1 ଇ ସମୁ ବିତ୍ରେ କିଣାନ୍‌ ଦେସ୍‌ତ ଜବର୍‌ କାତାର୍‌ ମାଚାତ୍‌ । 2 ଇଦାଂକାଜିଂ ହେୱାର୍‌ ମିସର୍‌ ଦେସ୍‌ତାଂ ଇମ୍‌ଣି ତାସ୍‌ ତାସି ୱାଜ଼ି ମାଚାର୍‌, ହେସବୁ ୱିସ୍ତିଲେ ତା ଲାତ୍ରାହି ହେୱାରିଙ୍ଗ୍‌ ଇଚାନ୍‌, "ଏପେଙ୍ଗ୍‌ ଆରେରଗ ହାଲ୍‌ଜି ମା କାଜିଂ ଅଲପ୍‌ ତାସ୍‌ କଡ଼୍‌ଜି ତାହିୱାଡୁ ।" 3 ହେବେ ଜିହୁଦା ଜାକୁବ୍‌ତିଂ ଇଚାନ୍‌, "ହେ ମାନାୟ୍‌ ବେସି ପାର୍ମାଣ୍‌ କିଜ଼ି ଇଞ୍ଚାନ୍ନା, ମି ଟଣ୍ଡେନ୍‌ ମି ଲାହାଂ ହିଲ୍‌ୱାତାନ୍‌, ଏପେଙ୍ଗ୍‌ ମା ମୁମ୍‌ ହୁଡ଼୍‌ଦେଂ ଆଡୁଦେର୍‌ । 4 ଲାଗିଂ ଜଦି ଏପ୍‌ ମା ଲାହାଂ ଟଣ୍ଡେନିଙ୍ଗ୍‌ ପକ୍ତାନାଦେର୍‌, ତେବେ ଆପେଙ୍ଗ୍‌ ନି କାଜିଂ ତାସ୍‌ କଡ଼୍‌ଦେଂ ହାନାପ୍‌ । 5 ମତର୍‌ ଜଦି ପକ୍‌ତିୱିତିସ୍‌, ତେବେ ଆପେଙ୍ଗ୍‌ ହାଲୁପ୍‌, ଇନେକିଦେଂକି ହେ ମୁଣିକା ଇଞ୍ଚାନ୍ନା, ମି ଟଣ୍ଡେନ୍‌ ମି ଲାହାଂ ହିଲ୍‌ୱିତିସ୍‌, ଏପେଙ୍ଗ୍‌ ମା ମୁମ୍‌ ହୁଡ଼୍‌ଦେଂ ଆଡୁଦେର୍‌ ।"

6 ହେବେ ଜାକୁବ୍‌ ଇଚାନ୍‌, "ମିୱାନ୍‌ ଆରେ ରକାନ୍‌ ଟଣ୍ଡେନ୍‌ ମାନାନ୍‌, ଇଦାଂ ଇସ୍ରାଏଲ୍‌ ମାନାୟ୍‌ତିଂ ଇଞ୍ଜି ନା କାଜିଂ ଏଲେଙ୍ଗ୍‌ ବାନ୍ୟାବେବାର୍‌ ଇନେକିଦେଂ କିତାଦେର୍‌ ?"

7 ହେୱାର୍‌ ଇଚାର୍‌, "ହେୱାନ୍‌ ମାଦାଂ ଆରି ମା ଇଞ୍ଜି କୁଟୁମ୍‌ତି ଟିକିନିକି ୱେନ୍‌ବାସି ଇଞ୍ଚାନ୍‌, ମି ଲାତ୍ରାଦି କି ନେଞ୍ଜେଙ୍ଗ୍‌ ପାତେକ୍‌ ଜିତାନ୍‌ନା ? ମିୱାନ୍‌ କି ଆରେ ଟଣ୍ଡେନ୍‌ ମାନାନ୍‌ ? ଲାଗିଂ ଆପେଙ୍ଗ୍‌ ହେ କାତାତିଂ ଉତର୍‌ ହିଜ଼ି ମାଚାପ୍‌; ହେୱାନ୍‌ ଜେ ମି ଟଣ୍ଡେନିଂ ଇବେ ତାହିୱାଡୁ ଇଞ୍ଜି ଇଞ୍ଜ୍‌ନାନ୍‌, ଇଦାଂ ଆପେଙ୍ଗ୍‌ ଇନେସ୍‌ ପୁଞ୍ଜେଙ୍ଗ୍‌ ଆଡ୍‌ନାପ୍‌ ?"

