ଆଦି 44

ଜାଙ୍ଗ୍‌ତି ଉଣିବାହା

1 ଇଦାଂପାଚେ ଜସେପ୍ ତା ଇଲ୍‌କାର୍ଣ୍ଣିଆଙ୍ଗ୍‌ ବଲ୍‌ ହିତାନ୍‌, "ଇ ଲକୁ ମଟ୍‌ତ ଏଚେକ୍‌ ତାସ୍‌ ଆହ୍‌ନାତ୍, ହେଏଚେକ୍‌ ବାର୍ତି କିଜ଼ି ହିଆଟ୍‌, ଆରେ, ଜାଣ୍‌କେ ମଲ୍‌ ମୁନ୍‌ଦ ଇଟାଟ୍‌ । 2 ଆରେ ହାରୁକାନ୍‌ ମଟ୍‌ତ ତାଦି ତାସ୍‌ କଡ଼୍‌ନି ଟାକାଂ ଲାହାଂ ମା ତାଡ଼ିୟା, ହେ ରୁପା ତାଡ଼ିୟା ଇଟାଟ୍‌ ।" ହେବେ ହେୱାନ୍‌ ଜସେପ୍‌ତି କାତାଇସାବ୍ରେ କିତାନ୍‌ । 3 ଆରେ ନାଡ଼ିସ୍‌ ଆନି ଦାପ୍ରେ, ହେୱାର୍‌ ଗଦ ଲାହାଂ ହେଲ ଅତାର୍‌ । 4 ଆରେ, ଗାଡ଼୍‌ଦାଂ ହସି ବେସି ଦେହା ହାଲ୍‌ୱିହିଂ, ଜସେପ୍ ତା ଇଲ୍‌କାର୍ଣ୍ଣିଆଙ୍ଗ୍‌ ଇଚାନ୍‌, "ଏନ୍‌ ନିଂଜି ହେ ମାନାୟାର୍‌ ପାଚେ ପାଚେ ହନ୍‌ଚି ହାଲ୍‌ଜି ହେୱାରିଙ୍ଗ୍‌ ଆସ୍ତି ଇନାଟ୍‌, ଏପେଙ୍ଗ୍ ଉପ୍‌କାର୍ ବାଦୁଲ୍‌ ଇନେକିଦେଂ ଆହାର୍‌ କିତାଦେର୍‌ ? 5 ମା ମାପ୍ରୁ ଇମେତାକେ ଉଣାନ୍‌ ଆରି ଇନାକା ହୁକେ ବେଣ୍‌ବାକ୍‌ଣାୟ୍‌ କିନାନ୍‌, ହେ ଗିନା କି ଇଦାଂ ଆକାୟ୍‌ ? ଏଲେଙ୍ଗ୍‌ କାମାୟ୍‌ ହୁଦାଂ ଏପେଙ୍ଗ୍‌ ଦସ୍‌ କିତାଦେର୍ଣ୍ଣା ।"

6 ଜସେପ୍‌ତି ଆଡ଼ିୟାର୍‌ କାତା ଆସ୍ତି ଗଡ଼ାଜପି ଦୁମ୍‌ଜି ହେୱାରିଂ ଏକାତାର୍‌, ଇଦାଂପାଚେ ହେୱାନ୍‌ ହେୱାରିଙ୍ଗ୍‌ ହାଙ୍ଗ୍‌ ଆସ୍ତି ଇ ସବୁ କାତା ଇଚାନ୍‌ । 7 ତାପାଚେ ହେୱାର୍‌ ଇଚାର୍‌, "ମା ମାପ୍ରୁ ଇନେକିଦେଂ ଏଲେଙ୍ଗ୍‌ କାତା ଇନାନ୍‌ ?" ମି ଆଡ଼ିୟା ଇବାନି କାମାୟ୍‌ କିନାକା ଦେହା ମାନେତ୍‌ । 8 ହୁଡ଼ାଟ୍‌, ଜାର୍‌ ଜାର୍‌ ମଟ୍‌ ମୁମ୍‌ଦାଂ ଆରେ ରଗ୍‌ ଇମ୍‌ଣି ଟାକାଂ ଗାଟାଜ଼ି ମାଚାପ୍‌; ହେଦାଂ ଆପେଙ୍ଗ୍‌ କିଣାନ୍‌ ଦେସ୍‌ତାଂ ଆରେରଗ ନି ଲାଗାଂ ତାହିୱାତାପ୍‌; ତେବେ ଇନେସ୍‌ ଏନେଙ୍ଗ୍‌ ମାପ୍ରୁ ଇଞ୍ଜାଙ୍ଗ୍‌ ରୁପା କି ହନା ଚରି କିନାପ୍‌ ? 9 ମି ଆଡ଼ିୟାର୍‌ ପା ଇନେର୍‌ ତାକେ ହେଦାଂ ଗାଟାଦ୍‌ନାତ୍‌, ହେୱାନ୍‌ ହାଏନ୍‌, ଆରେ, ଆପେଙ୍ଗ୍‌ ପା ମାପ୍ରୁ ଆଡ଼ିୟା ଆନାପ୍‌ ।

