1 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାନ୍‌, 2 "ଏପେଙ୍ଗ୍ ଇସ୍ରାଏଲ୍‌ ମାଜ଼ିରିଂ ଇନାଟ୍‌, ଏପେଙ୍ଗ୍ ମାସ୍‌ଦି ପିହହିରତନି ୱେଡ଼ାହତ୍‌ନି ଦିଗ୍‌ତ ମିଗ୍‌ଦଲ୍‌ ଆରି ହାମ୍‌ଦୁର୍‌ ବିତ୍ରେ କେପ୍‌ ରଚାଟ୍‌; ଏପେଙ୍ଗ୍ ବାଲ୍‌ସପନ୍‌ ଆଗେ, ଇଚିସ୍‌, ତା ମୁମ୍‌ଦ ହାମ୍‌ଦୁର୍‌ ଲାଗାଂ କେପ୍‌ ରଚାଟ୍‌ । 3 ପାଚେ ପାର ଇସ୍ରାଏଲ୍‌ ମାଜ଼ିର୍‌ ବିସ୍ରେ ଇନାନ୍‌, ହେୱାର୍‌ ଦେସ୍‌ ବିତ୍ରେ ଦାନ୍ଦା ଆଜ଼ି ମାନାରା ଆରି ବାଟାତ ହେୱାର୍‌ ହାଜ଼ି ବାଣାତାର୍ଣ୍ଣା । 4 ଆରେ, ଆସେଙ୍ଗ୍ ପାରତି ୱାସ୍କି ଆଟ୍‌ୱା କିନାସ୍‌, ପାଚେ ହେୱାନ୍‌ ହେୱାର୍‌ ପାଚେ ପାଚେ ହନ୍‌ନାନ୍‌; ଆରେ, ଆନେଙ୍ଗ୍ ପାର ଆରି ତା କାମାୟ୍‌ ମେଲ୍ୟା ହୁଦାଂ ପାଣ୍‌ ପାୟାନାସ୍‌; ପାଚେ ଆନେଙ୍ଗ୍‌ ଜେ ନିତ୍ରେମାପ୍ରୁ, ଇଦାଂ ମିସ୍ରିୟର୍‌ ମାନାୟାର୍‌ ପୁନାର୍‌ ।" ପାଚେ ହେୱାର୍‌ ହେ ଲାକେ କିତାର୍‌ ।

5 ଇଦାଂ ପାଚେ ମାନାୟାର୍‌ ହାନାରା, ଇ କାବୁର୍‌ ମିସ୍ରିୟ ରାଜାଙ୍ଗ୍‌ ୱେଚ୍‌ଚିଲେ, ମାନାୟାର୍‌ ବିସ୍ରେ ପାରତି ଆରି ତା ଆଡ଼୍‌ୟାର୍‌ ୱାସ୍କି ବାଦ୍‌ଲା ଆତାତ୍‌; ପାଚେ ହେୱାର୍‌ ଇଚାର୍‌, "ଆପେଙ୍ଗ୍ ଇ ହେବା କିତାପ୍‌ନା ? ଇନାକିଦେଂ ଇସ୍ରାଏଲ୍‌ତିଂ ଜାର୍‌ ଆଡ଼୍‌ୟାର୍‌ତାଂ ପିସ୍ତାପ୍‌ନ୍ନା ?" 6 ପାଚେ ରାଜା ଜାର୍‌ ହାଗାଡ଼୍‌ ରଚିକିତାନ୍‌ ଆରି ଜାର୍‌ ମାନାୟାରିଂ ରଚେ ଅତାନ୍‌ । 7 ଆରେ, ଚଅସହ ହାର୍ଦି ହାଗାଡ଼୍‌ ଆରି ମିସ୍ରିୟର୍‌ତି ସବୁ ହାଗାଡ଼୍‌ ଆରି ସବୁ ହାଗାଡ଼୍‌ତ ବିରରିଂ ଅତାର୍‌ । 