1 ଏନ୍‌ ମିଚ୍‌କାତା ନିକୁୟ୍‌; ଦସି ସାକି ଆଜ଼ି କୁର୍ଲିୟାଙ୍ଗ୍‌ ସାଇଜ କିଉୟ୍‌ । 2 ଏନ୍‌ ବାନ୍ୟାକାମାୟ୍‌ କିଦେଂ ବେସି ମାନାୟ୍‌ନି ପାଚେ ହାଲ୍‌ମା, ଆରେ, ନିୟାୟ୍‌ ବିଚାର୍‌ ବିନ୍‌ନିକା କିଦେଂ କାଜିଂ ବେସି ଲକୁନି ପାକ୍ୟା ଆଜ଼ି ଉଲ୍‌ଟିକାତା କିମାଟ୍‌; 3 ଇ ବିଚାର୍‌ତ ଅର୍କିତ୍‌ତିଂ ମୁକ୍‌ମେଟ୍‌ କିଉଦେର୍‌ । 4 ଏନ୍‌ ଜାର୍‌ ସତ୍ରୁନି କଡି କି ଗଦତିଂ ହାଜ଼ି ବାଣାସି ହାନାକା ହୁଡ଼୍‌ତିସ୍‌, ନିଜେ ତା ଲାଗାୟ୍‌ ତାଂ ଅସିହାନାଦେର୍‌ । 5 ଜଦି ଏପ୍‌ ଜାର୍‌ ସାତ୍ରୁତି ଗଦତିଂ ବଜ୍‌ ତାରେନ୍‌ ଆର୍ଜିମାନାକା ହୁଡ଼୍‌ତିସ୍‌, ତାଂ ପିସ୍ତି ହାଞ୍ଜେଙ୍ଗ୍‌ ଚିମ୍ରା ଆଡ, ଏପ୍‌ ନିଜେ ତା ଲାହାଂ ତାଂ ମୁକ୍‌ଡ଼ାୟ୍‌ କିନାଦେର୍‌ । 6 ଅର୍କିତ୍‌ତି ବିଚାର୍‌ତ ଏନ୍‌ ତା କାଜିଂ ଅନ୍ୟାୟ୍‌ କିଉଦେର୍‌ । 7 ମିଚ୍‌ ବିସ୍ରେତାଂ ଜାର୍‌ତିଂ ଦେହା ଇଟାଟ୍‌; ଆରେ, ଅଦସିଂ ଆରି ଦାର୍ମିତିଂ ନସ୍ଟ କିମାଟ୍‌; ଇନେକିଦେଂକି ଆପ୍‌ ଦୁସ୍ଟତିଂ ଦସ୍‌ କିଉପ୍‌ । 8 ଏପେଙ୍ଗ୍‌ ଲାଞ୍ଚ୍‌ ଅଉଦେର୍‌, ଇନେକିଦେଂକି ଲାଞ୍ଚ୍‌ କାଣ୍‌ଗା ମାନି ମାନାୟ୍‌ତିଂ କାଣା କିନାତ୍‌ ଆରି ଦାର୍ମିର୍‌ ବଚନ୍‌ ପଲ୍ୟା କିନାତ୍‌ । 9 ଏପ୍‌ ବିଦେସ୍ୟା କାଜିଂ ନାହାୟ୍‌ କିମାଟ୍‌, ଇନେକିଦେଂକି ଏନ୍‌ ବିଦେସ୍‌ନି ମାନ୍‌ ପୁନାଦେରା, ଇନାକିଦେଂକି ଏପେଙ୍ଗ୍‌ ମିସର୍‌ ଦେସ୍‌ତ ବିଦେସ୍ୟା ମାଚାଦେର୍‌ ।

10 ଆରେ ଏପେଙ୍ଗ୍‌ ଜାର୍‌ ବୁମିତ ଚଅ ବାର୍ହୁ ପାତେକ୍‌ ବିୟାନ୍‌ ୱିତ୍‌ନାଦେର୍‌ ଆରି ହେବେତାଂ ଉବ୍‌ଜାତି ତାସ୍‌ ରୁଣ୍ଡାୟ୍‌ କିନାଦେର୍‌ । 