ଆଦି 49

ମାଜ଼ିରିଂ ଜାକୁବତି ଆସିର୍ବାଦ୍‌

1 ଇଦାଂପାଚେ ଜାକୁବ ତା ମେହିରିଂ କୁକ୍‌ଚି ଇଚାନ୍‌, "ଏପେଙ୍ଗ୍‌ ରୁଣ୍ଡା ଆଡ; ହାରିହାରା ୱେଡ଼ାଲିଂ ମି କାଜିଂ ଇନାକା ଗିଟାନାତ୍‍, ହେଦାଂ ମିଂ ଇଞ୍ଜ୍‌ନାଙ୍ଗ୍‌ । 2 ଏ ଜାକୁବତି ମାଜ଼ିର୍‌, ରୁଣ୍ଡାଜ଼ି ୱେନାଟ୍‌ ଆରି ମି ଲାତ୍ରାଦି ଇସ୍ରାଏଲ୍‌ତି ବଚନ୍‌ ୱେନାଟ୍‌ । 3 ଏ ରୁବେନ୍‌, ଏନ୍‌ ନା ପର୍‌ତୁମ୍‌ ଗାଟାତି ମାଜ଼ି, ନା ବାଡ଼୍‌କାସ୍‌ ଆରି ନା ସାକ୍ତିନି ପର୍‌ତୁମ୍‌ ପାଡ଼୍‌; ଆରେ, ଜାଜ୍‌ମାଲ୍‌ ମୁଡ଼୍‌ ଆରି ୱିଜ଼େସାକ୍ତିତିଂ ମୁଡ଼୍‌ ମାଚାୟ୍‌ । 4 ଏନ୍‌ ଡ଼ିନି ଏସ୍‌ ଲାକେ, ନିଦାଂ ମୁଡ଼୍‌ ମାନ୍‌ଗୁତ୍‌; ଇନେକିଦେଂକି ଏନ୍‌ ନି ଲାତ୍ରାଦି ହୁଞ୍ଜ୍‌ନିତ ହାଚାୟ୍‌; ତେବେ ହେଦାଂ ବିଟାଡ଼୍‌ କିତାୟ୍‌ । 5 ସିମିୟନ୍‌ ଆରି ଲେବି ରିୟାର୍‌ ଟଣ୍ଡାର୍‌; ହେୱାର୍ତି କାଣ୍ଡା ଜୁଜ୍‌ କିଦେଂ କାଣ୍ଡା ହପ୍ତାନାର୍‌ । 6 ଏ ନା ପାରାଣ୍‌, ହେୱାର୍ତି ଡ଼ୁଗ୍‌ତି ଗାଣ୍‌ଜୁତ ହଣ୍‌ମାଟ୍‌; ଏ ନା ଜାଜ୍‌ମାଲ୍‌, ଏନ୍‌ ହେୱାର୍ତି ସବାତ ମେହାମାଟ୍‌; ଇନେକିଦେଂକି ହେୱାର୍‌ କାକ୍ରିତିଂ ନାର୍‌ଅସ୍ତିସ୍‌ ଆରି ମାନ୍‌ଇଚାତ ବଇଲାକାଂ ନିଙ୍ଗୁଣିଙ୍ଗ୍‌ କାତ୍‌ତାର୍‌ । 7 ହେୱାର୍ତି ରିସା ସାଇପ୍‌ ଆୟେତ୍‌, ଇନେକିଦେଂକି ହେଦାଂ ଜବର୍ ମାଚାତ୍‌; ହେୱାର୍‌ତି ରିସା ସାଇପ୍‌ ଆୟେତ୍‌, ଇନେକିଦେଂକି ହେଦାଂ ଅମାନ୍ୟା ମାଚାତ୍‌; ଆନ୍‌ ଜାକୁବତି ଲାତ୍ରା ବିତ୍ରେ ହେୱାରିଙ୍ଗ୍‌ ବାଗ୍ କିନାଙ୍ଗ୍‌ ଆରି ଇସ୍ରାଏଲ୍‌ ଦେସ୍‌ ବିତ୍ରେ ଚିନ୍‌ବିନ୍‌ କିନାଙ୍ଗ୍‌ । 8 ଏ ଜିହୁଦା, ନି ଟଣ୍ଡାର୍‌ ନିଙ୍ଗେଙ୍ଗ୍‌ ୱାରିକିୟ୍‌ କିଦ୍‌ନାର୍‌; ନି କେଇ ନି ସାତ୍ରୁକାଂ ହାକ୍‌ ଜପି ମାନ୍‌ଗାନାତ୍‌; ମି ଆକର୍‌ମେହିର୍‌ ନିଙ୍ଗେଙ୍ଗ୍‌ ଜୱାର୍‌ କିଦ୍‌ନାର୍‌ । 