1 Cu nnui laisiu ga raukegai hadungde: "Mipei ge mipui gede tung kemakbe yi." 2 Dede kemmha mdakkepie kehing de ziemne, mipei hangge ge kecu pekatei pe nau bamlu maisia, nah mipui hangge ge kecu pekatei pe nahpei bamlu maisia. 3 Peu penah de penau dage pe nsam tei gailu, nah cinzwa penau de penah dage pe nsam tei gailu. 4 Penau ge pekatei pe pum reu kengkieng gah, dede pe nahpei da bam. Nah cinzwa eh pe nahpei de pekatei pe pum reu kengkieng gah, dede penau da bam. 5 Hangge ge de mlai diso, tingkak ge ziemne kesamdau kelu gade gwale, iciu eh kekie gage nnui nnui ting kailu kerane. Pecai gwang ncüt dailu, iciude nnuikatei nnuide kezeulu kemak ziemne Satan nnuide kedei melu kerane.

6 Ih aidungde aja ge nzwa rang ma, dede ainzwa lude petau zielie kecu gade rangla. 7 Ih peu mina peciakne de Ih nzwa luneu.* Dede hangge ge kecu Tinggwang dade pe mapeu riep bam,* hangge mapeu aide, nah kedage mapeu lude. 8 Cu kelak teikemakme nah hemipuidung dage au, penui Ih nzwa bamlu zielie cai cide be yi zielie Ih rang gaila. 9 Dede penui penuikatei de kezeu gailak dicai, penui kelak teilu maisia. Kedanemene kehengin le pui kebam swa au kelak tei kelube yiki. 10 Cu kelak tei kelume dage Ih aja aide kaila—Ih ne ma, dede Rampaube ne—henau gede peu pe nahpei dade mpet ntsam kerabe ma 11 (dede pa mpet ntsamdi cai, peu pecu hemeu meu dai mene bamlu, mede peu pe nahpei de ngngwa kezuyi dailu), nah minahpei ge penau de tah kerabe ma. 12 Kedame pelane dage Ih rang gaila—Ih ne, Rampaube ne ma—nnui siname ge nlumkemak pui gede penau eh bamcai, nah pa pecu ngngwa lungh kera kesamdau lucai, pa cipau puide de tahdi kerabe ma. 13 Nah mipui ge nlumkemak pei gede penah teipwa bamcai, nah pa pecu ngngwa lungh kera kesamdau lucai, pa pe nahpei de tahdi kerabe ma. 14 Kedanemene nlumkemak nahpei de penau ziemne teimci lula, nah nlumkemak naude pe nahpei ziemne teimci lula. Iciu mecai nnui name au mci ma, dede cu au penui mci dida. 15 Dede nlumkemakbe de lamna di neucai, peu pecu tet dilu. Cikenzwa ga kenlum pei mede kenlum puide kang ma, kedanemene Tinggwang anuide lungciep gage qu gailu delu. 16 Kedanemene, mipuibo, nang dainzwa n nahpei de kelilu buimi mebi kecu cilu lai? Mede, mipeibo, nang dainzwa n nau de kelilu buimi mebi kecu cilu lai? 17 Peu keheibede de Rampaube ne pecu teilo kebeu nzwa, nah Tinggwang ne pecu qugai kelu ga peu lunghlu. Ih ngqwaki leune ga ainzwa ledeula. 18 Mige pegeurum kelucai ne pecu qulu ni? Peu pecu hegeurum kelude teinggah diso. Mige pegeurum mene qulu ni? Pecu peu hegeurum so. 19 Hegeukerum de magede ma, nah hegeurum kemakde magede ma, dede Tinggwang sam kai kebeudung de mzai kerabe. 20 Keheibe de Tinggwang pecu qu keludau nzwa bamlu maisia. 21 Ncu qu keludau nang hebaangme ge tei lani? Cide ziemne nang n lung pang so. Dede nang suirang ngaulu bui cai, ziuyi keyi cide luulu. 22 Kedanemene mige hebaangme ge teila eh Rampaube dage qugai kelube au Rampaube ne lungmpet kelume delu. Cinzwa eh, suirang teila eh qu kelube au Khrista baangme ge dida. 23 Nnuide Tinggwang ne pemi tei eh lui luda; cine mina baang tei diso. 24 Sinamedung, hangge ge kecu pecu qu keludau nzwa, peu pecu cinzwa Tinggwang de ngngwa bamlu.

25 Cu kelak tei kemakme ziemne au, Ih Rampaube dade sam kaikebeu magede ngau luma. Ciuliede, Rampaube dade ngaugia ngaukelu gade nlumlu kebuime ge nzwa a lungning ge Ih mzi gaila. 26 Cudau lungrei gwang kezeu de ziemne, a kecet au mige pekatei bam kelube yiki lie. 27 Nang n nau teilu deni? Pütti kera cet so. Nang n nau tei mereu ni? N nau tei kera cet so. 28 Dede nang n nau tei liede, nang kemau tei ma; nah releime ge meu de, pa kemau tei ma. Dede kelak tei kelume pumteih lungrei bam zie, nah Ih nnuide aide gade peu mbai luneu. 29 Dede Ih aide rangla, a sinamedung: Peting dui dida, cine cu gade penau kebammedung de peu penau kegahme nzwa lunghlu; 30 nah hap kelame de peu hapla kemak nzwa; nah pe suiyi kelame de peu penui suiyila kemak nzwa; nah lui kelame de peu penui ma kegah nzwa; 31 nah kideube gu teu lungh kelame de peu cide teu lungh kemak nzwa lunghlu. Kedanemene kideube zai reli aide au gahdi zielu. 32 Dede Ih nnuide peu lungrei gade relui luneu. Penau tei kemakbe dainzwa de Rampaube suiyi teilu zie bi de Rampaube tadung ziemne pelung kai lala. 33 Dede penau tei kelube dainzwa de penau suiyi teilu zie bi de kideube tadung ziemne pelung kai lala, nah pa pesui tsamdi la. Nah meu kemakbe pui mede relei kemcipui 34 Rampaube tadung ziemne pelung kai lala, iciu eh pa pumteihbe gade nah rabe gade mcilu kerane. Dede meu kedibe pui, pa dainzwa de pe nahpei suiyi teilu zie bi de kideube tadung ziemne pelung kai lala. 35 Ih aide nnui ziuyi ziemne rangla, nnui dage kekaam gede kaigai kerane ma, dede petautube teilu kerane nah magede kebwakdi mezing eh Rampaube ta teilu kerane. 36 Dede mipei ge pe naurang teikelu releikemcipui de rütlu tadi kera ta teikera cetla dicai, nah pa meulu kera mmi kahdi eh meulu maisia dicai, mipeibe tei keneube tei kerabe da. Pa au kemau teima; peu penaide ngngwa lunghlu. 37 Dede mige ketang mene, pelung gade cetlwe pe hengin de kezeulu eh pelung gade relei kemcipui de ngngwa lungh laklie tiak lucai, mina aipaude petau da. 38 Cine, pe naurang teipwa kebam puide ngngwa lungh kelube pei au yi, dede pecu ngngwa lungh kemakbe pei au yiki. 39 Minau au pe nahpei lungh kebamtane pe kangga lunghla. Dede pe nahpei tsai dicai, pa keneube de pa ngngwa lungh lubui, dede Rampaube da kelame de rünne zie. 40 Dede a lungning au pa meu mene bam kecube pe suiyi ki zie. Nah Ih aide kerang de Tinggwang Rabe gade rangbam lie kecu Ih cetgai.