଡ୍‌ଗା ହେୱାର୍‌ତି ସବୁ ବେଡ୍‌ଗାକାଂ ଗୁସ୍ତାତ୍‌ । 13 ହେବେ ନିତ୍ରେମାପ୍ରୁ ବଚନ୍‌ ଇସାବ୍ରେ ପାର ୱାସ୍କିତ ଆଟ୍‌ୱା ଆତାତ୍ ଆରି ହେୱାନ୍‌ ହେୱାର୍ କାତାତିଂ ୱେନ୍‌ୱାତାନ୍‌ ।

14 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାନ୍‌, "ପାରତି ୱାସ୍କି ଆଟ୍‌ୱା ଆତାତ୍‌ନା, ହେୱାନ୍ ମାନାୟାରିଂ ହାଞ୍ଜେଙ୍ଗ୍ ମୁନା କିନାନା ।" 15 ଇଦାଂ କାଜିଂ ଏପେଙ୍ଗ୍ ନାଣାଙ୍ଗେ ପାର ତାକେ ହାଲାଟ୍‌; ହୁଡ଼ାଟ୍‌, ହେୱାନ୍‌ ଏଜ଼ୁଙ୍ଗ୍ ନିପ ହାଚିସ୍‌, ଏପେଙ୍ଗ୍ ତା ଲାହାଂ ମେହା ଆଦେଂ ନିଲି ନାଗୁଡ଼୍‌ କଚଣ୍‌ତ ନିଲାଟ୍‌; ଇମ୍‌ଣି ବେଡ୍‌ଗା ରାଚ୍‌ ଆଜ଼ି ମାଚାତ୍‌, ହେଦାଂ ପା କେଇଦ ଅୱାଟ୍‌ । 16 ଆରେ, ପାରଙ୍ଗ୍‌ ଇନାଟ୍‌, ଏବ୍ରିୟରିଂ ନିତ୍ରେମାପ୍ରୁ ପରମେସ୍ୱର୍‌ ନାଙ୍ଗେଙ୍ଗ୍ ମି ଲାଗାଂ ପକ୍‌ଚି ଇଞ୍ଚାନ୍, "ଏନେଙ୍ଗ୍ ମା ମାନାୟାରିଂ ବାଟାତ ହେବା କିଦେଂ ପିସ୍ତି ହିଦା; ମତର୍ ହୁଡ଼ା, ଏନେଙ୍ଗ୍ ଇ ପାତେକ୍ ଇ କାତାତ ମାନ୍‌ହିୱାତାର୍ଣ୍ଣା ।" 17 ନିତ୍ରେମାପ୍ରୁ ଇ ଲାକେ ଇନାନା, "ଆପେଙ୍ଗ୍‌ ଜେ ନିତ୍ରେମାପ୍ରୁ, ହେଦାଂ ଏପେଙ୍ଗ୍ ଇବେତାଂ ପୁନାଦେର୍‌: ହୁଡ଼ାଟ୍‌, ଆନେଙ୍ଗ୍ ଜାର୍‌ କେଇଦ ଇ ବେଡ୍‌ଗା ଅସି ନିଲ ନାଗୁଡ଼୍‌ନି ଏଜ଼ୁଙ୍ଗ୍‌ ଜପି ଇଡ଼ା, ହେବେ ହେଦାଂ ନେତେର୍‌ ଆନାତ୍ ।" 18 ଆରେ, ଜଡ଼ିତ ମାନି ମିନ୍‌କୁ ହାନିକ୍‌ ଆରି ଜଡ଼ି ଗାନ୍ଦା ଆନାତ୍‌; ହେବେ ମିସ୍ରିୟ ମାନାୟାର୍‌ ନାଗୁଡ଼୍‌ନି ଏଜ଼ୁଙ୍ଗ୍‌ ଉଣ୍ଡେଙ୍ଗ୍‌ ଆଡୁର୍‌ । 