ଇପ୍ରୟିମ୍ ଆରି ମନଃସିତିଂ ଜାକୁବତି ଆସିର୍ବାଦ୍
1 ହେ ସବୁ ଗଟ୍ଣା ପାଚେ ଇନେନ୍ ଜସେପ୍ତିଂ କାବୁର୍ ହିଜ଼ି ଇଚାନ୍; "ହୁଡ଼ା, ନି ଲାତ୍ରାଦି ନାଦାର୍ ମାନାନ୍," ପାଚେ ହେୱାନ୍ ତା ରିୟାର୍ ମାଜ଼ିର୍ ମନଃସି ଆରି ଇପ୍ରୟିମ୍ତିଂ ହାଙ୍ଗ୍ଦ ଅଜ଼ି ହାଚାନ୍ । 2 ହେଏଚେକାଡ଼୍ଦ ରୱାନ୍ ଜାକୁବଙ୍ଗ୍ ଇଚାନ୍, ହୁଡ଼ା, ନି ମାଜ଼ି ଜସେପ୍ ନି ଲାଗାୟ୍ ୱାନାନା; ହେବେ ଇସ୍ରାଏଲ୍ ଜାର୍ତିଂ ବାଡ଼୍କାସ୍ କିଜ଼ି ଟାଟିତ ନିଂଜି କୁଚ୍ଚାନ୍ । 3 ଇଦାଂପାଚେ ଜାକୁବ ଜସେପ୍ତିଂ ଇଚାନ୍, "କିଣାନ୍ ଦେସ୍ତ ଲୁସ୍ ତର୍ନି ବାହାତ ୱିଜ଼େତିଂ ସାକ୍ତିକାଟି ଇସ୍ୱର୍ ନାଂ ଚଜ୍ୟାଜ଼ି ଆର୍ସିବାଦ୍ କିଜ଼ି ଇଦାଂ ଇଞ୍ଜି ମାଞ୍ଚାନ୍, 4 ହୁଡ଼ା, ଆପ୍ ନିଙ୍ଗେଙ୍ଗ୍ ପିଲ୍ବାଡାୟ୍ ଆରି ବେସିବଁସ୍ କିନାସ୍ ଆରି ନିତାକେ ବାର୍ବିନ୍ ବେସିକୁଟୁମ୍ ଉବ୍ଜାୟ୍ କିନାସ୍, ଆରେ, ନି ୱାନିଦିନ୍ତିବଁସ୍ତିଂ ୱିଜ଼୍ୱିକାଡ଼୍ନି ଆଦିକାର୍ କାଜିଂ ଇ ଦେସ୍ ହିନାସ୍ ।"
5 ଇନେକିଦେଂକି ମିସର୍ ଦେସ୍ତ ନି ଲାଗାୟ୍ ନା ୱାନି ଆଗେ ନିଦାଂ ଇମ୍ଣି ରିୟାର୍ ହିମ୍ଣାଙ୍ଗ୍ ମିସର୍ ଦେସ୍ତ ଜଲମ୍ ଆଜ଼ିମାଚାର୍, ହେୱାର୍ ନାୱାର୍ ଆନାର୍; ରୁବେନ୍ ଆରି ସିମିୟନ୍ ଲାକେ ଇପ୍ରୟିମ୍ ଆରି ମନଃସି ନାୱାର୍ ଆନାର୍ । 6 ଆରେ, ଇୱାର୍ତି ପାଚେ ମି ଇମ୍ଣି ମାଜ଼ି ଜଲମ୍ ଆନାର୍ । ହେୱାର୍ ମିୱାର୍ ଆନାର୍ ଆରି ପାଣ୍ୱା ଟଣ୍ଡାର୍ତି ତର୍ଦ ଜାର୍ ଜାର୍ ଆଦିକାର୍ତ ଡାକ୍ପୁଟା ଆନାର୍ । 7 ପଦନ୍ ଅରାମତାଂ କିଣାନ୍ ଦେସ୍ତ ନାଦି ୱାନି ୱେଡ଼ାଲିଂ ଇପ୍ରାତାତ ଏକିନି କାଜିଂ ଅଲପ୍ ଦେହା ମାନୁ ମାନୁ ରାହେଲ୍ ହାଜ଼ି ବିତ୍ରେ ନା ଲାଗାୟ୍ ହାତାତ୍; ପାଚେ ଆନ୍ ହେବେ ଇପ୍ରାତାତ, ଇଚିସ୍, ବେତଲିହିମ୍ନି ହାଜ଼ି କଚଣ୍ତ ତାଂ କବର୍ ହିତାଂ ।
