1 ଆରେ ମା କାଜିଂ ମାପ୍ରୁହେବାକିନାକାନ୍ କାମାୟ୍‌ କିନି କାଜିଂ ହେୱାରିଙ୍ଗ୍‌ ପୁଇପୁୟା କିନି କାଜିଂ ଏପ୍‌ ହେୱାର୍ କାଜିଂ ଇ ସବୁ କାମାୟ୍‌ କିନାଦେର୍‌; ଦସ୍‌ହିଲ୍‍ୱି ର କଡି ଆରି ରିଣ୍ଡି ମେଣ୍ଡା ଅନାଦେର୍‌, 2 ଆରେ, ହଇୱି ରୁଟି, ଚିକାଣ୍‌ ମେହାତି ହଇୱି ମୁଟ୍‌ଲା ଆରି ଚିକାଣ୍‌ମେହାତି ହଇୱି ପାତାଡ଼୍‌ ଚକ୍‌ଲି ଗଁ ଗୁଣ୍ଡାତ ଜାଲ୍‌ଦି କିନାଦେର୍‌ । 3 ଆରେ, ର ଟପାତ ହେଦାଂ ଇଟ୍‌ନାଦେର୍‌, ହେ ସଣ୍ଡ୍‌ ଆରି ରି ମେଣ୍ଡା ରଚେ ଅଜ଼ି ହେ ଟପା ତାହିୱାନାଦେର୍‌ ।

4 ଆରେ ହାରଣଂ ଆରି ତା ମାଜ଼ିରିଂ ମେହାନି ତୁମ୍‌ ଦୁୱେର୍‌ ଲାଗାୟ୍‌ ତାସି ଏଜ଼ୁକାଂ ହେୱାରିଂ ଇତ୍‌ପି କିନାଦେର୍‌ । 5 ତାପାଚେ ହେ‍ ସବୁ ହେନ୍ଦ୍ରାଙ୍ଗ୍‌ ଅଜ଼ି ହାରଣ୍‌ତିଂ ଆଙ୍ଗି ଆରି ଏପଦ୍‌ନି ଡଣ୍‌ଗ ଆଙ୍ଗି; ଏପଦ୍‌ ଆରି ନେଞ୍ଜାଡାକିନିହାଜ ଉସ୍‌ପି କିନାଦେର୍‌, ଆରେ ଏପଦ୍‌ନି ବାନାରଚ୍‌ଚି ପଟୁକାତ ତା ମ୍ଡେଙ୍ଗାକାଙ୍ଗ୍‌ ଗାଚ୍‌ନାଦେର୍‌ । 6 ତା କାପ୍‌ଡ଼ାତ ନାତା ଗାଚ୍‌ଚି ତା ଜପି ପୁଇପୁୟା ହାଜ ମୁକୁଟ୍‌ ହିନାଦେର୍‌ । 7 ଇଦାଂପାଚେ ନେନ୍ଦ୍ୟାନି* ଚିକାଣ୍‌ ଅଜ଼ି ତା କାପ୍‌ଡ଼ା ଜପି ୱାକ୍‌ଚି ତାଂ ନେନ୍ଦ୍‌ନାଦେର୍‌ ।

8 ପାଚେ ଏପେଙ୍ଗ୍‌ ହାରଣ୍‌ ମାଜ଼ିରିଂ ତାସି ଆଙ୍ଗି ଉସ୍ପି କିନାଦେର୍‌ । 9 ଆରେ, ହାରଣଂ ଆରି ତା ମାଜ଼ିରିଂ ମ୍ଡେଗାଂଗାଚ୍‌ଚି ଉସ୍ପି କିନାଦେର୍‌ ଆରି ହେୱାର୍‌ତି କାପ୍‌ଡ଼ାତ ନାତା ଗାଚ୍‌ନାଦେର୍‌; ହେବେ ହେୱାର୍‌ ୱିଜ଼୍‌ୱିକାଡ଼୍‌ନି ବିଦି ହୁଦାଂ ମାପ୍ରୁହେବାକିନି ପାଦ୍‌ ଗାଟାନାର୍‌ । ଇଲାକେ ଏପ୍‌ ହାରଣଂ ଆରି ତା ମେହିରିଂ ବାଚି କିନାଦେର୍‌ । 