1 ଇଦାଂପାଚେ ମିସର୍‌ ଦେସ୍‌ତ ନିତ୍ରେମାପ୍ରୁ ମସା ଆରି ହାରଣ୍‌ତିଂ ଇଚାନ୍‌, 2 ଇ ମାସ୍‌ ମିଦାଂ ମୁଡ଼୍‌ ମାସ୍‌ ଆରି ବାର୍‌ହୁନି ପର୍‌ତୁମ୍‌ ମାସ୍‌ ଆନାତ୍‌ । 3 ଏପେଙ୍ଗ୍ ଇସ୍ରାଏଲ୍‌ ସବୁ ମଣ୍ଡ୍‌ଲିତିଂ ଇ କାତା ଇନାଟ୍‌, ଇ ମାସ୍‌ନି ଦସ୍‌ ଦିନ୍ତାଙ୍ଗ୍‌ ମିଦାଂ ୱିଜ଼ାର୍ ମାନାୟାର୍‌ ଦାଦିର୍ ଇଲ୍‌ ଇସାବ୍ରେ ୱିଜ଼ାର୍ କୁଟୁମ୍‌ କାଜିଂ ରଞ୍ଜାଙ୍ଗ୍‌ ରଞ୍ଜାଙ୍ଗ୍‌ ମେଣ୍ଡାହିମ୍‌ଣା ଅନାଦେର୍‌ । 4 ଆରେ, ରଞ୍ଜାଙ୍ଗ୍‌ ମେଣ୍ଡାହିମ୍‌ଣା ଅନି କାଜିଂ ଜଦି ଇମ୍‌ଣି ଟଣ୍ଡାର୍‌ ଅଲପ୍‌ ଆନାର୍‌, ଲାଗିଂ ହେୱାନ୍‌ ଆରି ତା ଇଲ୍‌ ଲାଗାଂନି ଟଣ୍ଡାର୍‌, ପାରାଣିଂନି ଲମର୍‌ ଇସାବ୍ରେ ର ମେଣ୍ଡାହିମ୍‌ଣା ଅନାର୍‌; ଏପେଙ୍ଗ୍‌ ୱିଜ଼ାର୍‌ତି ତିନି ସାକ୍ତି ଇସାବ୍ରେ ମେଣ୍ଡାହିମ୍‌ଣାତି ଇସାବ୍‌ କିନାଦେର୍‌ । 5 ଏପେଙ୍ଗ୍ ମେଣ୍ଡାମାନ୍ଦା କି ଅଡାମାନ୍ଦା ବିତ୍ରେତାଂ ମେଣ୍ଡା ଅନାଦେର୍‌; ହେଦାଂ ଦସ୍‌ହିଲାକା, ର ବାର୍‌ହୁନିକା ଆରି ବକାମେଣ୍ଡା ଆନାକା ମାନାତ୍‌; 6 ହେ ମାସ୍‌ନି ଚଉଦ ଦିନ୍‌ ମିକାଲିଂ ହେଦେଲିଂ ବନ୍ଦ୍‌ କିଜ଼ି ଇଟ୍‌ନାଦେର୍‌; ଇଦାଂପାଚେ ଇସ୍ରାଏଲ୍‌ ମାନାୟାର୍‌ ୱିଜ଼ାର୍‌ କୁଟୁମ୍‌ ମିକାଲିଂ ହେ ମେଣ୍ଡାତିଂ ଅହ୍‌ନାଦେର୍‌ । 7 ଆରେ, ମାନାୟାର୍‌ ତା ଅଲପ୍‌ ନେତେର୍‌ ଅଜ଼ି ଇମ୍‌ଣି ଇମ୍‌ଣି ଇଲ୍‌ ବିତ୍ରେ ମେଣ୍ଡା ଜେଇ ତିନାର୍‌, ହେ ହେ ଇଲ୍‌ ଦୁୱେର୍‌ନି ରିଣ୍ଡି ବାପାକାଂ ଆରି ନିଦାଣ୍‌ ଜପି ହେଦାଂ କାସ୍‌ନାଦେର୍‌ । 8 ଆରେ ହେ ମିକାଲିଂ ତା ଜେଇ ତିନାଦେର୍‌; ନାଣିତ ହୁସ୍‌ଦି ୱାଚ୍‌ଚି ରୁଟି ଆରି କେନି କୁଚା ଲାହାଂ ହେଦାଂ ତିନାଦେର୍‌ । 