Êxodo 8

ରି ଡାଣ୍ଡ୍‌ ପାଣାଙ୍ଗ୍‌

1 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏନେଙ୍ଗ୍ ପାର ଲାଗାଂ ହାଲ୍‌ଜି ହେୱାନିଂ ଇନା, ନିତ୍ରେମାପ୍ରୁ ଇ କାତା ଇନାନ୍‌, ମା ହେବା କିନି କାଜିଙ୍ଗ୍ ମା ଲକୁରିଂ ହାଞ୍ଜେଙ୍ଗ୍‌ ହିଦା । 2 ମାତର୍‌ ଜଦି ଏପେଙ୍ଗ୍ ହେୱାରିଙ୍ଗ୍ ହାଜେଙ୍ଗ୍ ମୁନା କିନାଦେର୍‌, ଲାଗିଂ ହୁଡ଼ାଟ୍‌, ଆନ୍‌ ପାଣାଂ ହୁଦାଂ ମି ସବୁ ଦେସ୍‌ତିଂ ଡଣ୍ଡ୍‌ ହିଦ୍‍ନାଙ୍ଗ୍ । 3 ନାଗୁଡ଼୍‌ ପାଣାଂ ହୁଦାଂ ପୁରା ଆନାତ୍‌, ପାଚେ ହେ ୱିଜ଼ୁ ପାଣାଂ ନିଙ୍ଗ୍‍ଜି ମି ଇଞ୍ଜ, ହୁଞ୍ଜ୍‌ନିତାକେ, ପାସ୍ତିତାକେ, ମି ଆଡ଼ିୟାର୍‌ ଇଞ୍ଜ, ମି ମାନାୟାର୍‌ ଜପି, ମି ହଲିତାକେ ଆରି ଅଟା ପୁଲାୟ୍‌କିନି କଣ୍ତିତ ହଣିକ୍‌; 4 ଆରେ, ପାଣାଂ ମି ଆରି ମି ମାନାୟାର୍‌ତି ଆରି ଆଡ଼ିୟାର୍‌ ଜପି ଦୁମ୍‌ନିକ୍‌ ।" 5 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାନ୍‌, "ହାରଣଂ ୱେଚା, ଏନେଙ୍ଗ୍ ଜଡ଼ିତି, ଜାରାଣ୍‌ ଆରି ବାନ୍ଦ୍‌ ଜପି ଜାର୍‌ତି ବେଡ୍‌ଗା କେଇ ଲାମାୟ୍‌ କିଜ଼ି ମିସର୍‌ ଦେସ୍‌ ଜପି ପାଣାଂ ତାହିକିୟାଟ୍‌ ।" 6 ପାଚେ ହାରଣ୍‌ ମିସର୍‌ନି ସବୁ ଏଜ଼ୁ ଜପି ଜାର୍‌ କେଇ ଲାମାୟ୍‌ କିତିଲେ, ପାଣାଂ ନିଙ୍ଗ୍‍ଜି ମିସର୍‌ ଦେସ୍ତ ମେଙ୍ଗ୍‌ୟା ଆତିକ୍‌ । 7 ହେପାଦ୍‌ନା ଚୁଟ୍‌କିୟାର୍‌ ତା ମାୟାତ ହେ ଲାକେ କିଜ଼ି ମିସର୍‌ ଦେସ୍ ଜପି ପାଣାଂ ତାହିୱାତାର୍‌ । 