1 Sinamedung, Ih nnui dage rabe kebamme dage nzwa marang gailakdi, dede pumteihbe minadung nzwa, Khrista gade henamedung dage nzwa marangla. 2 Ih nnuide ketyeipok kengkiengbe mene, tungdui sak kera pwa peu, kedanemene cide ziemne nnui mtei lu mereulu. Kesang, cude, nnui mtei lu mereu, 3 nnui au cude pumteihbe reu kecune. Kedanemene nnui kakga mide ngau miriak kecu nah kengaurau kecu kebam ga, nnui pumteihbe meni nah mina zaibe nzwa tetla melui ni? 4 Nnui mige, "Ih Paul caisui la," nah kedage, "Ih Apollos caisui la," de kerang dau, nnui kideube mina meni? 5 Ciucai Apollos cau no? Nah Paul cau no? Penai au nnuide nlumkelu gage ngngwa gai kebeu kilame ge, Rampaube hangge ge kecu de teilo kebeu tade teila. 6 Ih ne linggai, Apollos dui ketaugai, dede Tinggwang ne tei mlung beu. 7 Cine, ling kegaibe mede dui ketau kegaibe au magede ma, dede tei mlung kegaibe au Tinggwang. 8 Cu ling kegaibe nah dui ketau kegaibe au ket, nah mige ge kecu pekatei peta rehi gade pe ziehi ngau zie. 9 Kedanemene anai au Tinggwang ziemne ngngwa bata tei kelame. Nnui au Tinggwang luh nah Tinggwang ki.

10 Tinggwang ngaugia acu kepeu gade Ih ki tei kecibe nzwa pe bangdwa dwalu, nah mina kedage cipau reu gade tei cuhla. Dede keheibe de sünne eh cipau reu gage teilu maisia. 11 Kedanemene migede pe bangdwa kenzeu de gwale kedage de dwasi gailak lu, cide au, Jisu Khrista.✝ 12 Cu keheibe de kecak, rangkanggeu, tangtsu pemi kehung, tsing, reigau, mede tanggai teu eh pe bangdwa dwa kenzeu gage teicai, 13 hangge ge bata de mi miakngau tei zie, kedanemene Khrista tingba benai cide liagai zie, nah cide mi gade keuliagai zie kecune. Keheibe de bata daikenzwa ge teipwa bambi kecu mi gade kedak pie zie. 14 Mige bata de mi gade tei msiadi mene bam lucai, pa ziehi ge ngau luzie; 15 dede mige bata de ru nggah dicai, pa kap dizie, dede pecu au pa mi gade mbaikelu nzwa kelilu zie.

16 Nnui au Tinggwang kerecaki lie kecu nah Tinggwang Rabe nnuida lunghbam lie kecu nnui ci meni? 17 Keheibe de Tinggwang kerecaki tei msia dicai, Tinggwang cipaude de tei msia dizie. Kedanemene Tinggwang kerecaki au mci, nah nnui cide da.

18 Peu migede de pekatei pecu cwa diso. Nnui kakga mige pekatei pecu le pwane cudau teilung gade maci lie lacai, peu pecu ma kecime ge teilu kerane pecu "kemieme" ge tei dilu. 19 Kedanemene aipau kideube maci au Tinggwang dwade kemta ge. Kedanemene Kesanglaisiu ga ainzwa raupwala,

"Pa makecime de penui ciem gade tui lula."✝

20 Nah pecaide,

"Rampaube au makecime lungcetdung au kemta lie kecu cila."✝

21 Aide ziemne, peu migede de minadung ziemne hegie so. Kedanemene ma pelane nnui gu delu, 22 Paul, mede Apollos, mede Cephas, mede kideube, mede kering, mede ketsai, mede cude, mede pecaide. Ma pelane nnui gu delu, 23 nah nnui au Khrista gu, nah Khrista au Tinggwang gu.