9 ଏପେଙ୍ଗ୍ ହେ ଜେଇ ୱେୱାତାକା କି ଏଜ଼ୁକାଂ ହାର୍‌ କିଜ଼ି ୱାଞ୍ଜୁଦେର୍‌, ମତର୍‌ ନାଣିତ ତା କାପ୍‌ଡ଼ା ଆରି କୁଟା ଗାଗାଡ଼୍‌ ୱିଜ଼ୁ ହୁସ୍‌ଦି ତିନାଦେର୍‌ । 10 ଆରେ, ନାଣାଙ୍ଗେ ପାତେକ୍‌ ହେବେନିକା ଇଚୁକ୍‌ ଇଟୁଦେର୍‌; ଜଦି ନାଣାଙ୍ଗେ ପାତେକ୍‌ ଇଚୁକ୍‌ ବାକି ମାନ୍‌ଗାନାତ୍‌, ହେଦାଂ ନାଣିତ ନସ୍ଟ କିନାଦେର୍‌ । 11 ଇ ବାନି ଏପେଙ୍ଗ୍‌ ହେଦାଂ ତିନାଦେର୍‌, ଇଚିସ୍‌ ମେଙ୍ଗାଙ୍ଗ୍‌ ଗାଚ୍‌ଚି ପାନାତ ପାଣ୍ଡାଇଙ୍ଗ୍‌ ତୁସ୍‌ଦି କେଇଦ ବେଡ୍‌ଗା ଅଜ଼଼ି ହେଦାଂ ତିନାଦେର୍; ଇଦାଂ ନିତ୍ରେମାପ୍ରୁତି ନିସ୍ତାର୍‌ ପାର୍ବୁ । 12 ଇନେକିଦେଂକି ଆପେଙ୍ଗ୍‌ ନେଜେଙ୍ଗ୍‌ ମିକାଲିଂ ମିସର୍‌ ଦେସ୍ତ ପା ହିଜ଼ି ମିସର୍‌ ଦେସ୍‌ନି ମାନାୟ୍‌ ଆରି ପସୁନି ସବୁ ପର୍‌ତୁମ୍‌ ଜଲମ୍‌ଆତିକ୍ୟାଂ ଅହ୍‌ନାଙ୍ଗ୍‌; ଆରେ, ମିସ୍ରିୟ ୱିଜ଼ାର୍‌ ପେନ୍‌ନି ବିଚାର୍‌ କିଜ଼ି ଡଣ୍ଡ୍‌ ହିନାପ୍‌; ଆନ୍‌ ନିତ୍ରେମାପ୍ରୁ ।

13 ଲାଗିଙ୍ଗ୍ ଏପେଙ୍ଗ୍ ଇମ୍‌ଣି ଇମ୍‌ଣି ଇଞ୍ଜ ମାନାଦେର୍‌, ହେ ହେ ଇଞ୍ଜ ହେ ନେତେର୍‌ ଚିନ୍‌ ଇସାବ୍ରେ ମାନ୍‌ଗାନାତ୍‌; ଆରେ ଆନ୍‌ ମିସର୍‌ ଦେସ୍‌ତିଂ ଡଣ୍ଡ୍‌ ହିନି ସମୁତ ହେ ନେତେର୍‌ ହୁଡ଼୍‌ତାର୍‌, ମିଙ୍ଗେଙ୍ଗ୍‌ ପିସ୍ତି ଆଗେ ହାନାସ୍‌, ଆରେ, ଅହ୍‌ନାଙ୍ଗ୍‌ ଇନାକା ନସ୍ଟ ମି କାଜିଂ ଗିଟା ଆଦୁତ୍‌ । 14 ଆରେ ହେ ଦିନ୍‌ ମିଦାଂ ଏତୁ ୱାନାତ୍‌, ଆରେ, ଏପେଙ୍ଗ୍ ହେ ଦିନ୍‌ତିଂ ନିତ୍ରେମାପ୍ରୁ ପାର୍ବୁ ଲାକେ ପାଲି କିନାଦେର୍‌; ଜୁଗ୍‌ଜୁଗ୍‌ ୱିଜ଼୍‌ୱି କାଡ଼୍‌ନି ବିଦି ନାଙ୍ଗ୍‌ ଇ ପାର୍ବୁ ପାଲି କିନାଦେର୍‌ ।

