1 ଆରେ ଏପ୍ ସିଟିମ୍‌ ମାର୍‌ନି ପାଞ୍ଚ୍‌ ଆତ୍ ଲାମା ଆରି ପାଞ୍ଚ୍‌ ଆତ୍‌ ଅହାର୍‌ନି ଗାର୍‌ଣି ରଚ୍‌ନାଦେର୍‌, ହେ ଗାର୍‌ଣି ଚାର୍‍କନା ଆନାତ୍‌; ହେବେନି ଉଚା ତିନ୍‌ ଆତ୍‌ ଆନାତ୍‌ । 2 ଆରେ, ହେବେନି ଚାର୍‌ କନାଂ ଜପି କମଂ କିନାଦେର୍‌, ଆରେ ହେ କମ ଗାର୍‌ଣିନି ର ବାଗ୍‌ ଆନାତ୍‌ ଆରି ହେଦାଂ ପିତାଡ଼୍‌ତ ଚାପାୟ୍‌କିନାଦେର୍‌ । 3 ଆରେ ହେବେତାଂ ନାଣିଗଡ଼ାଂ ଉନ୍ଦି ଅନି କାଜିଂ କତ୍‌ନିବାହା କିନାଦେର୍‌, ହେବେନି ନିସ୍‌ତୁଇନି ହାଟ୍‌ୱା, ୱେଟି କଣ୍ଡି, ଗିନା, ଆରି ଆକଡ଼ି କିନାଦେର୍‌; ହେବେନି ୱିଜ଼ୁ ବାହା ପିତାଡ଼୍‍ତ ରଚ୍‌ନାଦେର୍‌ । 4 ଆରେ, ପିତାଡ଼୍‌ତ ର ଜାଲି କିନାଦେର୍‌ ଆରି ତା ଜପି ଚାର୍‌ କନାତ ପିତାଡ଼୍‌ନି ଚାର୍‌ ବାଡ଼ାଂ ରଚ୍‌ନାଦେର୍‌ । 5 ଇ ଜାଲି ଗାର୍‌ଣି ଡ଼ଚ୍‌ଚି ଚାର୍‌ବେଣ୍‌ତାଂ ତାରେନ୍‌ ତାରେନ୍‌ନି ବାଗ୍‌ତ ଇଟ୍‌ନାଦେର୍‌ ଆରି ଜାଲି ଗାର୍‌ଣିନି ପାତେକ୍‌ ଗାଟାନାଦେର୍‌ । 6 ଆରେ ଗାର୍‌ଣି କାଜିଂ ସିଟିମ୍‌ ମାର୍‌ନି ଟେଙ୍ଗା କିନାଦେର୍‌ ଆରି ହେଦାଂ ପିତାଡ଼୍‌ତ ଚାପାୟ୍‌କିନାଦେର୍‌ । 7 ଆରେ, ଗାର୍‌ଣି ପିଣ୍ଡ୍‌ନି ୱେଡ଼ାଲିଂ ହେବେନି ରି ପାଡ଼୍‌କା ଜପି ବାଡା ବିତ୍ରେ ହେ କଣା ମାନ୍‌ଗାନାତ୍‌ । 8 ଏପ୍‌ ପାଗାଡ଼୍‌ ଇଡ଼୍‌ଜି ପାଟାତ ହେଦାଂ କିନାଦେର୍‌, ମାଡ଼ିତ ମିଙ୍ଗେଙ୍ଗ୍‌ ଇନେସ୍‌ ଲାକେ ଚଚ୍‌ଚି ମାଞ୍ଚାପ୍‌, ହେଲାକେ ମାନାୟାର୍‌ କିନାର୍‌ ।

9 ଇଦାଂପାଚେ ଏପ୍‌ ଇଲ୍‌ନି କୁୱାଡ଼୍‌ କିନାଦେର୍‌; ହେ କୁୱାଡ଼୍‌ନି ଦିଗି ଦିଗ୍‌ତ ନଟି ଡ଼ିଞ୍ଜ୍‌ନି କୱାଣ୍‌ ନୁଲ୍‌ତାଂ ପାର୍‌ଦା କିନାଦେର୍‌; ହେବେନି ର ପାଡ଼୍‌କାନି ଲାମା ସଏ ଆତ୍‌ ଆନାତ୍‍ । 10 ହେବେନି କଡ଼େ ମୁଣ୍ଡାଂ ଆରି କଡ଼େ ବାହା ଦୁୱେର୍‌କୁଟ୍‌ଲା ପିତାଡ଼୍‌ନିକା ଆନାତ୍‌, ଆରେ, ମୁଣ୍ଡାନି ଆକ୍‌ଡ଼ି ଆରି ତିଗା ରୁପାନିକା ଆନାତ୍‌ । 11 ହେଲାକେ ଉତର୍‌ ପାଡ଼୍‌କା ସଏ ଆତ୍‌ ଲାମା ପାର୍‌ଦା ଆନାତ୍‌, ହେବେନି କଡ଼େ ମୁଣ୍ଡାଂ ଆରି କଡ଼େ ବାହା କାଣାକିତିକୁଟ୍‌ଲା ପିତାଡ଼୍‌ନିକା ଆନାତ୍‌; ଆରେ, ମୁଣ୍ଡାନି ଆକଡ଼ା ଆରି ତିଗା ରୁପାନିକା ଆନାତ୍‌ । 