ମାପ୍ରୁହେବାକିନାକାନ୍ ହେନ୍ଦ୍ରାନି ଜାଗ୍ରତ୍
1 ଇଦାଂପାଚେ ମାନାୟାର୍ ମସା କାଜିଂ ନିତ୍ରେ ମାପ୍ରୁତି ବଲ୍ ଇସାବ୍ରେ ନିଲ୍ୟା, କଦା ଆରି ହେନ୍ଦର୍ ବାନି ହୁତୁର୍ କାଜିଂ ପୁଇପୁୟା ବାହାତ ହେବା କିନି କାଜିଂ ହାର୍ଦି ହେନ୍ଦ୍ରା ଜାଗ୍ରତ୍ କିତାର୍, ଆରେ ହାରଣ୍ କାଜିଂ ପୁଇପୁୟା ହେନ୍ଦ୍ରା ଜାଗ୍ରତ୍ କିତାର୍ ।
2 ଆରେ, ହେୱାନ୍ ହନା ହୁଦାଂ, ନିଲ୍ୟା, କଦା ହେନ୍ଦର୍ ବାନି ଆରି ନଟି କୱାଣ୍ ହାରୁ ନୁଲ୍ କାଜିଂ ଏପଦ୍ ହେନ୍ଦ୍ରା ରଚ୍ଚାନ୍ । 3 ଇଚିସ୍, ହେୱାର୍ ହନା ରିକ୍ଚି ପାତାଡ଼୍ ଆକି ଲାକେ କିଜ଼ି କଲ୍ଜି ରଚ୍ଚି ନିଲ୍ୟା, କଦା, ହେନ୍ଦର୍ ବାନି ଆରି ଡ଼ିଞ୍ଜ୍ନି କୱାଣ୍ ନୁଲ୍ ବିତ୍ରେ ଡ଼ଚ୍ନି କାଜିଂ ହେଦାଂ ରାସ୍ଦି ହାରୁ କିତାର୍ । 4 ହେୱାର୍ ହାଙ୍ଗ୍ଦିକିଂ ମେହାସି ରିଣ୍ଡାଂ ନିପିନିପଟିଂ କିତାର୍; ହେବେନି ରି କାପ୍ଡ଼ାତ ହାଙ୍ଗ୍ଦିକିଂ ଜଡ଼ାୟ୍ କିତାର୍ । 5 ମସାତି କାଜିଂ ନିତ୍ରେ ମାପ୍ରୁତି ବଲ୍ଇସାପ୍ରେ ଏପାଦ୍ନି ଜପ୍ଣି ଇମ୍ଣି ବାନାତ ତୁୱାଲ୍ ହେବେନି ଲେକା ମାଚାତ୍, ହେଦାଂ ପା ହେ କାମାୟ୍ ଇସାପ୍ରେ ହନା କାଜିଂ, ନିଲ୍ୟା, ଦୁଆଁ, ହେନ୍ଦର୍ ବାନି ଆରି ନଟି ଡ଼ିଞ୍ଜ୍ନି କୱାଣ୍ ନୁଲ୍ ହୁଦାଂ ରଚ୍ଚାର୍ । 6 ଆରେ ହେୱାର୍ ଇସ୍ରାଏଲ୍ ମାଜ଼ିର୍ତି ତର୍ ଇସାପ୍ରେ କାର୍ତି ଡାବୁଙ୍ଗ୍ କାର୍ଚି ଆରି ହନା ଦାରାତ ଡାନ୍ଚି ରି ଗରୁଚୁଚାନା ମଣି ରଚ୍ଚାର୍ । 7 ଆରେ, ମସା ନିତ୍ରେମାପ୍ରୁତି ବଲ୍ ଇସାପ୍ରେ ଏପାଦ୍ନି ରି ନିପି ଜପି ଇସ୍ରାଏଲ୍ ମାଜ଼ିରିଂ ଏତ୍କିନି ମଣି ଲାକେ ହେଦାଂ କୁଚିକିତାର୍ ।
ନେଞ୍ଜାଡାକିନିହାଜ ରଚ୍ନାକା
