1 ଇଦାଂପାଚେ ଅବ୍ରାହାମ୍‌ ହେବେତାଂ ୱେଡ଼ାହାନି ଦେସ୍‌ତ ହାଲ୍‌ଜି କାଦେସ୍‌ ଆରି ସର୍‌ନି ମାଦ୍‌ଣି ବାହାତ ମାନ୍‌ଞ୍ଜି ଗରାରତ ବାହା କିତାନ୍‌ । 2 ଆରେ, ଅବ୍ରାହାମ୍‌ ଜାର୍‌ ଡକ୍ରି ସାରା ବିସ୍ରେ ଇଚାନ୍‌, "ହେଦେଲ୍‌ ନା ତଣ୍‌ଦେଲ୍‌; ଇଦାଂକାଜିଂ ଗରାରନି ରାଜା ଅବିମେଲକ୍‌ ଲକୁ ପକ୍‌ଚି ସାରାଙ୍ଗ୍‌ ଅତାର୍‌ ।" 3 ହେବେ ନାଣାଲିଂ ଇସ୍ୱର୍‌ କ୍ଡେଞ୍ଜ୍‌କଣ୍‌ତ ଅବିମେଲକ୍‌ତିଂ ଲାଗାଂ ୱାଜ଼ି ଇଚାନ୍‌, "ହୁଡ଼ା; ଏନ୍‌ ହାନାୟ୍‌, ଇନେକିଦେଂକି ହେ ଇମ୍‌ଣି କଗ୍‌ଲେଂ ଏନ୍‌ ଅତାୟ୍‌ନା, ତା ଡକ୍ରାହି ମାନାନ୍‌ ।"

4 ମତର୍‌ ଅବିମେଲକ୍‌ ତା ଲାହାଂ ହୁଞ୍ଜ୍‌ୱାଦାଂ ମାଚିଲେ ଇଚାନ୍‌, "ଏ ମାପ୍ରୁ, ଇମ୍‌ଣି ଦେସ୍‌ନି ମାନାୟ୍‌ ଦସିଆକାୟ୍‌, ହେୱାରିଂ କି ଏନ୍‌ ଅହ୍‌ନାୟ୍‌ ? 5 ହେ ମୁଣିକା କି ନିଜେ ନାଂ ଇଞ୍ଜ୍‌ୱାଦାଂ ମାଚାନ୍‌ ଜେ, ହେଦେଲ୍‌ ନା ତଣ୍‌ଦେଲ୍‌ ? ଆରେ, ହେ କଗ୍‌ଲେ ନିଜେ ଇଚାତ୍‌ ହେୱାନ୍‌ ନା ଟଣ୍ଡେନ୍‌; ଲାଗିଂ ମାନ୍‌ନି ହୁଦାର୍‌ ଆରି କେଇନି ଦସିଆୱିତ ଆନ୍‌ ଇ କାମାୟ୍‌ କିତାଂନା ।"

6 "ତେବେ ଇସ୍ୱର୍‌ କ୍ଡେଞ୍ଜ୍‌କଣ୍‌ତ ହେୱାନିଂ ଇଚାନ୍‌ ।" ଏନ୍ ନି ହୁଦାର୍‌ତ ଇ କାମାୟ୍‌ କିତାୟ୍‌ନା; ଇଦାଂ ଆପ୍‌ ପୁନାପ୍‌; ଆରେ, ଆପ୍‌ ପା ମା ବିରୁଦ୍‌ତ ପାପ୍‌ କିଦେଂ ମୁନା କିତ୍‌ତାପ୍‌; ଇଦାଂ କାଜିଂ ହେଦେଲିଂ ଡୁଦେଂ ନିଂ ହିଦ୍‌ୱାତାପ୍‌ । 7 ଇଦାଂକାଜିଂ ନଂ ହେ ମାନାୟ୍‌ତି ଡକ୍ରୁହିଂ ଲେଉଟାୟ୍‌ କିଆ; ଇନେକିଦେଂକି ହେୱାନ୍‌ ବେଣ୍‌ବାକ୍‌ଣାୟ୍‌କିନାକାନ୍‌, "ହେୱାନ୍‌ ନି କାଜିଂ ପାର୍ତନା କିନାନ୍‌, ହେବେଣ୍ଡାଂ ଏନ୍‌ ଜିନାୟ୍‌; ମତର୍‌ ଜଦି ହେଦେଲିଂ ଲେଉଟାୟ୍‌ କିଜ଼ିହିୱିତିସ୍‌, ତେବେ ନିଚେ ଏପ୍‌ ସବୁଇଲ୍‌କୁଟୁମ୍‌ ହାନାଦେର୍‌, ଇଦାଂ ପୁନ୍‌ଞ୍ଜି ମାନା ।"

8 ଇଦାଂପାଚେ ଅବିମେଲକ୍‌ ନାଡ଼ିହିଂ ନିଂଜି ଆଡ଼ିୟାରିଂ କୁକ୍‌ଚି ଇ ସବୁ କାତା ହେୱାର୍‌ କିତୁଲ୍‌ତ ଇଚାନ୍‌, ହେୱାର୍‌ ବେସି ପାଣ୍ଡ୍ରା ଆତାର୍‌ । 9 ହେବେ ଅବିମେଲକ୍‌ ଅବ୍ରାହାମ୍‌ତି କୁକ୍‍ଚି ଇଚାନ୍‌, "ଏନ୍‌ ମା କାଜିଂ ଇଦାଂ ଇନା ବେବାର୍‌ କିତାୟ୍‌ ? ଏନ୍‌ ଜେ ମାଂ ଆରି ମା ରାଜିତିଂ ବେସି ପାପ୍‌ କିତାୟ୍‌; ଆପ୍‌ ମି ବିରୁଦ୍‌ତ ଏଲେଂ କି ଦସ୍‌ କିତାପ୍‌ନା ? ଏନ୍‌ ମା କାଜିଂ କିୱି କାମାୟ୍‌ କିତାୟ୍‌ ।" 10 ଅବିମେଲକ୍‌ ଅବ୍ରାହାମ୍‌ତିଂ ଆରେରଗ ଇଚାନ୍‌, "ଏନ୍‌ ଇନାକା ହୁଡ଼୍‌ଜି ଇ ଲାକେ କାମାୟ୍‌ କିତାୟ୍‌ ?"

