1 ଇଦାଂପାଚେ ଇସ୍ୱର୍‌ ମସାତି କାଜିଂ ଆରି ଜାର୍‌ ଲକୁ ଇସ୍ରାଏଲ୍‌ କାଜିଂ ଇମ୍‌ଣି ଇମ୍‌ଣି କାମାୟ୍‌ କିତାନ୍ନା, ବେସିକିଜ଼ି ଇସ୍ରାଏଲ୍‌ ବଁସ୍‌ତିଂ ମିସର୍‌ତାଂ ଇନେସ୍‌ ହପ୍‌ଚି ତାହିୱାତାନ୍ନା, ଇସବୁ କାତା ମସାତି ପତ୍‌ଲେହି ମିଦିୟନିୟ ମାପ୍ରୁହେବାକିନାକାନ୍‌ ଜିତ୍ର ୱେଞ୍ଜେଙ୍ଗ୍‌ ପାୟାତାନ୍‌ । 2 ହେବେ ମସାତି ପତ୍‌ଲେହି ହେ ଜିତ୍ର ଜାର୍‌ ଇଞ୍ଜ ପକ୍ୟାତାକାଦେଲ୍‌ ମସାତି ଡକ୍ରି ସିପ୍‌ପରାତିଂ ଆରି ତା ରି ମାଜ଼ିରିଂ ହାଙ୍ଗ୍‌ଦ ଅତାନ୍‌ । 3 ହେ ରି ମାଜ଼ିର୍‌ ବିତ୍ରେ ରୱାନ୍ତି ତର୍‌ ଗେର୍ସମ୍‌*, ଇନେକିଦେଂକି ହେୱାନ୍‌ ଇଞ୍ଜିମାଚାନ୍‌, "ଆନ୍‌ ବିଦେସ୍‌ତ ବାହା କିତାପ୍‌ ।" 4 ଆରେ, ବିନ୍‌ନିକାନ୍ତି ତର୍‌ ଇଲିୟେସର୍‌,* ଇନେକିଦେଂକି ହେୱାନ୍ ଇଞ୍ଜିମାଚାନ୍‌, "ନା ଆବାତି ପର୍‌ମେସ୍ୱର୍‌ ନା ଉପ୍‌କାର୍‌ୟା ଆଜ଼ି ପାରତି କାଣ୍ଡାତାଂ ନାଂ ଉଦାର୍‌ କିତ୍‌ତାନ୍‌ ।" 5 ଇଦାଂପାଚେ ମସାତି ପତ୍‌ଲେହି ଜିତ୍ର, ମସାତି ହେ ରିୟାର୍‌ ମାଜ଼ିର୍‌ ଆରି ଡକ୍ରି ହାଙ୍ଗ୍‌ଦ ଅଜ଼ି ବାଟାତ ମସାତି ଲାଗାୟ୍‌, ଇଚିସ୍‌, ପର୍‌ମେସ୍ୱର୍‌ ମାଡ଼ିନି ଇମ୍‌ଣି ବାହାତ ହେୱାନ୍‌ ଚାଉଣି ରଚ୍‌ଚି ମାଚାନ୍‌, ହେ ବାହାତ ୱାତାନ୍‌ । 6 ଆରେ, ହେୱାନ୍‌ ମସାଙ୍ଗ୍‌ ୱେଚ୍‌ଚାନ୍‌, ନି ପତ୍‌ଲେଦି ଜିତ୍ର, ଆନ୍‌ ଆରି ନି ଡକ୍ରି, ତା ଲାହାଂ ନି ରି ମାଜ଼ିର୍‌, ଆପ୍‌ ୱିଜ଼ାପ୍‌ ନି ଲାଗାୟ୍‌ ୱାତାପ୍‌ନା, 7 ହେଏଚେକାଡ଼୍‌ଦ ମସା ତା ପତ୍‌ଲେହି ଲାହାଂ ବେଟା ଆଜ଼ି ବାର୍ତ ହାଲ୍‌ଜି ହେୱାନିଙ୍ଗ୍‌ ଜୱାର୍‌କିଜ଼ି ଆରି ଡନ୍‌ଞ୍ଜାନ୍‌: ଆରେ, ହାରି ହାର୍‌ ବିୱାହିଙ୍ଗ୍‌ କାବୁର୍‌ ୱେନ୍‌ବାତି ପାଚେ ହେୱାର୍‌ ତୁମ୍‌ତ ହଟାର୍‌ । 