1 ଇଦାଂପାଚେ ନିତ୍ରେମାପ୍ରୁ ମସା ଇଚାନ୍‌, 2 "ଇସ୍ରାଏଲ୍‌ ମାଜ଼ିରିଂ ବିତ୍ରେ ପୁଇପୁୟା ମାନାୟ୍‌ ଆୟେର୍‌ କି ପସୁ ଆୟେତ୍‌, ଇମ୍‌ଣାକାର୍‌ ପର୍‌ତୁମ୍‌ ଉବ୍‌ଜା ଆନାନ୍‌, ହେୱାନ୍‌ ପର୍‌ତୁମ୍‌ ଉବ୍‌ଜାତାକାନ୍‌ ୱିଜ଼ାକାରିଂ ମା ଉଦେସ୍‌ତ ତାଡ; ହେଦାଂ ମାଦାଂ ଆନାତ୍‌ ।"

3 ଇଦାଂ ପାଚେ ମସା ମାନାୟାରିଂ ଇଚାନ୍‌, ଇ ଦିନ୍‌ ଏତୁ କିୟାଟ୍‌, ଇନାକିଦେଂକି ଇ ଦିନ୍‌ତ ଏପେଙ୍ଗ୍ ଆଡ଼ିୟାର୍‌ ଇଞ୍ଜ ଇସାବ୍ରେ ମିସର୍‌ତାଂ ହତାଦେର୍‌, ଆରେ ନିତ୍ରେମାପ୍ରୁ ବାପାଙ୍ଗ୍‌ ସାକ୍ତି ହୁଦାଂ ହେବେତାଂ ମିଙ୍ଗେଙ୍ଗ୍‌ ତାହିୱାତାନ୍‌; ଇବେ ହଇନାକା ମେହା ରୁଟି ତିନ୍ୟା ଆଉତ୍‌ । 4 ଏପେଙ୍ଗ୍‌ ଆବିବ୍‌ ତର୍‌ନି ପର୍‌ତୁମ୍‌ ମାସ୍ତ ଇ ଦିନ୍‌ତ ହତାଦେର୍‌ । 5 ଆରେ କିଣାନିୟ, ହିବିୟ, ଇମରିୟ, ହିତିୟ, ଆରି ଜିବୁସିୟ ମାନାୟାରିଂ ଇମ୍‌ଣି ଦେସ୍‌ ମିଙ୍ଗେଙ୍ଗ୍ ହିଦ୍‌ଦେଂ ନିତ୍ରେମାପ୍ରୁ ମି ଆକର୍‌ଦାଦିର୍‌ ଲାଗାଂ ପାର୍ମାଣ୍‌ କିଜ଼ି ମାଚାର୍‌, ହେ ପାଲ୍‌ ଆରି ପୁକିହତ୍‌ନି ଦେସ୍‌ତିଂ ଏଚେକାଡ଼୍‌ଦ ହେୱାନ୍‌ ମିଙ୍ଗେଙ୍ଗ୍ ତାହିୱାଦ୍‌ନାନ୍‌, ହେ ସମୁତ ଏପେଙ୍ଗ୍ ଇ ମାସ୍ତ ଇ ହେବାନି କାମାୟ୍‌ କିନାଦେର୍‌ । 6 ସାତ୍‌ଦିନ୍‌ ପାତେକ୍‌ ଇନାକା ହଇୱି ରୁଟି ତିନାଦେର୍‌ ଆରି ସାତ୍‌ ଦିନ୍‌ତାଂ ନିତ୍ରେମାପ୍ରୁତି ଉଦେସ୍‌ତ ପାର୍ବୁ ପାଲି କିୟାଟ୍‌ । 