1 ଆରେ ମା କାଜିଂ ମାପ୍ରୁହେବାକିନାକାନ୍ କାମାୟ୍‌ କିନି କାଜିଂ ଏନ୍ ଇସ୍ରାଏଲ୍‌ ହିମ୍‌ଣାଂ ବିତ୍ରେତାଂ ଜାର୍‌ ଟଣ୍ଡେନ୍ ହାରଣ୍‌ତିଂ ଆରି ହେଦାଂ ହୁକେ ତା ହିମ୍‌ଣାକାଂ, ଇଚିସ୍‌, ହାରଣ, ନାଦବ ଆରି ଅବିହୁ, ଇଲିୟାସର୍‌ ଆରି ଇତାମରତିଂ ଜାର୍‌ ଲାଗାୟ୍‌ ତାହିୱାନାଦେର୍‌ । 2 ନି ଟଣ୍ଡେନ୍‌ ହାରଣତି ହାର୍ଦାକା ଗାଜା ମାନିନି ଆରି ହଲ୍‌ନାକା କାଜିଂ ପୁଇପୁୟା ଆଙ୍ଗି ଜାଲ୍‍ଦି କିନାଦେର୍‌ । 3 ଆରେ ଆପ୍ ଇମ୍‌ଣାକାରିଂ ଗିୟାନ୍ନି ଜିବୁନ୍ତ ବାର୍ତି କିତାପ୍ନା, ହେ ୱିଜ଼ୁ ପୁନାକାରିଙ୍ଗ୍‌ ଆଦେସ୍‌ କିୟାଟ୍‌; ମା ଉଦେସ୍‌ତ ମାପ୍ରୁହେବାକିନାକାନ୍ କାମାୟ୍‌ କିନି କାଜିଂ ହାରଣତିଂ ପୁଇପୁୟା କିନି କାଜିଂ ହେୱାର୍‌ ତା ଆଙ୍ଗି ଜାଲ୍‌ଦି କିନାର୍‌ । 4 ଇଚିସ୍‌, ନେଞ୍ଜେଡାକି ହେନ୍ଦ୍ରା, ଏପଦ୍‌, ବଣ୍‌ଗଇନି, ଡେଙ୍ଗା ଆଙ୍ଗି, ଟପ୍ରି ଆରି ମ୍ଡେଙ୍ଗ୍‌ଡରି, ଇ ସବୁ ଆଙ୍ଗି ହେୱାର୍‌ ଜାଲ୍‌ଦି କିନାର୍‌; ମା କାଜିଂ ମାପ୍ରୁହେବାକିନାକାନ୍‌ କାମାୟ୍‌ କିନି କାଜିଂ ନି ଟଣ୍ଡେନ୍‌ ହାରଣ ଆରି ତା ମେହିର୍‌ କାଜିଂ ହେୱାର୍‌ ପୁଇପୁୟା ଆଙ୍ଗି ଜାଲ୍‌ଦି କିନାର୍‌ । 5 ହେୱାର୍‌ ହନା, ନିଲ୍ୟା, କଦା, ହେନ୍ଦୁର୍‌ ବାନି ଆରି ଅଟି ଡ଼ିଞ୍ଜ୍‌ନି କୱାଣ୍‌ ନୁଲ୍‌ ଅନାର୍‌ ।

6 ଆରେ, ହେୱାର୍‌ ହେ ହନା, ନିଲ୍ୟା, କଦା, ହେନ୍ଦୁର୍‌ ବାନି ଆରି ନଟି ଡ଼ିଞ୍ଜ୍‌ନି କୱାଣ୍‌ନୁଲ୍‌ ତ ପୁନାକାନ୍ତି ହାର୍‌ ରଚ୍‌ନାକାନ୍ତି କାମାୟ୍‌ ହୁଦାଂ ଏପଦ୍ ହେନ୍ଦ୍ରା ଜାଲ୍‌ଦି କିନାର୍‌ । 