10 ଇଦାଂପାଚେ ଏପ୍‌ ହାନିୱାନି ତୁମ୍‌ ମୁମ୍‌ଦ ହେ ବାଚି ତାଇକିନାଦେର୍‌, ଆରେ, ହାରଣ ଆରି ତା ମେହିର୍‌ ହେ ସଣ୍ଡ୍‌ତିଂ କାପ୍‌ଡ଼ାତ ଜାର୍‌ ଜାର୍ କେଇ ଇଟ୍‌ନାର୍‌ । 11 ପାଚେ ଏପେଙ୍ଗ୍‌ ମେହାନି ତୁମ୍‌ନି ଦୁୱେର୍‌ ଲାଗେ ନିତ୍ରେମାପ୍ରୁତି ଲାଗେ ହେ ସଣ୍ଡ୍‌ତିଂ ଅହ୍‌ନାଦେର୍‌ । 12 ଇଦାଂପାଚେ ସଣ୍ଡ୍‌ନି ନେତେର୍‌ ଅଲପ୍‌ ଅସି ୱାଚ୍‌କା ହୁକେ ଗାର୍‌ଣିନି ଗବା ଜପି ହିନାଦେର୍‌, ଆରେ, ଗାର୍‌ଣି ଦଲ୍‌ଦ ଆରେ ସବୁ ନେତେର୍‌ ୱାକ୍‌ନାଦେର୍ । 13 ଆରେ ତା ୱାସ୍କିନି କ୍ଡଆ ତଲ୍‌ ଆରି ତ୍ଡାକି ଜପ୍‌ଣି କ୍ଡଆ ଆରି ରି କେର୍‌ୱେଟି ପ୍ଡଚ୍‌ଲା ଆରି ତା ଜପ୍‌ଣି କ୍ଡଆ ଅଜ଼ି ଗାର୍‌ଣିତ ହୁଜ଼୍‌ନାଦେର୍‌ । 14 ମତର୍‌ ସଣ୍ଡ୍‌ନି ଜେୟ୍‌, ତଲ୍ ଆରି ଗାତ୍‌ ଚାଉଣି ବାର୍ତି ନାଣିତ ହୁଜ଼୍‌ନାଦେର୍‌; ଇଦାଂ ପାପ୍‌ନିକା ପୁଜା ।

15 ଇଦାଂପାଚେ ଏପ୍ ପର୍‌ତୁମ୍‌ ମେଣ୍ଡା ଅନାର୍‌; ଆରେ, ହାରଣ ଆରି ତା ମେହିର୍‌ ହେ ମେଣ୍ଡାନି କାପ୍‌ଡ଼ାତ ଜାର୍‌ ଜାର୍‌ କେଇ ଇଟ୍‌ନାର୍‌ । 16 ପାଚେ ଏପ୍‌ ହେ ମେଣ୍ଡାତିଂ ଅସ୍ତି ତା ନେତେର୍‌ ଅଜ଼ି ଗାର୍‌ଣି ଜପି ଚାର୍‌ବେଣ୍‌ତାଂ ତିର୍ଣ୍ଣାଦେର୍‌ । 17 ପାଚେ ମେଣ୍ଡାତିଂ ଗାଣ୍ଡ୍ରା ଗାଣ୍ଡ୍ରା କିଜ଼ି ତା ୱାହି ଆରି କାଲ୍‌କୁ ନୁସ୍‌ଦି ହେସବୁ ହେ ଗନ୍ଦା ସବୁ ଆରି କାପ୍‌ଡ଼ା ଲାହାଂ ଇଟ୍‌ନାଦେର୍‌ । 18 ଆରେ, ଏପ୍‌ ପୁରା ମେଣ୍ଡାତିଂ ଗାର୍‌ଣି ଜପି ହୁଜ଼୍‌ନାଦେର୍‌; ହେଦାଂ ନିତ୍ରେମାପ୍ରୁତି କାଟ୍‌ପୁଜା ଆରି ସାରିନିକା ମୁଞ୍ଜେଙ୍ଗ୍‌ ନିତ୍ରେମାପ୍ରୁତି ଉଦେସ୍‌ତ ନାଣିକିତି ଇନାମ୍‌ ଆନାତ୍‌ ।

