ଆଦି 25

ଅବ୍ରାହାମ୍‌ତି ବିନ୍‌ ଲାତ୍ରା

1 ଅବ୍ରାହାମ୍‌ କଟୁରା ତର୍‌ନି ଆରେ ରଞ୍ଜେଲ୍‌ କଗ୍‌ଲେଙ୍ଗ୍‌ ବିବା କିଜ଼ି ମାଚାନ୍‌ । 2 ହେଦେଲ୍‌ ତା କାଜିଂ ସିମ୍ରଣ୍‌, ଜକ୍‌ସନ୍‌, ମଦାନ୍‌, ମିଦିୟନ୍‌, ଜିସ୍‌ବକ୍‌ ଆରି ସୁହ, ଇୱାରିଂ ଜଲମ୍‌ କିତାତ୍‌ । 3 ହେ ଜକ୍‌ସନ୍‌ ସିବା ଆରି ଦଦାନ୍‌ତିଂ ଜଲମ୍‌ କିତାତ୍‌ । ଦାଦାନ୍‌ ଅସୁରିୟ ଆରି ଲଟୁସିୟ ଆରି ଲିୟମିୟ ମାନାୟାର୍ତି ଆକ । 4 ମିଦିୟନ୍‌ନି ହିମ୍‌ଣାଙ୍ଗ୍‌ ଐପା, ଏପର, ହନକ ଆରି ଅବିଦ ଇଲଦାୟା; ଇ ୱିଜ଼ାର୍‌ କଟୁରାତି ହିମ୍‌ଣାଙ୍ଗ୍‌ ।

5 ଇଦାଂପାଚେ ଅବ୍ରାହାମ୍‌ ଇସ୍‌ହାକ୍‌ତିଂ ସବୁ ସମ୍ପତି ହିତାନ୍‌; 6 ମତର୍‌ ଅବ୍ରାହାମ୍‌ ସାନ୍‍ଲିତି ହିମ୍‌ଣାକାଂ ଅଲପ୍‌ ଅଲପ୍‌ ହିଜ଼ି ଜାର୍‌ ଜିବୁନ୍‌ ବାଚାୟ୍‌ କିଦେଂ ଇସ୍‌ହାକ୍‌ତାଂ ହେୱାରିଙ୍ଗ୍‌ ପୁର୍ବଦିଗ୍‌ନି ଦେସ୍‌ତ ମାଞ୍ଜେଙ୍ଗ୍‌ ହେଲ ହିତାନ୍‌ ।

ଅବ୍ରାହାମ୍‌ତି ହାକି ଆରି ମୁଚ୍‌ନାକା

7 ଅବ୍ରାହାମ୍‌ତି ଆୟଁସ୍‍ନି ଉଣାଆଦିକ୍‌ ସହେ ସତୁରିପାଞ୍ଚ୍‌ ବାର୍ହୁ; ହେୱାନ୍‌ ଏଚେକ୍‌ ବାର୍ହୁ ପାତେକ୍‌ ଜିଜ଼ି ମାଚାନ୍‌ । 8 ଇଦାଂପାଚେ ଅବ୍ରାହାମ୍‌ ହାର୍ଦି ବୁଡ଼୍‌ହି ଅବସ୍ତାତ ବୁଡ଼ା ଆରି ବାର୍ତିଆୟଁସ୍‌ ଆଜ଼ି ପାରାଣ୍‌ ପିସ୍ତାନ୍‌: ଆରେ, ଆଗେତାଂ ହାତାକାର୍ତି ତା ଆକର୍‌ ଲାହାଂ ମେହା ଆତାନ୍‌ । 9 ଆରେ ଇପ୍ରଣ ମାଜ଼ି ଇସ୍‌ହାକ୍‌ ଆରି ଇସ୍ମାଏଲ୍‌ ମମ୍ରିନି ମୁମ୍‍ଦ ହିତିୟ ବସ୍ତିନି ମାଜ଼ି ସହର୍‌ନି ଜମିତ ମକ୍‌ପେଲା ତର୍‌ଦ ପାରାତ ହେୱାନିଙ୍ଗ୍‌ ମୁଚ୍‌ଚାର୍‌ । 10 ଇନେକିଦେଂକି ଅବ୍ରାହାମ୍‌ ହେତିୟ ହିମ୍‌ଣାଙ୍ଗ୍ ତାକେଣ୍ଡାଂ ହେ ଜମି କଡ଼୍‌ଜି ମାଚାନ୍‌ । ହେ ବାହାତ ଅବ୍ରାହାମ୍‌ତି ଆରି ତା ଡକ୍ରି ସାରାତି ଦୁଗେର୍‌ କିତାନ୍‌ । 11 ଅବ୍ରାହାମ୍‌ତି ହାକି ପାଚେ ଇସ୍ୱର୍‌ ତା ମାଜ଼ି ଇସ୍‌ହାକ୍‌ତିଂ ଆର୍ସିବାଦ୍‌ କିତାନ୍‌; ଆରେ, ଇସ୍‌ହାକ୍‌ ବେର୍‌-ଲହୟ-ରୟି ତର୍‌ନି ବାହାତ ବାହାକିତାନ୍‌ ।

