Êxodo 35

ଜମ୍‌ନିବାର୍‌ ବିଦି ମାନିକିନାକା

1 ପାଚେ ମସା ଇସ୍ରାଏଲ୍‌-ହିମ୍‌ଣାଂତି ସବୁ ମଣ୍ଡ୍‌ଲିତିଂ ରୁଣ୍ଡାୟ୍‌ କିଜ଼ି ଇଚାନ୍‌, "ନିତ୍ରେମାପ୍ରୁ ମିଂ ଇ ସବୁ ବଚନ୍‌ ମାନିକିଦେଂ ବଲ୍‌ ହିତ୍‌ତାନ୍ନା । 2 ଚଅ ଦିନ୍‌ କାମାୟ୍‌ କିୟାନାତ୍‌, ମତର୍‌ ସାତ୍‌ ଦିନ୍‌ ମି ଲାଗାୟ୍‌ ପୁଇପୁୟା ଦିନ୍‌ ଆନାତ୍‌; ହେଦାଂ ନିତ୍ରେମାପ୍ରୁତି ଉଦେସ୍‌ତ ଗାଜା ଜମ୍‌ନିବାର୍‌ ଆନାତ୍‌, ଇନେର୍‌କି ହେ ଦିନ୍‌ କାମାୟ୍‌ କିନାର୍‌, ହେୱାନ୍ତି ପାରାଣ୍‌ ଡାଣ୍ଡ୍‌ ଆନାତ୍‌ ।" 3 ଏପେଙ୍ଗ୍‌ ଜମ୍‌ନିବାର୍‌ ଜାର୍ତି ଇମ୍‌ଣାକାପା ବାହାକିନି ବାହାତ ନାଣି ଆହି କିଉଦେର୍‌ ।

ଇଲ୍‌ନି ତୁମ୍‌ କାଜିଂ ଇନାମ୍‌

4 ଆରେ, ମସା ଇସ୍ରାଏଲ୍‌-ହିମ୍‌ଣାଂତି ସବୁ ମଣ୍ଡ୍‌ଲିତିଂ ଆରେ ଇଚାନ୍‌, "ନିତ୍ରେମାପ୍ରୁ ଇ ବଲ୍‌ ହିତ୍‌ତାନ୍ନା । 5 ଏପେଙ୍ଗ୍‌ ନିତ୍ରେମାପ୍ରୁତି କାଜିଂ ଜାର୍ ବିତ୍ରେତାଂ ଇନାମ୍‌ ରୁଣ୍ଡାୟ୍‌ କିୟାଟ୍‌; ଇନେର୍‌କି ଜାର୍‌ ଇଚାନିମାନ୍‌, ହେୱାନ୍‌ ନିତ୍ରେମାପ୍ରୁତି କାଜିଂ ହନା, ରୁପା ଆରି ପିତାଡ଼୍‌, 6 ଆରେ, ନିଲ୍ୟା ବାନି, କଦା ବାନି, ହେନ୍ଦୁର୍‌ ବାନି, ଡ଼ିଞ୍ଜ୍‌ନାକା, ହଲ୍‌ନି କୱାଣ୍‌ ନୁଲ୍‌ ଆରି ଅଡା ବୁରାଙ୍ଗ୍‌; 7 ଆରେ, ନେତେର୍‌ କିତି ମେଣ୍ଡା ତଲ୍‌, କୱାଣ୍‌ ତଲ୍‌ ୱାଡ଼ି ୱେଜ଼୍‌ଗୁ, 8 ଆରେ, ବାଡ଼୍‌ତାନି ଚିକାଣ୍‌, ଚିକାଣ୍‌କାସ୍‌ନାକା ଆରି ହାର୍‌ଗାନ୍ଦା ଆନି ଚିକାଣ୍‌, 9 ଆରେ, ଏପଦ ଆରି ନେଞ୍ଜାଡାକିନି ହେନ୍ଦ୍ରା କାଜିଂ ଗରୁଚୁନା ମଣି ସବୁ ଡାଚ୍‌ଚି କାଲ୍‌, ଇ ସବୁ ନିତ୍ରେମାପ୍ରୁତି ଇନାମ୍‌ ତାହିୱାନାଦେର୍‌ ।"

