ଆଦି 32

ଜାକୁବ ଏସାଉତିଂ ବେଟାନି କାଜିଂ ଜାଲ୍‌ଦି

1 ତାପାଚେ ଜାକୁବ ହାଜ଼ି ଆସ୍ତିଲେ, ପର୍‌ମେସ୍ୱର୍‌ତି ଦୁତ୍‌କୁ ତା ଲାହାଂ ବେଟା ଆତିକ୍‌ । 2 ହେଦାଂକାଜିଂ ଜାକୁବ ହେୱାରିଙ୍ଗ୍‌ ହୁଡ଼୍‌ଜି ଇଚାନ୍, "ଇୱାର୍‌ ଇସ୍ୱର୍‌ତି କୁଦା; ଇଦାଂକାଜିଂ ହେ ବାହାନି ତର୍‌ ମହନୟିମ୍‌"*32:2 ରିକୁଦା ଇଡ଼୍‌ତାନ୍‌ ।

3 ତାପାଚେ ଜାକୁବ ତା ଆଗେ ସେୟିର ଦେସ୍‌ନି ଇଦମ୍‌ ବସ୍ତିତ ଟଣ୍ଡେନ୍‌ ଏସାଉ ଲାଗାଂ ଦୁତ୍‌କାଂ ପକ୍‌ତାନ୍‌ । 4 ଆରେ, ଜାକୁବ ହେୱାରିଙ୍ଗ୍‌ ଇ ବଲ୍‌ ହିତାନ୍, "ଏପେଙ୍ଗ୍‌ ମା ମାପ୍ରୁ ଏସାଉତିଂ ଇନାଦେର୍‌, ନି ଆଡ଼ିଏନ୍‌ ଜାକ୍‌ବ ନିଙ୍ଗେଙ୍ଗ୍‌ ୱେଚ୍‌ଚାନ୍‌, ଆନ୍‌ ଲାବନ ଲାଗାୟ୍‌ ବାହା କିଜ଼ି ମାଚାଙ୍ଗ୍‌, ନେଞ୍ଜେଙ୍ଗ୍‌ ପାତେକ୍‌ ନାଦାଂ ମାଲା ଆତାତ୍‌ । 5 ନା କଡିଂ, ଗଦ, ମେଣ୍ଡାମାନ୍ଦା ଆରି ଆଡ଼ିଏନ୍‌ ଆଡ଼ିୟାଣି ମାନିକ୍‌, ଆରେ, ଆନ୍‌ ନା ମାପ୍ରୁଙ୍ଗ୍‌ କାଣ୍‌କୁତ ଉପ୍‌କାର୍‌ ପାୟାନି କାଜିଂ ନି ଲାଗାୟ୍‌ କାବୁର୍‌ ପକ୍ତାତାଂ ।"