8 ଇଦାଂପାଚେ ନିତ୍ରେମାପ୍ରୁ ଇସ୍ରାଏଲ୍‌ କାଜିଂ ପାରତି ଲାଗେ ଆରି ମିସ୍ରିୟାର୍ତି କାଜିଂ ଇନାକା ଇନାକା କିତାନ୍ନା, ହାଜ଼ିତ ହେୱାର୍‌ତି ଇନେସ୍‌ ସବୁ ଦୁକ୍‌ ଗିଟାତାତ୍‌ନା ଆରି ନିତ୍ରେମାପ୍ରୁ ଇନେସ୍‌ବାନି ହେୱାରିଙ୍ଗ୍‌ ଉଦାର୍‌ କିତାନ୍ନା, ଇସବୁ କାତା ମସା ତା ପତ୍‌ଲେହିଂ ୱେଚ୍‌ଚାନ୍‌ । 9 ପାଚେ ନିତ୍ରେମାପ୍ରୁ ମିସ୍ରିୟର୍‌ତି କେଇଦାଂ ଇସ୍ରାଏଲ୍‌ତିଂ ରାକ୍ୟା କିଜ଼ି ଇନେସ୍‌ ସବୁ ହାର୍‌ କାତା ହିତାନ୍‌ନା, ତା କାଜିଂ ଜିତ୍ର ବେସି ୱାର୍‌ୟା ଆତାନ୍‌ । 10 ଆରେ, ଜିତ୍ର ଇଚାନ୍‌, "ଇମ୍‌ଣି ନିତ୍ରେମାପ୍ରୁ ମିସ୍ରିୟର୍‌ତି ଆରି ପାରତି କେଇଦାଂ ହେୱାରିଂ ରାକ୍ୟା କିତାନ୍ନା, ଆରେ ମିସ୍ରିୟର୍‌ତି ତାରେନ୍‌ତାଂ ମାନାୟାର୍ତିଂ ଆର୍ସିବାଦ୍‌ କିତାନ୍ନା, ହେୱାନ୍‌ ଜାଜ୍‌ମାଲ୍‌ ପାୟାଏନ୍‌ । 11 ନିତ୍ରେମାପ୍ରୁ ୱିଜ଼ୁ ପେନ୍‍କୁତାଂ ବେସି ଗାଜାକାନ୍‌, ଇଦାଂ ଆନ୍‌ ନଂ ପୁଚାଙ୍ଗ୍‌ । ଆଁ, ହେୱାର୍‌ ଇମ୍‌ଣି ବିସ୍ରେ ହେୱାର୍‌ତି ବିରୁଦ୍‌ତ ଗରବ୍‌ କିଜ଼ିମାଚାର୍‌, ହେ ବିସ୍ରେ ହେୱାନ୍‌ ଗାଜାକାନ୍‌ ।" 12 ଇଦାଂପାଚେ ମସାତି ପତ୍‌ଲେହି ଜିତ୍ର ଇସ୍ୱର୍‌ତି ଉଦେସ୍‌ତ କାଟ୍‌ପୁଜା ଆରି ଆକାତ୍‌ ପୁଜା କିତାନ୍‌; ଆରେ, ହାରଣ ଆରି ଇସ୍ରାଏଲ୍‌ନି ୱିଜ଼ାର୍‌ ବୁଡ଼ାଲୁର୍‌ ୱାଜ଼ି ପର୍‌ମେସ୍ୱର୍‌ ମୁମ୍‌ଦ ମସାତି ପତ୍‌ଲେହି ଲାହାଂ ଚିଚାର୍‌ ।

13 ତା ଆର୍କାତ୍‌ନାଞ୍ଜିଙ୍ଗ୍‌ ମସା ମାନାୟାର୍‌ତି ବିଚାର୍‌ କିଦେଂ କୁଚ୍‌ଚିଲେ, ମାନାୟାର୍‌ ନାଡ଼ିସ୍‌ତାଂ ମ୍ଡିକାହାରେସ୍‌ ପାତେକ୍‌ ତା ମୁମ୍‌ଦ ନିଲ୍‌ଚି ମାନ୍‌ଗାତାର୍‌ । 