7 ଆରେ, ହେ ସାତ୍‌ଦିନ୍‌ ପାତେକ୍‌ ହଇୱି ରୁଟି ତିନ୍ୟାନାତ୍‌ ଆରି ମି ଲାଗାଂ ହଇୱି ମେହା ରୁଟି ଚଞ୍ଜୁତ୍‌, ଆରେ ମିଦାଂ ସବୁ ଦେସ୍‌ ବିତ୍ରେ ହଇନାକା ହୁଡ଼୍‌ୟା ଆଉତ୍‌ । 8 ଆରେ, ହେ ଦିନ୍‌ ଏପେଙ୍ଗ୍ ଜାର୍‌ ମାଜ଼ିଙ୍ଗ୍‌ ଇନାଦେର୍‌, "ମିସର୍‌ତାଂ ଆସେଙ୍ଗ୍‌ ହତ୍‌ନିହିଂ ନିତ୍ରେମାପ୍ରୁ ମା କାଜିଂ ଇମ୍‌ଣି ଇମ୍‌ଣି କାମାୟ୍‌ କିଜ଼ି ମାଚାନ୍‌, ହେ ସବୁନି ଏତୁ କାଜିଂ ଇ ପାର୍ବୁ ଆନାତ୍‌ । 9 ଆରେ, ନିତ୍ରେମାପ୍ରୁତି ବିଦି ଇନେସ୍‌ ମି ୱେଇଦ ମାନାତ୍‌, ଇଦାଂ କାଜିଙ୍ଗ୍ ଇଦାଂ ଚିନ୍‌ ଲାକେ ମି କେଇଦ ଆରି ଏତୁନି ଉପାୟ୍‌ ଇସାବ୍ରେ ମି କାଣ୍‌କୁ ରିଣ୍ଡି ମାଦି ମାନ୍‌ଗାନାତ୍‌; ଇନେକିଦେଂକି ନିତ୍ରେମାପ୍ରୁ ସାକ୍ତିନି କେଇ ହୁଦାଂ ମିସର୍‌ତାଂ ମିଙ୍ଗେଙ୍ଗ୍‌ ହପ୍‌ଚି ତାଇୱାତାନ୍ନା । 10 ଇଦାଂ କାଜିଙ୍ଗ୍ ସମୁ ଇସାବ୍ରେ ମି କାଜିଂ ପାତି ବାର୍ହୁ ଇ ବିଦି ପାଲି କିନାଦେର୍‌ । 11 ନିତ୍ରେମାପ୍ରୁ ମି ଆରି ମି ଆକର୍‌ଦାଦିରିଂ ଲାଗାଂ ଇମ୍‌ଣି ପାର୍ମାଣ୍‌ କିତାର୍ଣ୍ଣା, ତା ଇସାବ୍ରେ ହେୱାନ୍‌ ଏଚେକାଡ଼୍‌ଦ କିଣାନିୟ ମାନାୟାର୍‌ତି ଦେସ୍‌ତ ହଟ୍‌ପିତିଲେ ମିଙ୍ଗେଙ୍ଗ୍‌ ହେଦାଂ ହିଦ୍‌ନାନ୍‌; 12 ହେପାଦ୍‌ନା ଏପେଙ୍ଗ୍ ପର୍‌ତୁମ୍‌ ଉବ୍‌ଜାତି ସବୁ ଗରବ୍‌ ପାଡ଼୍‌ ଆରି ମି ପସୁତାଂ ଉବ୍‌ଜାତି ୱିଜ଼ୁ ପର୍‌ତୁମ୍‌ ଗରବ୍‌ ପାଡ଼୍‌ ନିତ୍ରେମାପ୍ରୁ ଉଦେସ୍‌ତ ଆଲ୍‌ଗା କିନାଦେର୍‌; ଆଣ୍ଡ୍ରା ହିମ୍‌ଣାଂ ନିତ୍ରେମାପ୍ରୁତି ଆନାର୍‌ । 