12 ଆରେ ୱେଡ଼ାହାନି ଦିଗ୍‌ତ କୁୱାଡ଼୍‌ନି ଅହାର୍‌ କାଜିଂ ପଚାସ୍‌ ଆତ୍‌ ପାର୍‌ଦା, ହେବେନି ଦାସ୍‌ ମୁଣ୍ଡାଂ ଆରି ଦାସ୍‌ କାଣାକିତିକୁଟ୍‌ଲା କିନାଦେର୍‌ । 13 ଆରେ, ୱେଡ଼ାହନି ଦିଗି କୁୱାଡ଼୍‌ ପଚାସ୍‌ ଆତ୍‌ ଆନାତ୍‌ । 14 ଦୁୱେର୍‌ନି ର ପାଡ଼୍‌କାତ ପନ୍ଦ୍ର ଆତ୍‌ ପାର୍‌ଦା ଆରି ତିନ୍ ଗଟା ମୁଣ୍ଡାଂ ଆରି ତିନ୍‌ ଗଟା କାଣାକିତିକୁଟ୍‌ଲା ଆନିକ୍‌ । 15 ଆରେ ବିନ୍‌ ପାଡ଼୍‍କା ପନ୍ଦ୍ର ଆତ୍‌ ପାର୍‍ଦା ଆରି ତିନ୍ ଗଟା ମୁଣ୍ଡାଂ ଆରି ତିନ୍ ଗଟା ବାହାଂ କାଣାକିତିକୁଟ୍‌ଲା ଆନିକ୍‌ । 16 ଆରେ, କୁୱାଡ଼୍‌ନି ଦୁଆର୍‌ କାଜିଂ ନିଲ୍ୟା, କଦା, ହେନ୍ଦୁର୍‍ବାନି ଆରି କାହ୍‌ରାତି କୱାଣ୍‌ ହାତୁର୍‌ତ ରଚ୍‌ନିକାମାୟ୍‌ ବାର୍ତାକା କଡ଼େ ଆତ୍‌ ର ଡାବାୟ୍‌କିନି ହେନ୍ଦ୍ରା ଆରି ହେବେନି ଚାର୍‌ ମୁଣ୍ଡାଂ ଆରି ଚାର୍‌ ବାହା କାଣାକିତିକୁଟ୍‌ଲା ଆନାତ୍‌ । 17 ଆରେ, କୁୱାଡ଼୍‌ନି ଚାର୍‍ବେଣ୍‍ତି ମୁଣ୍ଡାଂ ୱିଜ଼ୁ ରୁପା ଗାଚ୍‌ନିତ ଗେହ୍‌ୟା ଆନାତ୍‌ ଆରି ହେବେନି ଆକଡ଼ା ରୁପାନିକା ଆରି ବାହା କାଣାକିତିକୁଟ୍‌ଲା ପିତାଡ଼୍‌ନିକା ଆନାତ୍‌ । 18 କୁୱାଡ଼୍‌ ସଏ ଆତ୍‌ ଲାମା ଆରି ସବୁ ପଚାସ୍‌ ଆତ୍ ଅହାର୍‌ ଆରି ପାଞ୍ଚ୍‌ ଆତ୍‌ ଉଚ୍‌, ଆରେ, ସବୁ ମୁଣ୍ଡା ଡ଼ିଞ୍ଜ୍‍ନି କୱାଣ୍‌ ନୁଲ୍‌ତାଂ ରଚ୍‌ଚାକା ଆରି ହେବେ ପିତାଡ଼୍‌ନି ବାହା ଆନାତ୍‌ । 19 ଆରେ ଇଲ୍‌ନି ୱିଜ଼ୁ କାମାୟ୍‌ ବିସ୍ରେ ବାହାଂ, କୁଟିଂ ଆରି କୁୱାଡ଼୍‌ନି ୱିଜ଼ୁ କୁଟିଂ ପିତାଡ଼୍‌ନିକିଂ ଆନିକ୍‌ ।

20 ଆରେ ନିତ୍ରେ ବୈଟା ଆସ୍ତି ଅଜଡ଼୍‌ କିନି କାଜିଂ ନିର୍ମଲ୍‌ ପିଡ଼ିକିତି ଜିତ୍‌ ଚିକାଣ୍‌ ମି ଲାଗାୟ୍‌ ତାହିୱାନି କାଜିଂ ଇସ୍ରାଏଲ୍‌ ମାଜ଼ିରିଂ ବଲ୍‌ ହିନାଦେର୍‌ । 21 ଆରେ ହାନିୱାନି ତୁମ୍‌ତ ସାକି ପେଡ଼ି ମୁମ୍‍ଦନି ଏଡ଼ାତି ହେନ୍ଦ୍ରାନି ବାର୍ତ ହାରଣ ଆରି ତା ମାଜ଼ିର୍‌ ମ୍ଡିକାହାରେସ୍‌ତାଂ ନାଡ଼ିସ୍‌ ପାତେକ୍‌ ନିତ୍ରେମାପ୍ରୁତି ମେହାଣ୍‌ତ ହେଦାଂ ବିଡ଼ାୟ୍‌କିଜ଼ି ଇଟ୍‌ନାର୍‌; ଇଦାଂ ଇସ୍ରାଏଲ୍‌ ହିମ୍‌ଣାଂତି ଜୁଗ୍‌ଜୁଗ୍‌ ଚାଲାସି ମାନି ପାଲି କିନାକା ୱିଜ଼୍‌ୱିକାଡ଼୍‌ନି ବିଦି ଆନାତ୍‌ ।