14 ହେପାଦ୍‌ନା ମସା ମାନାୟାର୍ତି ବିସ୍ରେ ଇନାକା ଇନାକା କିତାନ୍‌, ତା ପତ୍‌ଲେହି ହେଦାଂ ହୁଡ଼୍‌ଜି ଇଚାନ୍‌, "ଏନ୍‌ ମାନାୟାର୍‌ କାଜିଂ ଇ ଇନାକା ଲାକେ ବେବାର୍‌ କିନାୟ୍‌ ? ଏନ୍‌ ଇନେକିଦେଂ ରକାୟ୍‌ କୁଚ୍‌ନାୟ୍‌ ଆରି ୱିଜ଼ାର୍‌ ମାନାୟାର୍‌ ନାଡ଼ିସ୍‌ତାଂ ମ୍ଡିକାହାରେସ୍‌ ପାତେକ୍‌ ନି ଚାର୍‌ବେଣ୍‌ତାଂ ଇନେକିଦେଂ ନିଲ୍‌ତାର୍ଣ୍ଣା ?" 15 ପାଚେ ମସା ତା ପତ୍‌ଲେହିଂ ଇଚାନ୍‌, "ମାନାୟାର୍‌ ପର୍‌ମେସ୍ୱର୍‌ ବିଚାର୍‌ ବୁଜାନି କାଜିଂ ନା ଲାଗାୟ୍‌ ୱାନାର୍‌ 16 ଆରି ହେୱାର୍‌ତି ଇମ୍‌ଣାକାପା ଗଣ୍ଡ୍‌ଗଲ୍‌ ଆତିସ୍‌, ନା ଲାଗାୟ୍‌ ୱାନାର୍‌; ହେବେ ଆନ୍‌ ଇନାକାଂ ଆରି ଇନ୍‌ୱାକାଂ ବିତ୍ରେ ବିଚାର୍‌ କିନାଙ୍ଗ୍‌, ଆରେ, ପର୍‌ମେସ୍ୱର୍‌ ବିଦି ବିଦାଣିସବୁ ହେୱାରିଙ୍ଗ୍‌ ପୁନି କିନାଙ୍ଗ୍‌ ।"

17 ଇଦାଂପାଚେ ମସାତି ପତ୍‌ଲେହି ଇଚାନ୍‌, "ନିଦାଂ ଇ କାମାୟ୍‌ ହାର୍‌ ଆକାୟ୍‌ । 18 ଏନ୍‌ ଆରି ନି ହାଂଦାକାନ୍‌ ଇ ମାନାୟ୍ ରିୟାର୍‌ ନିଚୟ୍‌ ହାରୁ ଆଜ଼ିହାନାର୍‌; ଇନେକିଦେଂକି ଇ କାମାୟ୍‌ ନି କାଜିଂ ବେସି ବଜ୍‌; ଏନ୍‌ ରୱାୟ୍‌ ଇଦାଂ ପୁରା କିଦେଂ ଆଡ଼ୁୟ୍‌ । 19 ଇନେକିଦେଂକି ନା କାତାତ ମାନ୍‌ଦିଆନ୍ କିଆ, ଆନ୍‌ ନିଙ୍ଗେଙ୍ଗ୍‌ ବୁଜାମାଣା କିଦ୍‌ନାଙ୍ଗ୍‌, ଆରେ, ପର୍‌ମେସ୍ୱର୍‌ ଲାଗେ ଏନ୍‌ ମାନାୟାର୍‌ ପାକ୍ୟା ଆଜ଼ି ହେୱାର୍‌ କାତା ପର୍‌ମେସ୍ୱର୍‌ ଲାଗାୟ୍‌ ୱେଚା । 20 ଆରେ, ଏନ୍‌ ହେୱାରିଙ୍ଗ୍‌ ବିଦି ବିଦାଣି ବଲ୍‌ ହିଆ ଆରି ହେୱାର୍‌ତି ହାନି ହାଜ଼ି ଆରି କିନି କାମାୟ୍‌ ଚଚା । 