6 ଇଦାଂପାଚେ ଦୁତ୍‌କୁ ମାସ୍‌ଦି ୱାଜ଼ି ଜାକୁବତିଂ ଇଚାନ୍‌, "ଆପେଙ୍ଗ୍ ନି ଟଣ୍ଡେନ୍‌ ଏସାଉ ଲାଗାୟ୍‌ ହାଲ୍‌ଜି ମାଚାପ୍‌, ହେୱାନ୍‌ ଚାର୍‌ସ ଲକୁ ହୁକେ ଅଜ଼ି ନି ଲାହାଂ ଚଜ୍ୟାଦେଂ ୱାନାରା ।" 7 ହେବେ ଜାକୁବ ବେସି ପାଣ୍ଡ୍ରାତାନ୍‌ ଆରି ତ୍ରିଗ୍‌ତାନ୍‌, ଆରେ, ହାଂଦି ଲକାରିଙ୍ଗ୍‌ ଆରି କଡିଂମେଣ୍ଡାଙ୍ଗ୍‌ ୱିଜ଼ୁ ମାନ୍ଦା ଆରି ଉଟ୍‌କାଂ ବିନ୍ ବିନ୍‌ ରି କୁଦା କିଜ଼ି ଇଚାନ୍‌, 8 "ଏସାଉ ୱାଜ଼ି ଜଦି ର କୁଦାତିଂ ଟ୍ରାକ୍‌ନାନ୍‌, ଆତିସ୍‌ପା ବିନ୍‌ କୁଦା ଜିଜ଼ି ହନ୍‌ଞ୍ଚି ହାନାର୍‌ ।" 9 ହେଏଚେକାଡ଼୍‌ଦ ଜାକୁବ ଇଚାନ୍‌, "ଏ ନା ଆବା ଅବ୍ରାହାମ୍‌ତି ପର୍‌ମେସ୍ୱର୍‌, ଏ ନା ଆବା ଇସ୍‌ହାକ୍‌ତି ପର୍‌ମେସ୍ୱର୍‌, ଏ ନିତ୍ରେମାପ୍ରୁ, ଏନ୍‌ ନାଂ ଇଞ୍ଜିମାଞ୍ଚାୟ୍‌, ମାଜ଼ି ନା ଦେସ୍‌ ଆରି ଜାର୍‌ଲକୁତି ଲାଗାୟ୍‌ ମାସ୍‌ଦି ହାଲା, ହେବେ ଆପ୍‌ ମିଦାଂ ମଙ୍ଗଲ୍‌ କିନାପ୍‌ । 10 ଏନ୍‌ ଇ ଆଡ଼ିଏନ୍‌ କାଜିଂ ଇମ୍‌ଣି ୱିଜ଼ୁ ଦୟା ଆରି ଇମ୍‌ଣି ସବୁ ପାର୍ତି ହପ୍‌ତାୟ୍‌ନା, ଆନ୍‌ ହେବେନି ଅଲପ୍‌ ପା ଗାଟାଆନାକା ଜଗ୍ ଆକାୟ୍‌; ଇନେକିଦେଂକି ଆନ୍‌ ଜାର୍‌ ବେଡ୍‌ଗା ମତର୍‌ ଅଜ଼ି ଇ ଜର୍ଦନ୍‌ ନାସି ମାଚାଙ୍ଗ୍‌, ମତର୍‌ ନଂ ଆନ୍‌ ରି କୁଦା ଆତାଂନା । 11 ଗୱାରି କିଦ୍‌ନାଙ୍ଗା, ନା ଟଣ୍ଡେନ୍‌ କେଇଦାଂ, ଏସାଉ କେଇଦାଂ ନାଂ ରାକ୍ୟା କିଦା; ଇନେକିଦେଂକି ଆନ୍‌ ତାଙ୍ଗେଙ୍ଗ୍‌ ପାଣ୍ଡ୍ରାନାଙ୍ଗା, ଇନେସ୍‌ଆତିସ୍‌ ହେୱାନ୍ ୱାଜ଼ି ନାଙ୍ଗେଙ୍ଗ୍‌ ଆରି ଆୟା ଆରି ହିମ୍‌ଣାକାଂ ଅହ୍‌ନାନ୍‌ । 12 ଏନ୍ ତ ଇଞ୍ଚାୟ୍‌ନା, ଆପ୍ ଇନେସ୍‌ପା ମି ମଙ୍ଗଲ୍‌ କିନାସ୍‌, ଆରେ, ହାମ୍‍ଦୁର୍‌ ଗୁଟିତ ଇମ୍‌ଣି ବାଲି ବେସି କାଜିଂ ଗାଣାକିଦେଂ ଆଡ୍‍ୱାକା, ହେଦାଂ ଲାକେ ନି ବଁସ୍‌ ବାଡାୟ୍‌ କିନାୟ୍‌ ।"