9 ଜିହୁଦା ବେଣ୍ଟିୟା ସିୟଁଲାକେ; ଏ ନା ମାଜ଼ି, ଏନ୍‌ କଟ୍ରା ଅସ୍ତି ପାରାତ ନିଂଜି ୱାତାୟ୍‌; ହେୱାନ୍‌ ଗଂଜି ହାଚାନ୍‌, ହେୱାନ୍‌ ସିୟଁ ଆରି ତେୟାସିୟଁନି ନିୟାୟ୍‌ ହୁଞ୍ଜ୍‌ଚାତ୍‌ନା, ଇନେର୍‌ ତାଂ ନିକ୍‍ନାର୍‌ ? 10 ସିଲ ୱାନି ପାତେକ୍ ଜିହୁଦାତାଂ ରାଜାଡାଣ୍ଡ୍‌ ଆରି ତାଦି କାଲ୍‍କୁ ରିଣ୍ଡି ବିତ୍ରେତାଂ ବିଚାର୍‌କାର୍‌ଆ ବାଡ୍‌ଗେ ହାଲୁତ୍‌; ତା ଲାଗାୟ୍‌ ଲକୁ ତଲ୍ୟା ମାନି କିଉର୍‌ । 11 ହେୱାନ୍ ଅଙ୍ଗୁର୍‌କୁଡ଼ି ଲାଗାୟ୍‌ ତା ବାଚାତିଂ ଆରି ହାର୍‌ଦି ଅଙ୍ଗୁର୍‍କୁଡ଼ି ଲାଗାୟ୍‌ ଜାର୍‌ ତେୟା ଗଦ ହିମ୍‌ଣାତିଂ ଗାଚ୍‌ନାୟ୍‌; ହେୱାନ୍‌ ଅଙ୍ଗୁର୍‌ ରାସ୍‌ତ ଜାର୍‌ ହକ୍ତି ହେନ୍ଦ୍ରା ଆରି ଅଙ୍ଗୁର୍‌ ରାସ୍‍ତ ଜାର୍‌ ଆର୍ପିତି ଆଙ୍ଗି ନୁଜ଼୍‌ନାୟ୍‌ । 12 ତାଦାଂ କାଣ୍‌କୁ ଅଙ୍ଗୁର୍‌ରାସ୍‌ତ ନେତେର୍‌ ବାନି ଆନାତ୍‌, ପାଲ୍‌ତ ତା ଟାଡାଂ ଡ଼ିଞ୍ଜ୍‌ନିବାନି ଆନିକ୍‌ । 13 ସବୁଲୁନ୍‌ ହାମ୍‍ଦୁର୍‌ ଗୁଟିତ ବାହା କିନାନ୍‌ ଆରି ହେୱାନ୍‌ ଜାଜ୍‌ ଟେବାନିବାହା ଆନାତ୍‌; ଆରେ, ସିଦନ୍‌ ପାତେକ୍‌ ତା ଆଦିକାର୍‌ନି ହାନ୍ଦି ଆନାତ୍‌ । 14 ଇସାକର୍‌ ଗଦ ଲାକେ, ହେୱାନ୍‌ ମେଣ୍ଡାଂ ହାଡ଼ାତ ପା ହୁଞ୍ଜ୍‌ନାନ୍‌; 15 ହେୱାନ୍‌ ଜମ୍‌ନି ବାହାତିଂ ହାର୍ଦାକା ଆରି ଦେସ୍‌ତ ହାର୍‌ଦାଂ ହୁଡ଼୍‌ତାନ୍‌; ଲାଗିଂ ହେୱାନ୍‌ କାଉଡ଼ି ପିଣ୍‌ଦେଂ ନିପି ତାରେନ୍‌ କିତାନ୍‌, ବେଟାଜ଼ି କାମାୟ୍‌ କିଦେଂ ଆଡ଼ିଏନ୍‌ ଆତାନ୍‌ । 16 ଦାନ୍‌ ଇସ୍ରାଏଲ୍‌ନି ବିନ୍‌ନିକାର୍‌ ବଁସ୍‌ ଲାକେ ଆଜ଼ି ଜାର୍‌ ଲକୁର୍ତି ବିଚାର୍‌ କିନାୟ୍‌ । 17 ଦାନ୍‌ ହାଜ଼ିନି ରାଚ୍‌ ଲାକେ ଆରି ହାଜ଼ିନି ବିସ୍‌ ରାଚ୍‌ ଲାକେ; ଇନେର୍‌ ଗଡ଼ା ପାନାତିଂ ଡତିସ୍‌ ହେୱେଡ଼ାଲିଂ ଦୁମ୍‌ତାକାର୍‌ ପାଚ୍‌ବାଗାଂ ଆର୍‍ନାର୍‌ । 