ଇସ୍ମାଏଲ୍‌ତି ଲାତ୍ରା

12 ସାରାତି ଆଡ଼ିୟାଣି ମିସରିୟା ହାଗାର ଅବ୍ରାହାମ୍‌ତି କାଜିଂ ଇନେରିଙ୍ଗ୍‌ ଜଲମ୍‌ କିଜ଼ି ମାଚାତ୍‌, ଅବ୍ରାହାମ୍‌ତି ହେ ମାଜ଼ି ଇସ୍ମାଏଲ୍‌ତି ଲାତ୍ରାର୍‌ । 13 ତର୍‌ ଆରି କୁଟୁମ୍‌ ଇସାବ୍ରେ ଇସ୍ମାଏଲ୍‌ତି ହିମ୍‌ଣାଙ୍ଗ୍‌ ତର୍‌ ଇଦାଂ । ଇସ୍ମାଏଲ୍‌ତି ପାଣ୍‌ୱା ମାଜ଼ି ନବାୟତ୍‌, ତା ପାଚେ କେଦର୍‌ ଆରି ଅଦ୍‌ବେଲ ଆରି ମିବ୍‌ସମ୍‌, 14 ମିସ୍‌ମ, ଦୁମା, ମସା, 15 ହଦଦ, ତେମା, ଜିଟୁର, ନାପିସ୍‌ ଆରି କେଦମା । 16 ଇ ୱିଜ଼ୁ ଇସ୍ମାଏଲ୍‌ତି ହିମ୍‌ଣାଙ୍ଗ୍‌, ଆରେ, ହେୱାର୍ତି ତର୍‌ ଇସାବ୍ରେ ହେୱାର୍ତି ନାସ୍‌ ଆରି ଜାଲିଗାଦ୍ରି ବାହା ମାଚାତ୍‌; ଆରେ ହେୱାର୍‌ ଜାର୍‌ ଜାର୍‌ ଲାତ୍ରା ଇସାବ୍ରେ ବାର୍‌ ଜାଣ୍‌ ଆଦିକାରି ମାଚାର୍‌ । 17 ଇସ୍ମାଏଲ୍‌ତି ଆୟଁସ୍‌ ଉଣାଦିକ୍‌ ସଏ ତିରସ୍‌ ସାତ୍‌ ବାର୍ହୁ ମାଚାତ୍‌; ପାଚେ ହେୱାନ୍‌ ପାରାଣ୍‌ ପିସ୍ତାନ୍‌; ଆରେ ହେୱାନ୍‌ ଜାର୍‌ ମାନାୟାର୍‌ ଲାଗାୟ୍‌ ଇଟ୍‌ୟାତାନ୍‌ । 18 ଇଦାଂପାଚେ ତା ହିମ୍‌ଣାଙ୍ଗ୍‌ ହବିଲା ଆରି ମିସର୍‌ନି ୱେଡ଼ାହତ୍‌ନି ନିପ ସର୍‌ତାଂ ଅସୁରିୟା ନିପ କୁଚ୍‌ଚାର୍‌ । ଇଲାକେ ହେୱାନ୍‌ ଜାର୍‌ ୱିଜ଼ାର୍‌ ଟଣ୍ଡାର୍‌ ମୁମ୍‌ଦ କୁଚ୍‌ଚେଙ୍ଗ୍‌ ବାହା ଗାଟାତାନ୍‌ ।

