Êxodo 6

1 ହେଏଚେକାଡ଼୍‌ଦ ନିତ୍ରେମାପ୍ରୁ ମସାଂ ଇଚାନ୍‌, "ଆନ୍ ପାର କାଜିଙ୍ଗ୍ ଇନାକା କିନାଙ୍ଗ୍, ହେଦାଂ ଏନ୍‌ ନଙ୍ଗୟ୍‌ ହୁଡ଼ୁନାୟ୍‌; ଇନାକିଦେଂକି ବେସି ସାକ୍ତି ଚଞ୍ଜିୟା ଆତାନ୍‌, ହେୱାନ୍‌ ମାନାୟାରିଂ ହାଞ୍ଜେଙ୍ଗ୍ ହିନାୟ୍ ଆରି ବେସି ସାକ୍ତି ଚଞ୍ଜିୟା ଆତାନ୍‌, ଜାର୍‌ ଦେସ୍‌ତାଂ ହେୱାରିଂ ପେଜ଼୍‌ନାନ୍‌ ।"

ମସାଙ୍ଗ୍‌ ପର୍‌ମେସ୍ୱର୍‌ତି କୁକ୍‌ନାକା

2 ପର୍‌ମେସ୍ୱର୍‌ ମସା ଲାହାଂ ବେଣ୍‌ବାଟ୍‌ କିଜ଼ି ଆରେ ଇଚାନ୍‌, "ଆପ୍‌ ଜିହବାଃ ନିତ୍ରେମାପ୍ରୁ; 3 ଆପ୍‌ ଅବ୍ରାହାମ୍‌, ଇସ୍‌ହାକ୍‌ ଆରି ଜାକୁବତିଂ ସବୁ ସାକ୍ତିକାଟି ଇସ୍ୱର୍‌ ଇଞ୍ଜି କ୍ଡେଞ୍ଜି କିଜ଼ି ହିଜ଼ି ମାନ୍‌ଚାପ୍‌, ମତର୍‌ ଆପେଙ୍ଗ୍‌ ଜାର୍‌ ଜିହବାଃ ତର୍‌ଦ ହେୱାରିଂ ଚିନାଜାଣା ହିୱାଦାଂ ମାଚାପ୍‌ । 4 ଆରେ, କିଣାନ୍‌ ଦେସ୍‌, ଇଚିସ୍‌, ହେବେ ହେୱାର୍‌ ବାହାକିତାର୍‌, ହେ ବାହାକିତି ଦେସ୍‌ ପା ହେୱାରିଂ ହିନାସ୍‌ ଇଞ୍ଜି ହେୱାର୍‌ ଲାହାଂ ନିୟମ୍‌ ତିର୍‌ କିଜ଼ି ମାଚାପ୍‌ । 5 ନଙ୍ଗ୍‌ ମିସ୍ରିୟର୍‌ ଇମ୍‌ଣାକାରିଂ ଆଡ଼ିୟା କିଜ଼ି ଇଡ଼୍‌ତାର୍ଣ୍ଣା, ହେ ଇସ୍ରାଏଲ୍‌ ହିମ୍‌ଣାଂ ଆଡ଼୍‌ବାନାକା ୱେନ୍‌ଞ୍ଜି ଆପ୍‌ ଜାର୍‌ତି ହେ ନିୟମ୍‌ ଏତୁ କିନାପା । 6 ଇଦାଂକାଜିଂ ଇସ୍ରାଏଲ୍‌ ମାଜ଼ିରିଂ ଇନାଟ୍‌, ଆପ୍‌ ନିତ୍ରେମାପ୍ରୁ, ଆପ୍‌ ମିଙ୍ଗେଙ୍ଗ୍‌ ମିସ୍ରିୟର୍‌ କସ୍ଟ ଆଡ଼ିୟାତାଂ ମୁକ୍‌ଡ଼ାୟ୍‌ କିନାକା ଆରି ଆପ୍‌ ମିଙ୍ଗେଙ୍ଗ୍‌ ହେୱାର୍‌ତି ଆଡ଼଼ିୟାତାଂ ମୁକ୍‌ଡ଼ାୟ୍‌ କିଦ୍‌ନାପ୍‌, ଆରେ, ଆପ୍‌ ମାରା ଲାମାୟ୍‌ କିଜ଼ି ଆରି ଗାଜା ଗାଜା ଦଣ୍ଡ୍‌ ହୁକେ ମିଙ୍ଗେଙ୍ଗ୍‌ ମୁକ୍‌ଡ଼ାୟ୍‌ କିଦ୍‌ନାପ୍‌ । 7 ଆପ୍‌ ମିଙ୍ଗେଙ୍ଗ୍‌ ଜାର୍‌ ଲକ୍‌ ଲାକେ ମାନି କିନାକା ଆରି ଆପ୍‌ ମି ପର୍‌ମେସ୍ୱର୍‌ ଆନାପ୍‌; ପାଚେ ମିସ୍ରିୟର୍‌ ବଜ୍‌ ପିଣ୍ଡ୍‌ନାକା ମି କେଇ ମୁକ୍‌ଡ଼ାୟ୍‌କିନାକାପ୍‌ ଆପ୍‌ ଜେ ମି ପର୍‌ମେସ୍ୱର୍‌ ନିତ୍ରେମାପ୍ରୁ ଆନାପ୍‌, ହେଦାଂ ଏପେଙ୍ଗ୍‌ ପୁନାଦେର୍‌ ।" 8 ଆନେଙ୍ଗ୍‌ ଅବ୍ରାହାମ୍‌, ଇସ୍‌ହାକ୍‌ ଆରି ଜାକୁବଙ୍ଗ୍‌ ଇମ୍‌ଣି ଦେସ୍‌ ହିନି କାଜିଂ ଜାର୍‌ କେଇ ନିକ୍‌ତାପ୍‌ନ୍ନା, ହେ ଦେସ୍‌ତିଂ ଆପେଙ୍ଗ୍‌ ମିଙ୍ଗେଙ୍ଗ୍‌ ଅସି ହାଞ୍ଜ୍‌ନାପ୍‌; ଆରେ ଆପ୍‌ ଆଦିକାର୍‌ତାଂ ହେଦାଂ ମିଙ୍ଗେଙ୍ଗ୍‌ ହିଦ୍‌ନାପ୍‌; ଆପ୍‌ ନିତ୍ରେମାପ୍ରୁ କାପ୍‌ । 9 ଇଦାଂପାଚେ ମସା ଇସ୍ରାଏଲ୍‌ ମାଜ଼ିରିଂ ହେ ଲାକେ ଇଚାନ୍‌, ମତର୍‌ ହେୱାର୍‌ ମାନ୍‌ଦୁକ୍‌ ଆରି କସ୍ଟ ଆଡ଼ିୟା କାଜିଂ ମସାତି ବଚନ୍‌ତ ମାନ୍‌ଦ୍ୟାନ୍‌ କିୱାତାର୍‌ ।