15 "ଏପେଙ୍ଗ୍ ସାତ୍‌ ଦିନ୍‌ ପାତେକ୍‌ ୱାଚ୍‌ଚି ରୁଟି ତିନାଦେର୍‌; ବେସିକିଜ଼ି ପର୍‌ତୁମ୍‌ ଦିନ୍‌ ଜାର୍‌ ଜାର୍‌ ଇଞ୍ଜାଙ୍ଗ୍‌ ରୁଟି ଦେହା କିନାଦେର୍‌, ଇନେକିଦେଂକି ଇମ୍‌ଣାକାର୍‌ ପର୍‌ତୁମ୍‌ ଦିନ୍‌ତାଂ ସାତ୍‌ ଦିନ୍‌ ପାତେକ୍‌ ୱାଚ୍‌ଚି ମେହାତି ରୁଟି ତିନାଦେର୍‌, ହେ ପାରାଣି ଇସ୍ରାଏଲ୍‌ ବିତ୍ରେତାଂ ଅଲ୍‌ଗା ଆନାନ୍‌ । 16 ଆରେ ପର୍‌ତୁମ୍‌ ଦିନ୍‌ତ ମିଦାଂ ପୁଇପୁୟା ସବା ଆନାତ୍‌, ଆରେ, ସାତ୍‌ ଦିନ୍‍ତାଂ ପା ମିଦାଂ ପୁଇପୁୟା ସବା ଆନାତ୍‌; ଆରେ ହେ ରି ଦିନ୍‌ ସବୁ ପାରାଣିକାଂ କାଦିନି ଜାଗାଡ଼୍‌ ପିସ୍ତି ଆରେ ଇମ୍‌ଣି କାମାୟ୍‌ କିୟାଆଉତ୍‌, କେବଲ୍‌ ହେ କାମାୟ୍‌ ଏପେଙ୍ଗ୍‌ କିଦେଂ ଆଡ୍‌ନାଦେର୍‌ । 17 ଇ ବାନି ୱାଚ୍‌ଚି ରୁଟିନି ପାର୍ବୁ ପାଲି କିନାଦେର୍‌, ଇନାକିଦେଂକି ହେ ଦିନ୍‌ତ ନେ ଆପ୍‌ ମିଦାଂ ମେଲ୍ୟାରିଂ ମିସର୍‌ ଦେସ୍‌ତାଂ ହପ୍‌ଚି ତାହିୱାନାପ୍‌; ଲାଗିଂ ଏପେଙ୍ଗ୍ ମାନାୟ୍‌ହାନି ପାତେକ୍‌ ୱିଜ଼୍‌ୱିଦିନ୍‌ନି ବିଦି ନାଙ୍ଗେଙ୍ଗ୍ ଇ ଦିନ୍‌ ପାଲି କିନାଦେର୍‌ । 18 ଏପେଙ୍ଗ୍ ପର୍‌ତୁମ୍‌ ମାସ୍‌ନି ଚଉଦ ଦିନ୍‌ନି ମ୍ଡିକା ସମୁତାଂ କଡ଼େଏକ୍‌ ଦିନ୍‌ନି ମ୍ଡିକା ପାତେକ୍‌ ୱାଚ୍‌ଚି ରୁଟି ତିନାଦେର୍‌ । 19 ସାତ୍‌ଦିନ୍‌ ପାତେକ୍‌ ମି ଇଞ୍ଜ ଅଲପ୍‌ ମତର୍‌ ୱାଚ୍‌ଚ ମାନୁତ୍‌, ଇନାକିଦେଂକି ବିଦେସି କି ଜାର୍‌ଦେସ୍ତି ଇମ୍‌ଣାକାର୍‌ ଇ ବିତ୍ରେ ହଇନି ମେହା ଜିନିସ୍‌ ତିନାର୍‌, ହେ ପାରାଣି ଇସ୍ରାଏଲ୍‌ ମଣ୍ଡ୍‌ଲିତାଂ ବିନେ ଆନାତ୍‌ । 20 ଏପେଙ୍ଗ୍ ହଇନାକା ମେହା ଇମ୍‌ଣି ଜିନିସ୍‌ ତିନୁଦେର୍‌, ଏପେଙ୍ଗ୍ ଜାର୍‌ ଜାର୍‌ ସବୁ ବାହା କିନି ବାହାତ ହଇନି ରୁଟି ତିନାଦେର୍‌ ।"