8 ପାଚେ ପାର ମସା ଆରି ହାରଣ୍‌ତିଂ କୁକ୍‌ଚି ଇଚାନ୍, "ମାଙ୍ଗ୍‌ତାଂ ଆରି ମା ମାନାୟାର୍‌ତାଂ ଇ ସବୁ ପାଣାଂ ପେଜ଼୍‌ନି କାଜିଙ୍ଗ୍ ନିତ୍ରେମାପ୍ରୁ ଲାଗାଂ ପାର୍ତାନା କିୟାଟ୍‌; ପାଚେ ଆପେଙ୍ଗ୍ ନିତ୍ରେମାପ୍ରୁ ଉଦେସ୍‌ତ ପୁଜା କିନି କାଜିଙ୍ଗ୍ ମାନାୟାରିଂ ହାଞ୍ଜେଙ୍ଗ୍ ହିଦ୍‌ନାପ୍‌ ।" 9 ଲାଗିଂ ମସା ପାରଙ୍ଗ୍‌ ଇଚାନ୍, "ନା ଜପି ଗାର୍‌ବି କିୟାଟ୍‌; ପାଣାଂ ସବୁ ଇନେସ୍‌ ନିଙ୍ଗ୍‌ତାଂ ଆରି ନି ଇଞ୍ଜାଙ୍ଗ୍‌ ଦେହାଜ଼ି କେବଲ୍‌ ନିଲି ନାଗୁଡ଼୍‌ତ ମାନ୍‌ଗିନିକ୍‌, ନି ଆରି ନି ଆଡ଼ିୟାର୍‌ତି ଆରି ମାନାୟାର୍‌ କାଜିଂ ନିତ୍ରେମାପ୍ରୁ ମୁମ୍‌ଦ ଇନେୱାଡ଼ାଙ୍ଗ୍‌ ଇ ପାର୍ତାନା କିନାଙ୍ଗ୍‌ ?" 10 ହେୱାନ୍ ଇଚାନ୍, "ୱିଗାଲିଂ କିୟାଟ୍‌ ।" ହେପାଦ୍‌ନା ମସା ଇଚାନ୍‌, ମା ନିତ୍ରେମାପ୍ରୁ ପରମେସ୍ୱର୍‌ ଲାକେ ଇନେର୍‌ ଆକାୟ୍‌, ଇଦାଂ ଇନେସ୍‌ ଏନେଙ୍ଗ୍‌ ପୁନାୟ୍‌, ଇଦାଂ କାଜିଂ ନି ବଚନ୍‌ ଇସାବ୍ରେ ଆୟେତ୍‌ । 11 ପାଣାଂ ନିତାକେଣ୍ତାଂ ଆରି ନି ଇଲ୍‌, ଆଡ଼ିଏନ୍‌ ଆରି ୱିଜ଼ାର୍‌ ମାନାୟାର୍‌ତାଂ ଦେହାଜ଼ି କେବଲ୍‌ ନିଲ ନାଗୁଡ଼୍‌ତ ମାନ୍‌ଗିନିକ୍‌ । 12 ଇଦାଂ ପାଚେ ମସା ଆରି ହାରଣ୍‌ ପାର ଲାଗାଂ ବାର୍‌ତ ହାଚାନ୍‌; ଆରେ, ମସା ପାର ବିରୁତାଂ ତାହିୱାତି ପାଣାଂ ବିସ୍ରେ ନିତ୍ରେମାପ୍ରୁ ଲାଗାଂ ପାର୍ତାନା କିତାନ୍‌ । 13 ତା ପାଚେ ନିତ୍ରେମାପ୍ରୁ ମସାଂ ବଚନ୍‌ ଇସାବ୍ରେ କିତିଲେ, ଇଞ୍ଜ, ହାକ୍‌ଡ଼ି ଆରି ଜମିତ ସବୁ ପାଣାଂ ହାତିକ୍‌ । 14 ଲାଗିଂ ମାନାୟାର୍‌ ହେ ସବୁକାଂ ରବେ କିଜ଼ି ଗାଦି କିତିଲେ, ଦେସ୍‌ ଗାନ୍ଦା ଆଜ଼ି ହାଚାତ୍ । 15 ମତର୍‌ ପାର କସ୍ଟ ଗୁଚାତିଲେ ନିତ୍ରେମାପ୍ରୁତି ବଚନ୍‌ ପାର୍‌ମାଣ ଜାର୍‌ ୱାସ୍କି ଆଟ୍‌ୱା କିତାନ୍‌ ଆରି ହେୱାର୍‌ତି ବଚନ୍‌ ମାନ୍‌ହିୱାତାର୍‌ ।