7 ହେବେ ରି କାପ୍‌ଡ଼ାତ ହାରି ମେହାତି ରି ନିପିନିଟାଟି ମାନ୍‌ଗାନାତ୍‌; ଇଲାକେ ହେଦାଂ ଜଡ଼ା ଆନାତ୍‌ । 8 ଆରେ, ଏପଦ୍‌ନି ଇମ୍‌ଣି ବାନାକିତି ହାଜ ତା ଜପି ମାନ୍‌ଗାନାତ୍‌, ହେବେ ବାନାକିତି କାମାୟ୍‌ ହେ ହେନ୍ଦ୍ରାଇସାବ୍ରେ ଆନାତ୍‌; ଇଚିସ୍‌, ହନାତ, ନିଲ୍ୟା, କଦା, ହେନ୍ଦୁର୍‌ ବାନି ଆରି ନଟି ଡ଼ିଞ୍ଜ୍‌ନି କୱାଣ୍‌ ନୁଲ୍‌ତ ଆନାତ୍‌ । 9 ଇଦାଂପାଚେ ଏପ୍‌ ରି ଗରୁଚୁନା ମଣି ଅଜ଼ି କାଲ୍‌ ଜପି ଇସ୍ରାଏଲ୍‌ନି ହିମ୍‌ଣାଙ୍ଗ୍‌ତି ତର୍‌ ଲେକି କିନାଦେର୍‌ । 10 ଇଚିସ୍‌, ହେୱାର୍‌ତି ଜଲମ୍‌ଆତି ଇସାବ୍ରେ ଚଅ ତର୍‌କୁ ର ମଣି ଜପି ଆରି ବାକି ଚଅ ତର୍‌କୁ ବିନ୍‌ ମଣି ଜପି ଲେକିକିନାଦେର୍ । 11 ରଚ୍‌ନାକାନ୍‌ କାମାୟ୍‌ତ ଡାବୁଂ ଲେକିକିନି ନିୟାୟ୍‌ ହେ ରି ମଣି ଜପି ଇସ୍ରାଏଲ୍‌ ହିମ୍‌ଣାଙ୍ଗ୍‌ତି ତର୍‌ ଲେକି କିନାଦେର୍‌, ଆରେ, ହେଦାଂ ରି ହନା ଦାରାତ ବନ୍ଦ୍‌ କିନାଦେର୍‌ । 12 ଆରେ, ଇସ୍ରାଏଲ୍‌ନି ହିମ୍‌ଣାକାଂ ଏତ୍‌ କିନି କାଜିଂ ଏପ୍‌ ହେ ରିଣ୍ଡି ମଣି ଏପଦ୍‌ନି ରି ନିପିନିଟାଟିତ ହିନାଦେର୍‌; ହେବେ ହାରଣତିଂ ଏତ୍‌ କିଦେଂ ନିତ୍ରେମାପ୍ରୁତି ମୁମ୍‌ଦ ଜାର୍‌ ରି ନିପିତ ହେୱାର୍‌ତି ତର୍‌ ପିଣ୍ଡ୍‌ନାଦେର୍‌ । 13 ଆରେ ଏପେଙ୍ଗ୍‌ ରି ହନାଦାରା କିନାଦେର୍‌ 14 ଆରେ ନିର୍ମଲ୍‌ ହନା ହୁଦାଂ ରିଣ୍ଡି ତିଡ଼ିପ୍ତି ହିକ୍‌ଡ଼ିଂ କିଜ଼ି ହେ ତିଡ଼ିପ୍ତି ହିକ୍‌ଡ଼ିଂନି ହେ ରି ଇଦାରାତ ଆହିକିନାଦେର୍‌ ।

