1 ହେ ସମୁତ ମସା ଜାର୍‌ ପତ୍‌ଲେହି ଜିତ୍ର ତର୍ଦାକାନ୍ ମିଦିୟନିୟ ମାପ୍ରୁହେବାକିନାକାନ୍ତି ମେଣ୍ଡାରାହି ହାରାୟ୍‌କିଜ଼ି ମାଚାନ୍‌; ଦିନେକ୍‌ ହେୱାନ୍‌ ବାଟାତ ଜେନ୍‌ବାଙ୍ଗ୍‌ ମେଣ୍ଡାରାହି ଅଜ଼ି ହରେବ୍‌ ଅରେବ୍‌ ତର୍‌ଦି ପର୍‌ମେସ୍ୱର୍‌ତି ମାଡ଼ିତ ଏକାତାନ୍‌ । 2 ଇବେ ର ବୁଟା ବିତ୍ରେତାଂ ନାଣି ଗୁଦ୍‌ଗାନାକା ନିତ୍ରେମାପ୍ରୁତି ଦୁତ୍‌ ହେୱାନିଂ ଚଜ୍ୟା ଆତାତ୍‌; ହେବେ ହେୱାନ୍ ହୁଡ଼ୁତାନ୍‌, ଆରେ ହୁଡ଼ା, ବୁଟା ନାଣି ଆହ୍‌ନାତା, ଆତିସ୍‌ପା ବୁଟା ନସ୍ଟ ଆଉତା । 3 "ଲାଗିଂ ମସା ଇଚାନ୍;" ଆନ୍‌ ରକଣ୍ଡାଂ ହାଲ୍‌ଜି ଇ କାବାନି ବିସ୍ରେ ହୁଡ଼ୁନାଂ, "ବୁଟା ଇନେକିଦେଂ ନାଣି ଆହୁତା ।" 4 ମତର୍‌ ନିତ୍ରେମାପ୍ରୁ ଏଚେକାଡ଼୍‌ଦ ହୁଡ଼ୁତାନ୍‌ ଜେ ହେୱାନ୍‌ ହୁଡ଼୍‌ନି କାଜିଂ ରକଣ୍ଡାଂ ହାନାନା, ହେଏଚେକାଡ଼୍‌ଦ ମାପ୍ରୁ ବୁଟା ବିତ୍ରେତାଂ ହେୱାନିଂ କୁକ୍‌ଚି ଇଚାନ୍‌, "ଏ ମସା, ଏ ମସା ।" ହେବେ ହେୱାନ୍ ଇଚାନ୍ ଇଦାଂ "ହୁଡ଼ା ଆନେଙ୍ଗ୍‌ ଇବେ ମାନାଙ୍ଗ୍‌ ।" 5 ହେକାଜିଂ ହେୱାନ୍‌ ଇଚାନ୍, "ଏନ୍‌ ଇ ବାହାତ ଲାଗାୟ୍‌ ଆଦ୍‌ମା, ନି ପାନାତାଂ ପାଣ୍ଡାଇ ଦାକା, ଇନେକିଦେଂକି ଏନେଙ୍ଗ୍ ଇମ୍‌ଣି ବାହାତ ନିଲ୍‌ତାୟ୍‌ନା ହେଦାଂ ପୁଇପୁୟା ମେଦ୍‌ନି ।" 6 ହେୱାନ୍ ଆରେରଗ ଇଚାନ୍‌, "ଆପ୍ ନି ବୁଡ଼ାର୍ତି ପର୍‌ମେସ୍ୱର୍‌ ଇଚିସ୍, ଅବ୍ରାହାମ୍‌ତି ପର୍‌ମେସ୍ୱର୍ ଆରି ଇସ୍‌ହାକ୍‌ତି ପର୍‌ମେସ୍ୱର୍ ଆରି ଜାକୁବତି ପର୍‌ମେସ୍ୱର୍ ।" ହେବେ ମସା ଜାର୍ ମୁମ୍‌ ପ୍ଡାକ୍ତାନ୍, ଇନେକିଦେଂକି ହେୱାନ୍‌ ମାପ୍ରୁତି କାଜିଂ ହୁଡ଼୍‌ଦେଂ ପାଣ୍ଡ୍ରା ଆତାନ୍‌ । 