21 ହେପାଦ୍‌ନା ମସା ଇସ୍ରାଏଲ୍‌ନି ୱିଜ଼ାର୍‌ ବୁଡ଼ାଲୁରିଂ କୁକ୍‌ଚି ଇଚାନ୍‌, "ଏପେଙ୍ଗ୍ ଜାର୍‌ କାଜିଂ ଜାର୍‌ ଜାର୍‌ ଲକ୍‌ବାକ୍‌ ଇସାବ୍ରେ ର ର ମେଣ୍ଡାହିମ୍‌ଣା ହପ୍‌ଚି ଅଜ଼ି ନିସ୍ତାର୍‌ ପାର୍ବୁନି ପୁଜା କିୟାଟ୍‌ । 22 ଆରେ, ର ମୁଟା ଏସବ ଇ ସବୁ ଅସି କଣ୍ଡିନି ନେତେର୍‌ତ କ୍ଡୁଚି ଦୁୱେର୍‌ନି ନିଦାଣ୍‌ତ ଆରି ରି ବାନ୍ଦାଙ୍ଗ୍‌ ଜପି କଣ୍ଡିନି ନେତେର୍‌ କାସାଟ୍‌; ଆରେ, ନାଣାଙ୍ଗେ ପାତେକ୍‌ ମିଦାଂ ଇନେର୍‌ ଇଲ୍‌ ଦୁୱେର୍‌ନି ବାର୍ତ ହାଲ୍‌ମାଟ୍‌ । 23 ଇନାକିଦେଂକି ନିତ୍ରେମାପ୍ରୁ ମିସ୍ରିୟରିଂ ଅହ୍‌ନି କାଜିଙ୍ଗ୍ ହେୱାର୍‌ ବିତ୍ରେ ହିଜ଼ି ହାନାର୍‌; ହେବେ ନିଦାଣ୍‌ ଆରି ରି ବାପାଙ୍ଗ୍‌ ଜପି ହେ ନେତେର୍‌ ହୁଡ଼ୁତାର୍‌, ନିତ୍ରେମାପ୍ରୁ ହେ ଦୁୱେର୍‌ ପିସ୍ତି ଆଗେ ହାନାନ୍‌, ମି ଇଞ୍ଜ ଅହ୍‌ନାକାନିଂ ହଣ୍‌ଜି ଅସ୍ତେଙ୍ଗ୍‌ ହିଉନ୍‌ । 24 ଆରେ, ଏପେଙ୍ଗ୍ ଆରି ଜୁଗ୍‌ ଜୁଗ୍‌ ପାତେକ୍‌ ମି ହିମ୍‌ଣାଂ ବିଦି ଇସାବ୍ରେ ନାଙ୍ଗେଙ୍ଗ୍ ଇ ରିତି ପାଲି କିନାଦେର୍ । 25 ଆରେ ନିତ୍ରେମାପ୍ରୁ ଜାର୍‌ ପାର୍‌ମାଣ୍‌ ଇସାବ୍ରେ; ମିଙ୍ଗେଙ୍ଗ୍ ଇମ୍‌ଣି ଦେସ୍ ହିଦ୍‌ନାନ୍‌, ହେବେ ହଟିସ୍‌, ଇ ହେବା ମାନି କିନାଦେର୍‌ । 26 ଆରେ, ମିଦାଂ ଇ ହେବାନି ଉଦେସ୍‌ ଇନାକା ? 27 ଇଦାଂ ମି ମାଜ଼ିର୍‌ ୱେନ୍‌ବାତ୍‌ତିସ୍‌, ଏପେଙ୍ଗ୍ ଇନାଦେର୍‌, ଇଦାଂ ନିତ୍ରେମାପ୍ରୁତି ଉଦେସ୍‍ତ ନିସ୍ତାର୍‌ ପାର୍ବୁନି ପୁଜା; ଇନାକିଦେଂକି ମିସ୍ରିୟରିଂ ଅହ୍‌ନି ୱେଡ଼ାଲିଂ ହେୱାନ୍‌ ମିସର୍‌ତ ଜାର୍‌ଦେସ୍ତି ଇସ୍ରାଏଲ୍‌ ମାଜ଼ିର୍‌ତି ଇଲ୍‌ ସବୁ ପିସ୍ତି ଆଗେ ହାଲ୍‌ଜି ମା ଇଲ୍‌ ରାକ୍ୟା କିଜ଼ି ମାଚାନ୍‌ ।" ହେପାଦ୍‌ନା ମାନାୟାର୍‌ କାପ୍‌ଡ଼ା ତାରେନ୍‌ କିଜ଼ି ଜୱାର୍‌ କିତାର୍‌ । 28 ପାଚେ ଇସ୍ରାଏଲ୍‌ ମାଜ଼ିର୍‌ ହାଲ୍‌ଜି ହେ ଲାକେ କିତାର୍; ଆରେ ହେୱାର୍‌ ମସା ଆରି ହାରଣ୍‌ କାଜିଙ୍ଗ୍ ନିତ୍ରେମାପ୍ରୁତି ବଲ୍‌ ଇସାବ୍ରେ କାମାୟ୍‌ କିତାର୍‌ ।

