1 ଇଦାଂପାଚେ ବତ୍ସଲେଲ୍‌ ସିଟିମ୍‌ ମାର୍‌ତାକେ ଅଣିସ୍‌ ରି ଆତ୍‌ ଅଦା ଡେଙ୍ଗା ଆରି ଡେଡ଼୍‌ ଆତ୍‌ ଅହାର୍‌ ଆରେ ଡେଡ଼୍‌ ଆତ୍‌ ଜପି, ର ପେଡ଼ି ରଚ୍‌ଚାନ୍‌ 2 ଆରେ ଲାଗ୍‌ ହେ ବିତ୍ରେ ଆରି ବାର୍‌ତ ନିର୍ମଲ୍‌ ହନାତ କାସ୍‌ଦି ହେବେନି ଚାରିବେଣ୍‌ତାଂ ହନାନି ଅଟି କିତାନ୍‌ । 3 ଆରେ, ହେବେ ଚାରି କନାଙ୍ଗ୍ କାଜିଙ୍ଗ୍ ଚାରି ହନାବାଡ଼ା ୱାକ୍‌ତାର୍‌; ହେବେ ର ବାଗାଂ ରି ବାଡ଼ାଂ ଆରି ଆଲ୍‌ଗା ବାଗାଂ ରି ବାଡ଼ାଂ ହିତାନ୍‌ । 4 ଆରି ହେ ସିଟିମ୍‌ ମାର୍‌ତାଂ ମେହାୟ୍‌ କିଜ଼ି ହନା କାସ୍‌ତାନ୍‌ 5 ଆରି ପେଡ଼ି ପିଣ୍ଡ୍‌ନି କାଜିଙ୍ଗ୍ ପେଡ଼ିନି କଚଣ୍‌ତ ବାଡ଼ାତ ହେ କଣା ନେଚ୍‌ଚାନ୍‌ । 6 ଇଦାଂପାଚେ ହେୱାନ୍‌ ନିର୍ମଲ୍‌ ହନାତାଂ ଅଣିସ୍‌ ଆତ୍‌ କଣା ଆରି ଡେଡ଼୍‌ ଆତ୍‌ ଅହାର୍‌ ର ପାପ୍‌ଡାବାୟ୍‌ କିନି ଡାବ୍‌ଣା ରଚ୍‌ଚାର୍‌ । 7 ଆରେ, ହାରି ହନାତ ରି କିରୁବ ରଚିକିଜ଼ି ପାପ୍‌ ବାହାନି ରି ମୁଟ୍‌ଲା କାପ୍‌ଡ଼ାତ ଇଡ଼୍‌ତାନ୍‌ । 8 ହେବେନି ର କାପ୍‌ଡ଼ାତ ର କିରୁବ ଆରି ଆଲ୍‌ଗା କାପ୍‌ଡ଼ାତ ର କିରୁବ ରଚ୍‌ଚାନ୍‌ ପାପ୍‌ ବାହାନି ରି କାପ୍‌ଡ଼ାତ ରି କିରୁବତିଂ ହେବେ ମେହାୟ୍‌ କିଜ଼ି ଇଡ଼୍‌ତାନ୍‌ । 9 ଆରେ, କିରୁବର୍‌ତି ନିପ ଜପି ହାଲ୍‌ଜି ପାପ୍‌ ବାହାତ ହାଚାତ୍‌ ଆରି ହେୱାର୍‌ତି ମୁମ୍‌ ହାରି ହୁଡ଼୍‌କାଆତାର୍‌; ମାତର୍‌ ପାପ୍‌ପ୍ଡାନି କାଜିଂ କିରୁବର୍‌ତି ମୁମ୍‌ ମାଚାତ୍‌ ।