11 ମତର୍‌ ସାତ୍‌ ବାର୍ହୁତ ତାଂ ଜମି କିନାଦେର୍‌ ଆରି ପାଡ଼୍ୟା ଇଟ୍‌ନାଦେର୍‌; ହେବେ ମି ଅର୍କିତ୍‌ଲଗୁ ଚିଞ୍ଜେଙ୍ଗ୍‌ ଗାଟାନାର୍‌; ହେୱାର୍‌ ଇନାକା ବାକି ଇଟ୍‌ନାର୍‌, ହେଦାଂ ରାନ୍ତି ପସୁଙ୍ଗ୍‌ ତିନିକ୍‌ । ଆରେ, ଏପ୍‌ ଅଙ୍ଗୁର୍‌ ବାଡ଼୍‌ ଆରି ଜିତ୍‌ ମାର୍‌ କାଜିଂ ପା ହେଲାକେ କିନାଦେର୍‌ । 12 ଏପେଙ୍ଗ୍‌ ଚଅ ବାର୍ହୁ ଦିନ୍‌ ନି କାମାୟ୍‌ କିଜ଼ି ସାତ୍‌ ବାର୍ହୁ ଜମ୍‌ନାଦେର୍‌, ହେବେ ମି ଅର୍‌କିତାର୍‌ ଚିଞ୍ଜେଙ୍ଗ୍‌ ଗାଟାନାର୍‌, କଡି ଆରି ଗଦଂ ତିନିକ୍‌, ଆରେ, ନି ଆଡ଼ିଏଣି ମାଜ଼ି ଆରି ବିଦେସ୍‌ନି ମାନାୟ୍‌ ସାନ୍ତି ଗାଟାନାର୍‌ ।

13 ଆପ୍‌ ମିଂ ଇନାକା ଇନାକା ଇଞ୍ଚାପ୍‌ନା, ହେସବୁ ବିସ୍ରେ ଜାଗ୍ରତ୍‌ ଆଡ; ବିନ୍‌ ପେନ୍‌କୁନି ତର୍‌ ଏତ୍‌ କିୟ୍‌ କିମାଟ୍‌, କି ମି ମୁମ୍‌ଦାଂ ହେଦାଂ ୱେନ୍ୟା ଆମେତ୍‌ ।

14 ଏପେଙ୍ଗ୍‌ ବାର୍ହେକ୍‌ ବିତ୍ରେ ତିନ୍‌ ହଟ୍‌ ମା ଉଦେସ୍‌ତାଂ ପାର୍ବୁ ମାନି କିନାଦେର୍‌ । 15 ହଇୱି ରୁଟି ପାର୍ବୁ ମାନି କିନାଦେର୍; ମା ବଲ୍‌ଇସାବ୍ରେ ଆବିବ୍‌ ମାସ୍‍ନି ସମାନ୍‌ ସମୁତ ସାତ୍‌ ଦିନ୍‌ ହଇୱି ରୁଟି ତିନାଦେର୍‌, ଇନେକିଦେଂକି ଏପେଙ୍ଗ୍‌ ହେ ସମୁତ ମିସର୍‌ ଦେସ୍‌ତାଂ ମୁକ୍‌ଡ଼ାତାଦେର୍ଣ୍ଣା; ଆରେ, ଇନେର୍‌ ୱାରି କେଇଦାଂ ମା ଲାଗାଂ ଏକାୱାଉଦେର୍‌ । 16 ଆରେ, ଏପେଙ୍ଗ୍‌ ତାସ୍‌ ତ୍ରେଜ଼୍‌ନି ପାର୍ବୁ, ଇଚିସ୍‌, ଜମିତ ଇନାକା ୱିତ୍‌ନାଦେର୍‌, ହେବେନି ପର୍‌ତୁମ୍‌ ରୁଣ୍ଡାୟ୍‌ କିତି ପାଡ଼୍‌ନି ପାର୍ବୁ ମାନି କିୟାଟ୍‌; ଆରେ, ବାର୍ହୁ ହାରିହାର୍‌ତ ଜମିତାଂ ପାଡ଼୍‌ ରୁଣ୍ଡାୟ୍‌ କିନି ୱେଡ଼ାଲିଂ ପାଡ଼୍‌ ରୁଣ୍ଡାୟ୍‌ନି ପାର୍ବୁ ମାନି କିୟାଟ୍‌ । 17 ବାର୍ହୁ ବିତ୍ରେ ତିନ୍‌ ହଟ୍‌ ମି ୱିଜ଼ୁ ଆଣ୍ଡ୍ରାଂ, ମାପ୍ରୁ ନିତ୍ରେମାପ୍ରୁତି ମୁମ୍‌ଦ ଏକାନାକା ମାନାତ୍‌ ।

18 ଏପେଙ୍ଗ୍‌ ଆମାୟ୍‌ମେହାତି ଜିନିସ୍‌ ଲାହାଂ ନା ପୁଜାନି ନେତେର୍‌ ହିଉଦେର୍‌; ଆରେ, ମା ପାର୍ବୁ-ବିସ୍ରେ କ୍ଡୱା ହାର୍ତାନାଣା ନାଡ଼ିସ୍‌ ପାତେକ୍‌ ଇଟୁଦେର୍‌ ।