8 ଜିହୁଦା ତା ଲାତ୍ରାହି ଇସ୍ରାଏଲ୍‌ ଆରେ ଇଚାନ୍‌, "ଏନ୍‌ ହେ ଦାଂଣେନିଂ ନା ଲାହାଂ ପକ୍‌ତା; ଆପେଙ୍ଗ୍‌ ନିଂଜି ହାନାପ୍‌, ପାଚେ ଆପେଙ୍ଗ୍‌ ଆରି ଏପ୍‌ ଆରି ହିମ୍‌ଣାଙ୍ଗ୍‌, ୱିଜ଼ାସ୍‌ ଜିନାସ୍‌, ହାଉସ୍‌ ।" 9 ଆନ୍‌ ହେୱାନ୍ତି ଲାଗ୍‌ଣି ଆତାଂ, ନା କେଇଦାଂ ତାଙ୍ଗେଙ୍ଗ୍‌ ବୁଜାଜ଼ି ଅନାୟ୍‌; ଆନ୍‌ ଜଦି ତାଂ ତାସି ନି ମୁମ୍‍ଦ ଇଟ୍‌ୱିତିସ୍‌, ତେବେ ହେ ଦସ୍‌ ସବୁ ୱେଡ଼ାଂ ନା ଜପି ଆର୍ଦାନାତ୍‌ । 10 ଜଦି ମାଦାଂ ଏଚେକ୍ ବିଲମ୍‌ ଆୱାଦାଂ ମାଚିସ୍‌, ତେବେ ଆପେଙ୍ଗ୍‌ ଆରେ ରଗ ମାସ୍‌ଦି ୱାତାପ୍‌ମା ।

11 ପାଚେ ହେୱାର୍ତି ଲାତ୍ରାହି ଇସ୍ରାଏଲ୍‌ ହେୱାରିଙ୍ଗ୍‌ ଇଚାନ୍‌, "ଜଦି ଏଲେଙ୍ଗ୍‌ ଆତିସ୍‌, ତେବେ ର କାମାୟ୍‌ କିୟାଟ୍‌; ଏପେଙ୍ଗ୍‌ ଜାର୍‌ ଜାର୍‌ ବାହାତ ଇ ଦେସ୍‌ନି ହାର୍ଦି ଜିନିସ୍‌, ଇଚିସ୍‌, ଦୁପ୍‌ନି, ପୁକି, ହାର୍ଦିଗାନ୍ଦା ଦିନିସ୍‌, ଗାନ୍ଦାରାସ୍‌, ପେସ୍ତା ଆରି ଚେଣାଂ ଅଲପ୍‌ ଅଲପ୍‌ ଅଜ଼ି ହେ ମାନାୟ୍‌ତିଂ ହିଆଟ୍‌ । 12 ଆରେ, ଜାର୍‌ ଜାର୍‌ କେଇଦ ରି ଗୁଣ୍‌ ଟାକାଂ ଅୱାଟ୍‌ ଆରି ମି ମଟ୍‌-ମୁମ୍‌ଦ ଇମ୍‌ଣି ଟାକାଂ ମାସ୍‌ଦି ୱାତିକ୍‌ନା, ହେଦାଂ ପା କେଇଦ ଅଜ଼ି ହାଲାଟ୍‌; କାତେହିନା ହେଦାଂ ବୁଲ୍‌ ଆଜ଼ିମାନାତ୍‌ । 13 ଆରେ, ମି ଟଣ୍ଡେନ୍‌ ବିନ୍ୟାମିନ୍‌ତିଂ ଅଜ଼ି ଆରେରଗ ହେ ମାନାୟ୍‌ତାକେ ହାଲାଟ୍‌ । 14 ୱିଜ଼େତିଂ ସାକ୍ତିକାଟି ଇସ୍ୱର୍‌ ମିଙ୍ଗେଙ୍ଗ୍ ହେ ମାନାୟ୍‌ ଲାଗାୟ୍‌ ଏଲେଙ୍ଗ୍‌ ଉପ୍‌କାର୍‌ ଲଗୁ କିଦେନ୍‌, ଇନେସ୍‌ ହେୱାନ୍‌ ମି ବିନ୍‌ ଟଣ୍ଡେନିଂ ଆରି ବିନ୍ୟାମିନ୍‌ତିଂ ପିସ୍ତି ହିଦ୍‌ନାନ୍‌ । ମତର୍‌ ଜଦି ନାଂ ମାଜ଼ିହିଲ୍‌ୱାକାନ୍‌ ଆନାଙ୍ଗ୍‌, ତେବେ ମାଜ଼ିହିଲ୍‌ୱାକାଂ ଆନାଙ୍ଗ୍‌ ।"