10 ଇଦାଂପାଚେ ନିତ୍ରେମାପ୍ରୁ ମସାଙ୍ଗ୍‌ ଇଚାନ୍‌, 11 "ଏପେଙ୍ଗ୍‌ ହାଲ୍‌ଜି ମିସର୍‌ନି ରାଜା ପାରଙ୍ଗ୍‌ ଇନାଟ୍‌, ମି ଦେସ୍‌ତାଂ ଇସ୍ରାଏଲ୍‌ ମାଜ଼ିରିଂ ହାଞ୍ଜେଙ୍ଗ୍‌ ହିଦା ।" 12 ପାଚେ ମସା ନିତ୍ରେମାପ୍ରୁତି ମୁମ୍‌ଦ ଇଚାନ୍‌, "ହୁଡ଼ା, ଇସ୍ରାଏଲ୍‌ ହିମ୍‌ଣାଂ ନା କାତାତ ମାନ୍‌ଦ୍ୟାନ୍‌ କିୱାତାର୍ଣ୍ଣା; ଲାଗିଂ ହାର୍‌ଦି କାତା ଇଞ୍ଜେଙ୍ଗ୍‌ ପୁନ୍‌ୱି ଗୁରୁ ଜେ ଆନ୍‌, ନା କାତା ପାର ଇନେସ୍‌ ବାନି ୱେନାନ୍‌ ?"