ଏସାଉ ଆରି ଜାକ୍‌ବତି ଜଲମ୍‌

19 ଅବ୍ରାହାମ୍‌ତି ମାଜ଼ି ଇସ୍‌ହାକ୍‌ତି ଲାତ୍ରା । ଅବ୍ରାହାମ୍‌ ଇସାକ୍‌ତିଂ ଗାଟା ଆତାନ୍‌; 20 ହେ ଇସ୍‌ହାକ୍‌ ଚାଲିସ୍‌ ବାର୍ହୁ ବୟଁସ୍‌ତ ପଦନ୍‌ ଅରାମିୟ ବତୁୟେଲ୍‌ତି ଗାଡ଼୍‌, ଇଚିସ୍‌, ଅରାମିୟ ଲାବନତି ତଣ୍‌ଦେହି ରିବିକାଂ ବିବା କିତାନ୍‌ । 21 ଇସ୍‌ହାକ୍‌ତି ହେ କଗ୍‌ଲେ ବାଞ୍ଜ୍‌ଣି ଆତିଲେ ହେୱାନ୍‌ ତା କାଜିଂ ନିତ୍ରେମାପ୍ରୁତି ଲାଗେ ପାର୍ତନା କିତିଲେ; ହେବେଣ୍ଡାଂ ନିତ୍ରେମାପ୍ରୁ ତା ପାର୍ତନା ୱେଚିଲେ, ତା ଡକ୍ରୁହି ରିବିକା ଏସ୍‌ପିସ୍ତାତ୍‌ । 22 ଇଦାଂପାଚେ ତା ଗରବ୍‌ ବିତ୍ରେ ହିମ୍‌ଣାଙ୍ଗ୍‌ ଲେମ୍‌ତିଲେ, ନାଦାଂ ଏଲେଙ୍ଗ୍‌ ଇନେକିଦେଂ ଆତାତ୍‌ ? ଏଲେଙ୍ଗ୍‌ କି ଇନାକିଦେଂ ଆତାତ୍‌ ? ଇଦାଂ ବାବିକିଜ଼ି ହେଦେଲ୍‌ ନିତ୍ରେମାପ୍ରୁତି ଲାଗେ ୱେନ୍‌ବେଦେଂ ହାଚାତ୍‌ । 23 ହେବେଣ୍ଡାଂ ନିତ୍ରେମାପ୍ରୁ ତାଙ୍ଗେଙ୍ଗ୍‌ ଇଚାନ୍, "ନି ଗରବ୍‌ତ ରି ଗଚି ମାନାର୍‌, ରି କଟୁମ୍‌ ନି ପଟତାଂ ବିନେ ଆନାର୍‌; ର କୁଟୁମ୍‌ ବିନ୍ କୁଟୁମ୍‍ତାଙ୍ଗ୍‌ ସାକ୍ତିନିକାନ୍‌ ଅନାନ୍‌, ଆରେ, ପାଣ୍‌ୱା ହାରୁକାନ୍ତି ହେବା କିନାନ୍‌ ।"

24 ଇଦାଂପାଚେ ହିମ୍‌ଣାଗାଟାନି ସମୁ ବାର୍ତି ଆତିଲେ, ତା ୱାସ୍‌କିତାଂ ଜାଉଁଣା ହିମ୍‌ଣାଂ ଜଲମ୍‌ ଆତାର୍‌ । 25 ତା ପାଣ୍‌ୱା ମାଜ଼ି ନେତେର୍‌ ବାନି ଆରି ୱିଜ଼ୁ ଗାଗାଡ଼୍‌ ତେମୁଲ୍‍ତ ହେନ୍ଦ୍ରା ଲାକେ ମାଚାନ୍; ଇଦାଂକାଜିଂ ତା ତର୍‌ ଏସାଉ*25:25 ଏସାଉ ଇଚିସ୍‌ ବର୍‌ୱେଲା ମାଚାନ୍‌ ହିଆତାତ୍‌ । 26 ହେଦାଂ ପାଚେ ଏସାଉତି ପାନା ଆଗ୍‌ଦାକା ଆସ୍ତି ତା ଟଣ୍ଡେନ୍‌ ଜୁୱାର୍‌ କିତାନ୍‌; ଇଦାଂ କାଜିଂ ତା ତର୍‌ ଜାକୁବ ହିତାର୍‌ । ଇସ୍‌ହାକ୍‌ତି ସାଟେ ବାର୍ହୁ ବୟଁସ୍‌ତ ଇ ଜାଉଁଣା ମାଜ଼ି ଜଲମ୍‌ ଆତାର୍‌ ।