19 ମି ବୁମିନି ପର୍‌ତୁମ୍‌ଆତି ପାଡ଼୍‌ ମି ନିତ୍ରେମାପ୍ରୁ ପର୍‌ମେସ୍ୱର୍‌ ଇଞ୍ଜ ତାହିୱାନାଦେର୍‌ । ଏପେଙ୍ଗ୍‌ ବକା ଅଡାନି ଜେଇତିଂ ତେୟା ପାଲ୍‌ଦ ୱାଞ୍ଜୁଦେର୍‌ ।

20 ହୁଡ଼ାଟ୍‌, ଆପ୍‌ ମିଂ ହାଜ଼ିତ ରାକ୍ୟା କିଦ୍‌ନି କାଜିଂ ଆରି ମିଂ ମା ଜାଲ୍‌ଦିକିତି ବାହାତ ତାହିୱାନି କାଜିଂ ମି ଆଗେ ଆଗେ ର ଦୁତ୍‌ ପକ୍ତାନାପା । 21 ତା ବିସ୍ରେ ଜାଗ୍ରତ୍‌ ଆଡ ଆରି ତା କାତାତ ମାନ୍‌ଦିଆନ୍‌ କିୟାଟ୍‌; ହେୱାନିଙ୍ଗ୍‌ ମାନ୍‌କାଚା କିମାଟ୍‌; ଇନେକିଦେଂକି ହେୱାନ୍‌ ମି ଅଦାର୍ମି କେମା କିଦୁନ୍‌; ଇନେକିଦେଂକି ହେୱାନ୍ତିତାକେ ମା ତର୍‌ ମାନାତ୍‌ । 22 ମତର୍‌ ଏପ୍‌ ଜଦି ହାତେ ହେୱାନ୍ତି କୁକ୍ତିତ ମାନ୍‌ଦିଆନ୍‌ କିନାଦେର୍‌, ଆରେ, ଆପ୍‌ ଇନାକା ସବୁ ଇନାପ୍‌, ହେଦାଂ କିନାଦେର୍‌; ତେବେ ଆପ୍ ମି ସାତ୍ରୁର୍‌ତି ସାତ୍ରୁ ଆରି ମି ବେରିୟାର୍‌ ଲାହାଙ୍ଗ୍‌ ବିରିୟା ଆନାସ୍‌ । 23 ଇନେକିଦେଂକି ମା ଦୁତ୍‌ ମି ଆଗେ ଆଗେ ହାଲ୍‌ଜି ମିଂ ଇମରିୟ, ହିତିୟ, ପରିଜିୟ, କିଣାନିୟ, ହିବିୟ ଆରି ଜିବୁସିୟର୍ତି ଦେସ୍‌ତ ତାହିୱାଦ୍ନାନ୍‌, ଆରେ, ଆନ୍‌ ହେୱାରିଙ୍ଗ୍‌ ନାସ୍‌ କିନାଙ୍ଗ୍‌ । 24 ଏପେଙ୍ଗ୍‌ ହେୱାରିଙ୍ଗ୍‌ ପେନ୍‌କୁକାଂ ଜୱାର୍‌ କିଉଦେର୍‌ ଆରି ହେୱାକାଂ ହେବା କିଉଦେର୍‌, ଆରେ, ହେୱେକ୍‌ତି କାମାୟ୍‌ଇସାବ୍ରେ କାମାୟ୍‌ କିଉଦେର୍‌; ମତର୍‌ ହେୱାରିଙ୍ଗ୍‌ ଦଲ୍‌ସବୁ ଉଟ୍‌କାୟ୍‌ କିନାନ୍‌ ଆରି ହେୱାର୍‌ତି ମୁଣ୍ଡାଙ୍ଗ୍‌ ଡ୍ରିକ୍‌ଚି ତୁହିନାନ୍‌ । 25 ହେୱାର୍‌ ତା ନିତ୍ରେମାପ୍ରୁ ଇସ୍ୱର୍‌ତିଂ ହେବା କିନାର୍; ହେବେ ହେୱାନ୍‌ ମି ଆରାଣ୍‌ ଆରି ଏସ୍‍ତ ଆର୍ସିବାଦ୍‌ କିଦ୍‌ନାନ୍‌, ଆରେ, ଆପ୍‌ ମି ବିତ୍ରେତାଂ ରଗ୍‌ ଦେହା କିନାପ୍‌ । 