8 ଇଦାଂପାଚେ ହେୱାନ୍ ଏପାଦ୍ନି କାମାୟ୍ ହନା ହୁଦାଂ, ନିଲ୍ୟା, କଦା ହେନ୍ଦର୍ ବାନି ଆରି ନଟି ଡ଼ିଞ୍ଜ୍ନି କୱାଣ୍ନୁଲ୍ ହୁଦାଂ ହାର୍ ରଚ୍ନାକାନ୍ କାମାୟ୍ତ ନେଞ୍ଜାଡାକିନି ହେନ୍ଦ୍ରା ରଚ୍ଚାର୍ । 9 ହେଦାଂ ଚାରି କନା ମାଚାତ୍, ଇଚିସ୍, ହେୱାର୍ ହେ ନେଞ୍ଜାଡାକିନି ହେନ୍ଦ୍ରା ମଡି କିଜ଼ି ର ପାଡ଼୍କା ଡେଙ୍ଗା ଆରି ର ପାଡ଼୍କା ଅହାର୍ କିତାର୍ । 10 ଆରେ, ହେଦାଂ ଚାରି ଦାଡ଼ି ମଣିତ ଡାଚ୍ଚାର୍ ନେଞ୍ଜାଡାକିନିହାଜ; ହେବେନି ପର୍ତୁମ୍ ଦାଡ଼ିତ ଚୁଣି, ପିତମଣି ଆରି ମରକତ, 11 ରି ଦାଡ଼ିତ ପଦମ୍ ପୁଇ, ନିଲ୍ୟା ଆରି ହିରା, 12 ତିନି ଦାଡ଼ିତ ପେରଜ, ତୁବ୍ଣାରାଚ୍ ମଣି । 13 ଆରେ, ଚାରି ଦାଡ଼ି ଗରୁଚୁନା ଆରି ଗମେଦକ ଆରି ସୁର୍ଜକାନ୍ତ ମଣି ମାଚାତ୍; ଇ ସବୁ ମଣି ହନା ଦାରାତ କୁଚିକିୟାତାତ୍ । 14 ଆରେ, ଇସ୍ରାଏଲ୍-ମାଜ଼ିର୍ତି ତର୍ଦାଂ ଇ ସବୁ ମଣି ହେୱାର୍ ତର୍ ଇସାବ୍ରେ ବାର ଆତାତ୍ ଆରି ଡାବୁଙ୍ଗ୍ ର ର ମଣିତ ବାର ଦସ୍ ଲାତ୍ରାତ ର ର ତର୍ ମାଚାତ୍ । 15 ଇଦାଂପାଚେ ହେୱାର୍ ନେଞ୍ଜାଡାକିନିହାଜ ନିର୍ମଲ୍ ହନା ହୁଦାଂ ମେଡିକିତି ଲାକେ ନଟି ହୁର୍ନି ହିକ୍ଡ଼ିଙ୍ଗ୍ ରଚ୍ଚାର୍ । 16 ରିଣ୍ଡାଂ ହନା ଆରି ରିଣ୍ଡାଂ ହନା ବାଡ଼ା ରଚ୍ଚି ନେଞ୍ଜାଡାକିନିହାଜ ରି କନାତ ହେ ରି କାଗଡ଼ା ଡାଚ୍ଚାର୍ । 17 ଆରେ ନେଞ୍ଜାଡାକିନିହାଜ କନାତ ରିଣ୍ଡାଙ୍ଗ୍ କାଗଡ଼ାଂ ବିତ୍ରେ ହେ ରିଣ୍ଡାଂ ହୁର୍ନି ହନା ହିକ୍ଡ଼ିଙ୍ଗ୍ ଡାଚ୍ଚାର୍ । 18 ଆରେ, ହୁର୍ନି ହିକ୍ଡ଼ିଂନି ରି କାପ୍ଡ଼ାତ ରିଣ୍ଡାଂ ଦୁୱାର୍ତ ବନ୍ଦ୍ କିଜ଼ି ଇ ପାଦ୍ନି ହେନ୍ଦ୍ରା ଲାଗାଂ ରି ନିପି ଜପି ଇଡ଼୍ତାର୍ । 