10 ତାପାଚେ ହେୱାନ୍‌ ସିଟିମ୍‌ ମାର୍‌ତାଂ ରି ଆତ୍‌ ଡେଙ୍ଗା ଆରି ର ଆତ୍‌ ଅହାର୍ ଆରି ଡେଡ଼୍‌ ଆତ୍‌ ଉଚା ର ପାଟା ରଚ୍‌ଚାନ୍‌ । 11 ଆରେ, ତା ନିର୍ମଲ୍‌ ହନାତ କାସ୍‌ତାର୍‌ ଆରି ହେବେନି ଚାରିବେଣ୍‌ତାଂ ହନାନି ଅଟି କିତାନ୍‌ । 12 ଆରେ, ହେୱାନ୍‌ ହେବେନି ଚାରିବେଣ୍‌ତାଂ ଚାରିଅଙ୍ଗଲ୍‌ନି ର କୁୱାଡ଼୍‌ କିତାନ୍‌ ଆରି ହେ କୁୱାଡ଼୍‌ନି ଚାରିବେଣ୍‌ତାଂ ହନାନି ଅଟି କିତାନ୍‌ । 13 ଆରେ ହନାତ ଚାରି ବାଡ଼ା ୱାକ୍‌ଚି ହେବେନି ଚାରି ବାଗାଂ କାଲ୍‌କୁ ଚାରି କନାତ ଇଡ଼୍‌ତାନ୍‌ । 14 ହେ ବାଡ଼ା କଚଣ୍‌ ମାର୍‌ନି ହୁଞ୍ଜ୍‌ନି କାଟେଲ୍‌ ଆରି ପାଟା ପିଣ୍ଡ୍‌ନି କାଜିଂ କଣା ଡ଼ିଞ୍ଜ୍‌ନାକା ମାଚାତ୍‌ । 15 ଆରେ, ହେୱାନ୍‌ ହେ ପାହ୍‌ନାକା ପିଣ୍ଡ୍‌ନି କାଜିଂ ସିଟିମ୍‌ ମାର୍‌ନି କଣା ରଚ୍‌ଚି ହନାତାଂ ଚାପାୟ୍‌ତାନ୍‌ । 16 ଆରେ, ହେ ପାଟାନି ଜପିନି ବାହା, ସବୁ ଇଚିସ୍‌, ହେବେନି ତାଡ଼ିୟା ଆରି ଚାମ୍‌ଚ୍‌ ଆରି ଗିନା, ୱାକ୍‌ନି କାଜିଂ ଜାଚ୍‌କା ସବୁ ନିର୍ମଲ୍‌ ହନାତ ରଚ୍‌ଚାର୍‌ ।

17 ଆରେ, ହେୱାନ୍‌ ନିର୍ମଲ୍‌ ହନାନି ର ବୈଟାମାର୍‌ ରଚ୍‌ଚାନ୍‌, ହେ ମୁଟ୍‌ଲା କଲ୍‌ନି କାମାୟ୍‌ତ ବୈଟାମାର୍‌, ହେବେନି ଗାଣ୍ଡି ଆରି କେନ୍ଦାଂ ରଚ୍‌ଚାର୍‌, ଆରେ ହେବେନି ଆକାର୍‌, ମଡ୍‌ଲା ଆରି ପୁଇ ହେବେ ରଚ୍‌ୟାତାତ୍‌ । 18 ହେ ବୈଟାମାର୍‌ନି ରକଣ୍ଡାଂ ତିନିଗଟା କେନ୍ଦାଂ ଆରେ ବୈଟାମାର୍‌ନି ବିନ୍‌ ନିପଣ୍ଡାଂ ତିନ୍‌ଗଟା କେନ୍ଦାଂ, ଇ ଚ ଗଟା କେନ୍ଦାଂ ହେବେନି କଚଣ୍‌ତ ହତ୍‌ତାତ୍‌ । 19 ଆରେ, ର କେନ୍ଦାତ ବୁଇଁଚେଣାଂପୁଇ ତିନ୍‌ ଆକାର୍‌, ମଡ୍‌ଲା ଆରି ପୁଇ, ଆରେ, ବିନ୍‌ କେନ୍ଦାତ ବୁଇଁଚେଣାଂପୁଇ ତିନ୍‌ ଆକାର୍‌, ମଡ୍‌ଲା ଆରି ପୁଇ, ଇଲାକେ ବୈଟାମାର୍‌ତାଂ ହତି ଚ କେନ୍ଦାକାଂ ମାଚାତ୍‌ । 20 ମତର୍‌ ବୈଟାମାର୍‌ତ ବୁଇଁଚେଣାଂପୁଇ ଚାରି ଆକାର୍‌ ଆରି ହେବେନି ମଡ୍‌ଲା ଆରି ପୁଇ ମାଚାତ୍‌ । 