19 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାନ୍‌, "ହାରଣ୍‌ତିଂ ଇ କାତା ଇନାଟ୍‌, ଏପେଙ୍ଗ୍ ଜାର୍‌ ବେଡ୍‌ଗା ମିସର୍‌ ଦେସ୍‌ନି ଏଜ଼ୁଙ୍ଗ୍ ଜପି, ଇଚିସ୍‌, ହେବେନି ଜଡ଼ି, ଜାରାଣ୍‌, ବାନ୍ଦ୍‌ ଆରି ଏଜ଼ୁଙ୍ଗ୍‌ହନିକିଂ, ଇ ସବୁ ଜପି ଜାର୍‌ କେଇ ଲାମାୟ୍‌ କିୟାଟ୍‌, ପାଚେ ୱିଜ଼ୁ ଏଜ଼ୁଙ୍ଗ୍ ନେତେର୍‌ ଆନିକ୍‌; ଆରେ, ମିସର୍‌ ଦେସ୍‌ନି ଗାଜାଟି ୱେଜ଼୍‌ଗୁତାଂ ରଚ୍‌ଚି ବାହା ଆରି କାଲ୍‌ ବାହାତ ନେ ନେତେର୍‌ ଆନାତ୍ ।" 20 ପାଚେ ମସା ଆରି ହାରଣ୍‌ ନିତ୍ରେମାପ୍ରୁତି ବଲ୍‌ ଇସାବ୍ରେ ହେ ଲାକେ କିତାର୍, ହେ ବେଡ୍‌ଗା ଅଜ଼ି ପାର ଆରି ତା ଆଡ଼୍‌ୟାର୍‌ ମୁମ୍‌ଦ ନାଗୁଡ଼୍‌ନି ଏଜ଼ୁଙ୍ଗ୍ ଜପି ଅସ୍ତାର୍; ହେବେ ୱିଜ଼ୁ ନାଗୁଡ଼୍‌ନି ଏଜ଼ୁଙ୍ଗ୍ ନେତେର୍‌ ଆତିକ୍‌ । 21 ଆରେ, ନାଗୁଡ଼୍‌ନି ମିନ୍‌କୁ ହାତିକ୍‌ ଆରି ନାଗୁଡ଼୍‌ ଗାନ୍ଦା ଆତାତ୍‌, ପାଚେ ମିସ୍ରିୟର୍‌ ନାଗୁଡ଼୍‌ନି ଏଜ଼ୁଙ୍ଗ୍‌ ଉଣ୍ଡେଙ୍ଗ୍‌ ଆଡ୍‌ୱାତାର୍‌; ମିସର୍‌ ଦେସ୍‍ନି ସବୁ ନେତେର୍ ଆତାତ୍‌ । 22 ହେପାଦ୍‌ନା ମିସ୍ରିୟ ନେ ଜାର୍‌ ଚୁଟ୍‌କିୟା ମାୟାତ ହେ ଲାକେ କିତାର୍; ପାଚେ ନିତ୍ରେମାପ୍ରୁ ବଚନ୍‌ ଇସାବ୍ରେ ପାରତି ୱାସ୍କି ଆଟ୍‌ୱା ଆତାତ୍‌ ଆରି ହେୱାନ୍‌ ହେୱାର୍‌ କାତା ୱେନ୍‌ୱାତାନ୍‌ । 23 ଇଦାଂ ପାଚେ ପାର ୱେଇ ମାସ୍‍ସି ଜାର୍‌ ଇଞ୍ଜ ହାଚାନ୍‌, ଇବେ ଜାର୍‌ ମାନ୍‌ ହିୱାତାନ୍‌ । 24 ଆରେ, ୱିଜ଼ାକାର୍‌ ମିସ୍ରିୟ ମାନାୟାର୍‌ ନାଗୁଡ଼୍‌ନି ଏଜ଼ୁଙ୍ଗ୍ ଉଣ୍ଡେଙ୍ଗ୍‌ ଆଡ୍‌ୱିତିଲେ ଉଣି ଏଜ଼ୁଙ୍ଗ୍ କାଜିଙ୍ଗ୍ ନାଗୁଡ଼୍‌ନି ଚାରିବେଣ୍‌ତାଂ କାର୍ତାର୍‌ । 25 ନିତ୍ରେମାପ୍ରୁ ନାଗୁଡ଼୍‌ତିଂ ଇଡ଼୍‌ଜି ସାତ୍ ଦିନ୍‌ ପୁରା ଆତାତ୍ ।