18 ଏ ନିତ୍ରେମାପ୍ରୁ, ଆନ୍‌ ନି ହୁଦାଂ ମୁକ୍‌ଡ଼ାନାକା କାଜିଂ କାସି ମାନାଙ୍ଗ୍‌ । 19 ଚରିକିନାକାର୍‌ ଗାଦ୍‌ତିଂ ମାଡିବହାନାର୍‌; ମତର୍‌ ହେୱାନ୍‌ ପାଚେ ହେୱାରିଙ୍ଗ୍‌ ମାଡିବହାନାନ୍‌ । 20 ଆସେର୍‌ତାଂ ହାର୍‌ଦି କାଦି ଉବ୍‌ଜାନାତ୍‌; ହେୱାନ୍‌ ରାଜାତିନି କାଦି ଜଗାଇକିଦ୍‌ନାନ୍‌ । 21 ନପ୍ତାଲି ହନ୍‌ନି କଟ୍ରା ଲାକେ, ହେୱାନ୍‌ ହଲ୍‌ନି ବଚନ୍‌ ଇନାନ୍‌ । 22 ଜସେପ୍‌ ପାଡ଼୍‌ହିନି ମାର୍‌ ଲାକେ ଗିଲ୍‌ତାକା, ହେୱାନ୍‌ ଜାରାଣ୍‌ ଲାଗାୟ୍‌ନି ପାଡ଼୍‌ହିନି ମାର୍‌ନି ଗିଲ୍‌ତି ଲାକେ; ତା କେନ୍ଦାଙ୍ଗ୍‌ ସବୁ କୁଆଡ଼୍‌ତିଂ ନାନାତ୍‌ । 23 ଆମ୍‌କୁୱିଲ୍‌କୁ ଆସ୍ତାକାର୍‌ ତାଂ ବେସି ଦୁକ୍‌ ହିତାର୍ଣ୍ଣା, ଆରେ, ତାଂ ଆମ୍‌ ଏଜ୍‌ଜି କସ୍ଟକିୟ୍‌ କିତାର୍ଣ୍ଣା, 24 ମତର୍‌ ତା ୱିଲ୍‌ ଆଟ୍‌ୱା ଆଜ଼ି ମାଚାତ୍‌, ଆରେ, ଇନେନ୍‌ ଜାକୁବତି ବାଡ଼୍‌କାସ୍‌ ହିନାକାନ୍‌ ତା କାଜିଂ ପର୍‌ମେସ୍ୱର୍‌ ଇସ୍ରାଏଲ୍‌ନି ରାକ୍ୟାକାରି ପାଲକ୍‌ ଲାକେ ଡାକ୍‌ପୁଟା ଆନାନ୍‌, 25 ଇଚିସ୍‌, ଆକର୍‌ତି ଇସ୍ୱର୍‌, ଇନେନ୍‌ ଉପ୍‌କାର୍‌ କିଦ୍‌ନାନ୍‌ ଆରି ୱିଜ଼େତିଂ ସାକ୍ତିକାଟାକାନ୍‌, ଇନେନ୍‌ ଜପ୍‌ଣି ଆକାସ୍‌ତାଂ ମଙ୍ଗଲ୍‌ କିନାକାନ୍‌, ତାରେନ୍‌ବାହାତ ମେଙ୍ଗ୍‌ ବାର୍ହାତାଂ ମଙ୍ଗଲ୍‌ ନିକାନ୍‌, ମାୟ୍‌ ଆରି ଗରପ୍‌ତାଂ ମଙ୍ଗଲ୍‌ ହିଜ଼ି ନିଂ ଆର୍ସିବାଦ୍‌ କିଦ୍‌ନାନ୍‌, ହେୱାନ୍ତି ହୁଦାଂ ତା କେଇନି ମାରାଂ ବାଡ଼୍‌କାସ୍‌ ଆତାତ୍‌ । 26 ନା ଆକର୍‌ଦାଦିରିଂ ଆର୍ସିବାଦ୍‌ତାଂ ନି ଲାତ୍ରାଦିତି ଆର୍ସିବାଦ୍‌ ଆଦିକ୍‌; ହେଦାଂ ସବୁଦିନ୍‌ନିକା ମାଡ଼ିନି ହାନ୍ଦି ପାତେକ୍‌ ମେଙ୍ଗ୍‌ନାତ୍‌; ହେଦାଂ ଜସେପ୍‌ତି କାପ୍‌ଡ଼ାତ, ଇଚିସ୍‌, ଜାର୍‌ ଟଣ୍ଡାର୍‌ତାଂ ବିନେ କିତି ମାନାୟ୍‌ନି କାପ୍‌ଡ଼ାତ ଆର୍‌ନାତ୍‌ । 