8 ଇଦାଂପାଚେ ଇସ୍ରାଏଲ୍ ଜସେପ୍ତି ହିମ୍ଣାକାଂ ହୁଡ଼୍ଜି ୱେନ୍ବାତାନ୍, "ଇୱାର୍ ଇନେର୍ ?" 9 ହେବେ ଜସେପ୍ ଲାତ୍ରାହିଂ ଇଚାନ୍, "ଇୱାର୍ ନା ମାଜ଼ିର୍, ଇସ୍ୱର୍ ଇୱାରିଙ୍ଗ୍ ଇ ଦେସ୍ତ ନାଂ ହିତ୍ତାନ୍ନା ।" ତେବେ ଜାକୁବ୍ ଇଚାନ୍, "ଗୱାରି କିଦ୍ନାଙ୍ଗା, ଇୱାରିଙ୍ଗ୍ ନା ଲାଗାୟ୍ ତାହିୱାଡ, ଆନ୍ ଇୱାରିଙ୍ଗ୍ ଆର୍ସିବାଦ୍ କିନାଙ୍ଗ୍ ।" 10 ହେ ସମୁତ ଇସ୍ରାଏଲ୍ ବୁଡ଼୍ହି କାଜିଂ କାଣ୍କୁ ହାର୍ କିଜ଼ି ହୁଡ଼୍ଦେଂ ଆଡ୍ୱାତାନ୍ । ଲାଗିଂ ଜସେପ୍ ତା ଲାଗେ ହେୱାରିଙ୍ଗ୍ ତାସି ହିତିଲେ, ହେୱାନ୍ ହେୱାରିଙ୍ଗ୍ ଡନ୍ଞ୍ଚାନ୍ ଆରି ପମ୍ତାନ୍ । 11 ଆରେ, ଇସ୍ରାଏଲ୍ ଜସେପ୍ତିଂ ଇଚାନ୍, "ଆନ୍ ବାବି କିଜ଼ି ମାଚାଙ୍ଗ୍, ମି ମୁମ୍ ଆରେ ହୁଡ଼୍ଦେଂ ଆଡୁଙ୍ଗ୍; ମତର୍ ହୁଡ଼ାଟ୍, ଇସ୍ୱର୍ ମିଦାଂ ବଁସ୍ ପା ନାଂ ଚଚ୍ଚାତାନ୍ ।" 12 ପାଚେ ଜସେପ୍ ଲାତ୍ରାହିତି ରି କୁଟାଙ୍ଗ୍ ବିତ୍ରେତାଂ ହେୱାରିଙ୍ଗ୍ ଅଜ଼ି ଆପେ ଡାଣ୍ଡାହାଡ଼୍ ମାଗ୍ଜି ଜୱାର୍ କିତାନ୍ ।
13 ଇଦାଂପାଚେ ଜସେପ୍ ହେୱାନ୍ ରିୟାରିଙ୍ଗ୍ ଅଜ଼ି ତା ତିନିକେଇଦ ଇପ୍ରୟିମ୍ତିଂ ଆସ୍ତି ଜାକୁବ୍ତି ଡେବ୍ରି କଚଣ୍ତ ଆରି ଡେବ୍ରି କେଇଦ ମନଃସିତିଂ ଆସ୍ତି ଇସ୍ରାଏଲ୍ ତି ତିନିକେଇ କଚଣ୍ତ ଏକିକିୟ୍ କିତାନ୍ । 14 ପାଚେ ଇସ୍ରାଏଲ୍ ଜାର୍ ତିନି କେଇ ଲାମାୟ୍କିଜ଼ି ହାରୁକାନ୍ ଇପ୍ରୟିମ୍ନି କାପ୍ଡ଼ା ଜପି ଇଡ଼୍ତାନ୍, ଆରେ, ମନଃସିନି କାପ୍ଡ଼ା ଜପି ଡେବ୍ରି କେଇ ଇଡ଼୍ତାନ୍, ହେୱାନ୍ ମନେବାବି କିଜ଼ି ଜାର୍ କେଇ ଇଲାକେ ଚାଲାୟ୍କିତାନ୍; ଇନେକିଦେଂକି ମନଃସି ପର୍ତୁମ୍ ଜଲମ୍ ଆଜ଼ି ମାଚାନ୍ । 15 ଇଦାଂପାଚେ ହେୱାନ୍ ଜସେପ୍ତିଂ ଆର୍ସିବାଦ୍ କିଜ଼ି ଇଚାନ୍, "ଇମ୍ଣି ଇସ୍ୱର୍ତି ମୁମ୍ଦ ନା ଆକ ଅବ୍ରାହାମ୍ ଆରି ଇସ୍ହାକ୍ ବୁଲାଚାଲା କିଜ଼ିମାଚାର୍, ଇମ୍ଣି ଇସ୍ୱର୍ ଜଲମ୍ ଦିନ୍ତାଂ ନେଞ୍ଜେଙ୍ଗ୍ ପାତେକ୍ ନାଙ୍ଗେଙ୍ଗ୍ ପହାପାଲି