8 ଆରେ ନିତ୍ରେମାପ୍ରୁ ମିସ୍ରିୟ ରାଜା ପାରତି ୱାସ୍କି ଆଟ୍‌ୱା କିତିଲେ, ହେୱାନ୍‌ ଇସ୍ରାଏଲ୍‌ ମାଜ଼ିର୍‌ ପାଚେ ପାଚେ ଏକାତାର୍‌; ହେପାଦ୍‌ନା ଇସ୍ରାଏଲ୍‌ ମାଜ଼ିର୍‌ କେଇ ନିକ୍‌ଚି ହାଲ୍‌ଜି ମାଚାର୍‌ । 9 ପାଚେ ମିସ୍ରିୟର୍‌, ଇଚିସ୍‌, ପାରତି ଗଡ଼ା, ହାଗାଡ଼୍‌, ଆରି ଗଡ଼ା ଚାଲାୟ୍‌କିନାକାର୍‌ ମେଲ୍ୟାର୍‌ ହେୱାର୍‌ ପାଚେ ପାଚେ ହନ୍‌ଚି ବାଲ୍‌ସପନ୍‌ ଆଗେ ପିହହିରତ ଲାଗାଂ ହାମ୍‌ଦୁର୍‌ କଚଣ୍‌ତ ହେୱାର୍‌ କେପ୍‌ କିନି ସମୁତ ହେୱାର୍‌ ଲାଗାଂ ଏକାତାର୍‌ । 10 ଆରେ ପାର ଲାଗାଂ ଆତିଲେ, ଇସ୍ରାଏଲ୍‌ ମାଜ଼ିର୍‌ ତା ପାଚେ ପାଚେ ୱାନି ମିସ୍ରିୟର୍‌ରିଂ ହୁଡ଼୍‌ଜି ବେସି ପାଣ୍ଡ୍ରା ଆତାନ୍‌, ଆରେ, ଇସ୍ରାଏଲ୍‌ ମାଜ଼ିର୍‌ ନିତ୍ରେମାପ୍ରୁଙ୍ଗ୍‌ କୁକ୍ତାର୍‌ । 11 ଆରେ, ମସାଂ ଇଚାର୍‌, "ମିସର୍‌ତ ଦୁଗେର୍‌ ହିଲାତାତ୍‌ ଇଞ୍ଜି କି ବାଟାତ ଏପେଙ୍ଗ୍ ମାଙ୍ଗେଙ୍ଗ୍ ଅସ୍ତେଦେଂ ତାହିୱାତ୍‌ତାଦେର୍‌ ? ମା ଲାହାଂ ଇ ବେବାର୍‌ କିଜ଼ି ମାଙ୍ଗେଙ୍ଗ୍ ମିସର୍‌ତାଂ ଇନାକିଦେଂ ହପ୍‌ଚି ତାହିୱାତ୍‌ତାଦେର୍‌ ? 12 ମାଙ୍ଗେଙ୍ଗ୍ ମାଞ୍ଜେଙ୍ଗ୍ ହିଦାଟ୍‌, ଆପେଙ୍ଗ୍ ମିସ୍ରିୟର୍‌ତି ଆଡ଼୍‌ୟାର୍‌ କାମାୟ୍‌ କିନାପ୍‌, ଇନାକିଦେଂକି ବାଟାତ ହାନି ବାଟା ମିସ୍ରିୟର୍‌ତି ହେବା କିନାସ୍‌ ମା ମଙ୍ଗଲ୍‌, ଆପେଙ୍ଗ୍ ମିସର୍‌ତ ମିଙ୍ଗେଙ୍ଗ୍ ଇ କାତା ଇଞ୍ଜ୍‌ୱାଦାଂ ମାଚାପ୍‌ କି ?" 13 ପାଚେ ମସା ମାନାୟାରିଂ ଇଚାନ୍‌, "ଏପେଙ୍ଗ୍ ପାଣ୍ଡ୍ରା ଆମାଟ୍‌, ସୁସ୍ତା ମାନାଟ୍‌; ନିତ୍ରେମାପ୍ରୁ ନେଞ୍ଜେଙ୍ଗ୍ ଇନେସ୍‌ ବାନି ମିଙ୍ଗେଙ୍ଗ୍ ମୁକ୍‌ଡ଼ାୟ୍‌ କିଦ୍‌ନାର୍‌, ହେଦାଂ ହୁଡ଼ାଟ୍‌; ଏପେଙ୍ଗ୍ ନେଞ୍ଜେଙ୍ଗ୍ ଇନେସ୍‌ ମିସ୍ରିୟରିଂ ହୁଡ଼୍‌ନାଦେରା, ହେ ଲାକେ ୱିଜ଼୍‌ୱି କାଡ଼୍‌ ପାତେକ୍‌ ଆରେ ଇନାୱାଡ଼ାଙ୍ଗ୍‌ ହୁଡ଼ୁଦେର୍‌ ।" 