13 ଆରେ ଜାକ୍‌ବ ହେ ବାହାତ ହେ ନାଣା ହୁଞ୍ଚାନ୍‌; ଆରେ ତା ଲାଗାୟ୍‌ ଇନାକା ମାଚାତ୍‌, ହେବେ ତା ଟଣ୍ଡେନ୍‌ ଏସାଉ କାଜିଂ ବେଟାଜ଼ି ଜାଲ୍‌ଦି କିତାନ୍‌; 14 ଇଚିସ୍‌, ଦୁଇସ ତେୟାଅଡାଂ ଆରି କଡ଼େ ବକା ଅଡାଂ, ଦୁଇସ ତେୟାମେଣ୍ଡାଙ୍ଗ୍‌ ଆରି କଡ଼େ ବକା ମେଣ୍ଡାଂ, 15 ଆରେ, ଅହ୍‌ରିଂ ପାଲ୍‌ହନିକିଂ ତିରିସ୍‌ ଉଟ୍‌ ଆରି ଚାଲିସ୍‌ କଡିଂ ଆରି ଦସ୍‌ ସଣ୍ଡ୍‌, ଆରେ, କଡ଼େ ତେୟାଗଦଂ ଆରି ଦସ୍‌ ଗଟା ଆଣ୍ଡ୍ରାଂ ଗଦଂ ଜାଲ୍‍ଦି କିତାନ୍ । 16 ଇଦାଂପାଚେ ମାନ୍ଦା ସବୁ ବିନେ ବିନେ କିଜ଼ି ଜାର୍‌ ଆଡ଼ିୟାର୍‌ କେଇଦ ର ମାନ୍ଦା ହେଲାୟ୍‌ କିଜ଼ି ହେୱାରିଙ୍ଗ୍‌ ବଲ୍‌ ହିତାନ୍‌, "ଏପେଙ୍ଗ୍‌ ନା ଆଗେ ଆଗେ ହାଲାଟ୍‌, ଆରେ, ବିତ୍ରେ ବିତ୍ରେ ବାହା ଇଡ଼୍‌ଜି ଜାଣ୍‌କେ ମାନ୍ଦାତିଂ ବିନେ କିୟାଟ୍‌ ।" 17 ଆରେ, ହେୱାନ୍‌ ୱିଜ଼ୁକିନି ଆଡ଼େଏନିଂ ଇ ବଲ୍‌ ହିତାନ୍‌, "ନା ଟଣ୍ଡେନ୍‌ ଏସାଉ ଲାହାଂ ବେଟ୍‌ ଆତାନ୍‌, ହେୱାନ୍‌ ଜଦି ୱେନ୍‌ବାନାନ୍‌, ଏପ୍‌ ଇନେନ୍ତି ଆଡ଼ିଏନ୍‌ ? ଇମେତାକେ ହାନାୟା ? ଆରେ, ନି ମୁମ୍‌ଦାକା ଇ ୱିଜ଼ୁ ଇନେର୍ତି ? 18 ତେବେ ଏନ୍‌ ଉତର୍‌ ହିନାୟ୍‌, ଇ ୱିଜ଼ୁ ନି ଆଡ଼ିଏନ୍‌ ଜାକୁବତି, ଇସବୁ ବେଟାଜ଼ି ମା ମାପ୍ରୁ ଏସାଉତି କାଜିଂ ପକ୍ୟାତାକା; ହୁଡ଼ା, ହେୱାନ୍‌ ପା ପାଚେ ପାଚେ ୱାନାନା ।" 19 ଇ ବାନି ହେୱାନ୍‌ ଦୁଇ ଆରି ତିନି ମାନ୍ଦାନି ପାଚେହାନିକିଂ ସବୁ ଆଡ଼୍‌ୟାରିଙ୍ଗ୍‌ ବଲ୍‌ ହିଜ଼ି ଇଚାନ୍‌, "ଏସାଉ ଲାହାଂ ମେହା ଆତାନ୍, ଏପେଙ୍ଗ୍‌ ଇ ବାନି କାତା ଇନାୟ୍‌ ।" 20 ଆରେ ଇନାୟ୍‌, "ହୁଡ଼ାଟ୍‌, ନି ଆଡ଼ିଏନ୍‌ ଜାକୁବ ମା ପାଚେ ୱାନାନା; ଇନେକିଦେଂକି ହେୱାନ୍‌ ବାବି କିତାନ୍‌, ଆଗେ ବେଟାଜ଼ି ପକ୍‌ଚି ତାଂ ସୁସ୍ତା କିଜ଼ି ପାଚେ ତା ଲାହାଂ ବେଟା ଆନାସ୍‌, ପାଚେ ହେୱାନ୍‌ ମା କାଜିଂ କେମା କିଦେଂ ଆଡ୍‌ନାନ୍‌ ।" 21 ଇ ଲାକେ ତା ମୁମ୍‌ଦ ବେଟାଜ଼ି ଜିନିସ୍‌ ହାଚାତ୍‌; ମତର୍ ହେୱାନ୍‌ ନିଜେ ହେ ନାଣା ଜାର୍‌ କୁଦା ବିତ୍ରେ ମାଚାନ୍‌ ।