10 ପାଚେ ହେୱାନ୍‌ ଇଚାନ୍‌, "ହାର୍‌, ମି କାତା ଇସାବ୍ରେ ଆୟେତ୍‌; ଇନେର୍‌ ଲାଗାଂତାଂ ହେଦାଂ ଗାଟାନାତ୍‌, ହେୱାନ୍‌ ମା ଆଡ଼ିଏନ୍‌ ଆନାନ୍‌, ମତର୍‌ ବିନ୍‌ନିକାର୍‌ ଦସ୍‌ଆନାର୍‌ ।" 11 ପାଚେ ହେୱାର୍‌ ହେଦାପ୍ରେ ମେଦ୍ନିତ ଜାର୍‌ ଜାର୍‌ ମଟ୍‌ ଜୁତ୍‌ତି ଜାଣ୍‌କେ ଜାର୍‌ ଜାର୍‌ ମଟ୍‌କୁ ରିକ୍ତେଙ୍ଗ୍‌ ଲାଗାତାର୍ । 12 ହେ ଇଲ୍‌କାର୍ଣ୍ଣିୟା ପାଣ୍‌ୱାତାଂ ହାଂଜି ହାରୁକାନ୍‌ ପାତେକ୍‌ ଡେକ୍‌ଚି ହାଚାନ୍‌; ଆରେ ବିନ୍ୟାମିନ୍‌ନି ମଟ୍‌ତାଂ ହେ ଗିନା ଗାଟାତାନ୍‌ । 13 ହେପାଦ୍‌ନା ହେୱାର୍‌ ଜାର୍‌ ଜାର୍‌ ଆଙ୍ଗି କେଚ୍‌ଚାର୍‌, ଆରେ ଜାଣ୍‌କେ ଗଦତ ଲାଦିକିଜ଼ି ଗାଡ଼୍‌ଦ ମାସ୍‌ଦି ହାଚାର୍‌ ।

14 ଆରେ ଜିହୁଦା ଆରି ତା ଟଣ୍ଡାର୍‌ ଜସେପତି ଇଞ୍ଜ ହଟାର୍‌; ଜସେପ୍ ହେ ପାତେକ୍‌ ହେବେ ମାଚାନ୍‌; ଲାଗ୍‌ ହେୱାର୍‌ ତା ମୁମ୍‌ଦ ମେଦ୍ନିତ ଗୁର୍‌ତାର୍‌ । 15 ତେବେ ଜସେପ୍ ହେୱାରିଙ୍ଗ୍‌ ଇଚାନ୍‌, "ଏପେଙ୍ଗ୍‌ ଇଦାଂ ଇନେସ୍‌ କାମାୟ୍‌ କିତାଦେର୍‌ ? ମା ଲାକେ ମାନାୟ୍‌ ଜେ ଆତିସ୍ପା ବେଣ୍‌ବାକ୍‌ଣାୟ୍‌ କିନାକା ହୁଡ଼୍‌ଦେଂ ଆଡ୍‌ନାନ୍‌, ଇଦାଂ ଇନାକା ଏପେଙ୍ଗ୍‌ ପୁନ୍‌ୱାତାଦେର୍ଣ୍ଣା ?"