29 ଇଦାଂପାଚେ ପିଲା ନେକେର୍‌ ସମୁତ ନିତ୍ରେମାପ୍ରୁ ଗାଦିତ ପାରତି ପର୍‌ତୁମ୍‌ ଉବ୍‌ଜାତି ମାଜ଼ିତାଂ କାରାକୁପନି ବନ୍ଦିଇଞ୍ଜ ପର୍‌ତୁମ୍‌ ଉବ୍‌ଜାତି ମାଜ଼ି ପାତେକ୍‌ ମିସର୍‌ ଦେସ୍ତ ୱିଜ଼ାର୍‌ ପର୍‌ତୁମ୍‌ ଉବ୍‌ଜାତି ମାଜ଼ିରିଂ ଆରି ପସୁଙ୍ଗ୍‌ ପର୍‌ତୁମ୍‌ ଉବ୍‌ଜାତି ମେଣ୍ଡାହିମ୍‌ଣାକାଂ ଅସ୍ତାର୍‌ । 30 ପାଚେ ପାର ଆରି ତା ଆଡ଼୍‌ୟାର୍‌ ଆରି ମିସ୍ରିୟ ମାନାୟ୍ ୱିଜ଼ାକାର୍‌ ମିକାଲିଂ ନିଙ୍ଗ୍‌ତାର୍‌; ଆରେ, ମିସର୍‌ ଦେସ୍ତ ବେସି ଆଡ଼୍‌ବାନାକା ଆତାତ୍‌; ଇନାକିଦେଂକି ଏଲେଙ୍ଗ୍‌ ଇଲ୍‌ ହିଲାତାତ୍‌ ଇମ୍‌ଣି ଇଞ୍ଜ ଇନେର୍‌ ହାୱାଦାଂ ମାଚାର୍‌ । 31 ପାଚେ ମିକାଲିଂ ପାର, ମସା ଆରି ହାରଣ୍‌ତିଂ କୁକ୍‌ଚି ଇଚାନ୍‌, "ଏପେଙ୍ଗ୍ ଆରି ଇସ୍ରାଏଲ୍‌ ଲାତ୍ରା ନିଙ୍ଗ୍‍ଜି ମା ମାନାୟାର୍‌ ବିତ୍ରେତାଂ ହତାଟ୍‌, ମି କାତା ଇସାବ୍ରେ ନିତ୍ରେମାପ୍ରୁତି ହେବା କିନି କାଜିଂ ହାଲାଟ୍‌ । 32 ମି କାତା ଇସାବ୍ରେ କଡିଙ୍ଗ୍‌ ମାନ୍ଦା ୱିଜ଼ୁକାଂ ଅଜ଼ି ହାଲାଟ୍‌ ଆରି ମାଙ୍ଗେଙ୍ଗ୍‌ ପା ଆର୍ସିବାଦ୍‌ କିଦା ।"

33 ହେପାଦ୍‌ନା ମିସ୍ରିୟର୍‌ ମାନାୟାରିଂ ବେଗି ଦେସ୍‌ତାଂ ପକ୍‌ନି କାଜିଂ ବିଲ୍‌କି ଆତାର୍‌; ଇନାକିଦେଂକି ହେୱାର୍‌ ଇଚାର୍‌, "ଆପେଙ୍ଗ୍‌ ୱିଜ଼ାକାପ୍ ହାତି ଲାକେ ଆତାପ୍‌ନା ।" 34 ପାଚେ ଚାଟ୍‌କାୟ୍‌କିତି ମଇଦା ହଇନାକା ମେହା ଆନି ଆଗେ, ମାନାୟାର୍‌ ହେଦାଂ ଅଜ଼ି ମଇଦା ଚାଟ୍‌କାୟ୍‌କିନି ବାହା ସବୁ ଜାର୍‌ ଜାର୍‌ ହେନ୍ଦ୍ରାତ ଗାଚ୍‌ଚି ନିପିତ ଅତାର୍‌ । 