15 ଆରେ, ରଚ୍‌ନାକାନ୍‌ କାମାୟ୍‌ତ ବିଚାର୍‌କିନି ନେଞ୍ଜାଡାକି ହେନ୍ଦ୍ରା କିନାଦେର୍‌, ଇଚିସ୍‌, ଏପଦ୍‌ନି କାମାୟ୍‌ଇସାବ୍ରେ ହନାତ, ନିଲ୍ୟା, କଦା, ହେନ୍ଦୁର୍‌ ବାନି ଆରି ନଟି ଡ଼ିଞ୍ଜ୍‌ନି କୱାଣ୍‌ ନୁଲ୍‌ ରଚ୍‌ନାକାନ୍ତି କାମାୟ୍‌ ହୁଦାଂ ହେଦାଂ ଜାଲ୍‌ଦି କିନାଦେର୍‌ । 16 ହେଦାଂ ଚାର୍‌କନା ଆରି ସମାନ୍‌ କନାଂ ଆନିକ୍‌: ହେବେ ଲାମା ର ବିତା ଆରି ଅହାର୍‌ ର ବିତା ଆନାତ୍‌ । 17 ଆରେ, ହେଦେଲିଂ ଚାର୍‌ ଦାଡ଼ି ମଣିତ ଡାଚ୍‍ନାଦେର୍‌, ହେବେ ପର୍‌ତୁମ୍‌ ଦାଡ଼ିତ (ଚୁଣି), କେନିମଣି ଆରି ମରକତ୍‌; 18 ଦୁଇନି ଦାଡ଼ିତ (ବାନ୍ଦ୍‌ପୁୟ୍‌, ନିଲ୍ୟାକାନ୍ତ ଆରି ହିରକ) 19 ତିନ୍‌ନି ଦାଡ଼ିତ (ପେରଜ), ଜିସ୍ମ ଆରି ତୁବ୍‌ଣାରାଚ୍‌ ମଣି, 20 ଆରେ, ଚାର୍‌ ଦାଡ଼ିତ ଗରୁଚୁନା ଆରି ୱେଡ଼ାବାର୍ତାକା; ଇ ୱିଜ଼ୁ ହନାତ ଜାର୍‌ ଜାର୍‌ ଦାଡ଼ିତ କୁଚିକିୟାନାତ୍‌ । 21 ଇ ମଣି ଇସ୍ରାଏଲ୍‌ନି ହିମ୍‌ଣାଙ୍ଗ୍‌ତି ତର୍‌ କାଜିଂ ହେୱାର୍‌ତି ତର୍‌ ଇସାବ୍ରେ ବାର ଜାଣ୍‌ ଆନାର୍‌; ଡାବୁଂନିୟାୟ୍‌ କାର୍‌ଚି ପାତି ମଣିତ ହେ ବାର ବଁସ୍‌ କାଜିଂ ପାତି ମାଜ଼ିର୍ତି ତର୍‌ ପାଟାତ ମାନ୍‌ଗାନାତ୍‌ । 22 ଏପ୍‌ ନିର୍ମଲ୍‌ ହନା ହୁକେ ନେଞ୍ଜାଡାକିନିହାଜ କାଜିଂ ମାଡ଼୍‌ ହିକ୍‌ଡ଼ିଂ ଲାକେ ଚାପାତି ରି ହିକ୍‌ଡ଼ିଂ ରଚ୍‌ନାଦେର୍‌ । 23 ଆରେ, ନେଞ୍ଜାଡାକିନିହାଜ ଜପି ହନାନି ରି ବାଡା କିନାଦେର୍‌ ଆରି ନେଞ୍ଜାଡାକିନିହାଜ ରି କନାତ ହେ ରି ବାଡ଼ା ଡାଚ୍‍ନାଦେର୍‌ । 24 ଆରେ ନେଞ୍ଜାଡାକିନିହାଜ ରି କନାନି ରି ବାଡ଼ା ବିତ୍ରେ ହେ ରିଣ୍ଡି ତିଡ଼ିପ୍ତି ହନା ହିକ୍‌ଡ଼ିଂ ଡାଚ୍‍ନାଦେର୍‌ । 25 ଆରେ, ତିଡ଼ିପ୍ତି ହିକ୍‌ଡ଼ିନି ରି ମୁଣ୍ଡିତ ରି ବାଗ୍‌ତ ଗେହ୍‌ୟାଜ଼ି ଏପଦ୍‌ ହେନ୍ଦ୍ରାନି ମୁମ୍‌ଦ ରି ନିପିନିଟାଟି ଜପି ଇଟ୍‌ନାଦେର୍‌ । 