1 ନିତ୍ରେମାପ୍ରୁ ମସାଙ୍ଗ୍‌ ଇଚାନ୍‌, "ଆନେଙ୍ଗ୍ ପାର ଆରି ମିସର୍‌ ଜପି ଆରେ ରଞ୍ଜାଙ୍ଗ୍‌ ଡାଣ୍ଡ୍‌ ତାନାଙ୍ଗ୍‌; ତା ପାଚେ ହେୱାନ୍‌ ମିଙ୍ଗେଙ୍ଗ୍ ଇ ବାହାତାଂ ହାଞ୍ଜେଙ୍ଗ୍ ହିଦ୍‌ନାନ୍‌; ଆରେ, ହାଞ୍ଜେଙ୍ଗ୍ ହିଦ୍‌ନି ସମୁତ ହେୱାନ୍‌ ମିଙ୍ଗେଙ୍ଗ୍ ହାତେନେ ହପ୍ତାନାନ୍‌ । 2 ଇ କାଜିଙ୍ଗ୍ ନଙ୍ଗୟ୍‌ ମାନାୟାର୍‌ତି କିତୁଲ୍‌ତ ୱେଚାଟ୍‌, ୱିଜ଼ାର୍‌ ଆଣ୍ଡ୍ରାଙ୍ଗ୍‌ ଜାର୍‌ ଜାର୍‌ ପ୍ଡାହାନିକିଂତାଂ ରୁପା ହାସ୍‌କୁ ଆରି ହନା ହାସ୍‌କୁ ଏନ୍‌ଚି ଅୱାଟ୍‌ ।" 3 ଆରେ ନିତ୍ରେମାପ୍ରୁ ମିସ୍ରିୟର୍‌ତି କାଣ୍‌କୁକାଂ ମାନାୟାରିଂ ଦୟା ପାୟାତାର୍‌ । ଆରେ, ମିସର୍‌ ଦେସ୍‌ତ ପାରତି ଆଡ଼୍‌ୟାର୍‌ତି ଆରି ମାନାୟାର୍‌ତି କାଣ୍‌କୁକାଂ ମସା ବେସି ବପୁ ଆଣ୍ଡ୍ରେନ୍‌ ଆତାନ୍‌ । 4 ଇଦାଂ ପାଚେ ମସା ଇଚାନ୍‌, "ନିତ୍ରେମାପ୍ରୁ ଇ କାତା ଇନାନ୍‌, ଆସେଙ୍ଗ୍ ମାଦିମାଦା ନାଣା ମିସର୍‌ ନିପ ହିଜ଼ି ହାନାସ୍‌ ।" 5 ପାଚେ ଗାଦିତ କୁଚ୍‌ଚିଲେ ପାରତି ପର୍‌ତୁମ୍‌ ଜଲମ୍‌ଆତିତାଂ ଜେତା ନୁସ୍‌ନାକାଦେଲ୍‌ ଆଡ଼ିଏଣି ପର୍‌ତୁମ୍‌ ଜଲମ୍‌ଆତି ପାତେକ୍‌ ମିସର୍‌ ଦେସ୍‌ତ ସବୁ ପର୍‌ତୁମ୍‌ ଜଲମ୍‌ଆତି ଆରି ପସୁଙ୍ଗ୍‌ ପର୍‌ତୁମ୍‌ ଜଲମ୍‌ଆତିକିଂ ହାନିକ୍‌ । 6 ଲାଗ୍‌ ସବୁ ମିସର୍‌ ଦେସ୍ତ, ଇନେସ୍‌କି ଇନାୱାଡ଼ାଙ୍ଗ୍‌ ଆୱାତାତ୍‌ନା ଆରି ଆଉତ୍‌, ଏଲେଙ୍ଗ୍‌ ବେସି ଆଡ଼୍‌ବାନାକା ଆନାତ୍‌ । 7 ମତର୍‌ ନିତ୍ରେମାପ୍ରୁ ମିସ୍ରିୟ ମାନାୟାର୍‌ତାଂ ଇସ୍ରାଏଲିୟର୍‌ ମାନାୟାରିଂ ବିନେ କିନାନ୍‌, ଇଦାଂ ଇନେସ୍‌ ଏପେଙ୍ଗ୍ ପୁନାଦେର୍‌, ଇଦାଂ କାଜିଂ ଇସ୍ରାଏଲ୍‌ ମାଜ଼ିର୍‌ ବିତ୍ରେ ମାନାୟ୍‌ କି ପସୁ କାଜିଂ ର ନିକୁଡ଼୍‌ ପା ଆଡ଼୍‌ବୁତ୍‌ । 8 ପାଚେ ମିଦାଂ ଇ ୱିଜ଼ୁ ଆଡ଼୍‌ୟାର୍‌ ନା ଲାଗାଂ ତାରେନ୍‌ ଆଜ଼ି ୱାନାର୍‌ ଆରି ନାଙ୍ଗେଙ୍ଗ୍ ଜୱାର୍‌ କିଜ଼ି ଇଞ୍ଜ୍‌ନାର୍‌, ଏନେଙ୍ଗ୍ ଆରି ମି ପାଚେୱାନାକାର୍‌ ୱିଜ଼ାର୍‌ ମାନାୟ୍‌ ହସି ହାଲାଟ୍‌; ତା ପାଚେ ଆନ୍‌ ହସି ହାନାଙ୍ଗ୍‌ । ଇଦାଂ ପାଚେ ହେୱାନ୍‌ ବେସି ରିସାତାଂ ପାର ଲାଗାଂତାଂ ହସି ହାଚାନ୍‌ । 9 ନିତ୍ରେମାପ୍ରୁ ମସାଂ ଇଞ୍ଜିମାଚାନ୍‌, ଆପ୍‌ ଇନେସ୍‌ ମିସର୍‌ ଦେସ୍ତ ଜାର୍‌ କାବା କାମାୟ୍‌ ବେସିକିନାସ୍‌, ଇଦାଂ କାଜିଂ ପାର ମି କାତାତ ମାନ୍‌ହିଉନ୍‌ । 10 ଆରେ, ମସା ଆରି ହାରଣ୍‌ ପାର କଚଣ୍‌ତ ଇ ୱିଜ଼ୁ କାବା କାମାୟ୍‌ କିଜ଼ି ମାଚାନ୍‌; ମତର୍‌ ନିତ୍ରେମାପ୍ରୁ ପାରତି ୱାସ୍କି ଆଟ୍‌ୱା କିତିଲେ, ହେୱାନ୍‌ ଜାର୍‌ ଦେସ୍‌ତାଂ ଇସ୍ରାଏଲ୍‌ ମାଜ଼ିରିଂ ହାଞ୍ଜେଙ୍ଗ୍ ହିୱାତାନ୍‌ ।