19 ଆରେ, ହେୱାର୍ ରିଣ୍ଡାଂ ହନା ବାଡ଼ା ରଚ୍ଚି ନେଞ୍ଜାଡାକିନି ହେନ୍ଦ୍ରା ରି ବାଗାଙ୍ଗ୍ ଇ ଏପାଦ୍ନି ଲାଗେ ବିତ୍ରେ ବାଗ୍ତ ଇଡ଼୍ତାର୍ । 20 ହେୱାର୍ ଆରେ ରିଣ୍ଡାଂ ହନା ବାଡ଼ା କିଜ଼ି ଇ ପାଦ୍ନି ରିଣ୍ଡାଂ ନିପି ତାରେନ୍ ହେ ଲାଗେନି ବାଗାଂ ଜଡ଼ାୟ୍କିତିତ ଏପଦ୍ନି ବାନାଚୁନା ବାଦି ଜପି ହେଦାଂ ଇଡ଼୍ତାର୍ । 21 ଆରେ ନେଞ୍ଜାଡାକିନି ହେନ୍ଦ୍ରା ଇନେସ୍କି ଏପାଦ୍ନି ବାନାତ ବାଦି ଜପି ମାନ୍ଞ୍ଜି ଏପାଦ୍ତାଂ ଆରୁତ୍, ଇଦାଂ କାଜିଂ ହେୱାର୍ ନେଞ୍ଜାଡାକିନିହାଜ ନିଜର୍ ବାଡ଼ାତ ନିଲ୍ୟା ନୁଲ୍ ହୁଦାଂ ଏପାଦ୍ନି ବାଡ଼ା ଲାହାଙ୍ଗ୍ ବନ୍ଦ୍ କିଜ଼ି ଇଡ଼୍ତାର୍; ମସାତି କାଜିଂ ନିତ୍ରେମାପ୍ରୁତି ବଲ୍ ଇସାପ୍ରେ ଏଲେଙ୍ଗ୍ କିୟାତାତ୍ ।
ବିନ୍ ମାପ୍ରୁହେବାକିନ୍ହାଜ ରଚ୍ନାକା
22 ଇଦାଂପାଚେ ମସାତି କାଜିଂ ନିତ୍ରେମାପ୍ରୁ ବଲ୍ ଇସାପ୍ରେ ହେୱାନ୍ ଡ଼ଚ୍ନି କାମାୟ୍ତ ଏପାଦ୍ନି ଗାଜା ଆଙ୍ଗି ପୁରା ନିଲି ବାନି କିତାନ୍ । 23 ହେ ଗାଜା ଆଙ୍ଗିନି ମାଦି ବାହାତ ସାକ୍ତିକାଟି କାଣା ମାଚାତ୍; ହେଦାଂ ଇନେସ୍କି କେନ୍ଞ୍ଜି ହାଲୁତ୍, ଇଦାଂ କାଜିଂ ହେ ଗାଡେଲ୍ନି ଚାରି ବେଣ୍ତାଂ ଡ଼ଚ୍ୟାସି ମାଚାତ୍ । 24 ଆରେ, ହେୱାର୍ ଗାଜା ଆଙ୍ଗିନି ଚାରିବେଣ୍ତାଂ ନିଲ୍ୟା, କଦା ଆରି ହେନ୍ଦର୍ ବାନି ନଟି ନୁଲ୍ତ ଜୁମ୍କା ରଚ୍ଚାର୍ । 25 ଆରେ ହେୱାର୍ ଜୁମ୍କା ମାଦି ନିର୍ମଲ୍ ହନା କାଜିଂ ଗାଟି କିଜ଼ି ଗାଜା ଆଙ୍ଗି ଚାରିବେଣ୍ତାଂ ଜୁମ୍କା ମାଦି ମାଦି ଇଡ଼୍ତାର୍; 26 ଇଚିସ୍, ନିତ୍ରେମାପ୍ରୁ ହେବାକାରିୟା ମସା ଗାଜା ଆଙ୍ଗି ଚାରିବେଣ୍ତାଂ ର ଗାଟିତ ତାରେନ୍ ର ଜୁମ୍କା ଆରି ର ଗାଟି ତାରେନ୍ ର ଜୁମ୍କା, ଇ ଲାକେ କିତାର୍ । 