26 ମି ଦେସ୍‌ତ ଇନେର୍ତି ଅର୍ଚା ଆଉତ୍‌, ଆରେ, ଇନେର୍‌ ବାଞ୍ଜି ଆଉକ୍‌; ଆପ୍‌ ମି ଆୟଁସ୍‌ନି ବାର୍ତି ପୁରା କିନାପ୍‌ । 27 ଆପ୍‌ ମି ଆଗେ ଆଗେ ମା ବିସ୍ରେନି ପାଣ୍ଡ୍ରାନାକା ପକ୍ତାନାପ୍‌; ଆରେ, ଏପ୍‌ ଇମ୍‌ଣି ସବୁ ମାନାୟ୍‌ ଲାଗେ ଏକାନାଦେର୍‌, ହେୱାରିଙ୍ଗ୍‌ ତାନ୍‌ଦ୍ରା କିନାପ୍‌ ଆରି ଆପ୍‌ ମି ସାତ୍ରୁରିକାଂ ମାସ୍‌ଦି ହାନାସ୍‌ । 28 ଆପ୍‌ ମି ଆଗେ ଆଗେ ଟେକେର୍‌ତିଂ ପକ୍ତାନାପ୍‌; ହେୱାର୍‌ ହିବିୟ, କିଣାନିୟ ଆରି ହିତିୟର୍ତିଂ ମି ମୁମ୍‌ଦାଂ ପେଜ଼୍‌ଦିନିକ୍‌ । 29 ମତର୍‌ ର ବାର୍ହୁତ ମି ମୁମ୍‌ଦାଂ ହେୱାରିଙ୍ଗ୍‌ ପେସ୍‌ଦୁକ, ତାଆତିସ୍‌ ଦେସ୍‌ ୱାରାକା ଆନାତ୍‌ ଆରି ମି ବିରୁଦ୍‌ତ ରାନ୍ତି ଜାତ୍‍କୁ ବାଡାନିକ୍‌ । 30 ଏପ୍‌ ଏଚେପାତେକ୍‌ ଗାଜା ଆଉଦେରେ ଆରି ଦେସ୍‌ ଆଦିକାର୍‌ କିୱାଦେର୍ଣ୍ଣା, ହେପାତେକ୍‌ ଆପ୍‌ ମି ମୁମ୍‌ଦାଂ ହେୱାରିଙ୍ଗ୍‌ କାଲେ କାଲେ ପେଜ଼୍‌ନାସ୍ । 31 ଆରେ, ଆପ୍‌ ସୁପ୍‌ ହାମ୍‌ଦୁର୍‌ତାଂ ପଲେସ୍ଟିୟର୍ତି ହାମ୍‌ଦୁର୍‌ ପାତେକ୍‌ ଆରି ବାଟାତାଂ ପରାତ୍‌ ନାଗୁଡ଼୍‌ ପାତେକ୍‌ ମି ହାନ୍ଦି ରଚ୍‌ନାଂ; ଇନେକିଦେଂକି ଆପ୍‌ ହେ ଦେସ୍‌ତ ବାହାକିତାକାରିଂ ମି କେଇଦ ହେଲାୟ୍‌ କିଦ୍ନାପ୍‌; ହେବେ ଏପ୍‌ ଜାର୍‌ ମୁମ୍‌ଦାଂ ହେୱାରିଂ ପେଜ଼୍‌ନାଦେର୍‌ । 32 ଏପ୍‌ ହେୱାର୍‌ ଲାହାଂ କି ହେୱାର୍‌ତି ପେନ୍‌କୁ ଲାହାଂ ଇମ୍‌ଣାକାପା ରାଜିନାମା ତିର୍‌ କିଉଦେର୍‌ । 33 ହେୱାର୍‌ ମି ଦେସ୍‌ତ ବାହା କିଉର୍‌, କିତିସ୍‌ ହେୱାର୍‌ ମା ବିରୁତ୍‌ତ ମିଂ ପାପ୍‌ କିୟ୍‌କିଦ୍ନାର୍‌; ଇନେକିଦେଂକି ଏପ୍‌ ଜଦି ହେୱାର୍‌ତି ପେନ୍‌କୁକାଂ ହେବା କିନାଦେର୍‌, ତେବେ ହେଦାଂ ଆତିସ୍ପା ମି ଡ଼ୁକା ଲାକେ ଆନାତ୍‌ ।