Êxodo 40

ଇଲ୍‌ନି ବାହା ଆରି ଚିକାଣ୍‌କାସ୍‌କା

1 ଇଦାଂପାଚେ ନିତ୍ରେମାପ୍ରୁ ମସାଙ୍ଗ୍‌ ଇଚାନ୍‌, 2 ଏନେଙ୍ଗ୍‌ ପର୍‌ତୁମ୍‌ ମାସ୍ତ ପର୍‌ତୁମ୍‌ ନାଞ୍ଜିଙ୍ଗ୍‌ ହାନିୱାନି ତୁମ୍‌ ଇଲ୍‌ ରଚ୍‌ନାୟ୍‌ । 3 ଆରେ, ହେ ବିତ୍ରେ ସାକି ପେଡ଼ି ଇଡ଼୍‌ଜି କେନ୍‌ଚି ହେନ୍ଦ୍ରା ଟଣ୍‌ଜି ହେ ପେଡ଼ି ପ୍ଡାକ୍‌ନାଦେର୍‌ । 4 ଇଦାଂପାଚେ ପାଟା ବିତ୍ରେ ତାସି ହେବେ ଜପ୍‌ଣି ଆଡ଼୍‌ମାଡ଼୍‌ ନିୟମ୍‌ ଇସାବ୍ରେ ଇଟ୍‌ନାଦେର୍‌; ଆରେ ବୈଟାମାର୍‌ ବିତ୍ରେ ତାସି ହେବେନି ବୈଟା ସବୁ ଆହିକିନାସ୍‌ 5 ସାକି ପେଡ଼ି ମୁମ୍‌ଦ ହନାନି ଦୁପ୍‌ନିଗାର୍‌ଣି ଇଟ୍‌ନାୟ୍‌, ଆରେ, ଇଲ୍‌ ଦୁୱେର୍‌ତ ପ୍ଡାକ୍‌ନି ହେନ୍ଦ୍ରା ଟନ୍‌ନାୟ୍‌ । 6 ଆରେ ହାନିୱାନି ତୁମ୍‌ନି ଇଲ୍‌ନି ଦୁୱାର୍‌ ଲାଗାଂ ବେଦି ଇଟ୍‌ନାୟ୍‌ । 7 ହାନିୱାନି ତୁମ୍‌ ଆରି ଗାର୍‌ଣି ବିତ୍ରେ ନୁସ୍‌ନି ମତା ଇଡ଼୍‌ଜି ହେବେ ଏଜ଼ୁଙ୍ଗ୍‌ ଇଟ୍‌ନାଦେର୍‌ । 8 ଆରେ, ଚାରିବେଣ୍‌ତାଂ ହାକ୍‌ଡ଼ି ରଚ୍‌ନାୟ୍‌ ଆରି ହାକ୍‌ଡ଼ି ଦୁୱେର୍‌ତ ପ୍ଡାକ୍‌ନି ହେନ୍ଦ୍ରା ଟନ୍‌ନାୟ୍‌ । 9 ଇଦାଂପାଚେ ଚିକାଣ୍‌କାସ୍‌ଦି ଚିକାଣ୍‌ ଅଜ଼ି ଇଲ୍‌ ଆରି ମାନ୍‌ହିଜ଼ି ସବୁ ଜିନିସ୍‌ ଚିକାଣ୍‌କାସ୍‌ନାକା କିଜ଼ି ହେଦାଂ ଆରି ହେବେନି ସବୁ ବାହା ପୁଇପୁୟା କିନାୟ୍‌; ହେବେ ହେଦାଂ ପୁଇପୁୟା ଆନାତ୍‌ । 10 ଆରେ, ଏପେଙ୍ଗ୍‌ ପୁଜା ଗାର୍‌ଣି ଆରି ହେବେନି ସବୁ ବାହା ଚିକାଣ୍‌କାସ୍‌ଦି କିଜ଼ି ପୁଇପୁୟା କିନାଦେର୍‌; ହେବେନି ହେ ବେଦି ବେସି ପୁଇପୁୟା ଆନାତ୍‌ । 11 ଆରେ ଏପେଙ୍ଗ୍‌ ନୁସ୍‌ନି ବାହା ଆରି ହେବେନି ପାଟା ଚିକାଣ୍‌କାସ୍‌ଦି ପୁଇପୁୟା କିନାଦେର୍‌ ।