15 ହେବେ ହେୱାର୍‌ ହେ ବେଟି ଜିନିସ୍‌ ଆରି ରିଗୁଣ୍‌ ଟାକାଂ ଆରି ବିନ୍ୟାମିନ୍‌ତିଂ ହାଙ୍ଗ୍‌ଦ ଅଜ଼ି ହାଜ଼ି ଆସ୍ତି ମିସର୍‌ ଦେସ୍‌ତ ଜସେପ୍ ମୁମ୍‌ଦ ନିଲ୍‌ତାର୍‌ । 16 ହେଏଚେକାଡ଼୍‌ଦ ଜସେପ୍ ହେୱାର୍‌ ଲାହାଙ୍ଗ୍‌ ବିନ୍ୟାମିନ୍‌ତିଂ ହୁଡ଼୍‌ଜି ତା ଇଲ୍‌ମୁଣିକାଂ ଇଚାନ୍‌, "ଇ ମାନାୟାରିଙ୍ଗ୍‌ ମା ଇଞ୍ଜ ଅସି ହାଲାଟ୍‌ ଆରି ପସୁ ଅସ୍ତି କାଦିପିଦି ଜାଲ୍‌ଦି କିୟାଟ୍‌; ଇୱାର୍‌, ୱେଡ଼ାଲିଂ ମା ଲାହାଂ ତିନାର୍‌ ।" 17 ଇବେ ହେ ମାନାୟ୍‌ ଜସେପତି ବଲ୍‌ଇସାବ୍ରେ କାମାୟ୍‌ କିଜ଼ି ହେୱାରିଙ୍ଗ୍‌ ଜସେପ୍ ଇଞ୍ଜ ଅସି ହାଚାନ୍‌ ।

18 ଆରେ, ଜସେପ୍ ଇଞ୍ଜ ଏକିତିଲେ ହେୱାର୍‌ ପାଣ୍ଡ୍ରାସି ହାରି ଇନ୍‌ବାତାର୍‌, "ଆଗେ ମା ମଟ୍‌ତ ଇମ୍‌ଣି ଟାକାଂ ମାସ୍‌ଦି ହାଲ୍‌ଜି ମାଚିକ୍‌, ହେଦାଂ କାଜିଂ ମାଂ ଇବେ ତାହିୱାର୍ଣ୍ଣା; ନଂ ହେୱାନ୍‌ ମା ଜପି ତୁହ୍ୟାଜ଼ି ମାଡିବହାଜ଼ି ମା ଗଦଂ ସବୁ ଅସି ମାଂ ଆଡ଼ିୟାର୍‌ ଲାକେ ଇଡ଼୍‌ଦାନାନ୍‌ ।" 19 ଲାଗିଂ ହେୱାର୍‌ ଜସେପତି ଇଲ୍‌ମୁଣିକା ଲାଗାୟ୍‌ ହାଲ୍‌ଜି ଇଞ୍ଜ ହଣି ବାହାତ ତା ଲାହାଂ କାତାବାର୍ତା କିଜ଼ି ଇଚାର୍‌, 20 "ମାପ୍ରୁ, ଆପେଙ୍ଗ୍‌ ଆଗେ ତାସ୍‌ କଡ଼୍‌ଦେଂ ୱାଜ଼ିମାଚାପ୍‌; 21 ଆରେ, ଜମ୍‌ନି ବାହାତ ଜାର୍‌ ଜାର୍‌ ମଟ୍‌ ରିକ୍‌ଚି ହୁଡ଼୍‌ତାପ୍‌ ଜେ, ପାତି ଜାଣ୍‌ତି ମଟ୍‌-ମୁମ୍‌ଦ ତା ଟାକାଂ, ଇଚିସ୍‌, ପୁରା ତୁଲାୟ୍‌କିତି ଇସାବ୍ରେ ମା ଟାକାଂ ମାନିକ୍‌; ହେଦାଂ ମା କେଇଦ ଆରେରଗ ତାହିୱାତାପ୍‌ନା । 22 ଆରେ, ତାସ୍‌ କଡ଼୍‌ନି କାଜିଂ ଆପେଙ୍ଗ୍‌ ଆରେ ଟାକାଂ ତାହିୱାତାପ୍‌ନା; ମତର୍‌ ହେ ଟାକାଂ ମା ମଟ୍‌ତ ଇନେର୍‌ ଇଡ଼୍‌ଜିମାଚାନ୍‌, ଆପେଙ୍ଗ୍‌ ହେଦାଂ ପୁନୁପ୍‌ ।"