21 ଆରେ, ହେବେନି ଇମ୍‌ଣି ଚ ଗଟା କେନ୍ଦାଂ ହତିକ୍‌, ତା ଇସାପ୍‌ରେ ର କେନ୍ଦା ତାରେନ୍‌ ର ମଡ୍‌ଲା ଆରି ବିନ୍‌ କେନ୍ଦା ତାରେନ୍‌ ର ମଡ୍‌ଲା ଆରି ବିନ୍‌ କେନ୍ଦା ତାରେନ୍‌ ର ମଡ୍‌ଲା ମାଚାତ୍‌ । 22 ର ମଡ୍‌ଲା ଆରେ କେନ୍ଦା ହେବେନି ବାଗ୍‌ ଆତାତ୍‌ ଆରି ସବୁ ନିର୍ମଲ୍‌ ହନା ରଚ୍‌ଚିତ ର ମୁଟ୍‌ଲା କାମାୟ୍‌ ଆତାତ୍‌ । 23 ଆରେ, ହେୱାନ୍‌ ହେଦାଂ କାଜିଂ ସାତ୍‌ଗଟା ବୈଟାଂ, ଚିମ୍‌ଟା ଆରି ନାଣିଗଡାଂବାହା ନିର୍ମଲ୍‌ ହନାତ ରଚ୍‌ଚାର୍‌ । 24 ହେୱାନ୍‌ ର ତାଳନ୍ତ* ନିର୍ମଲ୍‌ ହନାତାକେ ହେଦାଂ ଆରି ତାପାଚେ ସବୁ ବାହା ରଚ୍‌ଚାର୍‌ ।

25 ଇଦାଂପାଚେ ହେୱାନ୍‌ ସିଟିମ୍‌ ମାର୍‌ତାଂ ର ଆତ୍‌ ଡେଙ୍ଗା, ର ଆତ୍‌ ଅହାର୍‌ ଆରି ରି ଆତ୍‌ ଉଚା ଚାରି କନା ଦୁପ୍‌ନିଗାର୍‌ଣି ରଚ୍‌ଚାନ୍‌, ତାପାଚେ କମଙ୍ଗ୍‌ସବୁ ହେବେ ବାଗ୍‌ ଆତାତ୍‌ । 26 ଆରେ, ହେଦାଂ, ହେବେନି ବାହା, ହେବେନି ଚାରି ବେଣ୍‌ତାଂ ଆରି ହେବେନି କମଙ୍ଗ୍‌ସବୁ ନିର୍ମଲ୍‌ ହନାତ ଚାପାୟ୍‌କିତାର୍‌; ଆରେ, ହେୱାନ୍‌ ହେବେନି ଚାରିବେଣ୍‌ତାଂ ହନାନି ଅଟି କିତାନ୍‌ । 27 ଆରେ, ହେବେନି ପିଣ୍ଡ୍‌ନାକା କଣା ଡ଼ିଞ୍ଜ୍‌ନି କାଜିଂ ହେବେନି ଅଟି ତାରେନ୍‌ ରି କଚଣ୍‌ତ ରି କନାତ ହନାନି ରି ରି ବାଡ଼ା ରଚ୍‌ଚାର୍‌ । 28 ଆରେ ସିଟିମ୍‌ ମାର୍‌ତାଂ କଣା କିତାର୍‌ ଆରି ହେଦାଂ ହନାତାଂ ଚାପାୟ୍‌କିତାର୍‌ । 29 ଇଦାଂପାଚେ ହେୱାନ୍‌ ଚିକାଣ୍‌କାସ୍‌ନାକା ନିର୍ମଲ୍‌ ଚିକାଣ୍‌ ଆରି ଦୁପ୍‌ନି କାଜିଂ ଗାନ୍ଦା ଜିନିସ୍‌ନି କାମାୟ୍‌ ଇସାପ୍‌ରେ ହାର୍‌ ଗାନ୍ଦାନି ଜିନିସ୍‌ ରଚ୍‌ଚାର୍‌ ।