1 ଇଦାଂପାଚେ ନିତ୍ରେମାପ୍ରୁ ମସାଂ ଇଚାନ୍, "ଏନ୍ ଆଗେଲାକେ ରି କାଲ୍‌ ପାଟା କିୟା । ଏନ୍ ଇମ୍‌ଣି କାଲ୍‌ ପାଟା ଡ୍ରିକ୍ତାୟ୍‌ନା, ତା ଜପି ଇନାକା ଇନାକା ଲେକା ମାଚାତ୍‌, ହେସବୁ କାତା ଆପ୍‌ ଇ ରି କାଲ୍‌ଦ ଲେକିକିନାପ୍‌ । 2 ଆରେ ଏପ୍‌ ନାଡ଼ିହିଂ ଜାଲ୍‍ଦି ମାନାଦେର୍‌ ଆରି ନାଡ଼ିହିଂ ସିନୟ ମାଡ଼ିତ ଦୁମ୍‌ଜି ହେବେ ମାଡ଼ି ଗବାତ ମା ଲାଗାୟ୍‍ତ ଏକାୱାଡ । 3 ମତର୍‌ ନି ଲାହାଂ ଆରେ ଇନେର୍‌ ଜପି ୱାଉର୍‌, ଆରେ, ଇ ସବୁ ମାଡ଼ିତ ଇନେର୍‌ ଚଞ୍ଜ୍‌ୟା ଆଉର୍‌ ଆରି କଡିଙ୍ଗ୍‌ ମାନ୍ଦା ପା ମାଡ଼ି ହାଣ୍‌କୁ ହାରା ଆଉକ୍‌ ।" 4 ପାଚେ ମସା ପର୍‌ତୁମ୍‌ କାଲ୍‌ ଲାକେ ରିଣ୍ଡି କାଲ୍‌ ପାଟା କାର୍ତାନ୍‌; ଆରେ, ହେୱାନ୍‌ ନିତ୍ରେମାପ୍ରୁତି ବଲ୍‌ଇସାବ୍ରେ ନାଡ଼ିହିଂ ନିଂଜି ସିନୟ ମାଡ଼ି ଜପି ହାଚାନ୍‌ ଆରି ହେ ରି କାଲ୍‌ ପାଟା କେଇଦ ଅତାନ୍‌ ।

5 ୱାଟିଂ ନିତ୍ରେମାପ୍ରୁ ବାଦାଡ଼୍‌ତ ପ୍ଡାକ୍ୟାତି ହେ ବାହାତ ତା ଲାହାଂ ନିଲ୍‍ଚି ନିତ୍ରେମାପ୍ରୁତି ତର୍‌ ସୁଣାୟ୍ କିତାନ୍‌ । 6 ଆରେ ନିତ୍ରେମାପ୍ରୁ ତା ମୁମ୍‌ ହିଜ଼ି ହାଲ୍‌ଜି ଇଦାଂ ସୁଣାୟ୍ କିତାନ୍, "ନିତ୍ରେମାପ୍ରୁ, ନିତ୍ରେମାପ୍ରୁ ପର୍‌ମେସ୍ୱର୍‌ ଲବାତ୍‌କିନାକାନ୍ ଆରି ଦୟାନିକାନ୍‌, ରିସାତ ସୁସ୍ତା, ଦୟା ଆରି ହାତ୍‌ପାତ ପୁରାବାର୍ତି; 7 ହାଜାର୍‌ ହାଜାର୍‌ ପାଟ୍‌ ପାତେକ୍‌ ଦୟାରାକ୍ୟାକିନାକାନ୍, ଅପ୍‌ରାଦ୍‌ ଆରି ବଲ୍ ଉଡ଼ାନାକାର୍‌ ଆରି ପାପ୍ କେମାକାର୍‌ୟା, ଆତିସ୍ପା ଇନେସ୍ପା ହେବେନି ଡାଣ୍ଡ୍‌ହିନାକାନ୍, ତିନି ଆରି ଚାରି ପାଟ୍‌ ପାତେକ୍‌ ମାଜ଼ିର୍‌ନାତିର୍‌ ଜପି ବାୱାର୍ତି ଦସିନି ଡାଣ୍ଡ୍‌ ହିନାକାନ୍ ।"