19 ଇଦାଂପାଚେ ଏପ୍‌ ଦୁଇନି ମେଣ୍ଡାତିଂ ଅନାଦେର୍‌, ଆରେ, ହାରଣ ଆରି ତା ମେହିର୍‌ ହେ ମେଣ୍ଡାନି କାପ୍‌ଡ଼ାତ ଜାର୍‌ ଜାର୍‌ କେଇ ଇଟ୍‌ନାର୍‌ । 20 ହେବେ ଏପ୍‌ ହେ ମେଣ୍ଡାତିଂ ଅସ୍ତି ତାଦାଂ ଅଲପ୍‌ ନେତେର୍‌ ଅଜ଼ି ହାରଣତି ଡେବ୍ରି କିତୁଲ୍‌ କାଟାତ ଆରି ତା ମେହିର୍‌ ତିନି କିତୁଲ୍‌ କାଟାତ, ହେୱାର୍‌ତି ତିନି କେଇନି ମୁଡ଼୍‌ୱାଚ୍‌କା ଜପି ଆରି ତିନି ପାନାନି ମୁଡ଼୍‌ୱାଚ୍‌କା ଜପି କାସ୍‌ନାଦେର୍‌, ଆରେ, ଗାର୍‌ଣି ଜପି ଚାର୍‌ବେଣ୍‌ତାଂ ତିର୍ଣ୍ଣାଦେର୍‌ । 21 ଇଦାଂପାଚେ ଗାର୍‌ଣିନି ଜପିମାନି ନେତେର୍‌ତାଂ ଆରି ନେନ୍ଦ୍ୟାନି ଚିକାଣ୍‌ତାଂ ଅଲପ୍‌ ଅଜ଼ି ହାରଣ ଜପି ଆରି ତା ହେନ୍ଦ୍ରା ଜପି, ଆରେ, ତା ଲାହାଂ ତା ମାଜ଼ିର୍‌ ଜପି ଆରି ହେୱାର୍‌ ହେନ୍ଦ୍ରା ଜପି ତିର୍ଣ୍ଣାଦେର୍‌; ହେବେ ହେୱାନ୍‌ ଆରି ତା ଲାହାଂ ତା ହେନ୍ଦ୍ରା, ଆରେ, ତା ମେହିର୍‌ ଆରି ହେୱାର୍‌ତି ହେନ୍ଦ୍ରା ପୁଇପୁୟା ଆନାତ୍‌ ।

22 ଆରେ, ଏପ୍‌ ହେ ମେଣ୍ଡାନି କ୍ଡୱା, କ୍ଡୱାନି ନିଙ୍ଗୁଣ୍‌, ୱାହିଂ ଜପ୍‌ଣି କ୍ଡୱା, ତ୍ଡାକିନି ଜପ୍‌ଣି ୱାସ୍କିହାନି, ରି କେର୍‌ୱେଟିଂ, ତା ଜପ୍‌ଣି କ୍ଡୱା ଆରି ତିନି ପାଡ଼ିୟା ଅନାଦେର୍‌, ଇନାକିଦେଂକି ହେଦାଂ ପୁଜାକିତି ମେଣ୍ଡା ଆନାତ୍‌ । 23 ଆରେ, ନିତ୍ରେମାପ୍ରୁତି ଲାଗେନି ହଇୱି ରୁଟିନି ଟପାତାଂ ର ରୁଟି, ଚିକାଣ୍‌ ମେହାତି ର ହାରି ଆରି ର ପାତାଡ଼୍‌ ଚକ୍‌ନି ଅଜ଼ି 24 ହେଦାଂ ସବୁ ହାରଣତି କେଇଦ ଆରି ତା ମେହିର୍‌ କେଇଦ ହିଜ଼ି ଚାଟ୍‌କାୟ୍‌କିତି ଆକାତ୍‌ କାଜିଂ ନିତ୍ରେମାପ୍ରୁତି ଲାଗେ ହେଦାଂ ଚାଟ୍‌କାୟ୍‌କିୟ୍ କିନାଦେର୍‌ । 25 ଇଦାଂପାଚେ ଏପ୍‌ ହେୱାର୍‌ତି କେଇଦାଂ ହେଦାଂ ସବୁ ଅଜ଼ି ସାରିଆଜ଼ି ମୁଞ୍ଜେଙ୍ଗ୍‌ ନିତ୍ରେମାପ୍ରୁତି ଲାଗେ ଗାର୍‌ଣିତ କାଟ୍‌ପୁଜା ଜପି ହୁସ୍‌ନାଦେର୍‌ । ଇଦାଂ ନିତ୍ରେମାପ୍ରୁତି ଉଦେସ୍‌ତ ନାଣିକିତି ଇନାମ୍‌ ଆନାତ୍‌ । 