14 ଇସ୍ୱର୍‌ ମି କାଜିଙ୍ଗ୍ ଜୁଜ୍‌ କିନାନ୍‌, ଏପେଙ୍ଗ୍ ଚିମ୍‌ରା ଆଜ଼ି ମାନାଦେର୍‌ । 15 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାତ୍‌, "ଏନେଙ୍ଗ୍ ମାଙ୍ଗେଙ୍ଗ୍ ଇନାକିଦେଂ କୁକ୍ତାନାୟା ? ଇସ୍ରାଏଲ୍‌-ମାଜ଼ିରିଂ ଇନାଟ, ହେୱାର୍‌ ଆଗେ ହାଲେର୍‌ । 16 ଆରେ, ଏପେଙ୍ଗ୍ ଜାର୍‌ ବେଡ୍‌ଗା ପେସ୍‌ଦି ଆରି ହାମ୍‌ଦୁର୍‌ ଜପି କେଇ ଲାମାୟ୍‌ କିଜ଼ି ହେଦାଂ ରି ବାଗ୍‌ କିୟା; ହେବେ ଇସ୍ରାଏଲ୍‌ ମାଜ଼ିର୍‌ ୱାଚ୍‌ଚି ହାଜ଼ିତିଂ ହାମ୍‌ଦୁର୍‌ ବିତ୍ରେ ହଣାର୍‌ । 17 ଆରେ, ଆପ୍‌, ହୁଡ଼ାଟ୍‌, ଆପ୍‌ ମିସ୍ରିୟର୍‌ ୱାସ୍କି ଆଟ୍‌ୱା କିତିଲେ, ହେୱାର୍‌ ହେୱାର୍‌ ପାଚେ ପାଚେ ହାନାର୍‌, ପାଚେ ଆପ୍‌ ପାର ଆରି ତା ସବୁ ମିଲ୍ୟାର୍‌, ହାଗାଡ଼୍‌ ଚାଲାୟ୍‌କିନାକାର୍‌ ମାନାୟାର୍‌ ହୁଦାଂ ପାଣ୍‌ ପାୟାନାସ୍‌ ।" 18 ଆରେ, ପାର, ତା ହାଗାଡ଼୍‌ ଆରି ତା ଗଡ଼ା ହାଗାଡ଼୍‌ ଚାଲାୟ୍‌କିନାକାର୍‌ ମାନାୟାର୍‌ ହୁଦାଂ ପାଣ୍‌ ପାୟାତି ପାଚେ ଆସେଙ୍ଗ୍‌ ଜେ ନିତ୍ରେମାପ୍ରୁ, ଇଦାଂ ମିସ୍ରିୟ ମାନାୟାର୍‌ ପୁନାର୍‌ । 19 ହେ ୱାଡ଼ାଙ୍ଗ୍ ଇସ୍ରାଏଲ୍‌ ଦଲ୍‌ନି ୱାନି ପର୍‌ମେସ୍ୱର୍‌ତି ଦୁତ୍‌ ବିନେ ଆଜ଼ି ହେୱାର୍‌ ପାଚେ ହାଚାତ୍‌, ଆରେ, ବାଦାଡ଼୍‌ମୁଣ୍ଡା ହେୱାର୍‌ ମୁମ୍‌ଦାଂ ବିନେ ଆଜ଼ି ହେୱାର୍‌ ପାଚେ ନିଲ୍‌ତାତ୍‌ । 