23 ପାଚେ ହେୱାନ୍‌ ଇଲ୍‌ମୁଣିକା ଇଚାନ୍‌, "ମିଦାଂ ହାର୍‌ ଆୟେତ୍‌, ପାଣ୍ଡ୍ରା ଆମାଟ୍‌, ମି ଇସ୍ୱର୍‌ ଆରି ମି ଆକର୍‌ ଇସ୍ୱର୍‌ ମି ମଟ୍‌ତ ମିଂ ଡ଼ୁଗ୍‌ତିଦନ୍‌ ହିତ୍‌ତାନ୍ନା; ମି ଟାକାଂ ନା ଲାଗାୟ୍‌ ମାଚାତ୍‌ ।" ପାଚେ ହେୱାନ୍‌ ସିମିୟନ୍‌ତିଂ ହପ୍‌ଚି ହେୱାର୍‌ ଲାଗାୟ୍‌ ତାହିୱାତାନ୍ ।

24 ଇଦାଂପାଚେ ହେୱାନ୍‌ ହେୱାରିଙ୍ଗ୍‌ ଜସେପତି ଇଲ୍‌ ବିତ୍ରେ ଅଜ଼ି ଏଜ଼ୁଙ୍ଗ୍‌ ହିତିଲେ, ହେୱାର୍‌ ପାନା ନୁସ୍‌ତାର୍‌; ଆରେ, ହେୱାନ୍‌ ହେୱାର୍‌ ଗଦକାଂ କାଦି ହିତାନ୍‌ । 25 ଆରେ ୱେଡ଼ାଲିଂ ଜସେପ୍ ୱାନାନ୍ ଇଞ୍ଜି ହେୱାର୍‌ ଉପ୍‌କାର୍‌ ହିନି ଜିନିସ୍‌ ଗାଡ଼ିକିତାର୍‌; ଇନେକିଦେଂକି ହେୱାର୍‌ ହେବେ ତିନାର୍‌ ଇଞ୍ଜି ୱେନ୍‌ଜି ମାଚାର୍‍ । 26 ଇଦାଂପାଚେ ଜସେପ୍ ଇଞ୍ଜ ୱାତିଲେ, ହେୱାର୍ତି ଉପ୍‌କାର୍‌ ହିନି ଦିନିସ୍‌ ତା ଲାଗାୟ୍‌ ଇଲ୍‌ ବିତ୍ରେ ତାସି ତାଂ ଗାଣ୍ଡ୍‌ହାଡ଼୍‌ ଜୱାର୍‌ କିତାର୍‌ । 27 ପାଚେ ଜସେପ୍ ହେୱାର୍ତି ମଙ୍ଗଲ୍‌ କାବୁର୍‌ ୱେନ୍‌ବାତାନ୍‌,, "ମି ଲାତ୍ରାଦି ଇନାକା ହାର୍‌ ମାନାନ୍‌ ? ଏପେଙ୍ଗ୍‌ ଇମ୍‌ଣି ବୁଡ଼୍‌ହିତି କାତା ଇଞ୍ଜିମାଚାଦେର୍‌, ହେୱାନ୍‌ କି ନେଞ୍ଜେଙ୍ଗ୍‌ ପାତେକ୍‌ ଜିତାନ୍‌ନା ?"