26 ଇଦାଂପାଚେ ଏପ୍‌ ହାରଣତି ପୁଜାକିତି ମେଣ୍ଡାତି ବିମ୍‌ ଅଜ଼ି ଚାକ୍‌ଟାୟ୍‌କିନି ଆକାତ୍‌ ନିତ୍ରେମାପ୍ରୁତି ଲାଗେ ଚାକ୍‌ଟାୟ୍‌କିୟ୍‌କିନାଦେର୍‌; ହେ ଇଚୁକ୍‌ ମିଦାଂ ବାଗ୍‌ ଆନାତ୍‌ । 27 ଆରେ ହାରଣତି ଆରି ମେହିର୍ତି ପାଦ୍‌ବିଡ଼ାୟ୍‌କିନି ମେଣ୍ଡାନି ଇମ୍‌ଣି ନେଞ୍ଜେଡାକି ଲାଗ୍‌ଦି ଚାକ୍‌ଟାୟ୍‌କିନି ଆକାତ୍‌ ଚାକ୍‌ଟାତାକା ଆରି ଇମ୍‌ଣି ଇଚ୍‌କେ ପାଡ଼ିଆ ଲାଗ୍‌ଦି ନିକ୍‌ଚି ପେଜ଼୍‌ନାକା ଇନାମ୍‌ ପାଟ୍‌ୟା ଚାଲାୟ୍‌କିନାକା ଆତାତ୍‌, ହେଦାଂ ଏପେଙ୍ଗ୍‌ ପୁଇପୁୟା କିନାଦେର୍‌ । 28 ହେବେନି ୱିଜ଼୍‌ୱିକାଡ଼୍‌ନି ବିଦି ହୁଦାଂ ଇସ୍ରାଏଲ୍‌ ହିମ୍‌ଣାଂତାଂ ହେଦାଂ ହାରଣତି ଆରି ହେୱାନ୍ତି ମାଜ଼ିର୍‌ ଆଦିକାର୍‌ ଆନାର୍‌, ଇନେକିଦେଂକି ହେଦାଂ ପେଜ଼୍‌ ଇନାମ୍‌; ଇସ୍ରାଏଲ୍‌ ହିମ୍‌ଣାଂତି ଇ ପେଜ଼୍‌ନାକା ଇନାମ୍‌ ହେୱାର୍‌ତି ହାର୍ଦି ପୁଜା ହିତାକା ଆନାତ୍‌; ଇଦାଂ ନିତ୍ରେମାପ୍ରୁତି ଉଦେସ୍‌ତ ହେୱାର୍‌ତି ନିକ୍‌ନି ଇନାମ୍‌ ଆନାତ୍‌ । 29 ଆରେ, ହାରଣତି ହାକି ପାଚେ ତାଦି ପୁଇପୁୟା ହେନ୍ଦ୍ରାଂସବୁ ତା ହିମ୍‌ଣାଂତି ଆନାତ୍‌; ଚିକାଣ୍‌ନେନ୍ତାକା ଆରି ପାଦ୍‌ ବାଚିକିନି ସମୁତ ହେୱାର୍‌ ହେଦାଂ ଉସ୍ପାନାର୍‌ । 30 ତା ମାଜ଼ିର୍‌ ବିତ୍ରେତାଂ ଇମ୍‌ଣି ଲଗୁ ତା ପାଦ୍‌ତ ମାପ୍ରୁହେବାକିନାକାନ୍ ଆଜ଼ି ପୁଇପୁୟା ବାହାତ ହେବା କିନି କାଜିଂ ମେହାଣ୍‌ନି ତୁମ୍‌ତ ୱାନାନ୍‌, ହେୱାନ୍‌ ହେ ହେନ୍ଦ୍ରା ସାତ୍‌ ଦିନ୍‌ ଉସ୍ପାନାନ୍‌ ।