ତୁମ୍‌ ଇଲ୍‌ନି ଆଡ଼୍‌ମାଡ଼୍‌

10 ଆରେ ମି ବିତ୍ରେତାଂ ଜାଣ୍‌କେ ବୁଦିନି ଲକୁ ୱାଜ଼ି ନିତ୍ରେମାପ୍ରୁତି ଆଗେ କିଜ଼ିମାଚି ସବୁ ଜିନିସ୍‌ ରଚେର୍‌, 11 ଇଚିସ୍‌, ଇଲ୍, ହେବେନି ହାନିୱାନି ତୁମ୍‌, ଚାଉଣି, ଆକଡ଼ା, ପାଟା, ଆର୍‌ଗାଡ଼ା, ମୁଣ୍ଡା ଆରି କାଣାକିତିକଟ୍‌ଲା, 12 ଆରେ, ପେଡ଼ି, ହେବେନି କଣା ପାପ୍‍ନିକା ଆରି ପ୍ଡାକ୍ୟାତି କେନ୍‌ଚି ହେନ୍ଦ୍ରା, 13 ଆରେ, ପାଟା, ହେବେନି ପାଟ୍ୟା, ବାହା ସବୁ ଆରି ହିନି ରୁଟି, 14 ଆରେ, ଅଜଡ଼୍‌ କାଜିଂ ବୈଟାମୁଣ୍ଡା, ହେବେନି ବାହା, ବୈଟା ଆରି ବୈଟା କାଜିଂ ଚିକାଣ୍‌, 15 ଆରେ, ଦୁପ୍‌ନିଗାର୍‌ଣି, ହେବେନି କଣା, କାସ୍‌ନି ଚିକାଣ୍‌, ବାସ୍ନା ଦୁପ୍‌ନି ଆରି ଇଞ୍ଜ ହଣି ଦୁୱାର୍‌ନି ପ୍ଡାକ୍ୟାତି ହେନ୍ଦ୍ରା, 16 ଆରେ, କାଟ୍‌ ଗାର୍‌ଣି, ହେବେନି ପିତାଡ଼୍‌ ହିକ୍‌ଡ଼ିଂ, କଣା, ବାହା ସବୁ, ନୁସ୍‌ନି ବାହା ଆରି ହେବେନି ବେଦି, 17 ଆରେ, ଦୁୱେର୍‌ନି ପାର୍‌ଦା, ହେବେନି ମୁଣ୍ଡା, କାଣାକିତିକଟ୍‌ଲା କୁର୍‌ଚି ଆରି ଦୁୱେର୍‌ନି ପ୍ଡାକ୍‌ତି ହେନ୍ଦ୍ରା, 18 ଆରେ ବାହାନି କୁଟି, ଦୁୱେର୍‌ନି କୁଟି ଆରି ରିଣ୍ଡିନି ଡରି, 19 ଆରେ, ପୁଇପୁୟା ବାହାତ ହେବା କିନି କାଜିଂ ହଲ୍‌ନି ହେନ୍ଦ୍ରା, ଇଚିସ୍‌, ହାରଣ୍‌ ମାପ୍ରୁହେବାକିନାକାନ୍‌ କାଜିଂ ପୁଇପୁୟା ହେନ୍ଦ୍ରା ଆରି ମାପ୍ରୁହେବାକିନାକାନ୍‌ କାମାୟ୍‌ କାଜିଂ ତା ମାଜ଼ିର୍‌ତି ହେନ୍ଦ୍ରା, ଇ ୱିଜ଼ୁ ଜାଲ୍‌ଦି କିନାନ୍‌ ।