28 ହେୱାର୍‌ ଇଚାର୍‌, "ନି ଆଡ଼ିୟା ମାଞ୍ଜ୍‌ବା ହାର୍‌ ମାନାନ୍‌, ହେୱାନ୍‌ ନେଞ୍ଜେଙ୍ଗ୍‌ ପାତେକ୍‌ ଜିତାନ୍ନା । ପାଚେ ହେୱାର୍‌ କାପ୍‌ଡ଼ା ତାରେନ୍‌ କିଜ଼ି ଜୱାର୍‌ କିତାର୍‌ ।"

29 ହେପାଦ୍‌ନା ଜସେପ୍ ହୁଡ଼୍‌ଜି ତା ଟଣ୍ଡେନ୍‌ ବିନ୍ୟାମିନ୍‌ତିଂ ହୁଡ଼୍‌ଜି ଇଚାନ୍‌, ଏପେଙ୍ଗ୍‌ ଇମ୍‌ଣି ହାରୁ ଟଣ୍ଡେନ୍‌ତି କାତା ଇଞ୍ଜିମାଚାଦେର୍‌, "ହେୱାନ୍‌ କି ଇୱାନ୍‌ ?" ଆରେ ହେୱାନ୍‌ ଇଚାନ୍‌, "ଏ ନା ମାଜ଼ି, ଇସ୍ୱର୍‌ ନିଂ ଉପ୍‌କାର୍‌ କିଦେନ୍‌ ।" 30 ପାଚେ ଟଣ୍ଡେନ୍‌ କାଜିଂ ଜସେପତି ୱାସ୍କି ଜିଉନନିତ କେଦ୍‌ଦି ହେୱାନ୍ ବେଗି ଆଡ଼୍‌ବେଦେଂ ବାହା ଡେକ୍ତାନ୍‌; ଆରେ, ହେୱାନ୍‌ ଜାର୍‌ ବାକ୍ରାତ ହଣ୍‌ଜି ହେବେ ଆଡ଼୍‌ବାତାନ୍‌ । 31 ଇଦାଂପାଚେ ହେୱାନ୍‌ ମୁମ୍‌ ନୁଜ଼୍‌ଜି ବାର୍ତ ୱାତାନ୍‌, ଆରେ, ଜାର୍‌ତିଂ ସମାଲି କିଦେଂ ଆଡ୍‌ୱାଦାଂ ତିନି କାଦିପିଦି ପାସ୍‌ପିନି କାଜିଂ ବଲ୍‌ ହିତାନ୍‌ । 32 ପାଚେ ଚାକରାର୍‌ ଜସେପ୍ କାଜିଂ ଆରି ତା ଟଣ୍ଡାର୍‌ କାଜିଂ, ଆରେ, ତା ଲାହାଂ ତିନାକାର୍‌ ମିସରିୟା ଲଗୁ କାଜିଂ ବିନେ ବିନେ ପାସ୍‌ପାତାର୍‌, ଇନେକିଦେଂକି ଏବ୍ରିୟାର୍‌ ଲାହାଂ ତିନାକା ମିସ୍ରିୟାର୍‌ତି ବେବାର୍‌ ହିଲାତାତ୍‌; ହେଦାଂ ମିସ୍ରିୟାର୍‌ତି ଗିଣ୍‌ କାମାୟ୍‌ । 33 ଇଦାଂପାଚେ ଜସେପ୍ ମୁମ୍‌ଦ ହେୱାର୍ତି ଗାଜାକାନ୍‌ ଗାଜା ବାହାତ ଆରି ହାରୁକାନ୍‌ ହାରୁ ବାହାତ କୁଚିକିତାନ୍‌; ପାଚେ ହେୱାର୍‌ ହାରି କାବା ଆତାର୍ । 34 ଆରେ, ହେୱାନ୍ ତା ମୁମ୍‌ଦାଂ ତିନି କାଦି ନିକ୍‌ଚି ହେୱାରିଙ୍ଗ୍‌ ଚିଚ୍‌ପାତାନ୍‌; ମତର୍‌ ଇବେ ୱିଜ଼ାର୍‌ ବାଗ୍‌ତାଂ ବିନ୍ୟାମିନ୍‌ତି ବାଗ୍‌ ପାଞ୍ଚ୍‌ଗୁଣ୍‌ ଆଦିକ୍‌ ମାଚାତ୍‌ । ଇବେଣ୍ଡାଙ୍ଗ୍ ହେୱାର୍‌ ଉଣ୍‌ଜି ତା ଲାହାଂ ୱାରି କିତାନ୍‌ ।