12 ଇଦାଂପାଚେ ଏପେଙ୍ଗ୍‌ ହାରଣଙ୍ଗ୍‌ ଆରି ତା ମେହିରିଙ୍ଗ୍‌ ହାନିୱାନି ତୁମ୍‌ ଦୁୱେର୍‌ ଲାଗାଂ ତାସି ଏଜ଼ୁଙ୍ଗ୍‌ ନୁସ୍‌ନାକା କିନାଦେର୍‌ । 13 ଆରେ, ମା ଉଦେସ୍‌ତ ମାପ୍ରୁ ହେବାକିନାକାନ୍‌ କାମାୟ୍‌ କିନି କାଜିଂ ହାରଣଂ ପୁଇପୁୟା ହେନ୍ଦ୍ରା ଉସ୍‌ପିକିଜ଼ି ଚିକାଣ୍‌କାସ୍‌ଜ଼ି ଆରମ୍‌ କିନାନ୍‌ । 14 ଆରେ ତା ମାଜ଼ିରିଙ୍ଗ୍‌ ତାସି ଆଙ୍ଗି ଆର୍ପିକିୟାଟ୍‌ । 15 ଆରେ, ହେୱାର୍‌ ଲାତ୍ରାହିଂ ଇନେସ୍‌ ଚିକାଣ୍‌ କାସ୍‌ତାୟ୍‌, ହେଲାକେ ହେୱାରିଂ ଚିକାଣ୍‌ କାସ୍‌ନାଦେର୍‌, ହେବେ ହେୱାର୍‌ ମା ମାପ୍ରୁହେବାକିନି କାମାୟ୍‌ କିନାର୍‌, ହେଲାକେ ଚିକାଣ୍‌କାସ୍‌ନାକା ହେୱାର୍‌ ଆଣ୍ଡ୍ରାଂଇସାପ୍ରେ ୱିସ୍‌ୱିକାଡ଼୍‌ ପାତେକ୍‌ ମାପ୍ରୁହେବାକିନାକା ମୁଡ଼୍‌ ଆନାତ୍‌ । 16 ମସା ଏଲେଙ୍ଗ୍‌ କିତାନ୍‌; ହେୱାନ୍‌ ନିତ୍ରେମାପ୍ରୁ ବଲ୍‌ ଇସାପ୍ରେ ସବୁ କିତାନ୍‌ । 17 ଇଦାଂପାଚେ ମସା କାଜିଂ ନିତ୍ରେମାପ୍ରୁତି ବଲ୍‌ଇସାପ୍ରେ ଦୁଇ ବାର୍ହୁନି ପର୍‌ତୁମ୍‌ ମାସ୍‌ନି ପର୍‌ତୁମ୍‌ ନାଞ୍ଜିଙ୍ଗ୍‌ ତୁମ୍‌ ରଚ୍‌ଚାନ୍‌ । 18 ଆରେ, ମସା ହାନିୱାନି ତୁମ୍‌ ରଚି କିଜ଼ି ହେବେନି କାଣାକିତିକଟ୍‌ଲା ହିଜ଼ି ପାଟା କୁଚିକିଜ଼ି ଆର୍‌ଗାଡ଼ା ନେଚ୍‌ଚି ହେବେନି ମୁଣ୍ଡା ନିଲି କିତାର୍‌ । 19 ତାପାଚେ ନିତ୍ରେମାପ୍ରୁ ମସା ତୁମ୍‌ ଜପି ତୁମ୍‌ ୱିକ୍‌ତାନ୍‌ ଆରି ତୁମ୍‌ ଜପି ଚାତ୍‌ କିତାନ୍‌; 20 ଇଦାଂପାଚେ ମସାତି କାଜିଂ ନିତ୍ରେମାପ୍ରୁ ବଲ୍‌ ଇସାପ୍‌ରେ ହେୱାନ୍‌ ସାକିଆକି ଆସ୍ତି ପେଡ଼ି ବିତ୍ରେ ଇଡ଼୍‌ତାର୍ ଆରି ପେଡ଼ିତ କଣା ଚାନ୍‌ଞ୍ଜି ପେଡ଼ି ଜପି ପାପ୍‌ପ୍ଡାକ୍‌ନାକା ଇଡ଼୍‌ତାର୍‌; 21 ଆରେ, ନିତ୍ରେମାପ୍ରୁ ତୁମ୍‌ ବିତ୍ରେ ପେଡ଼ି ତାଇୱାତାର୍‌ ଆରି ପ୍ଡାକ୍‌ଚି ପାହ୍‌ନି କେନ୍‌ଚିହେନ୍ଦ୍ରା ଟଣ୍‌ଜି ସାକି ପେଡ଼ିତିଂ ମସା ଡାବାୟ୍‌ କିତାର୍‌ । 