35 ଆରେ ଇସ୍ରାଏଲ୍‌-ମାଜ଼ିର୍‌ ମସାତି କାତା ଇସାବ୍ରେ ମିସ୍ରିୟରିଂ ରୁପା ହାସ୍‌କୁ, ହନା ହାସ୍‌କୁ ଆରି ହେନ୍ଦ୍ରା ଏନ୍ତାର୍‌ । 36 ପାଚେ ନିତ୍ରେମାପ୍ରୁ ମିସ୍ରିୟର୍‌ତି କାଣ୍‌କୁକାଂ ମାନାୟାରିଂ ଦୟା କିଦେଂ ହେୱାର୍‌ ହେୱେରିଂ ଇନାକା ଏନ୍ତାର୍‌, ହେୱାର୍‌ ହେଦାଂ ହିତାର୍‌ । ଇ ବାନି, ହେୱାର୍‌ ମିସ୍ରିୟର୍‌ତି ଦାନ୍‌ କ୍ଡିସ୍ତି ଅତାର୍‌ ।

37 ଇଦାଂପାଚେ ଇସ୍ରାଏଲ୍‌ ମାଜ଼ିର୍‌ କାଡ଼୍‌ଦେର୍‌ ପିସ୍ତି କମ୍‌ସେକମ୍‌ ଚଅ ଲକ୍ୟ ଆଣ୍ଡ୍ରାଙ୍ଗ୍‌ ପାନା କାଲ୍‌ଦାଂ ରାମିସେସ୍‌ତାଂ ସୁକ୍‌କତତିଂ ହାଚାର୍‌ । 38 ଆରେ, ମେହାତି ମାନାୟାର୍‌ତି ର ବେସି ମାନାୟାର୍‌ ଆରି କଡିଙ୍ଗ୍‌ ମାନ୍ଦା ବେସି ପସୁଙ୍ଗ୍‌ ହେୱାଙ୍ଗ୍‌ ଲାହାଂ ହାଚାର୍‌ । 39 ଇଦାଂ ପାଚେ ହେୱାର୍‌ ମିସର୍‌ତାଂ ତାତି ଚାଟ୍‌କାୟ୍‌କିତି ମଇଦାତ ହଇନି ରୁଟି ରଚ୍‌ଚାର୍‌; ଇନାକିଦେଂକି ହେଦାଂ ହଇନାକା ମେହା ଆୱାଦାଂ ମାଚାତ୍‌; ହେଦାଂ କାଜିଙ୍ଗ୍ ବିଲମ୍‌ କିୱିତିଲେ ଜାର୍‌ ଜାର୍‌ କାଜିଙ୍ଗ୍ ଅଲପ୍‌ କାଦି ରଚ୍‌ଚେଂ ଆଡ୍‌ୱାଦାଂ ମାଚାର୍‌ । 40 ଇସ୍ରାଏଲ୍‌ ଲାତ୍ରା ଚାରିସ ତିରିସ୍‌ ବାର୍ହୁ ପାତେକ୍‌ ମିସର୍‌ ଦେସ୍ତ ବାହା କିଜ଼ି ମାଚାର୍ । 41 ହେ ଚାର୍‌ସ ତିରିସ୍‌ ବାର୍ହୁ ହାରିହାରା, ହେ ଦିନ୍‌ତ ନିତ୍ରେମାପ୍ରୁତି ମେଲ୍ୟାର୍‌ ୱିଜ଼ାର୍‌ ମିସର୍‌ତାଂ ହତାର୍‌ । 42 ମିସର୍‌ ଦେସ୍‌ତାଂ ହେୱାର୍‌ ହତି କାଜିଙ୍ଗ୍ ହେଦାଂ ନିତ୍ରେମାପ୍ରୁତି ଉଦେସ୍‌ତ ବେସି ପାଲି କିନି ମ୍ଡିକା; ହେଦାଂ ନିତ୍ରେମାପ୍ରୁତି ମ୍ଡିକା ଇଞ୍ଜି ଇସ୍ରାଏଲ୍‌ ମାଜ଼ିର୍‌ତି ମାନାୟ୍‌ହାନି ପାତେକ୍‌ ବେସି ପାଲି କିନାକା ଆନାତ୍‌ ।