20 ହେ ବାଦାଡ଼୍‌ମୁଣ୍ଡା ମିସ୍ରିୟ ଦଲ୍‌ ଆରି ଇସ୍ରାଏଲ୍‌ ଦଲ୍‌ ବିତ୍ରେ ୱାତାତ୍‌, ଆରେ, ହେ ସମୁତ ବାଦାଡ଼୍‌ ମିସର ନିକାରିଂ ମାଜ୍‌ଗା ଆତାତ୍‌ ଆରେ ଇସ୍ରାଏଲ୍‌ ନିକାରିଂ ହେଦାଂ ମ୍ଡିକାଲିଂ ଅଜଡ଼୍‌ କିତାତ୍‌; ଇଦାଂ କାଜିଙ୍ଗ୍ ସବୁ ମ୍ଡିକା ର ଦଲ୍‌ ବିନ୍‌ ଦଲ୍‌ ଲାଗାଂ ୱାଦେଂ ଆଡ୍‌ୱାତାତ୍‌ । 21 ଇଦାଂ ପାଚେ ମସା ହାମ୍‌ଦୁର୍‌ ଜପି ଜାର୍‌ କେଇ ଲାମାୟ୍‌ କିତିଲେ, ନିତ୍ରେମାପ୍ରୁ ହେ ୱିଜ଼ୁ ମ୍ଡିକା ବେସି ୱେଡ଼ାହତ୍‌ନି ଦୁକା ହୁଦାଂ ହାମ୍‌ଦୁର୍‌ତିଂ ପିସ୍ତି ୱାଚି କିତାତ୍‌ ଆରି ଏଜ଼ୁଙ୍ଗ୍‌ ରି ବାଗ୍‌ ଆତାତ୍‌ । 22 ପାଚେ ଇସ୍ରାଏଲ୍‌ ହିମ୍‌ଣାଂ ୱାଚ୍‌ଚି ହାଜ଼ି ହିଜ଼ି ହାମ୍‌ଦୁର୍‌ ବିତ୍ରେ ହାଚାର୍‌, ଆରେ, ହେୱାର୍‌ ତିନାନିପ ଆରି ଡେବ୍ରି ନିପ ଏଜ଼ୁଙ୍ଗ୍ ଗାର୍‌ ଲାକେ ଆତାତ୍‌ । 23 ଇଦାଂପାଚେ ମିସ୍ରିୟର୍‌, ଇଚିସ୍‌, ପାରତି ସବୁ ଗଡ଼ାଙ୍ଗ୍‌, ହାଗାଡ଼୍‌, ଆରି ଗଡ଼ାଙ୍ଗ୍‌ ଚାଲାୟ୍‌କିନାକାର୍‌ ମାନାୟ୍‌ ୱିଜ଼ାକାର୍‌ ହନ୍‌ଚି ହେୱାର୍‌ ପାଚେ ପାଚେ ହାମ୍‌ଦୁର୍‌ତ ହଟାର୍‌ । 24 ମତର୍‌ ମ୍ଡିକାଲିଂ ଅଜଡ଼୍‌ ଆନିହିଙ୍ଗ୍‌ ନିତ୍ରେମାପ୍ରୁ ନାଣି ଆରି ବାଦାଡ଼୍‌ମୁଣ୍ଡା ହିଜ଼ି ମିସ୍ରିୟରିଂ ମେଲ୍ୟାକାଂ ହୁଡ଼୍‌ତାର୍‌ ଆରି ମିସ୍ରିୟରିଂ ମେଲ୍ୟାକାଂ ବିଲ୍‌କି କିତ୍‌ତାର୍‌ । 25 ହେୱାନ୍‌ ହେୱାର୍‌ତି ହାଗାଡ଼୍‌ନି ଚକା ଜାମ୍‌କିତାନ୍‌, ହେୱାର୍‌ ବେସି କସ୍ଟତାଂ ହାଗାଡ଼୍‌ ଚାଲାୟ୍‌ କିତାର୍‌; ହେବେ ମିସ୍ରିୟ ମାନାୟାର୍‌ ଇଚାର୍, "ୱାଡ, ଆସେଙ୍ଗ୍ ଇସ୍ରାଏଲ୍‌ ମୁମ୍‌ଦାଂ ହନ୍‌ନାସ୍‌, ଇନାକିଦେଂକି ନିତ୍ରେମାପ୍ରୁ ହେୱାର୍‌ ପାକ୍ୟା ଆଜ଼ି ମିସ୍ରିୟର୍‌ତି ବିରୁଦ୍‌ତ ଜୁଜ୍‌ କିନାରା ।" 