8 ହେବେ ମସା ବେଗି ମେଦ୍‌ନିତ କାପ୍‌ଡ଼ା ତାରେନ୍‌ କିଜ଼ି ଜୱାର୍‌ କିଜ଼ି ଇଚାନ୍‌, 9 "ହେୱାନ୍‌ ଇଚାନ୍‌ ମାପ୍ରୁ, ଆନ୍‌ ଜଦି ନି ନଞ୍ଜର୍‌ତ ଉପ୍‌କାର୍‌ ପାୟାତାଂନା, ତେବେ ଗୱାରି କିଦ୍‌ନାଙ୍ଗା, ମାପ୍ରୁ ମା ମାଦ୍‌ଣାକାନ୍‌ ଆଜ଼ି ତାଙ୍ଗା; ଇନେକିଦେଂକି ଇୱାର୍‌ ଜିଦ୍‌ ଲକୁ, ଆରେ ମା ପାପ୍‌ କାଜିଂ ମାଂ ଇଡ଼୍‌ଦେନ୍‌ ।"

10 ଲାଗ୍‌ ହେୱାନ୍‌ ଇଚାନ୍‌, "ଆନ୍‌ ରଞ୍ଜାଙ୍ଗ୍‌ ନିୟମ୍‌ କିନାଙ୍ଗ୍; ୱିଜ଼ୁ ପୁର୍ତିତ କି ଇମ୍‌ଣି କୁଟୁମ୍‌ ପା ଇନାକା କିୟାଆୱାତାତ୍‌ନା, ଆଲେଙ୍ଗ୍ କାବା ଆନି କାମାୟ୍‌ ଆପ୍‌ ମି ୱିଜ଼ାକାର୍‌ ମାନାୟାର୍‌ ତାକେ କିନାପ୍‌; ପାଚେ ଇମେଣି ସବୁ ଲକ୍‌ ବିତ୍ରେ ଏପ୍‌ ମାନାଦେର୍‌, ହେୱାର୍‌ ନିତ୍ରେମାପ୍ରୁ ହେ କାମାୟ୍‌ ହୁଡ଼ୁନାର୍‌, ଇନାକିଦେଂକି ଆପ୍‌ ମି ତାକେ ଇନାକା କିନାପ୍, ପାଣ୍ଡ୍ରୁ ହେଦାଂ ବୟ୍‌କାର୍‌ ଆନାତ୍‌ । 11 ନେଞ୍ଜେଙ୍ଗ୍ ଆନ୍‌ ମିଙ୍ଗେଙ୍ଗ୍ ଇନାକା ବଲ୍‌ ହିଦ୍‌ନାନ୍‌, ପାଚେ ଏତ୍‌କିୟାଟ୍‌; ହୁଡାଟ୍‌, ଆନ୍‌ ଇମରିୟ, କିଣାନିୟ, ହିବିୟ, ପରିଜିୟ, ହିତିୟ, ଆରି ଜିବୁସିୟ ଲକୁରିଂ ମି ତାକେଣ୍ଡାଂ ପେସ୍‌ନାଂ । 12 ଏପ୍‌ ମି ବିସ୍ରେ ଜାଗ୍ରତ୍‌ ଆଡୁ, ଇମ୍‌ଣି ଦେସ୍ତ ହାନାଦେରା, ହେ ଦେସ୍‌ତ ମାନି ଲକୁର୍‌ ନିୟମ୍‌ କିମାଟ୍‌; କାତେ ହେୱାଙ୍ଗ୍‌ ମି ବିତ୍ରେ ର ଡ଼ୁକା ଲାକେ ଆନାତ୍‌ । 13 ମାତର୍‌ ଏପେଙ୍ଗ୍ ହେୱାର୍‌ ବେଦି ସବୁ ଡ୍ରିକ୍‌ନାଦେର୍‌ ଆରେ ହେୱାର୍‌ ତୁମ୍‌ ସବୁ ଡ୍ରିକ୍‌ନାଦେର୍‌ ଆରି ଆସେରାନି ପୁତ୍‌ଡ଼ା କାଦ୍‌ଦି ତୁହିନାଦେର୍‌ ।"