କିତ୍ତାନ୍ନା, 16 ଇମ୍ଣି ଦୁତ୍ ୱିଜ଼ୁ ଆପଦ୍ତାଂ ନାଂ ମୁକ୍ଡ଼ାୟ୍ କିତ୍ତାନ୍ନା, ଜିସୁ ଇ ହିମ୍ଣାକାଂ ଆର୍ସିବାଦ୍ କିୟା; ଇୱାର୍ ନା ତର୍ଦ ଆରି ନା ଆକ ଅବ୍ରାହାମ୍ ଆରି ଇସ୍ହାକ୍ତି ତର୍ଦ ଡାକ୍ପୁଟା ଆୟେର୍, ଆରେ, ଇୱାର୍ ଦେସ୍ ବିତ୍ରେ ବାଡାଜ଼ି ମାନାୟ୍ ଆୟେର୍ ।"
17 ହେଏଚେକାଡ଼୍ଦ ଇପ୍ରୟିମ୍ନି କାପ୍ଡ଼ାତ ଲାତ୍ରାହିତି ତିନାକେଇ ହୁଡ଼୍ଜି ଜସେପ୍ ମାନ୍ଦୁକ୍ ଆତାନ୍; ଇଦାଂକାଜିଂ ଇପ୍ରୟିମ୍ନି କାପ୍ଡ଼ାତାଂ ମନଃସିନି କାପ୍ଡ଼ାତ ହେଦାଂ ରଚ୍ଚେଙ୍ଗ୍ ଲାତ୍ରାହିତି କେଇ ନିକ୍ଚି ଇଚାନ୍, 18 "ଆବା, ଏଲେଂ ଆକାୟ୍, ଇୱାନ୍ ରୱାନ୍ ପାଣ୍ୱାଁ ମାଜ଼ି, ଇୱାନ୍ତି କାପ୍ଡ଼ାତ ତିନାକେଇ ହିୟା ।"
19 ମତର୍ ତା ଲାତ୍ରାହି ରାଜିଆୱାଦାଂ ଇଚାନ୍, "ଏ ମାଜ଼ି; ହେଦାଂ ଆନ୍ ପୁନାଙ୍ଗ୍, ଆନ୍ ପୁନାଙ୍ଗ୍, ହେୱାନ୍ ପା ର କୁଟୁମ୍ ଆନାନ୍ ଆରି ହେୱାନ୍ ପା ଗାଜାକାନ୍ ଆନାନ୍; ମତର୍ ତା ହାରୁକାନ୍ ଟଣ୍ଡେନ୍ ତାତାଂ ଆଦିକ୍ ଗାଜା ଆନାନ୍ ଆରି ହେୱାନ୍ତି ବଁସ୍ ବେସି କୁଟୁମ୍ ଆନାତ୍ ।"
20 ହେ ଦିନ୍ ହେୱାନ୍ ହେୱାରିଙ୍ଗ୍ ଆର୍ସିବାଦ୍ କିଜ଼ି ଇଚାନ୍, "ଇସ୍ରାଏଲ୍ ଲାତ୍ରା ଆର୍ସିବାଦ୍ କିନି ୱେଡ଼ାଲିଂ ମି ତର୍ ଆସ୍ତି ଇଞ୍ଜ୍ନାର୍, ଇସ୍ୱର୍ ମିଙ୍ଗେଙ୍ଗ୍ ଇପ୍ରୟିମ୍ ଆରି ମନଃସି ଲାକେ କିଦେନ୍ ।" ଇ ବାନି ଜାକ୍ବ ମନଃସିତାଂ ଇପ୍ରୟିମ୍ତିଂ ଆଗେ କିତାନ୍ ।
21 ଆରେ ଇସ୍ରାଏଲ୍ ଜସେପ୍ତିଂ ଇଚାନ୍, "ହୁଡ଼ା, ଆନ୍ ହାନାଙ୍ଗା; ମତର୍ ଇସ୍ୱର୍ ମି ହାଙ୍ଗ୍ଦ ମାନାନ୍ ଆରି ମିଂ ଆରେରଗ ଆକର୍ ଦେସ୍ତ ଅସିହାଞ୍ଜ୍ନାନ୍ ।" 22 ଆନ୍ ନା କାଣ୍ଡା ଆରି ୱିଲ୍ ହୁଦାଂ ଇମରିୟର୍ତି କେଇଦାଂ ଇମ୍ଣି ବାଗ୍ ଗାଟାତାଂନା, ନି ଟଣ୍ଡାର୍ ବାଦୁଲ୍ ହେ ଆଦିକ୍ ବାଗ୍ ମିଂ ହିତ୍ତାଂ ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)