1 Ih mina let gade nah tinggimgwame let gade maranglu liede, Ih keku gah cai, Ih au hegeu kehedeu kwa ge mede hebam kedap kwa ge dida. 2 Nah Ih caihakecisam kerang mapeu bam liede, nah macetkecok leune nah maci leune ci liede, nah Ih lamlwadung teu nlai lu kera kenlum leune bam liede, iciu de ada keku gah cai, Ih au magede ma. 3 Nah Ih a mabam pelane peudi liede, nah Ih a pum peudi eh ngang lubui bam liede, iciu de ada keku gah cai, Ih magede kemmi gah.* 4 Keku au pelungtie nah mide ngau ngaunggia la; keku mide periak lama; keku helia mede ngang lama. 5 Keku au pezai sia lama, mede pekatei peziu ci lama, perata zette di lama, mede mi kesia teigai de cide pelung gage kaiteu lama. 6 Keku au masang kemakbe pesui lama, dede kesangbe ga pesui lala. 7 Keku ma pelane gum lula, ma pelane nlum la, ma pelane ga keregui bamla, ma pelane lia lula. 8 Keku au penli bam lama. Caihakecisamdung bam liede, cidungde gah dizie: helet ketsamdung bamde, cidungde mtak dizie; maci bamde, cide gah dizie. 9 Kedanemene anui maci au cang ma nah anui caihakeci kerang de au cang ma. 10 Dede yicangsiak kecube kegwang dau, cang kemakpe au gah dizie. 11 Ih hena dau, hename ge nzwa marang, hename ge nzwa macet, hename ge nzwa ma mning. Ih ngkiengcuh luge, Ih hename zaidungde gi dida. 12 Kedanemene cu anui kengau de au miakpiebung gade ngau mci kemak nzwa, dede pecai kezumok eh ngau dizie. Cu Ih ma cicang ma, dede pecai Ih ci cangsiak luzie, Tinggwang acu ci cangsiak kela nzwa. 13 Dede cu makecum aidungde bam: kenlum, keregui nah keku. Dede aidungde kakde ditube au keku.