13 ଇ ଲାକେ ନିତ୍ରେମାପ୍ରୁ ମସା ଆରି ହାରଣତି ଲାହାଂ ବେଣ୍‌ବାଟ୍‌ କିତାନ୍‌, ଆରେ, ଇସ୍ରାଏଲ୍‌ ମାଜ଼ିରିଂ ମିସର୍‌ ଦେସ୍‌ତାଂ ହପ୍‌ଚି ତାଇୱାନି କାଜିଂ ମିସର୍‌ ରାଜା ପାର ଲାଗାଂ ଆରି ଇସ୍ରାଏଲ୍‌ ହିମ୍‌ଣାଂ ଲାଗାଂ ମାନ୍‌ନି କାତା ହେୱାରିଂ ବଲ୍‌ ହିତାନ୍‌ ।

ମସା ଆରି ହାରଣତି ଲାତ୍ରା

14 ଇ ୱିଜ଼ାର୍‌ ମାନାୟ୍‌ ଜାର୍‌ ଜାର୍‌ ଆକର୍‌ ଲାତ୍ରା ବିତ୍ରେ ମୁଡ଼୍‌ ମାଚାର୍‌ । ଇସ୍ରାଏଲ୍‌ତି ପାଣ୍‌ୱା ମାଜ଼ି ରୁବେନ୍‌ତି ମେହି ହନକ, ପଲ୍ଲୁ, ହିସ୍ରଣ୍‌ ଆରି କର୍ମି; ଇୱାର୍‌ ରୁବେନ୍‌ତି କୁଟୁମ୍‌ । 15 ଆରେ ସିମିୟନତି ମାଜ଼ି ଜିମୁୟେଲ୍‌, ଜାମିନ୍‌, ଓହଦ୍‌, ଜାକିନ୍‌, ସୋହର ଆରି କିଣାନିୟା କଗ୍‌ଲେନି ମାଜ଼ି ସୌଲ; ଇୱାର୍‌ ସିମିୟନତି ଲାତ୍ରା ଆତାର୍ଣ୍ଣା । 16 ଲାତ୍ରା ଇସାବ୍ରେ ଲେବିତି ମାଜ଼ିର୍‌ ତର୍‌ ଗେର୍ସନ୍‌, କହାତ୍‌ ଆରି ମରାରି, ଲେବିତି ବୟଁସ୍‌ ସଏ ତିରିସ୍‌ସାତ୍‌ ବାର୍ହୁ ମାଚାତ୍‌ । 17 ଆରେ, ଜାର୍‌ ଜାର୍‌ ଲାତ୍ରା ଇସାବ୍ରେ ଗେର୍ସନ୍‌ତି ମାଜ଼ିର୍‌ ଲିବ୍‌ନି ଆରି ସିମିୟି । 18 ଆରେ, କହାତ୍‌ତି ମାଜ଼ି ଅମ୍ରମ୍‌, ଜିସ୍‌ହର୍‌, ହିବ୍ରଣ ଆରି ଉସିୟେଲ୍‌; ହେ କହାତ୍‌ତି ସଏ ତିରିସ୍‌ତିନି ବାର୍ହୁ ବୟଁସ୍‌ ଆଜ଼ି ମାଚାତ୍ । 19 ମରାରିନି ମାଜ଼ି ମହଲି ଆରି ମୁସି; ଇୱାର୍‌ ଲାତ୍ରାନିକାର୍‌ ଇସାବ୍ରେ ଲେବିତି ଲାତ୍ରା ଆନାର୍‌ । 20 ଆରେ, ଅମ୍ରମ୍‌ ଜାର୍‌ ଆମା ଜକେବଦତିଂ ବିବା କିତିଲେ, ହେଦେଲ୍‌ ତା ନେତେର୍‌ତାଂ ହାରଣ୍‌ତିଂ ଆରି ମସାଂ ଜଲମ୍‌ କିତାତ୍‌: ହେ ଅମ୍ରମର୍ ସହେ ସଁଇତିରିସ୍‌ ବାର୍ହୁ ଜିସି ମାଚାନ୍‌ । 21 ଜିସ୍‌ହର୍‌ନି ମାଜ଼ି କରହ, ନେପଗ ଆରି ସିକ୍ରି । 22 ଆରେ, ଉସିୟେଲ୍‌ନି ମାଜ଼ି ମିସାୟେଲ ଆରି ଇଲିସାପନ୍‌ ଆରି ସିତ୍ରି । 23 ଆରେ, ହାରଣ ଅମ୍ମିନାଦବର ଗାଡ଼୍‌ ନହସନତି ତଣ୍‌ଦେଲ୍‌ ଇଲିସେବାତିଂ ବିବା କିତାନ୍‌; ହେବେ ହେୱାନ୍‌ ତା ନେତେର୍‌ତ ନାଦବ, ଅବିହୁ, ଇଲିୟାସର୍‌ ଆରି ଇତାମରତିଂ ଗାଟାଆତାତ୍‌ । 24 ଆରେ, କରହର ମାଜ଼ି ଅସିର ଆରି ଇଲ୍‌କାନା ଆରି ଅବିୟାସପ୍‌; ଇୱାର୍‌ କରହର ଲାତ୍ରା ଆନାର୍‌ । 25 ଆରେ, ହାରଣ୍‌ତି ମାଜ଼ି ଇଲିୟାସର୍‌ ପୁଟିୟେଲନି ର ଗାଡ଼୍‌ଚେଂ ବିବା କିତିଲେ, ହେଦେଲ୍‌ ତା ନେତେର୍‌ତାଂ ପିନହସତିଂ ଗାଟାଆତାତ୍‌, ଇୱାର୍‌ ଲେବିୟର୍‌ତି ଲାତ୍ରା ମେହାଆତି ଇସାବ୍ରେ ହେୱାର୍‌ତି ଆକର୍‌ ଦାଦିର୍‌ଲାତ୍ରା ବିତ୍ରେ ଗାଜାକାର୍‌ ମାଚାର୍‌ । 26 ଇୱାନ୍‌ ଜେ ହାରଣ୍‌ ଆରି ମସା, ଇୱାରିଂ ନିତ୍ରେମାପ୍ରୁ ଇଚାନ୍‌, "ଏପେଙ୍ଗ୍‌ ମେଲ୍ୟାକାଦେର୍‌ ଇସ୍ରାଏଲ୍‌ ମାଜ଼ିରିଂ ମିସର୍‌ ଦେସ୍‌ତାଂ ହପ୍‌ଚି ତାଇୱାଡ ।" 27 ଇୱାର୍‌ ମିସର୍‌ତାଂ ଇସ୍ରାଏଲ୍‌-ମାଜ଼ିରିଂ ହପ୍‌ଚି ତାହିୱାନି କାଜିଂ ମିସର୍‌ନି ରାଜା ପାର ହୁଦାଂ କାତାବାର୍ତା କିଜ଼ି ମାଚାର୍ । ଇୱାର୍‌ ହେ ମସା ଆରି ହାରଣ ।