26 ଏପ୍‌ ହନାନି ରି ବାଡ଼ା ରଚ୍‌ଚି ନେଞ୍ଜାଡାକିନିହାଜ ରି ଗୁଟିତ ଏପଦ୍ ହେନ୍ଦ୍ରାନି ହାଣ୍‍କୁ ବିତ୍ରେନି ବାଗ୍‌ତ ଇଟ୍‌ନାଦେର୍‌ । 27 ଆରେ ରି ହନାନି ବାଡ଼ା କିଜ଼ି ଏପଦ୍‌ ହେନ୍ଦ୍ରାନି ରି ନିପିନିଟାଟି ତାରେନ୍‌ ହେବେନି ହାଣ୍‌କୁ ବାଗ୍‌ତ ଜୁଡ଼ି ବାହାନି ଏପଦ୍‌ନି ବାନାମାନି ପଟ୍‌କା ଜପି ହେଦାଂ ଇଟ୍‌ନାଦେର୍‌ । 28 ହେବେ ନେଞ୍ଜାଡାକିନି ହେନ୍ଦ୍ରା ଇନେସ୍‌ ଏପଦ୍‌ନି ବାନା ପଟ୍‌କା ଜପି ମାନ୍ଞ୍ଜି ଏପଦ୍‌ତାଂ ହାଡ଼ୁତ୍‌, ଇଦାଂକାଜିଂ ହେୱାର୍‌ ନେଞ୍ଜାଡାକିନିହାଜ ଜାର୍‌ ବାଡ଼ାତ ନିଲ୍ୟା ନୁଲ୍‌ ହୁଦାଂ ଏପଦ୍‌ନି ବାଡ଼ା ଲାହାଂ ଗାଚ୍‌ଚି ଇଟ୍‌ନାଦେର୍‌ । 29 ଇମ୍‌ଣି ସମୁତ ହାରଣ ପୁଇପୁୟା ବାହାତ ହଣାନ୍‌, ହେ ସମୁତ ନିତ୍ରେମାପ୍ରୁତି ମୁମ୍‌ଦ ନିତ୍ରେ ଏତ୍‌ କିଦେଂ ହେୱାନ୍‌ ବିଚାର୍‌ନି ନେଞ୍ଜାଡାକିନିହାଜ ଇସ୍ରାଏଲ୍‌ ମାଜ଼ିର୍‌ତି ତର୍‌ ସବୁ ଜାର୍‌ ଜିବୁନ୍ ଜପି ପିଣ୍ଡ୍‌ନାଦେର୍‌ । 30 ହେ ବିଚାର୍‌କିନି ନେଞ୍ଜାଡାକିନିହାଜତ ଏପ୍‌ ଉରିମ୍‌ ଆରି ତୁମ୍ମିମ୍‌ ଅଜଡ଼୍‌ ଆରି ମାନି ଇଟ୍‌ନାଦେର୍‌; ହେବେ ହାରଣ ଇମ୍‌ଣି ସମୁତ ନିତ୍ରେମାପ୍ରୁତି ଲାଗେ ହଣାଦେର୍‌, ହେ ୱେଡ଼ାଲିଂ ହାରଣ ଜିବୁନ୍ ଜପି ହେଦାଂ ମାନ୍‍ଗାନାତ୍‌, ଆରେ, ହାରଣ ନିତ୍ରେମାପ୍ରୁତି ଲାଗେ ନିତ୍ରେ ନିତ୍ରେ ଇସ୍ରାଏଲ୍‌ ହିମ୍‌ଣାଂତି ବିଚାର୍‌ ଜାର୍‌ ଜିବୁନ୍‌ ଜପି ପିଣ୍ଡ୍‌ନାର୍‌ ।