ଏସାଉତି ପାଣ୍‌ୱା ଆଦିକାର୍‌ ପ୍ରନାକା

27 ଇଦାଂପାଚେ ହିମ୍‌ଣାଙ୍ଗ୍‌ ଗାଜାତି ପାଚେ ଏସାଉ ବାଣ୍‌ୱେନ୍‌ ଆତାନ୍‌ ଆରି ରାନ୍ତ ବାହାକିନାକାନ୍‌ ଆତାନ୍‌; ଆରେ, ଜାକୁବ ହୁଦାର୍‌ମାନାୟ୍‌ ଆରି ତୁମ୍‌ ବାହା କିନାକାନ୍‌ ଆତାନ୍ । 28 ଇସ୍‌ହାକ୍‌ କଟ୍ରା ଜେଇ ବେସି ହୱାଦ୍‌ ଅସି ହିତିଲେ ଏସାଉତିଂ ବେସି ଜିଉନାତାନ୍ । ମତର୍‌ ରିବିକା ଜାକୁବତିଂ ଜିଉନତାତ୍‌ ।

29 ର ଦିନା ଜାକୁବ ଦାଡ଼ି ୱାଞ୍ଜିମାଚାନ୍‌, ହେ ୱେଡ଼ାଲିଂ ଏସାଉ ନାସ୍କିଆସି ୱାସ୍ତି ଜମିତାଂ ୱାତାନ୍‌; 30 ଆରି ଏସାଉ ଜାକୁବ୍‌ଙ୍ଗ୍‌ ଇଚାନ୍‌, "ଆନ୍‌ ୱାସ୍ତାଙ୍ଗ୍‌ନା, ଗୱାରି କିଦ୍‌ନାଙ୍ଗା, ହେ ଗେରୁ ଦାଡ଼ି ହିଜ଼ି ଚିଚ୍‌ପାଦା, ଇ କାଜିଂ ତା ତର୍‌ ଇଦମ୍‌ ଗେରୁ ଡାକ୍‌ପୁଟା ଆତାତ୍ ।"

31 ହେଏଚେକାଡ଼୍‌ଦ ଜାକୁବ ଇଚାନ୍, "ଜଦି ଏନ୍‌ ନାଂ ଜାର୍ତି ଗାଜା ଆଦିକାର୍‌ ପ୍ରତ୍‌ନାୟ୍‌ ତାଆତିସ୍‌ ଆନ୍‌ ହିଦ୍‌ନାଂ ।" 32 ଏସାଉ ଉତର୍‌ ହିତାନ୍‌, "ହୁଡ଼ା, ଆନ୍‌ ହାତି ଲାକେ, ଗାଜା ଆଦିକାର୍‌ତ ନାଦାଂ ଇନା ଲାବ୍‌ ?"

33 ଜାକୁବ ଇଚାନ୍‌, "ଏନ୍‌ ନେଞ୍ଜେଙ୍ଗ୍‌ ନା ଲାଗାୟ୍‌ ପାର୍ମାଣ୍‌ କିଆ; ହେବେ ହେୱାନ୍‌ ତା ଲାଗାୟ୍‌ ପାର୍ମାଣ୍‌ କିତାନ୍‌ ।" ଇ ଲାକେ ହେୱାନ୍‌ ଜାର୍‌ ଗାଜା ଆଦିକାର୍‌ ଜାକୁବତିଂ ପ୍ରସି ତୁହିତାନ୍‌ । 34 ପାଚେ ଜାକୁବ ଏସାଉତିଂ ରୁଟି ଆରି ୱାନ୍‌ଞ୍ଚି ମୁହ୍‌ରି ଦାଡ଼ି ହିତିଲେ, ହେୱାନ୍‌ ତିନାଉଣା କିଜ଼ି ନିଙ୍ଗ୍‌ଜି ହାଚାନ୍‌ । ଇଲାକେ ଏସାଉ ଗାଜା ଆଦିକାର୍‌ ଚି ଗିୟାନ୍‌ କିତାନ୍‌ ।