ମସା ଆରି ହାରଣ୍‌ତିଂ ମାପ୍ରୁତି ଆଦେସ୍‌

28 ଇମେଣି ଦିନ୍ ନିତ୍ରେମାପ୍ରୁ ମିସର୍‌ ଦେସ୍‍ତ ମସାତି ହୁଦାଂ ଡଞ୍ଜ୍‌ବା ଆତାର୍‌, 29 ହେ ନାଜିଂ ନିତ୍ରେମାପ୍ରୁ ମସାଂ ଇ କାତା ଇଚାନ୍‌, "ଆନେଙ୍ଗ୍ ନିତ୍ରେମାପ୍ରୁ, ଆନେଙ୍ଗ୍ ମିଙ୍ଗେଙ୍ଗ୍ ଇନା ଇନାକା ଇଞ୍ଜ୍‌ନାଙ୍ଗ୍‌; ହେଦାଂ ସବୁ ମିସ୍ରିୟ ରାଜା ପାରଙ୍ଗ୍ ଇନାଟ୍‌ ।" 30 ତା ପାଚେ ମସା ନିତ୍ରେମାପ୍ରୁତି ମୁମ୍‌ଦ ଇଞ୍ଜିମାଚାନ୍‌, "ହାର୍‌ଦି ବେଣ୍‌ ଇଞ୍ଜେଙ୍ଗ୍‌ ପୁନ୍‌ୱି ଲକ୍‌ ଜେ ଆନେଙ୍ଗ୍, ନା, କାତା ପାର ଇନେସ୍‌ ୱେନାନ୍‌ ?"