21 ଆରେ, ଏନ୍‌ ଇ ମାନାୟାର୍‌ ବିତ୍ରେତାଂ କାମାୟ୍‌ଆଡ୍ନାକାନ୍‌, ଇଚିସ୍, ପର୍‌ମେସ୍ୱର୍‌ କାଜିଂ ପାଣ୍ଡ୍ରାନାକାନ୍‌, ହାତ୍‌ପାନିକାନ୍‌ ଆରି ଅନ୍ୟାୟ୍‌ ଲାବ୍‌ ଗିଣ୍‌କିନାକାନ୍‌ ମାନାୟ୍‌ତିଂ ବାଚି କିୟା; ଆରେ, ହେୱାରିଙ୍ଗ୍‌ ମାନାୟାର୍‌ ଜପି ହାଜାର୍‌ ମୁଡ଼୍‌ଦାକନ୍‌, ସଏ ମୁଡ଼୍‌ଦାକାନ୍‌, ପଚାସ୍‌ ମୁଡ଼୍‌ଦାକାନ୍‌ ଆରି ଦସ୍‌ ମୁଡ଼୍‌ଦାକାନ୍‌ ଲାକେ ବାଚି କିୟା । 22 ହେୱାର୍‌ ସବୁୱେଡ଼ାଙ୍ଗ୍‌ ମାନାୟାର୍‌ତି ବିଚାର୍‌ କିଏନ୍‌, ଆରେ, ଇମ୍‌ଣାକାପା ଗାଜା କାତା ଆତିସ୍‌ ନି ଲାଗାୟ୍‌ ତାହିୱାନାର୍‌, ମତର୍‌ ହାରୁ କାତା ଆତିସ୍‌ ହେୱାର୍‌ ଜାର୍‌ ବିଚାର୍‌ କିନାର୍‌, ତା ଆତିସ୍‌ ନିଦାଂ ନିଜ୍‌ କାମାୟ୍‌ ଉସାସ୍‌ ଆନାତ୍‌, ଆରେ, ହେୱାର୍‌ ନି ଲାହାଂ ବଜ୍‌ ପିଣ୍ଡ୍‌ନାର୍‌ । 23 ଜଦି ଏନ୍‌ ଏଲେଂ କିତିସ୍‌, ଆରେ, ପର୍‌ମେସ୍ୱର୍‌ ଏଲେଂ କିନି କାଜିଂ ବଲ୍‌ ହିନାନ୍‌ ତେବେ ଏନ୍‌ ହୁଞ୍ଜେଙ୍ଗ୍‌ ଆଡ୍‌ନାୟ୍‌ ? ଆରେ ଇ ସବୁ ମାନାୟାର୍‌ ବିୱାହିଂ ଜାର୍‌ ବାହାତ ହାନାର୍‌ ।"

24 ଇଦାଂପାଚେ ମସା ଜାର୍‌ ପତ୍‌ଲେହିତି କାତାତ ମାନ୍‌ଦିଆନ୍‌ କିଜ଼ି ତା କାତା ଇସାବ୍ରେ ସବୁ କାମାୟ୍‌ କିତାନ୍‌ । 25 ଆରେ, ମସା ସବୁନି ଇସ୍ରାଏଲ୍‌ ବିତ୍ରେତାଂ କାମାୟ୍‌ଅଡ୍ନି ମାନାୟ୍‌ ବାଚି କିଜ଼ି ମାନାୟାର୍‌ ଜପି ମୁଡ଼୍‌ଦାକାର୍‌, ଇଚିସ୍‌, ହାଜାର୍‌ ମୁଡ଼୍‌ଦାକାନ୍‌, ସଏ ମୁଡ଼୍‌ଦାକାନ୍‌, ପଚାସ୍‌ ମୁଡ଼୍‌ଦାକାନ୍‌ ଆରି ଦସ୍‌ ମୁଡ଼୍‌ଦାକାନ୍‌ ଲାକେ ବାଚି କିତାର୍‌ । 26 ପାଚେ ହେୱାର୍‌ ସବୁ ୱେଡ଼ାଲିଂ ମାନାୟାର୍‌ତି ବିଚାର୍‌ କିତାର୍‌; ଆଟ୍‌ୱା ବିଚାର୍ଣ୍ଣା ସବୁ ମସା ଲାଗାଂ ତାହିୱାତାର୍‌; ମତର୍‌ ହିରୁ ହିରୁ କାତା ସବୁ ଆପେ ଆପେ ବିଚାର୍‌ କିତାର୍‌ ।

27 ଇଦାଂପାଚେ ମସା ତା ପତ୍‌ଲେହିଂ ହେଲ ହିତିଲେ, ହେୱାନ୍‌ ନିଜ୍‌ ଦେସ୍‌ତ ହାଚାନ୍‌ ।