7 ଇଦାଂ ପାଚେ ନିତ୍ରେମାପ୍ରୁ ଇଚାନ୍‌, "ଆପ୍‌ ମିସର୍‌ ଦେସ୍‌ତ ମାନି ଜାର୍‌ ମାନାୟାର୍ତି ଦୁକ୍‌ ହାତ୍‌ପା ହୁଡ଼୍‌ତାପ୍‌ନା ଆରି କାମାୟ୍‌ସାସନ୍‌ତି କାଜିଂ ଆଜ଼ି ମାନି ହେୱାର୍‌ତି ଆଡ଼୍‌ବାନାକା ୱେଚାପ୍‌ନା, ଆପ୍‌ ହେୱାର୍‌ତି କସ୍ଟ ପୁଚାପ୍‌ନା । 8 ଇଦାଂକାଜିଂ ମିସର୍‌ନି ମାନାୟାର୍‌ କେଇଦାଂ ହେୱାରିଙ୍ଗ୍‌ ରାକ୍ୟା କିଦେଂ, ଆରି, ହେ ଦେସ୍‌ତାଂ ହାର୍‌ ଆରି ଅହାର୍‌ ର ଦେସ୍‌ତିଂ; ଇଚିସ୍‌, କିଣାନିୟ, ହିବିୟ, ଇମରିୟ, ପରିଜିୟ, ହିତିୟ ଆରି ଜିବୁସିୟାର୍‌ ଇମ୍‌ଣି ବାହାତ ମାନ୍‌ବାନାର୍‌, ହେ ପାଲ୍‌ପୁକିହନି ଦେସ୍‌ତିଂ ହେୱାରିଂ ଅଜ଼ି ହାଞ୍ଜେଙ୍ଗ୍‌ ଜୁଜ଼ି ୱାତାପ୍‌ । 9 ହେଦାଂ କାଜିଂ ହୁଡ଼ାଟ୍, ଇସ୍ରାଏଲ୍‌ ହିମ୍‌ଣାନି କସ୍ଟ ମା କିତୁଲ୍‌ତ ୱେଚାପ୍‌ନା; ମିସ୍ରିୟର୍‌ ମାନାୟାର୍‌ ହେୱାର୍‌ କାଜିଂ ଇମ୍‌ଣି କାରାପ୍‌ କାମାୟ୍‌ (ଅତ୍ୟାଚାର) ବେବାର୍‌ କିନାର୍‌, ହେଦାଂ ଆପ୍‌ ହୁଡ଼୍‌ତାପ୍‌ନା । 10 ଲାଗିଙ୍ଗ୍ ନଂ ୱାଡ଼, ଆପ୍‌ ମିଙ୍ଗେଙ୍ଗ୍‌ ପାର ଲାଗାଂ ପକ୍‌ତାନାପ୍‌, ଏନ୍‌ ମିସର୍‌ ତାଂ ମା ଲକୁ ଇସ୍ରାଏଲ୍‌-ହିମ୍‌ଣାୱାକ୍‌ଡ଼ାତିଂ ହପ୍‌ଚି ତାଇୱାନାୟ୍‌ ।" 11 ହେବେ ମସା ପର୍‌ମେସ୍ୱର୍‌ତିଂ ଇଚାନ୍‌, "ଆନ୍‌ ଇନେନ୍‌ ଜେ, ପାର ଲାଗେ ହାଲ୍‌ଜି ମିସର୍‌ ଦେସ୍‌ତାଂ ଇସ୍ରାଏଲ୍‌ ମାଜ଼ିରିଂ ହପ୍‌ଚି ତାହିୱାନାଂ ?" 12 ହେବେ ହେୱାନ୍‌ ଇଚାନ୍‌, "ଆପ୍‌ ହାତ୍‌ପା ନି ଆଦିକାର୍‌ ଆନାପ୍‌; ଆରେ, ଆପ୍‌ ଜେ ନିଙ୍ଗେଙ୍ଗ୍ ପକ୍‌ତାନାପ୍‌, ହେବେନି ର ଚିନ୍‌ ପୁନାୟ୍‌, ଏନ୍‌ ମିସର୍‌ତାଂ ଲକୁରିଂ ହପ୍‌ଚି ତାହିୱାତି ପାଚେ ଏପ୍‌ ଇ ମାଡ଼ିତ ପର୍‌ମେସ୍ୱର୍‌ତି ହେବା କିନାଦେର୍‌ ।" 