1 Nnui mige ne mi keda gede ngngwa kesamlim kecudau, kemcimedung dwaga gwang mene masang kemakme dwa tutiakki ga gwang kera kekuu bam ni? 2 Mede kemcime* ne kideube tutiak kera nnui ci meni? Nah nnui ne kideube de tiak zie liecai, nnui makie keceuna gede tiak gailak ni?✝ 3 Anui tinggimgwame de tiak zielie kecu nnui ci meni? Cine nnui aipau teilung ga kesamlim kecudung tiaklu bi kerabe. 4 Cine, nnui aipau teilung de ga kesamlim kecudung bamcai, nnui daitei ngqwa ga malie la kemakme da hetutiak kera teugwang no? 5 Ih aide nnuide teingngam gai kerane rang zeu. Nnui kakga migede maci eh nnui kenlumme kakga ngngwa kesamlim kecu tei mduilu kera gah deni? 6 Dede kenlumme ge kenlumme kedage de mmau eh nlumkemakme dwaga tutiakki ga gwang lani! 7 Nnuikatei nnui kakgade ngngwa hetuketiak au nnui kau cangsiak kesang dida. Ciciu kecu swa maukedibe be yiki meni? Ciciu kecu swa cwakedibe be yiki meni? 8 Meliene nnui kemau tei nah mide cwala, nnui sinamedung de kecang de! 9 Mede nnui masang kemakme Tinggwang hegwangram gum gailak lie kecu ci meni? Nnuide peu cwa diso; kemmhame, mede mamie kerecame, mede kelak kahpet kemmhame, mede mipei heli li kelame, mede mipei mede mipui kerai ngngwa ma kesia keteime, 10 mede keregame, mede migu kehenginme, mede sak kemieme, mede mide rang msia kelame, mede sütketyeime, Tinggwang hegwangram gum gailak. 11 Nah nnui midung ge ciciu la. Dede nnuide teimci luda, nnui mci luda, nnuide Rampaube Jisu Khrista zi gade nah anui Tinggwang Rabe gade tei masang luda.

12 "Ma peciakne a ziemne petau," dede peciakne au yikap ma. "Ma peciakne a ziemne petau," dede Ih ma keheibe kangga lunghdi gailak. 13 Ketyeipok au miza ziemne, nah miza au ketyeipok ziemne, dede Tinggwang ma kena aide teingkap dizie. Mipum au kemmha ziemne ma, dede Rampaube ziemne, nah Rampaube au mipum ziemne. 14 Nah Tinggwang Rampaube de kwakcuh luda, nah anuide de pe kengkieng le kwakcuh luzie. 15 Nnui pumdung Khrista dade kepet nnui ci meni? Ciciu cai Ih Khrista pum teugwang cidungde helipui pum teidi zieni? Ciciu daulak! 16 Mede mige helipui gede ncüt kedibe de au pumteih gade pecu ngngwa ket kedi nnui ci meni? Kedanemene aiciu rangla, "Hangna de teih ge tei dizie."✝ 17 Dede Rampaube de ncüt kelube pecu ngngwa rabe gade ket dida. 18 Kemmha gade mbailu! Mina kemau keda tei kela leune au mipum gwale ge teila, dede mmha kelabe au pekatei pe pum gage kemau tei gaila. 19 Nnui pum au nnui lung ga kebam, Tinggwang ne kepeu Kemci Rabe kerecaki lie kecu nnui ci meni? Nnui au nnuikatei nnui gu ma, 20 kedanemene Tinggwang nnuide pemi tei eh lui luda. Ciziemne nnui pum gade Tinggwang de tei ndu lulo.