14 ଇଦାଂକାଜିଂ ଏପ୍‌ ବିନ୍‌ ଇମ୍‌ଣାକାପା ପେନ୍‌ଦିଂ ଜୱାର୍‌ କିଉଦେର୍‌, ଇନେକିଦେଂକି ନିତ୍ରେମାପ୍ରୁତି ତର୍‌ ନିଜ୍‌ ଜାଜ୍‌ମାଲ୍‌ ରାକ୍ୟାତାଂ ତିର୍‌କାଡ଼୍‌, ହେୱାନ୍‌ ନିଜ୍‌ ଜାଜ୍‌ମାଲ୍‌ ରାକ୍ୟାତାଂ ତିର୍‌କାଡ଼୍‌ ଇସ୍ୱର୍‌ ଆନାନ୍‌ । 15 ଇନେସ୍‌କି କି ଏନ୍‌ ହେ ଦେସ୍‌ ନିକାର୍‌ ମାନାୟାର୍‌ ଲାହାଂ ନିୟମ୍‌ କିନାଦେର୍‌; କିତିସ୍‌ ଇମ୍‌ଣି ସମୁତ ହେୱାର୍‌ ଜାର୍‌ ପେନ୍‌କୁନି ପାଚେହାଲ୍‌ଜି ଦାରୁଲା କିନାର୍‌ ଆରି ନିଜ୍‌ ପେନ୍‌କୁ ଲାଗାୟ୍‌ ପୁଜା କିନାର୍‌, ହେ ସମୁତ ଇନେର୍‌ ମିଂ କୁକ୍ତିତିସ୍‌, ଏପ୍‌ ତା ପୁଜାଜିନିସ୍‌ ତିନାଦେର୍‌; 16 କି ଏପେଙ୍ଗ୍‌ ଜାର୍‌ ମାଜ଼ିର୍‌ କାଜିଂ ହେୱାର୍‌ତି ଗାଚ୍‌କୁକାଂ ଇଡ଼୍‌ତାଦେର୍‌ଚି, ହେୱାର୍‌ତି ଗାଚ୍‌କୁକାଂ ନିଜ୍‌ ପେନ୍‌କୁନି ପାଚେହାଲ୍‍ଜି ମି ମାଜ଼ିରିଂ ଜାର୍ତି ପେନ୍‌କୁନି ପାଚେହାଲି କିଜ଼ି ଦାରି କିୟ୍‌କିନିକ୍‌ ।

17 ଏପ୍‌ ଜାର୍‌ କାଜିଂ ଚାଚ୍‌ତ ରଚ୍‌ଚି ଇମ୍‌ଣାକାପା ପେନ୍‌ କିମାଟ୍‌ । 18 ଏପ୍‌ ହଇୱି ରୁଟିନି ପାର୍ବୁ ମାନି କିନାଦେର୍‌, ଆରେ, ଆବିବ୍‌ ମାସ୍‌ନି ଇମ୍‌ଣି ସମୁତ ଇନେସ୍ କିଦେଂ ମିଂ ବଲ୍‌ ହିତ୍‌ତାପ୍‌ନା, ହେଲାକେ ଏପ୍‌ ସାତ୍‌ ଦିନ୍ ହଇୱି ରୁଟି ତିନାଦେର୍‌; ଇନେକିଦେଂକି ହେ ଆବିବ୍‌ ମାସ୍‌ତ ଏପ୍‌ ମିସର୍‌ ଦେସ୍‌ତାଂ ହସି ୱାଜ଼ିମାଚାଦେର୍‌ ।

19 ଆରେ ୱିଜ଼ୁ ପର୍‌ତୁମ୍‌ ଗାଟାତି ଗରବ୍‌ପାଡ଼୍‌ ଆରି କଡିଂ ମେଣ୍ଡାଂ ମାନ୍ଦା ବିତ୍ରେତାଂ ପର୍‌ତୁମ୍‌ ଗାଟାତି ଆଣ୍ଡ୍ରାପସୁ ସବୁ ମାଦାଂ । 20 ମତର୍‌ ପର୍‌ତୁମ୍‌ ଗାଟାତି ଗଦ ବାଦୁଲ୍‌ତ ଏପ୍‌ ମେଣ୍ଡାହିମ୍‌ଣା ହିଜ଼ି ହେଦେଲିଂ ମୁକ୍‌ଡ଼ାୟ୍‌ କିନାଦେର୍‌; ଜଦି ମୁକ୍‌ଡ଼ାୟ୍‌ କିୱିତିସ୍‌, ତେବେ ତାଦି ହାକ୍‌ ଡ୍ରିକ୍‌ନାଦେର୍‌ । ମି ପର୍‌ତୁମ୍‌ଗାଟାତି ମାଜ଼ି ସବୁତିଂ ଏପ୍‌ ମୁକ୍‌ଡ଼ାୟ୍‌ କିନାଦେର୍‌ । ଆରେ, ଇନେର୍‌ ୱାରି କେଇଦାଂ ମା ମୁମ୍‌ଦ ଏକାୱାଉଦେର୍‌ ।

21 ଏପ୍‌ ଚଅ ଦିନ୍‌ ହେବା କିନାଦେର୍‌, ମତର୍‌ ସାତ୍‌ ଦିନ୍ତ ଜମ୍‌ନାଦେର୍‌; ତାସ୍‌କାମାୟ୍‌ ଆରି ତାସ୍‌ ତ୍ରେଜ଼୍‌ନି ସମୁତ ପା ଜମ୍‌ନାଦେର୍‌ ।