43 ଆରେ ନିତ୍ରେମାପ୍ରୁ ମସା ଆରି ହାରଣ୍‌ତିଂ ଇଚାନ୍‌, "ନିସ୍ତାର୍‌ ପାର୍ବୁନି ଇ ବିଦି; ଇମ୍‌ଣି ବିଦେସ୍‌ନି ମାନାୟ୍‌ ହେଦାଂ ତିନୁନ୍‌ । 44 ମତର୍‌ ରୁପା ହୁଦାଂ କଡ଼୍‌ତି ଆଡ଼ିଏନ୍‌ ୱିଜ଼ାର୍‌ ଆଡ଼୍‌ୟାର୍‌ ସୁନତ୍‌ ଆତିସ୍‌ ଚିଞ୍ଜେଙ୍ଗ୍‌ ଆଡ୍‌ନାଦେର୍‌; 45 ଇମ୍‌ଣି ବିଦେସି କି କୁଲିଆ ଆଡ଼ିଏନ୍‌ ହେଦାଂ ଚିଞ୍ଜେଙ୍ଗ୍‌ ଆଡୁନ୍‌ । 46 ର ଇଲ୍‌ ବିତ୍ରେ ହେଦାଂ ତିନ୍ୟା ଆନାତ୍‌, ଏପେଙ୍ଗ୍ ହେ ଜେଇନି ଅଲପ୍‌ ମତର୍‌ ଇଲ୍‌ ବାର୍‌ତ ଅମାଟ୍‌; ନଲେ ତାଦି ର ପ୍ଡେନ୍‌ ପା ଡ୍ରିଙ୍ଗ୍‌ଗୁତ୍‌ । 47 ଇସ୍ରାଏଲ୍‌ନି ସବୁ ମଣ୍ଡ୍‌ଲି ହେଦାଂ ପାଲି କିନାର୍‌ । 48 ଆରେ, ମି ଲାହାଂ ଜାର୍‌ଦେସ୍ତମାନାକାନ୍‌ ଇମ୍‌ଣି ବିଦେସି ମାନାୟ୍‌ ଜଦି ନିତ୍ରେମାପ୍ରୁତି ନିସ୍ତାର୍‌ ପାର୍ବୁ ପାଲି କିଦେଂ ଇଚା କିନାନ୍‌, ତେବେ ତା କୁଟୁମ୍‌ନି ସବୁ ଆଣ୍ଡ୍ରାଙ୍ଗ୍‌ ସୁନତ୍‌ ଆଏର୍‌, ତା ପାଚେ ହେୱାନ୍‌ ଲାଗେ ୱାଜ଼ି ପାର୍ବୁ ପାଲି କିଏନ୍‌; ପାଚେ ହେୱାନ୍‌ ଦେସ୍ତ ଉବ୍‌ଜାତି ମାନାୟ୍‌ ଲାକେ ଆନାନ୍‌; ମତର୍‌ ଇମ୍‌ଣି ସୁନତ୍‌ ଆୱିତି ମାନାୟ୍‌ ହେଦାଂ ତିନୁନ୍‌ । 49 ଆରେ ଦେସ୍ତ ଉବ୍‌ଜାତି ମାନାୟ୍‌ ଆରି ମି ବିତ୍ରେ ଜାର୍‌ଦେସ୍ତବାହାକିତି ବିଦେସି ମାନାୟ୍‌ କାଜିଂ ରଞ୍ଜି ବିଦି ଆନାତ୍‌ ।" 50 ପାଚେ ଇସ୍ରାଏଲ୍‌ନି ୱିଜ଼ାର୍‌ ମାଜ଼ିର୍‌ ଇ ବାନି କିତାର୍‌; ମସା ଆରି ହାରଣ୍‌ କାଜିଂ ନିତ୍ରେମାପ୍ରୁତି ବଲ୍‌ ଇନେସ୍‌ ମାଚାତ୍‌, ହେ ଲାକେ ହେୱାର୍‌ କିତାର୍‌ । 51 ଇ ବାନି ନିତ୍ରେମାପ୍ରୁ ହେ ଦିନ୍‌ ମେଲ୍ୟାର୍‌ କୁଦାତିଂ ଇସ୍ରାଏଲ୍‌ ମାଜ଼ିରିଂ ମିସର୍‌ ଦେସ୍‌ତାଂ ହପ୍‌ଚି ତାହିୱାତାର୍‌ ।