16 ପାଚେ ଜିହୁଦା ଇଚାନ୍‌, "ଆପେଙ୍ଗ୍ ହାଉକାର୍‌ ଲାଗେ ଆରେ ଇନାକା ଉତର୍‌ ହିନାପ୍‌ ? ଆରେ ଇନାକା କାତା ଇନାପ୍‌ ? କିବା ଇନେସ୍‌ ଜାର୍ତିଂ ଦସ୍‌ହିଲିୱାକା କିନାପ୍‌ ? ଇସ୍ୱର୍‌ ନି ଆଡ଼୍‌ୟାରିଂ ଦସ୍‌ନିକା ହପ୍‌ତାନ୍‌ନା; ହୁଡ଼ା, ଆପେଙ୍ଗ୍‌ ଆରି ଇନେର୍‌ ତାକେ ଗିନା ଗାଟାତାତ୍‌ନା ହେୱାନ୍‌, ଆରେ ଆପେଙ୍ଗ୍‌ ୱିଜ଼ାପ୍‌ ନି ମାପ୍ରୁତି ଆଡ଼ିୟା ଆନାପ୍‌ ।"

17 ପାଚେ ଜସେପ୍‌ ଇଚାନ୍‌, "ଏଲେଙ୍ଗ୍‌ କାମାୟ୍‌ ମାତାଂ ଦେହା ଆୟେତ୍‌; ଇନେର୍‌ତାଂ ଗିନା ଗାଟାତାତ୍‌ନ୍ନା, ହେୱାନ୍‌ ମା ଆଡ଼ିୟା ଆନାନ୍; ମତର୍‌ ଏପେଙ୍ଗ୍‌ ବିୱାହିଂ ଲାତ୍ରାଦି ଲାଗାୟ୍‌ ତାଂଜି ହାଲାଟ୍‌ ।"

ଜିହୁଦାତି ବିନ୍ୟାମିନ୍‌ କାଜିଂ ଗୱାରି

18 ପାଚେ ଜିହୁଦା ଲାଗେ ହାଲ୍‌ଜି ଇଚାନ୍, "ମାପ୍ରୁ, ନିଦାଂ ଇ ଆଡ଼ିଏନିଂ ହାଉକାର୍‌ତି ଲାଗେ ୱେଞ୍ଜେଙ୍ଗ୍‌ ପାଦେକ୍‌ ଗୱାରି କିଦେଂ ଇଞ୍ଜେଙ୍ଗ୍‌ ହିଦା ଆରି ନି ଆଡ଼ିଏନ୍‌ କାଜିଂ ନି ରିସା ଆମେତ୍‌; ଇନେକିଦେଂକି ଏନ୍‌ ପାରତି ଲାକେ ଆନାୟ୍‌ ।" 19 ମାପ୍ରୁ ତା ଆଡ଼୍‌ୟାରିଂ ୱେନ୍‌ବିସ୍‌ ମାଚାନ୍‌, "ମି ଲାତ୍ରାଦି କିବା ଟଣ୍ଡେନ୍‌ ମାନାନ୍‌ କି ?" 20 ହେବେ ଆପ୍‌ ମାପ୍ରୁଙ୍ଗ୍‌ ଉତର୍‌ ହିଜ଼ି ମାଚାପ୍‌, ମାଞ୍ଜ୍‌ବା ମାନାନ୍‌, ହେୱାନ୍‌ ବୁଡ଼୍‌ହି ଲଗୁ; ଆରେ, ତା ବୁଡ଼୍‌ହି ୱେଡ଼ାଲିଂ ରୱାନ୍‌ ମାଜ଼ି ମାନାନ୍‌, ହେୱାନ୍‌ ରୱାନ୍‌ ହାରୁକାନ୍‌; ମତର୍ ତା ଟଣ୍ଡାହି ହାତାନ୍ନା, ହେୱାନ୍‌ କେବଲ୍‌ ତା ତେହିନି ହାରିହାରା ମାଜ଼ି; ଲାଗିଂ ତା ଲାତ୍ରାହି ତାଂ ଜିଉନନାନ୍‌ । 21 ଇବେଣ୍ଡାଙ୍ଗ୍‌ ଏନ୍‌ ଇ ଆଡ଼୍‌ୟାରିଙ୍ଗ୍‌ ଇଞ୍ଜିମାଚାୟ୍‌, "ଏପେଙ୍ଗ୍ ତାଂ ମା ଲାଗାଂ ତାହିୱାଡ, ଆପ୍‌ ତାଂ ଜାର୍‍କାଣ୍‌କୁତାଂ ହୁଡ଼୍‌ନାପ୍‌ ।" 22 ତେବେ ଆପେଙ୍ଗ୍‌ ମାପ୍ରୁ ଇଞ୍ଜିମାଚାପ୍‌, "ହେ କାଡ଼୍‌ଦେ ଲାତ୍ରାହିଂ ପିସ୍ତେଙ୍ଗ୍‌ ଆଡୁନ୍‌; ହେୱାନ୍‌ ତା ଲାତ୍ରାହିଂ ପିସ୍ତି ୱାତିସ୍‌, ଲାତ୍ରାହି ହାନାନ୍‌ ।" 23 ପାଚେ ଏନ୍‌ ଇ ଆଡ଼୍‌ୟାରିଙ୍ଗ୍‌ ଇଚାୟ୍‌, "ମି ଲାହାଂ ଟଣ୍ଡେନ୍‌ ୱାୱିତିସ୍‌, ଏପେଙ୍ଗ୍‌ ଆରେ ନା ମୁମ୍‌ ହୁଡ଼୍‌ଦେଂ ଆଡୁଦେର୍‌ ।"