22 ଏପ୍‌ ସାତ୍‌ଦିନ୍‍ନି ପାର୍ବୁ, ଇଚିସ୍‌, ତ୍ରେସ୍ତି ଗଁମ୍‌ନି ପର୍‌ତୁମ୍‌ ପାଡ଼୍‌ନି ପାର୍ବୁ ଆରି ବାର୍ହୁନି ହାରିହାରା ୱେଡ଼ାଲିଂ ପାଡ଼୍‌ ରୁଣ୍ଡାୟ୍‌କିତି ପାର୍ବୁ କିନାଦେର୍‌ ।

23 ମି ୱିଜ଼ାର୍‌ ଆଣ୍ଡ୍ରାହିମ୍‌ଣାଂ ବାର୍ହୁ ବିତ୍ରେ ତିନ୍‌ ହଟ୍‌ ଇସ୍ରାଏଲ୍‌ନି ମାପ୍ରୁ ନିତ୍ରେମାପ୍ରୁ ପର୍‌ମେସ୍ୱର୍‌ତି ମୁମ୍‍ଦ ହାନାଦେର୍‌ । 24 ଇନେକିଦେଂକି ଆପ୍‌ ମି ମୁମ୍‌ଦାଂ ବିନ୍ ଦେସ୍‌ନି କୁଟୁମ୍‌ତିଂ ଦେହା କିନାଂ ଆରି ମି ହାନ୍ଦି ଅହାର୍‌ କିନାପ୍‌, ଆରେ, ଏପ୍‌ ବାର୍ହୁ ବିତ୍ରେ ତିନ୍‌ ହଟ୍‌ ନିତ୍ରେମାପ୍ରୁ ପର୍‌ମେସ୍ୱର୍‌ତି ମୁମ୍‌ଦ ଏକିନି କାଜିଂ ହାଚିସ୍‌, ମି ବୁଇଁ କାଜିଂ ଇନେର୍‌ ଲବ୍‌ କିଉର୍‌ ।

25 ଏପ୍‌ ମା ପୁଜାନି ନେତେର୍‌ ହୈନାକା ମେହାତି ଜିନିସ୍‌ ଲାହାଂ ପୁଜା କିଉଦେର୍‌ ଆରି ନିସ୍ତାର୍‌ ପାର୍ବୁନି ପାର୍ବୁତ ପୁଜାଜିନିସ୍‌ ନାଡ଼ିସ୍‌ ପାତେକ୍‌ ଇଟୁଦେର୍‌ ।

26 ଏପ୍‌ ଜାର୍‌ ବୁଇଁନି ପର୍‌ତୁମ୍‌ ଗାଟାତି ପାଡ଼୍‌ନି ଆଗେନି ବାଗ୍‌ ଜାର୍‌ ନିତ୍ରେମାପ୍ରୁତି ଇଞ୍ଜ ତାହିୱାନାଦେର୍‌ । ଆରେ, ଏପ୍‌ ଅଡା ହିମ୍‌ଣାତିଂ ତା ତେୟା ପାଲ୍‍ଦାଂ ୱାଞ୍ଜୁଦେର୍‌ ।

27 ଆରେ ନିତ୍ରେମାପ୍ରୁ ମସାଂ ଇଚାନ୍‌, "ଏନ୍‌ ଇ ସବୁ ବଚନ୍‌ ଲେକିକିୟା, ଇନେକିଦେଂକି ଆପ୍‌ ଇ ବଚନ୍‌ ଇସାବ୍ରେ ନି ଲାହାଂ ଆରି ଇସ୍ରାଏଲ୍‌ ଲାହାଂ ନିୟମ୍‌ ତିର୍‌ କିତାପ୍‌ନା ।" 28 ହେ ସମୁତ ମସା ନିତ୍ରେମାପ୍ରୁତି ଲାହାଂ ହେ ବାହାତ ରିକଡ଼ି ୱେଡ଼ାନାଣା ବାହା କିତାନ୍‌; ହେୱାନ୍‌ କାଦି ତିନ୍‌ୱାତାନ୍‌ କି ଏଜ଼ୁଂ ଉଣ୍‌ୱାତାନ୍‌ । ହେୱାନ୍ ହେ ରିଣ୍ଡି କାଲ୍‌ଦ ନିୟମ୍‌ ବଚନ୍‌, ଇଚିସ୍‌, ଦାସ୍‌ ବଲ୍‌ ଲେକିକିତାନ୍‌ ।