22 ଇଦାଂପାଚେ ମସାତି କାଜିଂ ନିତ୍ରେମାପ୍ରୁତି ବଲ୍‌ ଇସାପ୍‌ରେ ହେୱାନ୍‌ ତୁମ୍‌ନି ଡେବ୍ରି ପାଡ଼୍‌କା କେନ୍‌ଚି ହେନ୍ଦ୍ରାନି ବାର୍‌ତ ହାନିୱାନି ତୁମ୍‌ତ ପାଟା ଇଡ଼୍‌ତାର୍‌; 23 ଆରେ, ମସା ହେ ନିତ୍ରେମାପ୍ରୁତି ମୁମ୍‌ଦ ନିୟମ୍‌ଇସାପ୍ରେ ତା ଜପି ରୁଟି ଇଡ଼୍‌ତାର୍‌ । 24 ଇଦାଂପାଚେ ମସାତି କାଜିଂ ନିତ୍ରେମାପ୍ରୁତି ବଲ୍‌ ଇସାପ୍‌ରେ ପାଟା ମୁମ୍‌ଦ ଇଲ୍‌ନି ତିନା ବାଗାଂ ହାନିୱାନି ତୁମ୍‌ତ ବୈଟା ମାର୍‌ ଇଡ଼୍‌ତାର୍‌, 25 ଆରି ମସା ନିତ୍ରେମାପ୍ରୁ ମୁମ୍‌ଦ ବାଡ଼୍‌ତା ଆହିକିତାର୍‌ । 26 ଆରେ ମସାତି କାଜିଂ ନିତ୍ରେମାପ୍ରୁତି ବଲ୍‌ ଇସାପ୍‌ରେ ହେୱାନ୍‌ ହାନିୱାନି ତୁମ୍‌ତ କେନ୍‌ଚି ହେନ୍ଦ୍ରା ମୁମ୍‌ଦ ହନା ଗାର୍‌ଣି ଇଡ଼୍‌ତାର୍‌ 27 ଆରି ନିତ୍ରେମାପ୍ରୁ ମସା ତା ଜପି ହାର୍‌ଗାନ୍ଦାନି ଦୁପ୍‌ନି ଆହିକିତାର୍‌ । 28 ଆରେ, ନିତ୍ରେମାପ୍ରୁ ମସାତି କାଜିଂ ନିତ୍ରେମାପ୍ରୁ ବଲ୍‌ ଇସାପ୍‌ରେ ହେୱାନ୍‌ ତୁମ୍‌ ଦୁୱେର୍‌ତ ପ୍ଡାକ୍‌ନି ହେନ୍ଦ୍ରା ଟଣ୍‌ତାର୍‌ 29 ଆରି ହାନିୱାନି ତୁମ୍‌ତ ଇଲ୍‌ନି ଦୁୱାର୍‌ ଲାଗାଂ ବେଦି ଇଡ଼୍‌ଜି ନିତ୍ରେମାପ୍ରୁ ମସା ତା ଜପି କାଟ୍‌ପୁଜା ଆରି ଆକାତ୍‌ ହିତାର୍‌ । 30 ଇଦାଂପାଚେ ମସାତି କାଜିଂ ନିତ୍ରେମାପ୍ରୁତି ବଲ୍‌ ଇସାପ୍‌ରେ ହେୱାନ୍‌ ହାନିୱାନି ତୁମ୍‌ ଆରି ଗାର୍‌ଣି ମାଦିବାହାତ ନୁସ୍‌ନି ବାହା ଇଡ଼୍‌ଜି ତା ବିତ୍ରେ ନୁସ୍‌ନି କାଜିଂ ଏଜ଼ୁଙ୍ଗ୍‌ ହିତାର୍‌ । 