ଇସ୍ୱର୍‌ତି ହୁକେ ଜାକ୍‌ବତି ଜୁଜ୍‌

22 ଇଦାଂପାଚେ ହେୱାନ୍‌ ନାଣା ନିଙ୍ଗ୍‌ଜି ତା ରି ଡକ୍ରୁହିକ୍‌ ଆରି ରି ଆଡ଼ିୟାଣିକ୍‌ ଆରି ଏଗାର୍‌ ଜାଣ୍‌ ହିମ୍‌ଣାକାଂ ଜବ୍‌ବକ ଗାଟ୍‌ତ ନାତେଂ କାଜିଂ ହାଙ୍ଗ୍‌ଦ ଅତାନ୍‌ । 23 ଆରେ, ହେୱାରିଙ୍ଗ୍‌ ନାଗୁଡ଼୍‌ ନାପି କିଜ଼ି ଜାର୍‌ ୱିଜ଼ୁ ଜିନିସ୍‌ ହେପାଡ଼୍‌କା ପକ୍‌ତାନ୍ । 24 ହେଏଚେକାଡ଼୍‌ଦ ଜାକୁବ ହେବେ ରୱାନ୍‌ ମାଚାନ୍‌; ହେବେ ରୱାନ୍‌ ମାନାୟ୍‌ ନାଡ଼ିସ୍‌ ପାତେକ୍‌ ତା ଲାହାଂ ଜୁଜ୍‌ କିତାନ୍‌ । 25 ମତର୍‌ ତାଙ୍ଗେଙ୍ଗ୍‌ ଜିଣାଦେଂ ଆଡ୍‌ୱାତାନ୍‌ ହୁଡ଼୍‌ଜି ହେୱାନ୍‌ ଜାକୁବତି କୁଟା ହାନ୍ଦି ବାହାତ ମାଡ୍‌ କିତାନ୍‌; ତା ଲାହାଂ ଇବାନି ଜୁଜ୍‌ କିତିଲେ ଜାକ୍‌ବତି କୁଟା ହାନ୍ଦି ପିଟାତାତ୍‌ । 26 ଇଦାଂପାଚେ ହେ ମାନାୟ୍‌ ଇଚାନ୍‌, "ମାଂ ପିସ୍ତାଟ୍‌," ଇନେକିଦେଂକି ନାଡ଼ିସ୍‌ ଆତାତ୍‌ । ହେବେ ଜାକ୍‌ବ ଇଚାନ୍‌, "ଏନ୍‌ ନାଙ୍ଗେଙ୍ଗ୍‌ ଆର୍ସିବାଦ୍‌ କିଦ୍‌ୱିତିସ୍‌, ଆନ୍‌ ନିଂ ପିସ୍ତୁଙ୍ଗ୍‌ ।" 27 ଆରେରଗ ହେ ମାନାୟ୍‌ ଇଚାନ୍‌, "ନି ତର୍‌ ଇନାକା ?" ହେୱାନ୍‌ ଇଚାନ୍‌ "ଜାକୁବ ।" 28 ହେୱାନ୍‌ ଇଚାନ୍‌, "ଏନ୍‌ ଜାକୁବ ତର୍‌ଦ ଆରେ ଡାକ୍‌ପୁଟା ଆଉୟ୍‌, ମତର୍‌ ଇସ୍ରାଏଲ୍‌ ତର୍‌ଦ ଡାକ୍‌ପୁଟା ଆନାୟ୍‌, ଇନେକିଦେଂକି, ଏନ୍‌ ଇସ୍ୱର୍‌ ଆରି ମାନାୟ୍‌ ଲାହାଂ ଜୁଜ୍‌ କିଜ଼ି ଜିଣା ଆତାୟ୍‌ନା ।"

29 ହେଏଚେକାଡ଼୍‌ଦ ଜାକୁବ ୱେନ୍‌ବିସ୍‌ ଇଚାନ୍‌, "ଆନ୍‌ ଗୱାରି କିଦ୍‌ନାଙ୍ଗା, ନି ତର୍‌ ୱେଚ୍‌ଚା ।" ହେୱାନ୍‌ ଇଚାନ୍‌, "ଏନ୍‌ ଇନେକିଦେଂ ମା ତର୍‌ ୱେନ୍‌ବାଦ୍ନାୟା ?" ପାଚେ ହେୱାନ୍‌ ହେବେ ଜାକ୍‌ବତିଂ ଆର୍ସିବାଦ୍‌ କିତାନ୍‌ ।

30 ହେବେଣ୍ଡାଂ ହେ ବାହାନି ତର୍‌ ପନୁୟେଲ*32:30 ଇସ୍ୱରତି ମୁମ୍‌ ଇଡ଼୍‌ତାନ୍‌; ଇନେକିଦେଂକି ଜାକୁବ ଇଚାନ୍‌, "ଆନ୍‌ ଇସ୍ୱର୍‌ତିଂ ମୁମ୍‌ଦ ମୁମ୍‌ଦ ଆଜ଼ି ହୁଡ଼୍‌ତିସ୍‌ ନେ ନା ପାରାଣ୍‌ ଜିତାତ୍‌ ।" 31 ଇଦାଂପାଚେ ଜାକୁବ ପନୁୟେଲ ନାତିଲେ, ୱେଡ଼ା ହତାତ୍‌; ମତର୍‌ ହେୱାନ୍‌ କୁଟା ହାନ୍ଦ୍‌ଣି କାଜିଂ ଚଟାଜ଼ି ତାଂତାନ୍‌ । 32 ଇନେକିଦେଂକି ଇସ୍ରାଏଲ୍‌ ହିମ୍‌ଣାଙ୍ଗ୍‌ ନେଞ୍ଜେଙ୍ଗ୍‌ ପାତେକ୍‌ ଇମ୍‌ଣାକାପା ଉରୁ ଦେସ୍‌ନି ଜପ୍‌ଣି ପ୍ଡେନ୍‌ମୁଟି ତିନୁର୍‌, ଇନେକିଦେଂକି ହେୱାନ୍‌ ଜାକୁବତି କୁଟାନି ହାନ୍ଦିଚିରା ଡୁଜ଼ି ମାଚାତ୍‌ ।