27 ଇଦାଂପାଚେ ମସାତି କାଜିଂ ନିତ୍ରେମାପ୍ରୁତି ବଲ୍ ଇସାପ୍ରେ ହେୱାର୍ ହାରଣ୍ ଆରି ତା ମାଜ଼ିର୍ କାଜିଂ ଡ଼ିଞ୍ଜ୍ନି କୱାଣ୍ନୁଲ୍ ହୁଦାଂ ଡ଼୍ଚ୍ଚାକା ରଚ୍ଚି ରାଇକା 28 ଆରି ନଟି ଡ଼ିଞ୍ଜ୍ନି କୱାଣ୍ନୁଲ୍ ରଚ୍ଚି ଟପ୍ରି, ନଟି ଡ଼ିଞ୍ଜ୍ନି କୱାଣ୍ନୁଲ୍ ରଚ୍ଚି ନାତାଗାଚ୍ନାକା ଆରି ନଟି ଡ଼ିଞ୍ଜ୍ନି କୱାଣ୍ନୁଲ୍ ରଚ୍ଚି ହାର୍ଦି ଜାଙ୍ଗିଆ ରଚ୍ଚାର୍ । 29 ଆରେ ନିତ୍ରେମାପ୍ରୁ ମସା ନଟି ଡ଼ିଞ୍ଜ୍ନି କୱାଣ୍ ହେନ୍ଦ୍ରା, ନିଲ୍ୟା, କଦା ଆରି ହେନ୍ଦର୍ ବାନି ନୁଲ୍ତ ଡ଼ଚ୍ନି କାମାୟ୍ତ ବେସି ର ଗାଚ୍ୟାନାକା ରଚ୍ଚାର୍ । 30 ଇଦାଂପଚେ ମସାତି କାଜିଂ ନିତ୍ରେମାପ୍ରୁତି ବଲ୍ ଇସାପ୍ରେ ହେୱାର୍ ନିର୍ମଲ୍ ହନାତ ପୁଇପୁୟା ମୁକୁଟ୍ନି ଆକି ରଚ୍ଚି କାର୍ଚି ଲେକାତି ହେ ଜପି "ନିତ୍ରେମାପ୍ରୁ ଉଦେସ୍ତ ପୁଇପୁୟା" ଇଦାଂ ଲେକିକିତାର୍ । 31 ଆରେ, ନିତ୍ରେମାପ୍ରୁ ମସା ଜପିନି ଟପ୍ରି ଜପି ଇଟ୍ନି କାଜିଂ ହେଦାଂ ନିଲ୍ୟା ନୁଲ୍ତ ଗାଚ୍ଚାର୍ ।
ଇଲ୍ କାମାୟ୍ ୱିସ୍ତାର୍
32 ଏଲେଙ୍ଗ୍ ବାନି ହାନିୱାନି-ତୁମ୍ ଲାକେ ବାହା ସବୁ କାମାୟ୍ ୱିସ୍ତାତ୍; ଇସ୍ରାଏଲ୍ ମାଜ଼ିର୍ ହେଦାଂ କିତାର୍, ମସାତି କାଜିଂ ନିତ୍ରେମାପ୍ରୁତି ବଲ୍ ଇସାପ୍ରେ ହେୱାର୍ ସବୁ କାମାୟ୍ କିତାର୍ । 33 ଇଦାଂପାଚେ ହେୱାର୍ ମସା ଲାଗାଂ ହେ ବାହା ତାଇୱାତାର୍, ଇଚିସ୍, ତୁମ୍ ଆରି ହେବେନି ସବୁ ବାହା, ଆକଡ଼ା, ପାଟା, ଆର୍ଗାଡ଼ା, ଆରେ ମୁଣ୍ଡା ଆରି କାଣାକିତିକୁଟ୍ଲା; 34 ଆରେ ନେତେର୍ ବାନି ମେଣ୍ଡାତଲ୍ ରଚ୍ଚି ଚାତ୍ ଆରି କୱାଣ୍ ତଲ୍ ରଚ୍ଚି ଚାତ୍ ଆରି ପ୍ଡାକ୍ନି କେଚ୍ଚି