31 ତାପାଚେ ମସା, ହାରଣ ଆରି ତା ମାଜ଼ିର୍‌ ଜାର୍‌ ଜାର୍‌ କେଇ କାଲ୍‌ ନୁସ୍ତାର୍‌ । 32 ଏଚେକାଡ଼୍‌ନି ସମୁତ ମାପ୍ରୁ ମସା ହେୱାର୍‌ ହାନିୱାନି ତୁମ୍‌ତ ହଟିସ୍‌ କି ବେଦିତ ଏକିତିସ୍‌, ହେ ସମୁତ ହେୱାର୍‌ କେଇ କାଲ୍‌ ନୁସ୍ତାର୍‌ । 33 ଇଦାଂପାଚେ ମସା ହେ ବାହାତ ଆରି ବେଦିତ ଚାରିବେଣ୍‌ତାଂ ହାକ୍‌ଡ଼ି ରଚ୍‌ଚାର୍‌ ଆରି ହାକ୍‌ଡ଼ି ଦୁୱେର୍‌ତ ଡାବାୟ୍‌ନିକି ହେନ୍ଦ୍ରା ଟଣ୍‌ତାର୍‌, ଏଲେଙ୍ଗ୍‌ ମସା ହେ କାମାୟ୍‌ ୱିସ୍ତାର୍‌ ।

ନିତ୍ରେମାପ୍ରୁତି ଜାଜ୍‌ମାଲ୍‌

34 ଇଦାଂପାଚେ ବାଦାଡ଼୍‌ ହେ ହାନିୱାନି-ତୁମ୍‌ତିଂ ଡାବାୟ୍‌ କିତାତ୍‌ ଆରି ନିତ୍ରେମାପ୍ରୁତି କେର୍‌କଣ୍‌ ବାହାତ ପୁରା କିତାତ୍‌ । 35 ତାପାଚେ ମସା ହାନିୱାନି-ତୁମ୍‌ତ ହଣ୍‌ଗେଦେଂ ଆଡ୍‌ୱାତାନ୍‌, ଇନାକିଦେଂକି ବାଦାଡ଼୍‌ ତା ଜପି ଡାବାୟ୍‌ କିଜ଼ିମାଚାତ୍‌ ଆରି ନିତ୍ରେମାପ୍ରୁ କେର୍‌କଣ୍‌ ବାହାତିଂ ପୁରା କିଜ଼ିମାଚାତ୍‌ । 36 ଆରେ, ଇଲ୍‌ ଜପିତାଂ ଏଚେକାଡ଼୍‌ଦ ବାଦାଡ଼୍‌ ଅୟାତାତ୍‌, ହେପଦ୍‌ନା ଇସ୍ରାଏଲ୍‌-ମାଜ଼ିର୍‌ ଜାର୍‌ ହାଞ୍ଜେଙ୍ଗ୍‌ ଜାଗ୍‌ରତ୍‌ ଆତାର୍‌ । 37 ମତର୍‌ ବାଦାଡ଼୍‌ ଏଚେକାଡ଼୍‌ଦ ଜପିତାଂ ତାରେନ୍‌ ଜୁଦ୍‌ୱାତାତ୍‌, ହେପଦ୍‌ନା ଜପିତାଂ ତାରେନ୍‌ ଜୁଦ୍‌ୱି ଦିନା ପାତେକ୍‌ ହେୱାର୍‌ ହାଲ୍‌ୱାତାର୍‌ । 38 ଇନାକିଦେଂକି, ୱିଜ଼ାର୍‌ ଇସ୍ରାଏଲ୍‌ ଲାତ୍ରା ହୁଡ଼୍‌ନିତାକେ ହେୱାର୍‌ତି ୱିଜ଼ାର୍‌ ହାନି ଦିନା ୱେଡ଼ାଲିଂ ନିତ୍ରେମାପ୍ରୁତି ବାଦାଡ଼୍‌ ଆରି ନାଣାଲିଙ୍ଗ୍‌ ନାଣି ବାହା ଜପି ଜୁତ୍‌ତାତ୍‌ ।