27 ବିନ୍ୟାମିନ୍‌ ନାହାୟ୍‌କିନି ହୁଣ୍ଡାର୍‌ବୁର୍କା ଲାକେ; ନାଡ଼ିସ୍‌ ମ୍ଡିକା ହେୱାନ୍‌ ବେଟ୍‌କିଜ଼ି ତିନାନ୍‌ ।" 28 ଇୱାର୍‌ ଇସ୍ରାଏଲ୍‌ତି ବାର୍‌ କୁଟୁମ୍; ଇୱାର୍ତି ଲାତ୍ରାହି ଆର୍ସିବାଦ୍‌ କିନି ୱେଡ଼ାଲିଂ ଇ କାତା ଇଞ୍ଜି ଇୱାର୍ତି ପାତି ଜାଣ୍‌ତିଂ ହାର୍ଦି ହାର୍ଦି ଆର୍ସିବାଦ୍‌ କିତାନ୍‌ ।

ଜାକ୍‌ବତି ହାକି ଆରି ଦୁଗେର୍‌

29 ଇଦାଂପାଚେ ଜାକ୍‌ବ ତା ମାଜ଼ିରିଂ ଆଦେସ୍‌ ହିଜ଼ି ଇଚାନ୍‌, "ଇପ୍ରଣ ଜାର୍‌ ଲକୁ ଲାହାଂ ରୁଣ୍ଡା ଆଦେଂ ହାନାଙ୍ଗ୍ ଆନ୍‌ ଏଚେକାଡ଼୍‌ଦ ହାନାଙ୍ଗ୍‌ ନା ଆକର୍‌ଦାଦିର୍‌ ଲାହାଂ ନାଂ ହିତିୟ ରିହା ଜମିତାକେ ମୁଚ୍‌ନାର୍‌ । 30 ଇନେକିଦେଂକି ଅବ୍ରାହାମ୍‌ ଦୁଗେର୍‌ ବାହାନି ଆଦିକାର୍‌ କାଜିଂ କିଣାନ୍‌ ଦେସ୍‌ତ ମମ୍ରିନି ମୁମ୍‌ଦ ଇମ୍‌ଣି ମକ୍‌ପେଲାନି ବୁଇଁ ହେତିୟ ଇପ୍ରଣତାଂ କଡ଼୍‌ଜି ମାଚାନ୍‌, ହେ ହିତିୟ ଇପ୍ରଣନି ବୁଇଁବାହା ପାରାତ ନା ଆକର୍‌ଦାଦିର୍‌ ଲାଗାୟ୍‌ ନାଙ୍ଗେଙ୍ଗ୍ ମୁଚ୍‌ଚାଟ୍‌ । 31 ହେ ବାହାତ ଅବ୍ରାହାମ୍‌ତି ଆରି ତା ଡକ୍ରୁହି ସାରାତି ଦୁଗେର୍‌ ଆତାତ୍‍ନା, ଆରେ, ହେ ବାହାତ ଇସ୍‌ହାକ୍‌ତି ଆରି ତା ଡକ୍ରି ରିବିକାତି ଦୁଗେର୍‌ ଆତାତ୍‌ନା, ଆରେ, ହେ ବାହାତ ଆନ୍‌ ପା ଲେୟାତିଂ ମୁଚ୍‌ଚାଙ୍ଗ୍‌ନା । 32 ହେ ବୁଇଁ ଆରି ହେବେମାନି ପସୁ ହେତିୟ ହିମ୍‌ଣାଂତାଂ କଡ଼୍‌ୟା ଆତାତ୍‌ନା ହେବେ ନାଂ ମୁଚ୍‌ଚାଟ୍‌ ।" 33 ଇଲାକେ ଜାକୁବ ତା ମାଜ଼ିରିଙ୍ଗ୍‌ ବଲ୍‌ ହିଦେଂ ୱିସ୍ତି ପାଚେ ଟାଟିତ ରି ପାନା ରବେ କିଜ଼ି ପାରାଣ୍‌ ପିସ୍ତାନ୍‌ ଆରି ଜାର୍ ଲକୁ ଲାଗାୟ୍‌ ରୁଣ୍ଡା ଆତାର୍‌ ।