11 ହେଏଚେକାଡ଼୍‌ଦ ଅବ୍ରାହାମ୍‌ ଇଚାନ୍‌, "ଇ ଦେସ୍‌ତ ଇସ୍ୱର୍‌ତି କାଜିଂ ମୁଡ଼େ ପାଣ୍ଡ୍ରୁ ଆକାୟ୍‌; ଇଦାଂ କାଜିଂ ଆନ୍‌ ବାବିକିତାଂ, ଇୱାର୍‌ କି ନା ଡକ୍ରି ଲାବ୍‌ଡ଼ିତ ନାଙ୍ଗେଙ୍ଗ୍‌ ଅସ୍ତାନାର୍‌ । 12 ହେଦେଲ୍‌ ନା ତଣ୍‌ଦେଲ୍‌, ଇଦାଂ ହାତ୍‌ପା, ଇନେକିଦେଂକି ହେଦେଲ୍‌ ନା ଆବା ଗାଡ଼୍‌ହି, ଆୟାଗାଡ଼୍‌ହି ଆକାୟ୍‌, ଆରେ, ନା ଡକ୍ରି ଆତାତ୍‌ । 13 ଏଚେକାଡ଼୍‌ଦ ଇସ୍ୱର୍‌ ନାଂ ଆକର୍‌ ଇଲ୍‌ତାଂ ବୁଲାୟ୍‌କିତ୍‌ତାନ୍‌, ହେଏଚେକାଡ଼୍‌ଦ ଆନ୍‌ ହେଦେଲିଂ ଇଚାଙ୍ଗ୍‌, ଏନ୍‌ ନା କାଜିଂ ଇ ଉପ୍‌କାର୍‌ କିଦ୍‌ନାୟ୍‌, ଆସେଙ୍ଗ୍‌ ଇମ୍‌ଣି ଇମ୍‌ଣି ବାହାତ ହାନାପ୍‌, ହେ ହେ ବାହାତ ଏନ୍‌ ନାଂ ଟଣ୍ଡେନ୍‌ ଇଞ୍ଜି ଜାଣା ହିଦ୍‌ନାୟ୍‌ ।"

14 ହେଏଚେକାଡ଼୍‌ଦ ଅବିମେଲକ୍‌ ତା ଡକ୍ରି ସାରାତିଂ ହିତାନ୍‌, ଆରି ମେଣ୍ଡା ଆରି କଡିଂ ଆରି ଆଡ଼ିଏନ୍‌ ଆଡ଼ିୟାଣି ତାସି ଅବ୍ରାହାମ୍‌ତିଂ ଲେଉଟାୟ୍‌ କିତାନ୍‌ । 15 ଇଦାଂପାଚେ ଅବିମେଲକ୍‌ ଅବ୍ରାହାମ୍‌ତିଂ ଇଚାନ୍‌, "ହୁଡ଼ା, ମାଦାଂ ଇ ୱିଜ଼ୁ ଦେସ୍‌ ମି ମୁମ୍‌ଦ ମାନାତ୍‌, ମିଦାଂ ଇମେତାକେ ଇଚା, ହେବେ ବାହା କିୟାଟ୍‌ ।" 16 ଆରେ, ହେୱାନ୍‌ ସାରାତିଂ ଇଚାନ୍‌, "ହୁଡ଼ା, ଆପ୍‌ ନି ଟଣ୍ଡେନିଂ ହାଜାର୍‌ ଗଟା ରୁପା ହିତାପ୍‌; ହୁଡ଼ା, ହେଦାଂ ନି କାଜିଂ ଗିଟାତି ୱିଜ଼ୁ ବିସ୍ରେ କାଜିଂ ୱିଜ଼ାର୍‌ ମୁମ୍‌ଦ କାଣ୍‌କୁକାଂ ପ୍ଡାକ୍ୟାତି ଲାକେ; ଆରେ ୱିଜ଼ୁ ବିସ୍ରେ ନି କାଜିଂ ନିୟାୟ୍‌ ବିଚାର୍‌ କିୟାତାତ୍‌ ।"

17 ଇଦାଂପାଚେ ଅବ୍ରାହାମ୍‌ ଇସ୍ୱର୍‌ତି ଲାଗାୟ୍‌ ପାର୍ତାନା କିତିଲେ, ଇସ୍ୱର୍‌ ଅବିମେଲକ୍‌ତିଂ ଆରି ତା ଡକ୍ରୁହିଂ ଆରି ତା ଆଡ଼ିଏଣିକାଂ ଉଜ୍‌ କିତାନ୍‌; ହେବେତାଂ ହେୱାର୍ତି ହିମ୍‌ଣାୱାକ୍‌ଡ଼ା ଜଲମ୍‌ ଆତାର୍‌ । 18 ଇନେକିଦେଂକି ଅବ୍ରାହାମ୍‌ତି ଡକ୍ରି ସାରା କାଜିଂ ନିତ୍ରେମାପ୍ରୁ ଅବିମେଲକ୍‌ତି ଇଞ୍ଜମାନି କଗ୍‌ଲେକ୍‌ତି ଗରବ୍‌ ଟେବାୟ୍‌ କିଜ଼ି ମାଚାନ୍‌ ।