1 Cu sinamedung, nnui laisiu gage raukegai rabe mapeudung ha de, Ih nnuide peu ci mene bam neuma. 2 Nnui Khrista de nlum kemakdau, nnuide teukegai leuga, nnui mamie pekwa kegahdung de lambie rwala kecu nnui cibam.✝ 3 Ciziemne migede Tinggwang rabe gade rang kelame "Jisu au reset pung," de eh rang kelak nah migede "Jisu au Rampaube," de Kemci Rabe gade mai ranggai kelak Ih nnuide peu ci mci gaila.

4 Cu mapeudung ketsamtsam bam, dede Rabe au ket. 5 Nah zierang ta ketsamtsam bam, dede Rampaube au ket. 6 Nah heta ketsamtsam bam, dede mileune da ma pelane heta tei kebambe au Tinggwang lie. 7 Hangge gede ngha eh pelane mmilu kera Rabe mapeu anui pelane dage pwapeu. 8 Rabe ne migede kemteusam kerang pwapeu, nah cipau Rabe dene kedage de macisam kerangde cilu kera pwapeu, 9 cipau Rabe dene kedage de kenlum peu, nah cipau Rabe dene kedage de teikengkei mapeu peu, 10 nah kedage de kengkieng bata teilu kera, kedage de caihakecisam kerang, kedage de rabedung ci ntsamlu kera, kedage de helet ketsamtsam ranglu kera, nah kedage de helet ketsamtsam ranglia mcilu kera peu. 11 Dede ma aidung pelane Rabe ket ne teigai, pa pesui gade hangge gede cidungde nzi beula.

12 Mipum au ket nah penzi kekiee ge bamla, dede mipum nzi pelane, kekiee ge liede, pum ge kecu nzwa; Khrista de cide nzwa da. 13 Kedanemene Rabe ket gade anui pelane de duipum teipwa pum ge tei luda, Jewme mede Greekme, hebaang keteime mede tei kemakme, nah pelane de Rabe ket gade sak kera peu. 14 Kedanemene pumbe au zi ge ma, dede kekiee ge. 15 Hepi, "Ih au heba ge melu, Ih au pum ga ncüt ma," de eh rang liede, cide ziemne pum ga ncüt ta swa gailak. 16 Nah mikwen, "Ih miak melu, Ih pum ga ncüt ma," de rang liede, cide ziemne pum ga ncüt ta swa gailak. 17 Mipum pelane mimiak dicai, dai gade siu lai? Mipum pelane mikwen dicai, dai gade nghuilu lai? 18 Dede cu Tinggwang mipum nzidung ket ket kecude pa pesuibe nzwa eh mipum gage kaibeu pwabam. 19 Dede cidungde pelane nzi ket liecai, mipumbe daiga bam lai? 20 Cine cu nzidung kekiee ge bam, dede mipum au ket. 21 Mimiak miba dade, "Ih ncu teu maisia ma," de eh ranggai lak. Mede pecaide, mipeube mipi dade, "Ih ncu teu maisia ma," de eh ranggai lak. 22 Ciciu kecube meliene, mipum nzidung mneiki kecube de teu maisia ki, 23 nah anui mipum nzidung herüt cam lie cet kelabe, anui cidungde de herüt peu kila, nah mipum nzi ngau hezu yi kemakpe mapie sünne la, 24 dede anui nzidung hezu keyibe cidungde teu maisia ma. Dede Tinggwang mipum de keu ncüt siakte gai, herüt peu kemakpe de herüt peu ki eh, 25 iciu eh mipum kakga peu nzi pang melu kerane, dede mipum nzidung helungnei nsam eh ket ket de kema pielu kerane. 26 Cine mipum nzi ket keherei dige, nzidung pelane ngngwa keherei dila; nah mipum nzi ket hetwa pung luge, nzidung pelane ngngwa mi suiyi lula. 27 Cu au nnui Khrista pumbe dida nah cide ga zi ge dida. 28 Nah Tinggwang ngqwaki ga kangge de kedet pwa bam kesang, keraibe langkegaime, kenabe caihakecime, kecumbe keledeume, pecai miswakegah bata keteime, pecai mateei teikengkei mapeu, kenghame, piekerengeime, nah helet ketsamtsam kerangme. 29 Peciakne langkegaimedung ni? Peciakne caihakecimedung ni? Peciakne keledeumedung ni? Peciakne miswakegah bata tei lani? 30 Peciakne mateei teingkei lu kebui mapeu bam ni? Peciakne helet ketsamtsam rang lani? Peciakne pekie ranglia lula ni? 31 Dede mapeu kedibedung hengin lulo. Nah cu Ih nnuide yigwa kecu ge keulia zie.