31 ଏପ୍‌ ଏପଦ୍‌ନି ତାରେନ୍‌ନିକା ଚଗା ନିଲ୍ୟା ବାନି କିନାଦେର୍‌ । 32 ତା ମାଦ୍‌ଣିବାହାତ କାପ୍‌ଡ଼ା ନେଚ୍‌ନି କାଜିଂ ର କାଣା ମାନ୍‌ଗାନାତ୍‌; ନେଞ୍ଜାଡାକିନିହାଜ ହାକ୍‌ତ ନିୟାୟ୍‌ ହେ କାଣାନି ଚାର୍‌ବେଣ୍‌ତାଂ ଡ଼ଚ୍‌ଚି ଲାକେ ଆନାତ୍‌, ହେବେ ହେଦାଂ ନାଡୁତ୍‌ । 33 ଆରେ, ଏପ୍‌ ହେବେନି ଚାର୍‌ବେଣ୍‌ତାଂ ନିଲ୍ୟା, କଦା ଆରି ହେନ୍ଦର୍‌ ବାନିନି ଡାଲିମ୍‌ କିନାଦେର୍‌; ଆରେ ତା ଚାର୍‌ବେଣ୍‌ତିନି ମାଦି ମାଦି ହନା ଗାଟି ମାନ୍‌ଗାନତ୍‌ । 34 ହେ ବଣ୍‌ଗ କାନିନି ଚାର୍‌ବେଣ୍‌ତାଂ ର ହନା ଗାଟ୍‌ ଆରି ରଞ୍ଜି ଡାଲିମ୍‌, ଆରେ, ର ହନା ଗାଟ୍‌ ଆରି ର ଡାଲିମ୍‌ ମାନ୍‌ଗାନତ୍‌ । 35 ଆରେ ହାରଣ ହେବା କିନି ୱେଡ଼ାଲିଂ ହେଦାଂ ଉସ୍ପାନାନ୍‌; ହେବେ ହେୱାନ୍‌ ଏଚେକାଡ଼୍‌ଦ ନିତ୍ରେମାପ୍ରୁତି ଲାଗେ ପୁଇପୁୟା ବାହାତ ହଣାନ୍‌ ଆରି ଏଚେକାଡ଼୍‌ଦ ହେୱାନ୍‌ ହେବେତାଂ ହନାନ୍‌, ହେଏଚେକାଡ଼୍‌ଦ ହେବେନି ଗାଜ୍ରାନାକା ୱେନ୍ୟାନାତ୍‌; ତାଆତିସ୍‌ ହେୱାନ୍‌ ହାଉନ୍ ।

36 ଆରେ ଏପ୍‌ ନିର୍ମଲ୍‌ ହନାତ ର ଲେକାତି ଆକି ଜାଲ୍‌ଦି କିଜ଼ି ନାଦି ନିୟାୟ୍‌ ତା ଜପି "ନିତ୍ରେମାପ୍ରୁତି କାଜିଂ ପୁଇପୁୟା" ବାହାତ ଲେକି କିନାଦେର୍‌ । 37 ଆରେ, ନାତା ଜପି ମାନି କାଜିଂ ହେଦାଂ ନିଲ୍ୟା ନୁଲ୍‌ତ ଗାଚ୍‌ଚି ନାତାନି ମୁମ୍‌ଦ ଇଟ୍‌ନାଦେର୍‌ । 38 ହେଦାଂ ହାରଣତି ନିଦାଣ୍‌ ଜପି ମାନ୍‌ଗାନାତ୍‌, ହେବେ ପୁଇପୁୟା ଜିନିସ୍‌ ଗିଟାତି ସାରିନିକା, ଇଚିସ୍‌, ଇସ୍ରାଏଲ୍‌ ମାଜ଼ିର୍‌ ହେୱାର୍‌ତି ପୁଇପୁୟା କିତି ପୁଇପୁୟା ଦାନ୍‌ହିତ୍‌ତାକା ସବୁ ଜିନିସ୍‌ ବିସ୍ରେ ଇମ୍‌ଣି ଦସ୍‌ କିନାର୍‌, ହେଦାଂ ହାରଣ ପିଣ୍ଡ୍‌ନାନ୍‌ ଆରି ନିତ୍ରେମାପ୍ରୁତି ଲାଗେ ହେୱାର୍‌ ଇନେସ୍‌ ଇଟ୍ୟା ଆନାର୍‌, ଇଦାଂକାଜିଂ ହେଦାଂ ନିତ୍ରେ ନିତ୍ରେ ତା ନିଦାଣ୍‌ତ ମାନ୍‌ଗାନାତ୍‌ । 