26 ଇଦାଂ ପାଚେ ନିତ୍ରେମାପ୍ରୁ ମସାଂ ଇଚାନ୍‌; "ଏପେଙ୍ଗ୍‌ ହାମ୍‌ଦୁର୍‌ ଜପି ଜାର୍‌ କେଇ ଲାମାୟ୍‌ କିୟା; ହେବେ ମିସ୍ରିୟର୍‌ତି, ହେୱାର୍‌ତି ହାଗାଡ଼୍‌ ଆରି ଚାଲାୟ୍‌କିନାକାର୍‌ ଜପି ଆରେରଗ ଏଜ଼ୁଙ୍ଗ୍‌ ୱାନିକ୍‌ ।" 27 ପାଚେ ମସା ହାମ୍‌ଦୁର୍‌ ଜପି କେଇ ଲାମାୟ୍‌ କିତାନ୍‌, ଆରେ ନାଣାଙ୍ଗେ ସମୁତିଂ ହାମ୍‌ଦୁର୍‌ ଆରେରଗ ସମାନ୍‌ ଆଦେଂ ଲାଗାତାତ୍‌; ପାଚେ ମିସ୍ରିୟର୍‌ ହନ୍‌ତିଲେ, ନିତ୍ରେମାପ୍ରୁ ହାମ୍‌ଦୁର୍‌ ବିତ୍ରେ ହେୱାରିଂ ମୁଚ୍‌ଚାନ୍‌ । 28 ଆରେ, ଏଜ଼ୁଙ୍ଗ୍ ଆରେରଗ ହେୱାର୍‌ତି ହାଗାଡ଼୍‌ ଆରି ଚାଲାୟ୍‌କିନାକାର୍‌ ମାନାୟାରିଂ ଡାବାୟ୍‌ କିତାତ୍‌; ପାଚେ ପାରତି ଇମ୍‌ଣି ସବୁ ମେଲ୍ୟାର୍‌ ହେୱାର୍‌ ପାଚେ ପାଚେ ହାମ୍‌ଦୁର୍‌ ବିତ୍ରେ ହଣ୍‌ଜି ମାଚାର୍‌, ହେୱାର୍‌ ବିତ୍ରେତାଂ ରୱାନ୍‌ ପା ବାକି ମାନ୍‌ୱାତାର୍‌ । 29 ମତର୍‌ ଇସ୍ରାଏଲ୍‌ ମାଜ଼ିର୍‌ ୱାଚ୍‌ଚି ହାଜ଼ିତ ହାମ୍‌ଦୁର୍‌ ନାସି ହାଚାର୍‌; ଆରେ, ଏଜ଼ୁଙ୍ଗ୍ ହେୱାର୍‌ତି ଡେବ୍ରି ଆରି ତିନିବାଗାଙ୍ଗ୍‌ କାତି ଲାକେ ଆତିକ୍‌ । 30 ଇ ବାନି ହେ ଦିନ୍‌ ନିତ୍ରେମାପ୍ରୁ ମିସ୍ରିୟର୍‌ତି କେଇଦାଂ ଇସ୍ରାଏଲ୍‌ତିଂ ସାଇଜ କିତାନ୍‌ ଆରି ଇସ୍ରାଏଲ୍‌ ମିସ୍ରିୟରିଂ ହାମ୍‌ଦୁର୍‌ ମାଦି ହାତାକା ହୁଡ଼୍‌ତାର୍‌ । 31 ନିତ୍ରେମାପ୍ରୁ ମିସ୍ରିୟର୍‌ ବିରୁଦ୍‌ତ ଇ ଇମ୍‌ଣି ଗାଜା କାମାୟ୍‌ କିତାନ୍‌, ହେଦାଂ ଇସ୍ରାଏଲ୍‌ ହୁଡ଼ୁତାର୍‌; ହେବେ ମାନାୟାର୍‌ ନିତ୍ରେମାପ୍ରୁତିଂ ପାଣ୍ଡ୍ରା ଆଜ଼ି ନିତ୍ରେମାପ୍ରୁତାକେ ଆରି ତା ଆଡ଼୍‌ୟାର୍‌ ମସାତିତାକେ ପାର୍ତି କିତାର୍‌ ।