13 ଇଦାଂ ପାଚେ ମସା ମାପ୍ରୁଙ୍ଗ୍‌ ଇଚାନ୍‌, "ହୁଡ଼ାଟ୍‌, ଆନ୍‌ ଏଚେକାଡ଼୍‌ଦ ଇସ୍ରାଏଲ୍‌ ହିମ୍‌ଣାଙ୍ଗ୍ ତାକେ ହାଲ୍‌ଜି ହେୱାରିଙ୍ଗ୍ ଇନାଙ୍ଗ୍, କି ମି ଆଗେନି ବୁଡ଼ାବୁଡ଼ିର୍‌ ପର୍‌ମେସ୍ୱର୍‌ ନାଙ୍ଗ୍‌ ମି ତାକେ ପକ୍‌ତାତାନ୍‌ନା; ଆରେ, ହେୱାର୍ ୱେନ୍‌ବାଦ୍‌ନାର୍‌, ତା ତର୍‌ ଇନା ତର୍‌ ? ହେଏଚେକାଡ଼୍‌ଦ ଆନ୍‌ ଇନାକା ଉତର୍‌ ହିନାଙ୍ଗ୍‌ ?" 14 ଲାଗ୍‌ ପର୍‌ମେସ୍ୱର୍‌ ମସାଙ୍ଗ୍‌ ଇଚାନ୍‌, "ଆନ୍‌ ଜେ ମାନାଂ, ହେୱାଙ୍ଗ୍‌ ମାନାଙ୍ଗ୍‌," ଆରେ, ହେୱାନ୍‌ ଇଚାନ୍‌, "ଏନ୍‌ ଇସ୍ରାଏଲ୍‌ ମାଜ଼ିରିଂ ଇନାୟ୍‌, ନିତ୍ରେ ଆପ୍ ମାନାପ୍ ମି ତାକେ ନାଙ୍ଗେଙ୍ଗ୍ ପକ୍‌ତାତାନ୍ନା ।" 15 ପର୍‌ମେସ୍ୱର୍‌ ମସାଙ୍ଗ୍‌ ଆରେ ଇଚାନ୍‌, "ଏନ୍‌ ଇସ୍ରାଏଲ୍‌ ମାଜ଼ିରିଂ ଇ କାତା ଇନାୟ୍‌, ମି ଆଗେନି ଆକର୍‌ତି ପର୍‌ମେସ୍ୱର୍‌, ଇଚିସ୍‌, ଅବ୍ରାହାମ୍‌ତି ପର୍‌ମେସ୍ୱର୍‌, ଇସ୍‌ହାକ୍‌ତି ପର୍‌ମେସ୍ୱର୍‌ ଆରେ ଜାକୁବତି ପର୍‌ମେସ୍ୱର୍‌ ଜେ ନିତ୍ରେମାପ୍ରୁ ନିଜେ, ହେୱାନ୍‌ ମି ତାକେ ନାଙ୍ଗେଙ୍ଗ୍ ପକ୍‌ତାତାନ୍‌ନା; ମାଦାଂ ଇ ତର୍‌ ୱିଜ଼ୁତ୍‌, ଆରେ ଜୁଗ୍‌ଜୁଗ୍‌ ଏତୁତ ମାନାତ୍‌ । 16 ଏନ୍‌ ହାଲ୍‍ଜି ଇସ୍ରାଏଲ୍‌ ବଁସ୍‌ନି ରବେ କିଜ଼ି ଇ କାତା ଇନା । ମି ଆଗେନି ବୁଡ଼ାଲୁର୍‌ ପର୍‌ମେସ୍ୱର୍‌, ଲାଗ୍‌, ଅବ୍ରାହାମ୍‌, ଇସ୍‌ହାକ୍‌ ଆରେ ଜାକୁବତି ପର୍‌ମେସ୍ୱର୍‌ ନିତ୍ରେମାପ୍ରୁ ନାଙ୍ଗେଙ୍ଗ୍ ଦର୍‌ସନ୍‌ ହିଜ଼ି ୱେଚ୍‌ଚାତାତ୍‌ନା, ଆପ୍‌ ମିଦାଂ ଆରେ ମିସର୍‌ ତାକେ ମି କାଜିଂ ଇନାକା ଇନାକା କିୟାଆତାତ୍‌ନା, ହେସବୁ ବିସ୍ରେ ଦିଆନ୍‌ ହିନାପା । 