31 ଇଦାଂପାଚେ ଏପ୍‌ ହେ ପୁଜାକିତି ମେଣ୍ଡାତି ଜେଇ ଅଜ଼ି ର ପୁଇପୁୟା ବାହାତ ୱାଞ୍ଜ୍‌ନାଦେର୍‌, 32 ଆରେ, ହାରଣ ଆରି ତା ମେହିର୍‌ ମେହାନି ତୁମ୍‌ନି ଦୁୱେର୍‌ ଲାଗାୟ୍‌ ହେ ମେଣ୍ଡା ଜେଇ ଆରି ଟପାତମାନି ହେ ରୁଟି ତିନାର୍‌ । 33 ଆରେ, ହେୱାରିଙ୍ଗ୍‌ ପାଦ୍‌ତ ବାଚିକିଜ଼ି ଆରି ହାଂଦେଂ କାଜିଂ ଇନାକା ଲାହାଂ ପୁଜା କିୟାତାତ୍‌, ହେଦାଂ ହେୱାର୍‌ ତିନାର୍‌; ମତର୍‌ ଇମ୍‌ଣାକାପା ବିନ୍‌ ଲାତ୍ରାଂ ଲକୁ ହେଦାଂ ତିନୁର୍‌, ଇନେକିଦେଂକି ହେଦାଂ ସବୁ ପୁଇପୁୟା ଆଡ଼୍‌ମାଡ଼୍‌ । 34 ଆରେ ହେ ପାଦ୍‌ କିଜ଼ିମାନି ପୁଜା ଜେଇ ଆରି ରୁଟିତାଂ ଜଦି ନାଡ଼ିସ୍‌ ପାତେକ୍‌ ବାକି ମାଚିସ୍‌, ତେବେ ହେ ବାକିନି ଜେଇ ନାଣିତ ହୁଜ଼୍‌ଦିନିସ୍‌ କିନାଦେର୍‌, ଇନେର୍‌ ହେଦାଂ ତିନୁଦେର୍‌; ଇନେକିଦେଂକି ହେଦାଂ ପୁଇପୁୟା ଆଡ଼୍‌ମାଡ଼୍‌ ।

35 ଆପ୍‌ ମିଂ ଇନେସ୍‌ ବଲ୍‌ ହିତ୍‌ତାପ୍‌ନା, ହେ ଇସାବ୍ରେ ଏପ୍‌ ହାରଣ କାଜିଂ ଆରି ତା ମେହିର୍‌ କାଜିଂ କିନାଦେର୍‌; ହେୱାର୍‌ତି ପୁଜାକିନାକା ସାତ୍‌ ଦିନ୍‌ ଲାଗାନାତ୍‌ । 36 ଆରେ ଏପ୍‌ ପୁଜା କାଜିଂ ନିତ୍ରେ ପାପ୍‌ହାଚ୍‌ନି ପୁଜା ଲାକେ ର ଆଣ୍ଡ୍ରା ସଣ୍ଡ୍‌ ପୁଜା କିନାଦେର୍‌, ଆରେ, ଗାର୍‌ଣି କାଜିଂ ପୁଜା କିଜ଼ି ହେଦାଂ ପାପ୍‌ ମୁକ୍ଡ଼ାୟ୍‌ କିନାଦେର୍‌ ଆରି ହେଦାଂ ପୁଇପୁୟା କିନି କାଜିଂ ଚିକାଣ୍‌ କାସ୍‌ନାଦେର୍‌ । 37 ଏପ୍‌ ଗାର୍‌ଣି କାଜିଂ ସାତ୍‌ ଦିନ୍‌ ପାପ୍‌କେମା କିନାଦେର୍; ହେବେ ଗାର୍‌ଣି ବେସିପୁଇପୁୟା ଆନାତ୍‌, ଆରେ, ଇନାକା ଅଲପ୍‌ ଗାର୍‌ଣିତ ଡୁତିସ୍‌, ହେ ସବୁ ପୁଇପୁୟା ଆନାତ୍‌ ।

38 ହେ ଗାର୍‌ଣି ଜପି ଇ ପୁଜା କିନାଦେର୍‌; ଏପ୍‌ ବିଦିବିଦାଣି ବାବ୍ରେ ପାତିଦିନ୍‌ ର ବାର୍ହୁନି ମେଣ୍ଡାହିମ୍‌ଣା, 39 ଇଚିସ୍‌, ତା ପର୍‌ତୁମ୍‌ ମେଣ୍ଡାହିମ୍‌ଣାତିଂ ନାଡ଼ିହିଂ ପୁଜା କିନାଦେର୍‌ ଆରି ଦୁଇନି ମେଣ୍ଡାହିମ୍‌ଣାତିଂ ମ୍ଡିକାହାରେସ୍‌ ପୁଜା କିନାଦେର୍‌ । 