13 ଆରେ, ଏପେଙ୍ଗ୍ ମେଣ୍ଡାହିମ୍‌ଣା ହିସି ୱିଜ଼ୁ ପର୍‌ତୁମ୍‌ ଉବ୍‌ଜାତି ଗଦତିଂ ମୁକ୍‌ଡ଼ାୟ୍‌ କିନାଦେର୍‌; ଜଦି ମୁକ୍‌ଡ଼ାୟ୍‌ କିୱିତିସ୍‌, ତେବେ ତା ଗାଡେଲ୍‌ ଡ୍ରିକ୍‌ନାଦେର୍‌; ମତର୍‌ ମି ମାଜ଼ିର୍‌ ବିତ୍ରେତାଂ ମାନାୟ୍‌ତି ପର୍‌ତୁମ୍‌ ଉବ୍‌ଜାତି ୱିଜ଼ାରିଂ ମୁକ୍‌ଡ଼ାୟ୍‌ କିନାକା ମାନାତ୍‌ । 14 ଆରେ ପାଚେ କାଡ଼୍‌ନି ମି ମାଜ଼ି ଜଦି ୱେନ୍‌ବାଆଦ୍‌ନାନ୍‌, ଇଦାଂ ଇନାକା ? ଲାଗିଂ ଏପ୍‌ ଇନାଦେର୍‌, ନିତ୍ରେମାପ୍ରୁ ଏଚେକାଡ଼୍‌ଦ ମାଙ୍ଗେଙ୍ଗ୍ ଜାର୍‌ ବାପାଙ୍ଗ୍‌ ସାକ୍ତି ହୁକେ ଆଡ଼ିଏନ୍‌ ଇଲ୍‌ ଇସାବ୍ରେ ମିସର୍‌ତାଂ ହପ୍‌ତାନ୍‌, 15 ହେପାଦ୍‌ନା ପାର ମାଙ୍ଗେଙ୍ଗ୍ ହାଞ୍ଜେଙ୍ଗ୍ ହିଦ୍‌ନି କାଜିଂ ଆଟ୍‌ୱା ଆନାର୍‌, ନିତ୍ରେମାପ୍ରୁ ମିସର୍‌ ଦେସ୍ତ ମାନାୟ୍‌ ଆରି ପସୁନି ୱିଜ଼ୁ ପର୍‌ତୁମ୍‌ ଉବ୍‌ଜାତି ମାଜ଼ିରିଂ ଅସ୍ତି ମାଚାର୍‌; ଇଦାଂ କାଜିଂ ଆସେଙ୍ଗ୍‌ ପର୍‌ତୁମ୍‌ ଉବ୍‌ଜାତି ହିମ୍‌ଣାୱାକ୍‌ଡ଼ାକାଂ ନିତ୍ରେମାପ୍ରୁ ଉଦେସ୍‌ତ ପୁଜା କିନାସ୍‌; ମତର୍‌ ମା ପର୍‌ତୁମ୍‌ ଉବ୍‌ଜାତି ମାଜ଼ି ୱିଜ଼ାକାରିଂ ମୁକ୍‌ଡ଼ାୟ୍‌ କିଏନ୍‌ । 16 ଇଦାଂ ଚିନ୍ ଇସାବ୍ରେ ମି କେଇଦ ଆରି ଉସ୍ପିତି ଇସାବ୍ରେ ମି କାଣ୍‌କୁ ରିଣ୍ଡି ମାଦି ବାହାତ ମାନ୍‌ଗାନାତ୍‌; ହେଦାଂ କାଜିଙ୍ଗ୍ ନିତ୍ରେମାପ୍ରୁ ବାପାଙ୍ଗ୍‌ ସାକ୍ତିତ ମାଙ୍ଗେଙ୍ଗ୍ ମିସର୍‌ତାଂ ହପ୍‌ଚି ତାହିୱାତାନ୍‌ ।"