ତିନ୍‌ଗଟା ଡାଣ୍ଡ୍‌ ପେନ୍‌କୁ ପ୍ଡିକୁ

16 ପାଚେ ନିତ୍ରେମାପ୍ରୁ ମସାଂ ଇଚାନ୍‌, "ହାରଣ୍‌ତିଂ ଇନା, ସବୁ ମିସର୍‌ ଦେସ୍‌ତ ଇନେସ୍‌ ପେନ୍‌କୁ ପ୍ଡିକୁ ଆତିସ୍‌, ଇଦାଂ ଏପେଙ୍ଗ୍‌ ଜାର୍‌ ବେଡ୍‌ଗା ପେଜ଼୍‌ଦି ବୁଇଁନି ଦୁଡ଼ିତ ଇଡ଼ାଟ୍‌ ।" 17 ତା ପାଚେ ହେୱାର୍‌ ହେ ଲାକେ କିତାର୍; ହାରଣ୍‌ ବେଡ୍‌ଗା କେଇ ଲାମାୟ୍‌ କିଜ଼ି ବୁଇଁନି ଦୁଡ଼ିତ ଇଡ଼୍‌ତିଲେ, ମାନାୟ୍‌ ଆରି ପସୁଙ୍ଗ୍‌ତାକେ ପେନ୍‌କୁ ପ୍ଡିକୁ ଆତିକ୍‌; ଆରେ, ମିସର୍‌ ଦେସ୍‌ନି ବୁଇଁନି ୱିଜ଼ୁ ଦୁଡ଼ି ପେନ୍‌କୁ ପ୍ଡିକୁ ଆତିକ୍‌ । 18 ହେପାଦ୍‌ନା ଚୁଟ୍‌କିୟାର୍‌ ଜାର୍‌ ଜାର୍‌ ମାୟାତ ହେ ବାନି ପେନ୍‌କୁ ପ୍ଡିକୁ ଉବ୍‌ଜାୟ୍‌ କିଦେଂ ଚେସ୍ଟା କିତାର୍‌, ମତର୍‌ ଆଡ୍‌ୱାତାର୍‌; ହେବେ ମାନାୟ୍‌ ଆରି ପସୁଙ୍ଗ୍‌ ଜପି ପେନ୍‌କୁ ପ୍ଡିକୁ ଆତିକ୍‌ । 19 ଲାଗିଂ ଚୁଟ୍‌କିୟାର୍‌ ପାରଙ୍ଗ୍‌ ଇଚାର୍‌, "ଇୱାନ୍‌ ତ ପରମେସ୍ୱର୍‌ତି ୱାଚ୍‌କାଂ କିତି କାମାୟ୍‌," ଆତିସ୍ପା ନିତ୍ରେମାପ୍ରୁ ବଚନ୍‌ ଇସାବ୍ରେ ପାରତି ୱାସ୍କି ଆଟ୍‌ୱା ଆତାତ୍‌, ଆରେ, ହେୱାର୍‌ତି ବଚନ୍‌ତ ମାନ୍‌ହିୱାତାର୍‌ ।