ଇସ୍ରାଏଲ୍‌ ଲକ୍‌ତି ଇନାମ୍‌

20 ଇଦାଂ ପାଚେ ଇସ୍ରାଏଲ୍‌ ହିମ୍‌ଣାଂତି ୱିଜ଼ୁ ମଣ୍ଡ୍‌ଲି ମସା ମୁମ୍‌ଦାଂ ହାଚାର୍‌ । 21 ଆରେ, ଇନେର୍‌ତି ମାନ୍‌ ଇନେରିଙ୍ଗ୍‌ ବୁଲ୍‌କାୟ୍‌କିତାତ୍‌ ଆରି ଇନେର୍‌ତି ଜିବୁନ୍‌ ଇନେନିଙ୍ଗ୍‌ ଇଚା କିତାତ୍‌, ହେୱାର୍‌ ହାନିୱାନି ତୁମ୍‌ ରଚ୍‌ନି କାଜିଂ ଆରି ତା ବିସ୍ରେ ସବୁ କାମାୟ୍‌ ଆରି ପୁଇପୁୟା ହେନ୍ଦ୍ରା କାଜିଂ ନିତ୍ରେମାପ୍ରୁତି ଇନାମ୍‌ ତାଇୱାତାର୍‌ । 22 ଆରେ, ଆଣ୍ଡ୍ରେନ୍‌ ଆରି କଗ୍‌ଲେ ଏଚେକ୍‌ ମାନାୟ୍‌ ଚାତୁରିଂ ମାଚାର୍‌, ହେୱାର୍‌ ୱିଜ଼ାର୍‌ ୱାଜ଼ି ତୁସ୍‌ତି, ମୁଙ୍ଗେଲ୍‌ନି ଡାଣ୍ଡି, କିତୁଲ୍‌ନି ମୁଦ୍ରା, ୱାଚ୍‌କାନି ୱାତୁସ୍‌ ଆରି ହାକ୍‌ତି ବାରବିନି ହନା ହାସ୍‌କୁ ସବୁ ତାଇୱାତାର୍‌; ୱିଜ଼ାକାର୍‌ ନିତ୍ରେମାପ୍ରୁ ଉଦେସ୍‌ତ ହନା ଇନାମ୍‌ ହିତାର୍‌ । 23 ଆରେ, ଇମ୍‌ଣାକାର୍‌ ତାକେ ନିଲ୍ୟା, ଦୁପ୍‌ନି, ହେନ୍ଦର୍‌ ବାନି, ଡ଼ିଞ୍ଜ୍‌ନି କୱାଣ୍‌ ନୁଲ୍‌, ବାଚି ବୁରା, ନେତେର୍‌ଆତି ମେଣ୍ଡା ତଲ୍‌ ଆରି କୱାଣ୍‌ ତଲ୍‌ ମାଚାତ୍‌, ହେୱାର୍‌ ୱିଜ଼ାର୍‌ ହେଦାଂ ତାଇୱାତାର୍‌ । 24 ଆରେ ଇନେନ୍‌ ରୁପା କି ପିତାଡ଼୍‌ନି ଇନାମ୍‌ ହିତାନ୍‌, ହେୱାନ୍‌ ନିତ୍ରେମାପ୍ରୁତି ଇନାମ୍‌ ତାଇୱାତାନ୍‌; ଆରେ ଇନେର୍‌ ଲାଗାଂ ହେବାନି ଇମ୍‌ଣି କାମାୟ୍‌ କାଜିଂ ସିଟିମ୍‌ ମାର୍‌ ମାଚାତ୍‌, ହେୱାନ୍‌ ହେଦାଂ ତାଇୱାତାନ୍‌ । 25 ବୁଦିକାଟି କଗ୍‌ଲେକ୍‌ ଜାର୍‌ ଜାର୍‌ କେଇଦ ନୁଲ୍‌ ରାସ୍‌ଦି ନିଲ୍ୟା ଦୁପ୍‌ନି, ହେନ୍ଦର୍‌ ବାନି ଆରି ଡ଼ିଞ୍ଜ୍‌ନି କୱାଣ୍‌ ନୁଲ୍‌ ତାଇୱାତିକ୍‌ । 26 ଆରେ, କାମାୟ୍‌ ଇମ୍‌ଣି କଗ୍‌ଲେହିମ୍‌ଣାଂ ମାନ୍‌ ଗିଆନ୍‌ତ ବାଡା ଆତାତ୍‌, ହେୱେକ୍‌ ୱିଜ଼େକ୍‌ ବାଚି ବୁରାନି ନୁଲ୍‌ ରାସ୍‌ୱାତିକ୍‌ । 27 ଆରେ ମୁଣିକାର୍‌ ଏପାଦ ଆରି ନେଞ୍ଜାଡାକି ହେନ୍ଦ୍ରା କାଜିଂ ଗରୁଚୁନା ଡାନ୍‌ଚି ମଣି, 28 ଆରେ ବଇଟା ଆରି କାସ୍‌ନି ଚିକାଣ୍‌ ଆରି ବାସ୍‌ନା ଦୁପ୍‌ନି କାଜିଂ ହାର୍‌ଗାନ୍ଦାନି ଚିକାଣ୍‌ ତାଇୱାତାର୍‌ । 29 ଇସ୍ରାଏଲ୍‌ ହିମ୍‌ଣାଂ ଇଚାତାଂ ନିତ୍ରେମାପ୍ରୁ ଉଦେସ୍‌ତ ଇନାମ୍‌ ତାଇୱାତାର୍‌; ନିତ୍ରେମାପ୍ରୁ ମସା ହୁକେ ଇନା ଇନାକା କିଦେଂ ବଲ୍‌ ହିଜ଼ି ମାଚାନ୍‌, ହେବେନି ଇନେସ୍‌ ବାନି କାମାୟ୍‌ କିନି କାଜିଂ ଇମ୍‌ଣି ଇମ୍‌ଣି ମାନାୟାର୍‌ ଆରି କଗ୍‌ଲେହିମ୍‌ଣାଂ ମାନ୍‌ ହେୱାରିଂ ମାନ୍‌ ମାଚାତ୍‌, ହେୱାର୍‌ ୱିଜ଼ାର୍‌ ଇନାମ୍‌ ତାଇୱାତାର୍‌ ।