ହେନ୍ଦ୍ରା; 35 ସାକି ପେଡ଼ି, ହେବେନି କଣା ଆରି ପାପ୍ ପ୍ଡାକ୍ନାକା 36 ପାଟା, ହେବେନି ସବୁ ବାହା ଆରି ଚଚ୍ଚିହିନି ରୁଟି, 37 ନିର୍ମଲ୍ ବୈଟାମାର୍, ହେବେନି ବୈଟା, ଇଚିସ୍, ତା ସବୁ ଦିନିସ୍ ଆରେ ହେବେନି ସବୁ ବାହା ଆରି ବୈଟାନି ଚିକାଣ୍; 38 ଆରେ ହନାନି ଗାର୍ଣି, ଚିକାଣ୍କାସ୍ନାକା ଚିକାଣ୍, ଦୁପ୍ନିନି ହାର୍ଗାନ୍ଦାନି ଦିନିସ୍ ଆରି ତୁମ୍ ଦୁୱାର୍ନି ପ୍ଡାକ୍ନି ହେନ୍ଦ୍ରା; 39 ପିତାଡ଼୍ନି ଗାର୍ଣି ଆରି ହେବେ ପିତାଡ଼୍ ହିକ୍ଡ଼ିଙ୍ଗ୍, ହେବେନି କଣା ଆରି ସବୁ ବାହା, ନୁସ୍ନି ବାହା ଆରି ହେବେନି ପିଣ୍ଡା; 40 ହାକ୍ଡ଼ିନି ପାର୍ଦା, ହେବେନି ମୁଣ୍ଡା ଆରି କାଣାକିତିକୁଟ୍ଲା ଆରି ହାକ୍ଡ଼ି ଦୁୱାର୍ନି ପ୍ଡାକ୍ନି ହେନ୍ଦ୍ରା, ହେବେନି ଡରି ଆରି କୁଟି ହାନିୱାନି ତୁମ୍ କାଜିଂ ବାହାକିନି କାମାୟ୍ ହେଲାକେ ସମାନ୍ ବାହା; 41 ପୁଇପୁୟା ବାହାତ ହେବାକିନି ହଲ୍ନି ହେନ୍ଦ୍ରା, ଇଚିସ୍, ହାରଣ୍ ମାପ୍ରୁହେବାକିନାକାନ୍ ପୁଇପୁୟା ହେନ୍ଦ୍ରା ଆରି ତା ମାଜ଼ିର୍ତି ମାପ୍ରୁହେବାକିନାକାନ୍ କାମାୟ୍ ହେଲାକେ ହେନ୍ଦ୍ରା, 42 ଏଲେଙ୍ଗ୍ ଇମ୍ଣି ଇମ୍ଣି କାମାୟ୍ କିଦେଂ ମସାତି କାଜିଂ ନିତ୍ରେମାପ୍ରୁ ବଲ୍ ହିଜ଼ି ମାଚାନ୍, ଇସ୍ରାଏଲ୍ ମାଜ଼ିର୍ ହେଦାଂ ସବୁ ପୁରା କିତାର୍ । 43 ଇବେ ମସା ହେ ସବୁ କାମାୟ୍ ନିଜେ ହୁଡ଼୍ତାନ୍, ଆରେ ହୁଡ଼ାଟ୍, ହେୱାର୍ ସବୁ କିତାର୍ନା; ନିତ୍ରେମାପ୍ରୁ ଇନେସ୍ ବଲ୍ ହିସିମାଚାନ୍, ହେୱାର୍ ହେଲାକେ ସବୁ କିଜ଼ିମାଚାର୍; ହେବେ ମସା ହେୱାରିଂ ଆର୍ସିବାଦ୍ କିତାନ୍ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)