1 Ih Khrista ciem reli kelu nzwa, a ciem reli lulo.

2 Cu Ih nnuide twala, kedanemene nnui ma pelane gade de acu nsung bam kelane, nah Ih nnuide ledeu kebeu hezaidungde nnui nzui kelane. 3 Cu Ih nnuide peu mina leune peube au Khrista, nah mipui peube au mipei, nah Khrista peube au Tinggwang lie kecu cilu neu. 4 Mipei keheibe de pe peu hezui lwe kekie tei mede caihakecisam rang kelabe, pe peu keu hengam tei dila. 5 Dede mipui keheibe de pe peu hezui mene kekie tei mede caihakecisam rang kelabe au pe peu keu hengam tei dila. Kedanemene cide au pe peu taikedi nzwakap delu.* 6 Kedanemene mipui ge pe peu hezui meliecai, peu pe peutam de rumdi lu. Dede pe peutam rum kedi mede pe peu tai kedi mipui ziemne hengam ge cai, peu pecu pe peu hezuilu. 7 Mipei ge au Tinggwang rehibe nah kendube lu, pe peu hezui kerabe ma. Dede mipui au mipei kendube. 8 Kedanemene mipei de au mipui dade teilu ma, dede mipui de au mipei dade teilu.✝ 9 Mede mipei de mipui ziemne damgai ma,* dede mipui de mipei ziemne damgai.✝ 10 Cine tinggimgwame ziemne, mipui au penah kengkieng kangga lalie kecu keulia lu kerane pe peu hezui maisia. 11 Iciuliede, Rampaube gade mipui au mipei de teu mede yi, nah mipei de mipui de teu mede yilie kecube ma. 12 Kedanemene mipui de au mipei dade teikelu nzwa eh mipei de mipui dade lunghgwang lu: dede ma pelane Tinggwang dade gwang. 13 Nnuikatei de cet pielo: Mipui ge pe peu hezui mene Tinggwang dade kekie tei kecu petau ni? 14 Mina zai gade de mipei ge pe tam mzwak pungtie lacai, cide au pe ziemne hengam ge lie kecu nnuide ledeu beu meni? 15 Dede mipui ge pe tam pungtie lacai, cide au pe pwa de meni? Kedanemene pe tam ketie de au pe peu halu kerane pecu pwapeu delu. 16 Dede keheibe de aipau hade rang repia neucai, anui mede Tinggwang ngqwadung de hezai keda gede gah.

17 Dede ledeu kegai aipau samdung de gade Ih nnuide twa lama, kedanemene nnui gwang ngkwakelu au yiki lu kera ziemne ma, dede siakidi kera ziemne lu. 18 Kedanemene, keraibe, nnui ngqwaki ga gwang ngkwa keludau, nnui kakga hemaabe nzidi lie kecu Ih siu, nah Ih cide ma kesa nlum kesang. 19 Nah nnui kakga hemaa ketsamtsam bam kesang maisia da, iciu eh nnui kakga Tinggwang pesui kelume de peu ci ncigilu kerane. 20 Cine, nnui bam ge ga gwang ngkwa kelu au Rampaube Kensung taktyei tyei kera ziemne ma. 21 Kedanemene matyei kera ting dige, hangge ge kecu pe taktyei riep tyei raila; cine mige nzeu bamla, nah kedabe sakmie dila. 22 Nnui tyei nah sak kera kidung gahni? Mi nnui Tinggwang ngqwa de mlai nah ma kegahme de hengam tei lano? Ih nnui dage dai rang lai no? Ih nnuide aide ziemne twa zie ni? Ih nnuide twa daulak! 23 Kedanemene Ih Rampaube dade ngaukelude Ih nnui dage de ranglia di delu, cide Rampaube Jisu pecu tuigai kedibe ziu, tangku keulu, 24 nah pa hetwa peugai eh cide tei poplwe rangdi, "Aide nnui ziemne a pum da. Acu kensung gade aide teilu." 25 Cinzwa eh, matyei kelucai pa hepiak de pwalwe, ranggai, "Aipau piak de au a jai gade samkakkelu kehecibe da. Aide nnui kesak dau, acu kensung gade teilu."✝ 26 Kedanemene nnui tangku aide tyei nah hepiak aide kesak ramsangne, nnui pa gwang kemaktane Rampaube tsit ha ranglia bam lugu. 27 Ciziemne, keheibe de, pezai petau mene tangku de tyei mede Rampaube piak de sak cai, Rampaube pum nah pe jai de mmau eh kemau tei dizie. 28 Dede peu migede pekatei pecu keteu siaktelu eh peu pecu tangkube tyei nah hepiakbe saklu. 29 Kedanemene Rampaube pum hade ci siakte mene tyei nah sak kelabe, pekatei pemau tyei nah sakgai lula. 30 Ciziemne nnui kakga mina kekieege mnei nah mateei bam, nah nnui mina kekieege tsai dida. 31 Dede anuikatei anuide keteusiakte lucai, anuide mmau dilak. 32 Dede anuide Rampaube ne tiak kecudau, anuide ledeu lula, iciu eh anuide kideube de ngngwa mmaudi melu kerane. 33 Ciziemne, a sinamedung, nnui Kensung Taktyei tyei kera ngkwa keludau, hangge ge de kerekwa lu. 34 Mige mzeu lacai, peu pecu kilung gade matyeilu, iciu eh nnui tutiak ga gwang ncüt melu kerane. Nah nnui rau kegai kedabedung ziemne au, Ih gwanglude Ih nnui puisaudung peu beuzie.