ତୁମ୍‌ ଇଲ୍‌ ରଚ୍‌ନାକା

30 ଇଦାଂ ପାଚେ ମସା ଇସ୍ରାଏଲ୍‌ ମାଜ଼ିରିଂ ଆରେ ଇଚାନ୍‌, "ହୁଡ଼ାଟ୍‌, ନିତ୍ରେମାପ୍ରୁ ଜିହୁଦା ଲାତ୍ରାନି ହୁରତି ନାତି ଉରିତି ମାଜ଼ି ବତ୍ସଲେଲ୍‌ତିଂ ତର୍‌ ଆସ୍ତି କୁକ୍‌ତାର୍ଣ୍ଣା ।" 31 ଆରେ, ତାଙ୍ଗ୍‌ ଗିଆନ୍‌, ବୁଦି, ବିଦ୍ୟା ଆରି କାମାୟ୍‌ କିଦେଂ ଦାୟ୍‌ ପର୍‌ମେସ୍ୱର୍‌ତି ଜିବୁନ୍‌ତ ବାର୍ତି କିଜ଼ି 32 ବାନାଂ କାମାୟ୍‌ ଆରି ହନା, ରୁପା ଆରି ପିତାଡ଼୍‌ ବାନା 33 ଆରି ଡାନ୍‌ଚି ମଣିନି କରତ୍‌ ଆରି ବାରବିନି ଡ଼ଚ୍‌ନି କାମାୟ୍‌ କାଜିଂ ୱେଜ଼୍‌ଗୁ ରାସ୍‌ନାକା, ଇ ସବୁ ଡ଼ଚ୍‌ନି କାମାୟ୍‌ କିନି କାଜିଂ ହେଦେଲିଂ ଦାରା କିତାର୍ଣ୍ଣା । 34 ଆରେ, ହିକ୍ୟା ହିନି କାଜିଂ ହେୱାନ୍‌ତି ଆରି ଦାନ୍‌ ଲାତ୍ରାନି ଅହିସାମକର୍‌ ମାଜ଼ି ଅହଲିୟାବର୍‌ ମାନ୍ତ ବୁଦି ହିତାନ୍‌ । 35 ଆରେ ପତ୍‌ତି ଆରି ରଚ୍‌ନାକାନ୍‌ କାମାୟ୍‌ କିନି କାଜିଂ, ଆରେ, ନିଲ୍ୟା, ଦୁପ୍‌ନି, ହେନ୍ଦର୍‌ ବାନି ଆରି ଡ଼ିଞ୍ଜ୍‌ନି କୱାଣ୍‌ ନୁଲ୍ ସକଟ୍‌ କାମାୟ୍‌ ଆରି ରଚ୍‌ନାକାନ୍‌ କାମାୟ୍‌ କିନି କାଜିଂ, ଇଚିସ୍‌, ପ୍ରନି କାମାୟ୍‌ ଆରି ବାନାଂ କାମାୟ୍‌ କିନି କାଜିଂ ହେୱାର୍‌ ମାନ୍‌ତିଂ ଗିଆନ୍‌ତ ବାର୍ତି କିତାର୍ଣ୍ଣା ।