17 ଇଦାଂପାଚେ ପାର ମାନାୟାରିଂ ହାଞ୍ଜେଙ୍ଗ୍ ହିନାନ୍‌, ପଲେସ୍ଟିୟ ମାନାୟାର୍‌ତି ଦେସ୍‌ତିଂ ହାନି ହାଜ଼ି ଲାଗେ ନେ ପର୍‌ମେସ୍ୱର୍‌ ହେ ହାଜ଼ିତ ହେୱାରିଂ ହାଲି କିୱାତାନ୍‌; ହେଦାଂ କାଜିଂ ପରମେସ୍ୱର୍‌ ଇଚାନ୍‌, "ଏଚେକାଡ଼୍‌ଦ ମାନାୟାର୍‌ ଜୁଜ୍‌ ହୁଡ଼୍‌ନାର୍‌ ହେୱାର୍‌ ଜାର୍‌ ଜାର୍‌ତିଂ ମାନ୍‌ତିଂ ବାଦ୍‌ଲାୟ୍‌ କିଜ଼ି ମିସର୍‌ତ ହାଞ୍ଜେଙ୍ଗ୍‌ ଆଡ୍‌ନାର୍‌ ।" 18 ଇଦାଂ କାଜିଙ୍ଗ୍ ପର୍‌ମେସ୍ୱର୍‌ ହେୱାରିଂ ସୁପ୍‌ ହାମ୍‌ଦୁର୍‌ତ ବାଲିବାଟାନି ବାଙ୍ଗ୍‌ଟା ହାଜ଼ିତ ହାଲି କିତାର୍‌ ଆରି ଇସ୍ରାଏଲ୍‌ ମାଜ଼ିର୍‌ ରଞ୍ଜ୍‌ଜି ମିସର୍‌ତାଂ ହାଚାର୍‌ ।

19 ଆରେ, ମସା ଜସେପ୍‌ତି ପ୍ଡେନ୍‌ ଜାର୍‌ ଲାହାଂ ଅତାନ୍‌; ଇନାକିଦେଂକି ହେୱାନ୍‌ ଇସ୍ରାଏଲ୍‌ ମାଜ଼ିରିଂ ଆଟ୍‌ୱା ପାର୍ମାଣ୍‌ କିୟ୍‌କିଜ଼ି ମାଚାନ୍‌, "ପର୍‌ମେସ୍ୱର୍‌ ଆତିସ୍ପା ମିଦାଂ ଡେକ୍‌ନାର୍‌; ହେ ସମୁତ ଏପେଙ୍ଗ୍ ଜାର୍‌ ହୁଦାଂ ନା ପ୍ଡେନ୍‌ ଇ ବାହାତାଂ ଅନାଦେର୍‌ ।"

20 ଇଦାଂ ପାଚେ ହେୱାର୍‌ ସୁକ୍‌କତତାଂ ହାଲ୍‌ଜି ବାଟାନି ଦାରାନି ଏତମ୍‌ତ କେପ୍‌ କିଜ଼ି ମାଚାର୍‌ । 21 ହେୱାର୍‌ ଇନେସ୍‌ ୱେଡ଼ାଲିଂ ଆରି ନାଣାଲିଂ ହାଞ୍ଜେଙ୍ଗ୍‌ ଆଡ୍‌ନାର୍‌, ଇଦାଂ କାଜିଂ ନିତ୍ରେମାପ୍ରୁ ୱେଡ଼ାଲିଂ ହାଜ଼ି କାଡାୟ୍‌କିନି କାଜିଂ ବାଦାଡ଼୍‌ମୁଣ୍ଡାତ ଆରି ମିକାଲିଂ ଅଜଡ଼୍‌ ହିନି କାଜିଙ୍ଗ୍ ନାଣିମୁଣ୍ଡା ମାନ୍‌ଜି ହେୱାର୍‌ ଆଗେ ଆଗେ ହାଚାର୍‌; 22 ହେୱାନ୍‌ ମାନାୟାର୍‌ ମୁମ୍‌ଦାଂ ୱେଡ଼ାଲିଂ ବାଦାଡ଼୍‌ମୁଣ୍ଡା ଆରି ନାଣାଲିଂ ନାଣିମୁଣ୍ଡା ହାଲି କିୱାତାର୍‌ ।