17 ଆରେ, ଆପ୍‌ ମିଙ୍ଗେଙ୍ଗ୍ ମିସର୍‌ନି କସ୍ଟତାଂ ମୁକ୍‌ଡ଼ାୟ୍ କିଜ଼ି କିଣାନିୟାର୍‌ତି, ହିତିୟର୍‌ତି, ଇମରିୟର୍‌ତି, ପରିଜିୟର୍‌ତି, ହିବିୟର୍‌ତି ଆରି ଜିବୁସିୟର୍‌ତି ପାଲ୍‌ ଆରି ପୁକିହନି ଦେସ୍‌ତ ଅଜ଼ିହାଞ୍ଜ୍‌ନାପ୍ ଇଞ୍ଜି ୱେଚାତାପ୍‌ନା । 18 ନଙ୍ଗୟ୍‌ ହେୱାର୍‌ ନି ବେରଣ୍‌ତ ୱେନାର୍‌; ଲାଗ୍‌ ଏପ୍‌ ଆରେ ଇସ୍ରାଏଲ୍‌ ବଁସ୍‌ନିକାର୍ ବୁଡ଼ାଲୁର୍‌ ମିସର୍‌ନି ରାଜା ତାକେ ହାଲ୍‌ଜି ଇ କାତା ଇନାଦେର୍‌, ଏବ୍ରିୟ ମାନାୟାର୍‌ତି ପର୍‌ମେସ୍ୱର୍‌ ନିତ୍ରେମାପ୍ରୁ ମା ହୁଦାଂ ବେଟା ଆତ୍‌ତାନ୍ନା; ଇ କାଜିଙ୍ଗ୍ ଇଞ୍ଜ୍‌ନାଙ୍ଗା ମା ପର୍‌ମେସ୍ୱର୍‌ ନିତ୍ରେମାପ୍ରୁ ଆଦେସ୍‌ତାଂ ପୁଜା ହିଦେଂ ନଙ୍ଗୟ୍ ମାଙ୍ଗେଙ୍ଗ୍ ତିନି ଦିନ୍‌ନି ବାଟାତ ହାଞ୍ଜେଙ୍ଗ୍‌ ଆଦେସ୍‌ ହିଦା । 19 ମତର୍‌ ଆପ୍‌ ପୁନାପ୍‌, ମିସର୍‌ନି ରାଜା ମିଙ୍ଗେଙ୍ଗ୍ ହାଞ୍ଜେଙ୍ଗ୍ ହିଦୁନ୍‌, ସାକ୍ତିକାଟି କେଇ ହତ୍‌ତିସ୍‌ ପା ହିଦୁନ୍‌ । 20 ପାଚେ ଆପ୍‌ ଜାର୍‌ କେଇ ଅହାର୍‌ କିଜ଼ି ଦେସ୍‌ ବିତ୍ରେ ଜେ ସବୁ କାବା କାମାୟ୍‌ କିନାସ୍; ତା ହୁଦାଂ ମିସର୍‌ତିଂ କେଇ କିତି ପାଚେ ହେୱାନ୍‌ ମିଙ୍ଗେଙ୍ଗ୍ ହାଞ୍ଜେଙ୍ଗ୍ ହିଦ୍‍ନାନ୍ । 21 ଆରେ ଆପ୍‌ ମିସର୍‌ନି ମାନାୟାର୍‌ ମୁମ୍‌ଦାଂ ଇ ମାନାୟାରିଂ ଉପ୍‌କାର୍‌ନି ଲଗୁ କିନାସ୍‌, ପାଚେ ଏପେଙ୍ଗ୍ ହାଜ଼ିଆହ୍‌ନି ୱେଡ଼ାଲିଂ ୱାରି କେଇଦାଂ ହାଲୁଦେର୍‌; 22 ମତର୍‌ ୱିଜ଼େକ୍‌ କଗ୍‌ଲେକ୍‌ ଜାର୍‌ ପାଡ଼୍‌ହାନିକିକ୍‌ ଆରି ଜାର୍‌ ଇଲ୍‌ମୁଣିକାଣି କଗ୍‌ଲେ ଲାଗାଙ୍ଗ୍‌ ରୁପା ହାସ୍‌କୁ ହାରାଂ ଆରି ହନା ହାସ୍‌କୁ ହାରାଂ ଆରି ହେନ୍ଦ୍ରା ଏନ୍‌ଚି ଅନାର୍‌; ଆରେ, ହେଦାଂ ଏପେଙ୍ଗ୍‌ ଜାର୍‌ ମାଜ଼ିଗାଚ୍‌କୁକାଂ ତୁସିକିନାଦେର୍‌ । ଏଲେଙ୍ଗ୍‌ କାଜିଂ ଏପେଙ୍ଗ୍‌ ମିସର୍‌ନି ଲକୁତାଂ ଜିନିସ୍‌ ଚରି କିନାଦେର୍‌ ।"