1 ଇଦାଂପାଚେ ନିତ୍ରେମାପ୍ରୁ ମସାଂ ଇ କାତା ଇଚାନ୍‌, 2 "ହୁଡ଼ାଟ୍‌, ଆପ୍‌ ଜିହୁଦା ଲାତ୍ରାନି ହୁରତି ନାତି ଉରିତି ମେହି ବତ୍ସଲେଲ୍‌ତିଂ ତର୍‌ ଆସ୍ତି କୁକ୍‌ତାପ୍‌ନା 3 ଆରେ, ପର୍‌ମେସ୍ୱର୍‌ ବାନା ରଚ୍‌ନାକାର୍‌, କାମାୟ୍‌ ଇଚିସ୍‌, ହନା, ରୁପା ଆରି ପିତାଡ଼୍‌ତ କାର୍ଚି ଆରି ଡାଚ୍‌ନି ମଣି ଗିୟାନ୍‌ତାଂ କାତ୍‌ନାକା ଆରି ମାର୍‌ କାତ୍‌ନି ସବୁକାଂ 4 ସବୁ ବାନି ଡାବୁଙ୍ଗ୍‌ ବାନାରଚ୍‌ପାନାକାରିଂ କିନି କାଜିଂ 5 ତାଙ୍ଗେଙ୍ଗ୍‌ ଗିୟାନ୍‌, ବାଡାନାକା, ବିଦ୍ୟା ଆରି କାମାୟ୍‌ ବେସିମଲ୍‌ କିନି ପର୍‌ମେସ୍ୱର୍‌ତି ଜିବୁନ୍‌ତ ବାର୍ତି କିତାପ୍‌ନା । 6 ଆରେ ହୁଡ଼ାଟ୍‌, ଆପ୍‌ ଦାନ୍‌ ବଁସ୍‌ଜଲମ୍‌ଆତି ଅହିସାମକନତି ମେହି ଅହଲିୟାବତିଂ ତା ହାଙ୍ଗ୍‌ଦାଂ ହେବା କାମାୟ୍‌ କାଜିଂ ବାଚି କିତାପ୍‌ନା; ଆରେ, ସବୁ ବୁଦିମାନାକାର୍‌ ମାନାୟ୍‌ତି ଜିବୁନ୍ତ ଗିୟାନ୍‌ ହିତାପ୍‌ନା; ଲାଗିଂ ଆପ୍‌ ମିଂ ଏଚେକ୍ ସବୁ ବଲ୍‌ ହିତ୍‌ତାପ୍‌ନା, ହେଦାଂ ସବୁ ହେୱାର୍‌ ରଚ୍‌ଚେଂ ଆଡ୍‌ନାର୍‌ । 7 ଇଚିସ୍‌, ହାନିୱାନି ତୁମ୍‌ ଆରି ସାକି ସିନ୍ଦୁକ୍‌ ଆରି ହେବେନି ଜପ୍‌ଣି ପାପ୍‌ପ୍ଡାନାକା ଆରି ତୁମ୍‌ନି ସବୁ ବାହା, 8 ଆରେ ପାଟା, ହେବେନି ବାହାଂ, ନିର୍ମଲ୍‌ ବୈଟାମାର୍‌, ହେବେନି ସବୁ ବାହାଂ, ଦୁପ୍‌ନିଗାର୍‌ଣି, 9 କାଟ୍‌ ଗାର୍‌ଣି, ହେବେନି ସବୁ ବାହାଂ, ନୁଜ଼୍‌ନି ବାହାଂ ଆରି ହେବେନି କୁଚିକିନି ବେଦି, 10 ଆରେ, ହାର୍‌ରଚ୍‌ଚି ଆଙ୍ଗି, ମାପ୍ରୁହେବାକିନାକାନ୍‌ କାମାୟ୍‌ କିନାକାନ୍ତି ହାରଣ ମାପ୍ରୁହେବାକିନାକାନ୍ତି ପୁଇପୁୟା ଆଙ୍ଗି ଆରି ତା ମେହିର୍‍ତି ଆଙ୍ଗିଙ୍ଗ୍‌, 11 ଆରେ, ଚିକାଣ୍‌କାସ୍‌ନାକା ଚିକାଣ୍‌ ଆରି ପୁଇପୁୟା ବାହା କାଜିଂ ହାର୍‌ଗାନ୍ଦା ଦୁପ୍‌ନି, ଇଦାଂ ଇମ୍‌ଣି ୱିଜ଼ୁ ବଲ୍‌ ମିଂ ହିତ୍‌ତାପ୍‌ନା, ହେ ଇସାବ୍ରେ ହେୱାର୍ କିନାର୍‌ ।"