ଚାରିଗଟା ଡାଣ୍ଡ୍‌ ଗାଜା ୱିଜ଼ାଙ୍ଗ୍‌

20 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାନ୍‌, "ଏନେଙ୍ଗ୍ ନାଣାଙ୍ଗେ ନିଙ୍ଗ୍‍ଜି ପାର ମୁମ୍‍ଦ ନିଲା; ହୁଡ଼ା, ହେୱାନ୍‌ ଏଜ଼ୁଙ୍ଗ୍ ଲାଗାଂ ୱାତିସ୍‌, ଏନେଙ୍ଗ୍ ତାଙ୍ଗେଙ୍ଗ୍ ଇ କାତା ଇନାୟ୍‌, ନିତ୍ରେମାପ୍ରୁ ଇଞ୍ଚାନ୍‌, ନା ହେବା କିଦେଂ ମା ମାନାୟାରିଂ ହାଞ୍ଜେଙ୍ଗ୍ ହିଦା । 21 ଆରେ, ଜଦି ମା ଲକୁରିଂ ହାଞ୍ଜେଙ୍ଗ୍ ହିଉଦେର୍‌, ଜଦି ଅନେଙ୍ଗ୍ ମି ଜପି ଆରି ମି ଆଡ଼ିୟାର୍‌ ଜପି ଆରି ମି ଲକୁର୍‌ ଜପି ଆରି ଆରେ ମି ଇଲ୍ ବିତ୍ରେ ଇ ଲାକେ ନସ୍ଟ କିଦ୍‌ନି ୱିଜ଼ାଙ୍ଗ୍‌ ପକ୍ତାନାଙ୍ଗ୍‌ ଜେ, ତା ପାଚେ ମିସ୍ରିୟର୍‌ ଇଲ୍‌ ଆରି ବାହାଜମି ପୁରା ଆନାତ୍‌ । 22 ଆରେ, ପୁର୍ତି ବିତ୍ରେ କେବଲ୍‌ ଆନ୍ ନିତ୍ରେମାପ୍ରୁ, ଇଦାଂ ନିଙ୍ଗେଙ୍ଗ୍‌ ୱେଚ୍‌ଚେଦେଂ ଇଞ୍ଜି ହେ ଦିନ୍‌ ମା ଲକୁ ମାନାକା ବାହା ଗସନ ରାଜି ବିନେ କିନାସ୍‌; ହେବେ ଦଂସକାଦିନି ୱିଜ଼ାଙ୍ଗ୍‌ ଆଉକ୍‌ ।" 23 ଆପ୍‌ ଜାର୍‌ ଲକୁରିଂ ଆରି ମି ମାନାୟାର୍‌ ବିତ୍ରେ ବାଗ୍‌ କିନାପ୍‌; ୱିଗାଲିଂ ଇ ଚିନ୍‌ ଆନାତ୍‌ । 24 ଇଦାଂ ପାଚେ ନିତ୍ରେମାପ୍ରୁ ହେ ଲାକେ କିତାନ୍‌; ପାଚେ ପାରତି ଆରି ତା ଆଡ଼ିୟାର୍‌ ଇଞ୍ଜ ଦଂସକାଦିନି ଗାଜା ୱିଜ଼ାଙ୍ଗ୍‌ ଏକିତିକ୍‌; ଆରେ, ସବୁ ମିସର୍‌ ଦେସ୍‌ ଦଂସକାଦି କାଜିଂ ନସ୍ଟ ଆତାତ୍‌ । 25 ହେପାଦ୍‌ନା ପାର ମସା ଆରି ହାରଣ୍‌ତିଂ କୁକ୍‌ଚି ଇଚାନ୍‌, "ଏପେଙ୍ଗ୍ ହାଲ୍‌ଜି ଇ ଦେସ୍‍ତ ବିତ୍ରେ ମି ପର୍‌ମେସ୍ୱର୍‌ତି ଉଦେସ୍‌ତ ପୁଜା କିୟାଟ୍‌ ।"

26 "ତା ପାଚେ ମସା ଇଚାନ୍‌," ହେଦାଂ କିନାକା ହାର୍‌ ଆକାୟ୍‌; ଇନେକିଦେଂକି, "ହେଦାଂ କିତିସ୍‌ ମା ନିତ୍ରେମାପ୍ରୁ ପରମେସ୍ୱର୍‌ତି ଉଦେସ୍‌ତ ମିସ୍ରିୟର୍‌ତି ଗିଣ୍‌ ପୁଜା କିୟାନାତ୍‌; ହୁଡ଼ାଟ୍‌, ମିସ୍ରିୟର୍‌ତି କାଣ୍‌କୁକାଂ ହେୱାର୍‌ତି ଗିଣ୍‌ ପୁଜା କିତାର୍‌, ହେୱାର୍‌ କି ମାଙ୍ଗେଙ୍ଗ୍‌ କାଲ୍‌କୁ ଇଡ଼୍‌ଜି ଅସ୍ତୁର୍‌ ? 27 ଲାଗିଂ ଆପେଙ୍ଗ୍‌ ତିନ୍‌ ଦିନ୍‌ନି ହାଜ଼ି ବାଟାତ ହାଲ୍‌ଜି ମା ନିତ୍ରେମାପ୍ରୁ ପରମେସ୍ୱର୍‌ ଇମ୍‌ଣି ବଲ୍‌ ହିଦ୍‌ନାନ୍‌, ତା ପାଚେ ତା ଉଦେସ୍‍ତ ପୁଜା କିନାପ୍‌ ।"