39 ଏପ୍‌ ଆଙ୍ଗିତିଂ ଡେଙ୍ଗା ଡ଼ିଞ୍ଜ୍‌ନି କୱାଣ୍‌ ହେନ୍ଦ୍ରାତ ଆରି ନାତାତିଂ ଡ଼ିଞ୍ଜ୍‌ନି କୱାଣ୍‌ନୁଲ୍‌ତ ଜାତ୍‌ନାୟ୍‌ କିନାଦେର୍‌; ଆରେ, ମ୍ଡେଙ୍ଗ୍‌ଗାଚ୍‌ନାକା ସକଟ୍‌ କାମାୟ୍‌ ହୁଦାଂ କାବ୍ରାଚିତ୍ରା କିନାଦେର୍‌ ।

40 ଆରେ ହାରଣତି ମାଜ଼ିର୍‌ କାଜିଂ ଆଙ୍ଗି ଆରି ମ୍ଡେଙ୍ଗ୍‌ଗାଚ୍‌ନାକା ଜାଲ୍‌ଦି କିନାଦେର୍‌, ଆରେ ହେୱାର୍‌ତି ଆରି ଗାଜା ସବା କାଜିଂ କାପ୍‌ଡ଼ାତ ମୁଗି କିନାଦେର୍‌ । 41 ଆରେ, ମି ଟଣ୍ଡେନ୍‌ ହାରଣ ଆରି ତା ମାଜ଼ିରିଂ ହେ ସବୁ ଉସ୍‌ପି କିନାଦେର୍‌; ଆରେ, ହେୱାରିଂ ଚିକାଣ୍‌କାସ୍‌ନି ପାଦ୍‌ତ ବାଚିକିଜ଼ି ଆରି ପୁଇପୁୟା କିନାଦେର୍‌, ହେବେ ହେୱାର୍‌ ମାଦାଂ ମାପ୍ରୁହେବାକିନି କାମାୟ୍‌ କିନାର୍‍ । 42 ଏପ୍‌ ହେୱାର୍‌ତି ଗାଗାଡ଼୍‍ନି ନାଗ୍‌ଡ଼ା ଡ଼ୁକ୍‍ନି କାଜିଂ ମ୍ଡେଙ୍ଗ୍‌ତାଂ କୁଟା ପାତେକ୍‌ ଡ଼ିଞ୍ଜ୍‌ନି ଜାଙ୍ଗିଆ ଉସ୍ପିକିନାଦେର୍‍ । 43 ଆରେ, ଏଚେକାଡ଼୍‌ଦ ହାରଣ ଆରି ତା ମେହିର୍‌ ହାନିୱାନି ମାନାୟାର୍‌ ତୁମ୍‌ତ ହଣାର୍‌, କି ପୁଇପୁୟା ବାହାତ ହେବା କିନି କାଜିଂ ଗାର୍‍ଣିନି ଲାଗାୟ୍‌ ଆନାର୍‌, ହେଏଚେକାଡ଼୍‌ଦ ହେୱାର୍‌ ଇନେସ୍‌ ଦସ୍‌ କିୱାଦାଂ ହାନାର୍‌, ଇଦାଂକାଜିଂ ହେୱାର୍‌ ଇ ହେନ୍ଦ୍ରାଂ ଉସ୍ପାନାର୍‌; ଇଦାଂ ହାରଣତି ଆରି ତା ୱାନିଦିନ୍ତିନି ଲାତ୍ରାନି ମାନିକିନି ୱିଜ଼୍‌ୱିଦିନ୍‌ କାଜିଂ ବିଦି ଆନାତ୍‌ ।