12 ଇଦାଂପାଚେ ନିତ୍ରେମାପ୍ରୁ ମସାଂ ଇଚାନ୍‌, 13 ଏପ୍ ଇସ୍ରାଏଲ୍‌ ମେହିରିଂ ଇ କାତା ଇନା, "ନିଚୟ୍‌ ଏପେଙ୍ଗ୍‌ ମା ଜମ୍‌ନିବାର୍‌ ମାନି କିନାଦେର୍‌; ଇନେକିଦେଂକି ଆପ୍‌ ଜେ ମି ପୁଇପୁୟାକିନି ନିତ୍ରେମାପ୍ରୁ, ଇଦାଂ ଇନେସ୍‌ ଏପେଙ୍ଗ୍‌ ପୁନାଦେର୍‌, ଇଦାଂକାଜିଂ ମି ପୁର୍ବେନିକାର୍‌ ମାଦାଂ ଆରି ମିଦାଂ ବିତ୍ରେ ହେଦାଂ ର ଚିନ୍ ଆନାତ୍‌ । 14 ଲାଗିଂ ଏପେଙ୍ଗ୍‌ ଜମ୍‌ନିବାର୍‌ ମାନି କିନାଦେର୍‌; ଇନେକିଦେଂକି ହେଦାଂ ମି କାଜିଂ ପୁଇପୁୟାନିକା; ଇନେର୍‌କି ହେଦାଂ ବିଟାଡ଼୍‌ କିନାର୍‌, ହାତ୍‌ପା ତାଦାଂ ପାରାଣ୍‌ଡାଣ୍ଡ୍‌ ଆନାତ୍‌; ଆରେ, ଇମ୍‌ଣାକାର୍‌ ହେ ଦିନ୍ତ କାମାୟ୍ କିନାର୍‌, ହେୱାନ୍‌ ଜାର୍‌ ମାନାୟାର୍‌ତାଂ ବିନେ ଆନାନ୍ । 15 ଚଅ ଦିନ୍‌ ପାତେକ୍ କାମାୟ୍‌ କିୟାନାତ୍‌, ମତର୍‌ ସାତ୍‌ ଦିନ୍ତ ନିତ୍ରେମାପ୍ରୁତି ଉଦେସ୍‌ତ ପୁଇପୁୟା ବେସିଗାଜା ଜମ୍‌ନିବାର୍‌ ଆନାତ୍‌; ହେ ଜମ୍‌ନି ଦିନ୍ତ ଇନେର୍‌ କାମାୟ୍‌ କିନାନ୍, ନିଚୟ୍‌ ତାଦାଂ ପାରାଣ୍ ଡାଣ୍ଡ୍‌ ଆନାତ୍‌ । 16 ହେଦାଂ କାଜିଂ ଇସ୍ରାଏଲ୍‌-ହିମ୍‌ଣାଂ ୱିଜ଼୍‌ୱିକାଡ଼୍‌ନି ନିୟମ୍‌ ଲାକେ ପୁର୍ବେନିକାର୍‌ ମାନି କିନି କାଜିଂ ଜମ୍‌ନିବାର୍‌ ପାଲି କିନାଦେର୍‌ । 17 ହେଦାଂ ମାଦାଂ ଆରି ଇସ୍ରାଏଲ୍‌ ହିମ୍‌ଣାଂ ବିତ୍ରେ ରଞ୍ଜାଙ୍ଗ୍ ୱିଜ଼୍‌ୱିକାଡ଼୍‌ନି ଚିନ୍‌ ଆନାତ୍, ଇନେକିଦେଂକି ନିତ୍ରେମାପ୍ରୁ ଚଅ ଦିନ୍ତ ଆକାସିକାଂ ଆରି ପୁର୍ତିତିଂ ରଚ୍‌ଚି ସାତ୍‌ ଦିନ୍ତ ଜମ୍‌ଜି ବିୱାହିଂ ମାଚାନ୍‌ ।" 18 ପାଚେ ହେୱାନ୍‌ ସିନୟ ମାଡ଼ିତ ମସା ଲାହାଂ କାତା ୱିସ୍ତି ସାକି ଲାକେ ରି ପାଟା, ଇଚିସ୍‌, ପର୍‌ମେସ୍ୱର୍‌ ୱାଚ୍‌କା ଲେକିକିତାକା ରିଣ୍ଡି କାଲ୍‌ ପାଟା ତାଂ ହିତାନ୍‌ ।