28 ପାଚେ ପାର ଇଚାନ୍‌, "ଆନ୍‌ ମିଙ୍ଗେଙ୍ଗ୍ ହାଜେଙ୍ଗ୍ ହିଦ୍‌ନାଂ, ଏପେଙ୍ଗ୍ ବାଟାତ ହାଲ୍‌ଜି ଜାର୍‌ ନିତ୍ରେମାପ୍ରୁ ପରମେସ୍ୱର୍‌ ଉଦେସ୍‌ତ ପୁଜା କିୟାଟ୍‌; ମତର୍‌ ଦେହା ହାଲ୍‌ମାଟ୍‌, ଆରେ, ମା କାଜିଙ୍ଗ୍ ପାର୍ତାନା କିୟାଟ୍‌ ।"

29 ଇଦାଂ ପାଚେ ମସା ଇଚାନ୍‌, "ହୁଡ଼ାଟ୍‌, ଆନ୍‌ ନି ଲାଗାଂ ହାଲ୍‌ଜି ନିତ୍ରେମାପ୍ରୁ ମୁମ୍‌ଦ ପାର୍ତାନା କିନାଙ୍ଗ୍, ହେବେ ନିଦାଂ ନି ଆଡ଼୍‌ୟାର୍‌ତି ଆରି ନି ମାନାୟାର୍‌ ଲାଗାଂ ୱିଗାଲିଂ ସବୁ ଦଂସକ୍‌ ୱିଜ଼ାଙ୍ଗ୍‌ ଦେହା ଆନିକ୍‌; ମତର୍‌ ନିତ୍ରେମାପ୍ରୁ ଉଦେସ୍‌ତ ପୁଜା କିନି କାଜିଙ୍ଗ୍ ମାନାୟାରିଂ ହାଞ୍ଜେଙ୍ଗ୍‌ହିଦ୍‌ନି ବିସ୍ରେ ଆରେରଗ ଆଟ୍‌କାୟ୍‌ କିଦ୍‌ମା ।" 30 ପାଚେ ମସା ପାର ଲାଗାଂ ବାର୍‌ତ ହାଲ୍‌ଜି ନିତ୍ରେମାପ୍ରୁ ଲାଗାଂ ପାର୍ତନା କିତାନ୍‌ । 31 ତା ପାଚେ ନିତ୍ରେମାପ୍ରୁ ମସାତି ପାର୍ତାନା ଇସାବ୍ରେ ପାରଙ୍ଗ୍‌ତାଂ ତା ଆଡ଼୍‌ୟାର୍‌ ଆରି ମାନାୟାର୍‌ ୱିଜ଼ାକାର୍‌ତାଂ ସବୁ ଦଂସକାଦି ୱିଜ଼ାଙ୍ଗ୍‌ ଦେହା କିତାନ୍‌; ରଞ୍ଜାଙ୍ଗ୍‍ପା ହିଲ୍‌ୱାତାଦ୍‌ଦେ । 32 ଇବେତାଂ ପା ପାର ଜାର୍‌ ୱାସ୍କି ଆଟ୍‌ୱା କିତାନ୍‌ ଆରି ମାନାୟାରିଂ ହାଞ୍ଜେଙ୍ଗ୍‌ ହିୱାତାନ୍‌ ।