24 ଇଦାଂପାଚେ ଆପେଙ୍ଗ୍‌ ନି ଆଡ଼୍‌ୟାର୍‌ ଜେ ନା ଆବା, ତା ଲାଗାୟ୍‌ ଇକିସ୍‌ ତା ମାପ୍ରୁ ଇ କାତା ଇଚାପ୍‌ । 25 ଇଦାଂପାଚେ ମାଞ୍ଜ୍‌ବା ଇଚାନ୍‌, "ଏପେଙ୍ଗ୍‌ ଆରେରଗ ହାଲ୍‌ଜି ମା କାଜିଂ ଅଲପ୍‌ କାଦି କଡ଼୍‌ଜି ତାହିୱାଡ ।" 26 ପାଚେ ଆପେଙ୍ଗ୍‌ ଇଚାପ୍‌, "ହାଞ୍ଜେଙ୍ଗ୍‌ ଆଡୁପ୍‌; ଜଦି ହାରୁ ଟଣ୍ଡେନ୍‌ ମା ଲାହାଂ ହିଲ୍‌ୱିତିସ୍‌, ଆପେଙ୍ଗ୍‌ ହେ ମାନାୟ୍‌ତି ମୁମ୍‌ ହୁଡ଼୍‌ଦେଂ ଆଡୁପ୍‌ ।" 27 ହେବେ ନି ଆଡ଼ିଏନ୍‌ ଇନେର୍‌ ନା ଆବା, ହେୱାନ୍‌ ମାଂ ଇଞ୍ଚାନ୍‌, "ଏପେଙ୍ଗ୍‌ ପୁନାଦେର୍‌, ମା ଡକ୍ରିତାଂ ରାହେଲ୍‌ତାକେ ମତର୍‌ ରିୟାର୍‌ ହିମ୍‌ଣାଙ୍ଗ୍‌ ଆଜ଼ିମାଚାର୍‌ ।" 28 ହେୱାର୍‌ ବିତ୍ରେତାଂ ରୱାନ୍‌ ମା ତାକେଣ୍ଡାଂ ହାଚାନ୍‌, ହେବେ ଆପ୍‌ ଇଚାପ୍‌, ହେୱାନ୍‌ ହାତ୍‌ପା ଗାଣ୍ଡ୍ରା ଗାଣ୍ଡ୍ରା ଆଜ଼ି କାବ୍ରାଚିତ୍ରା ଆତାନ୍ନା; ଆରେ, ହେ ନାଞ୍ଜିଙ୍ଗ୍‌ତାଂ ଆପ୍‌ ଆରେ ହୁଡ଼୍‌ୱାତାପ୍‌ନା । 29 ନଙ୍ଗୟ୍‌ ମା ଲାଗେତାଂ ଇୱାନିଙ୍ଗ୍‌ ଅତିସ୍ ଜଦି ଇୱାନିଙ୍ଗ୍‌ ଇମ୍‌ଣାକାପା ବିପଦ୍‌ ଗିଟାତିସ୍‌, ତେବେ ଏପେଙ୍ଗ୍‌ ନାଂ ଦୁକ୍‌ତ ଇ ହେନ୍ତି ତେମୁଲ୍‌ତ ହାକି ମୁମ୍‌ଦ ତୁହିଦ୍ନାଦେର୍‌ ।