29 ଇଦାଂପାଚେ ମସା ସିନୟ ମାଡ଼ିତାଂ ଜୁଦ୍‌ନି ସମୁତ ସାକି ଲାକେ ରିଣ୍ଡାଙ୍ଗ୍‌ କାଲ୍‌ କେଇଦ ଆସ୍ତି ହାଲ୍‌ଜି ମାଡ଼ିତାଂ ଜୁତାନ୍‌, ମତର୍‌ ନିତ୍ରେମାପ୍ରୁତି ଲାହାଂ ବେଣ୍‌ବାଟ୍‌ କିନି କାଜିଂ ତା ମୁମ୍‌ ଜେ ଅଜଡ଼୍‌ ଆଜ଼ି ମାଚାତ୍‌, ହେଦାଂ ମସା ପୁନ୍‌ୱାଦାଂ ମାଚାନ୍‌ । 30 ଆରେ, ଏଚେକାଡ଼୍‌ଦ ହାରଣ ଆରି ଇସ୍ରାଏଲ୍‌ ହିମ୍‌ଣାଂ ମସାଂ ହୁଡ଼୍‌ତାର୍‌, ହେଏଚେକାଡ଼୍‌ଦ ତା ମୁମ୍‌ର ତଲ୍‌ ଅଜଡ଼୍‌ ମାଚାତ୍‌; ଲାଗିଂ ହେୱାର୍‌ ତା ଲାଗାୟ୍‌ ହାନି କାଜିଂ ପାଣ୍ଡ୍ରା ଆତାର୍‌ । 31 ମତର୍‌ ମସା ହେୱାରିଂ କୁକ୍ତିଲେ, ହାରଣ ଆରି ମଣ୍ଡ୍‌ଲିନି ମୁଣିକାର୍‌ ତା ଲାଗାୟ୍ ମାସ୍‌ଦି ହାଚାର୍‌; ହେବେ ମସା ହେୱାର୍‌ ଲାହାଂ ବେଣ୍‌ବାଟ୍‌ କିତାନ୍‌ । 32 ତାପାଚେ ଇସ୍ରାଏଲ୍‌ ହିମ୍‍ଣାଂ ତା ଲାଗାୟ୍‌ ହାଚାର୍‌; ହେବେ ନିତ୍ରେମାପ୍ରୁ ସିନୟ ମାଡ଼ିତ ତାଂ ଇମ୍‌ଣି ଇମ୍‌ଣି କାତା ଇଞ୍ଜି ମାଚାନ୍‌, ହେସବୁ ହେୱାନ୍‌ ବଲ୍ ଲାକେ ହେୱାରିଂ ୱେଚ୍‌ଚାନ୍ । 33 ଆରେ, ମସା ହେୱାର୍ ଲାହାଂ କାତାବାର୍ତା ୱିସ୍ତି ପାଚେ ଜାର୍‌ ମୁମ୍‌ଦ ତୁୱାଲ୍‌ ମୁକ୍ୟାତାନ୍‌ । 34 ମତର୍‌ ମସା ନିତ୍ରେମାପ୍ରୁତି ଲାହାଂ ବେଣ୍‌କିନି କାଜିଂ ବିତ୍ରେ ହେୱାନିଂ ମେହାଦେଂ ହାଲ୍‌ଜି ବାର୍ତ ୱାୱି ପାତେକ୍‌ ହେ ତୁୱାଲ୍‌ ରିକ୍‌ଚି ଇଡ଼୍‌ତାନ୍‌; ଆରେ ଇମ୍‌ଣି ବଲ୍‌ ପାୟାତାନ୍‌, ବାର୍ତ ୱାଜ଼ି ଇସ୍ରାଏଲ୍‌ ମାଜ଼ିରିଂ ହେଦାଂ ୱେଚ୍‌ଚାନ୍‌ । 35 ହେବେ ମସାତି ମୁମ୍‌ନି ତଲ୍‌ ଅଜଡ଼୍‌ ଆନାତ୍‌, ଇଦାଂ ଇସ୍ରାଏଲ୍‌ ହିମ୍‌ଣାଂ ତା ମୁମ୍‌ କାଜିଂ ମାସ୍‌ଦି ହୁଡ଼୍‌ତାର୍‌; ମସା ନିତ୍ରେମାପ୍ରୁତି ଲାହାଂ ବେଣ୍‌କିନି କାଜିଂ ଏଚେପାତେକ୍‌ ବିତ୍ରେ ହାଲ୍‌ୱାତାନ୍‌; ହେ ପାତେକ୍‌ ଜାର୍‌ ମୁମ୍‌ଦ ତୁୱାଲ୍‌ ମୁକ୍ୟାତାନ୍‌ ।