40 ଆରେ, ପର୍‌ତୁମ୍‌ ମେଣ୍ଡାହିମ୍‌ଣା ଲାହାଂ ହିନ୍‌* କଣ୍ଡିନି ଚାର୍‌ବାଗ୍‌ ନିର୍‌ମଲ୍‌ ଉସ୍ତି ଚିକାଣ୍‌ତ ମେହାତି ର ଏପାର* ନି ଦାସ୍‌ବାଗ୍‌ ଗମ୍‌ଗୁଣ୍ଡା ମଇଦା ଆରି ଉଣି ଆକାତ୍‌ କାଜିଂ ହିନ୍‌ନି ଚାର୍‌ବାଗ୍‌ ଅଙ୍ଗୁର୍‌ରାସ୍‌ ହିନାଦେର୍‌ । 41 ଆରେ ମ୍ଡିକା ହାରେସ୍‌ ଦୁଇନି ମେଣ୍ଡାହିମ୍‌ଣା ପୁଜା କିନାଦେର୍‌, ଆରେ, ନାଡ଼ିହିଂ ତିନି ଆକାତ୍‌ ଆରି ଉଣି ଆକାତ୍‌ ପାର୍‌ମାଣ୍‌ନି ସାରିନିକା ମୁଞ୍ଜ୍‌ନିକାଜିଂ ନିତ୍ରେମାପ୍ରୁତି ଉଦେସ୍‌ତ ନାଣିକିତି ଇନାମ୍‌ ଲାକେ ହେଦାଂ ପୁଜା କିନାଦେର୍‌ । 42 ଇଦାଂ ମେହାନି ତୁମ୍‌ନି ଦୁୱାର୍‌ ଲାଗାୟ୍‌ ନିତ୍ରେମାପ୍ରୁତି ମୁମ୍‌ଦ ମି ଆଗେପୁର୍ବେନିକାର ଦାଡ଼ିତାଂ ନିତ୍ରେ କାମାୟ୍‌ କାଟ୍‌ପୁଜା ଆନାତ୍‌; ହେ ବାହାତ ଆପ୍‌ ମି ଲାହାଂ କାତାବାର୍ତା କିନି କାଜିଂ ମି ଲାହାଂ ବେଟା ଆନାପ୍‌ । 43 ଆରେ ହେ ବାହାତ ଆପ୍‌ ଇସ୍ରାଏଲ୍‌ ହିମ୍‌ଣାଙ୍ଗ୍‌ ଲାହାଂ ବେଟା ଆନାପ୍; ଆରେ, ମା ଜାଜ୍‌ମାଲ୍‌ ତୁମ୍‌ ପୁଇପୁୟାକିୟା ଆନାତ୍‌ । 44 ଆରେ, ଆପ୍‌ ମେହାଣ୍‌ନି ତୁମ୍‌ ଆରି ଗାର୍‌ଣିତିଂ ପୁଇପୁୟା କିନାପ୍‌, ଆରେ, ମା ମାପ୍ରୁହେବାକିନାକାର୍‌ କାମାୟ୍‌ କିନିକାଜିଂ ହାରଣତିଂ ଆରି ତା ମାଜ଼ିରିଂ ପୁଇପୁୟା କିନାପ୍‌ । 45 ଆପ୍‌ ଇସ୍ରାଏଲ୍‌ ହିମ୍‌ଣାଙ୍ଗ୍‌ ବିତ୍ରେ ବାହା କିଜ଼ି ହେୱାର୍‌ତି ପର୍‌ମେସ୍ୱର୍‌ ଆନାସ୍‌ । 46 ହେବେ ଆନ୍‌ ଜେ ହେୱାର୍‌ତି ନିତ୍ରେମାପ୍ରୁ ଇସ୍ୱର୍‌, ହେୱାର୍‌ତି ବିତ୍ରେ ବାହା କିନି କାଜିଂ ମିସର୍‌ ଦେସ୍‌ତାଂ ହେୱାରିଙ୍ଗ୍‌ ହପ୍‌ଚି ତାହିୱାତାପ୍‌ନା, ହେଦାଂ ହେୱାର୍‌ ପୁନାର୍‌; ଆନ୍‌ ନିତ୍ରେମାପ୍ରୁ ହେୱାର୍‌ତି ପର୍‌ମେସ୍ୱର୍‌ ।