30 ଇନେକିଦେଂକି ନି ଆଡ଼ିଏନ୍‌ ଜେ ମାଞ୍ଜ୍‌ବା, ତା ଲାଗାୟ୍‌ ଆନ୍‌ ହାଚିସ୍‌, ମା ଲାହାଂ ଜଦି ଇ କାଡ଼୍‌ଦେ ହିଲ୍‌ୱିତିସ୍‌, ତେବେ ଇ କାଡ଼୍‌ଦେ ହିଲ୍‌ୱାକା ହୁଡ଼୍‌ଜି ହେୱାନ୍‌ ଦାପ୍ରେ ହାନାନ୍‌ । 31 ଇନେକିଦେଂକି ତା ପାରାଣ୍‌ ଇ କାଡ଼୍‌ଦେ ତାକେ ଗାଚ୍ୟା ଆତାତ୍ନା । ପାଚେ ନି ଇ ଆଡ଼ିୟାର୍‌ ଦୁକ୍ତ ହେନ୍ତିତେମୁଲ୍‌ତ ନି ଆଡ଼ିଏନ୍‌ ମାଞ୍ଜ୍‌ବାଙ୍ଗ୍‌ ଦୁଗେର୍‌ତ ପକ୍‌ନାୟ୍‌ । 32 ଆରେ, ନି ଆଡ଼ିଏନ୍‌ ଆନ୍‌, ମାଞ୍ଜ୍‌ବା ଲାଗାୟ୍‌ ଇ କାଡ଼୍‌ଦେଂ ଲାଗ୍‌ଣି ଆଜ଼ି ଇଚାଙ୍ଗ୍‌ନା, ଆନ୍‌ ଜଦି ତାଂ ନି ଲାଗାଂ ତାୱିତିସ୍‌, ତେବେ ଆନ୍‌ ହାନିପାତେକ୍‌ ଆବା ଲାଗାୟ୍‌ ଦସି ଆନାଙ୍ଗ୍‌ । 33 ଲାଗିଂ ଗୱାରି କିଦ୍‌ନାଙ୍ଗା, ମାପ୍ରୁ ଲାଗାୟ୍‌ ଇ କାଡ଼୍‌ଦେନି ବାଦୁଲ୍‌ ନି ଆଡ଼ିଏନ୍‌ ଆଜ଼ି ମାନାଙ୍ଗ୍‌, ମତର୍ ଇ କାଡ଼୍‌ଦେଂ ଟଣ୍ଡାର୍‌ ଲାହାଂ ପକା । 34 ଇନେକିଦେଂକି ଇ କାଡ଼୍‌ଦେ ନା ଲାହାଂ ହିଲ୍‌ୱିତିସ୍, ଆନ୍‌ ଇନେସ୍‌କିଜ଼ି ଆବା ତାକେ ହାଞ୍ଜେଙ୍ଗ୍‌ ଆଡ୍‌ନାଙ୍ଗ୍‌ ? ଆରେ, ଆବାଂ ଇମ୍‌ଣି ସନି ଗିଟାନାତ୍‌, ହେଦାଂ ଇନେସ୍‌କିସି ହେଦାଂ ହୁଡ଼୍‌ଦେଂ ଆଡ୍‌ନାଙ୍ଗ୍‌ ?