1 Ih suirang keteime ge meni? Ih langkegaime ge meni? Ih anui Rampaube Jisu de ngau meni? Nnui Rampaube gade a bata de meni? 2 Ih kedame ziemne langkegaibe meliede, Ih nnui ziemne au langkegaibe lie. Kedanemene nnui au Rampaube gade Ih langkegaime ge lie kecu teimci lia kecu ge delu. 3 A tu tiak kelame dade aide au a nzeuda: 4 Anui tyei nah sak kera anui nzeu bam meni? 5 Anui langkegaime kedamedung nzwa, nah Rampaube siname, nah Cephas* nzwa kenlum nau ge de ngngwa nzangla kera anui nzeu meni? 6 Mede Barnabas anai rünne mata tei eh anai pok hi tyei maisia ni? 7 Reugwame ge tei eh cau pekatei pe mabam mpet lano? Cau kubeluh ge talwe petsi tyeila meno? Mede cau meurün gui eh meurün hau tungdui sakla meno? 8 Ih aidungde mina kengkieng teu eh rangbam meni? Mede, hezaibe de ainzwa rangla meni? 9 Kedanemene Moses zai ga ainzwa raupwala, "Nnui ketumseu tsiu neumpet kebamdau pe mui cum diso." Tinggwang hetumseu ziemne pelung nei lani?✝ 10 Mede pa anui rünsangne ziemne rangbam meni? Cide anui ziemne rau pwala, kedanemene puh kelabe keregui bam eh puhla, nah neu kelabe de luhlüt pe qwa ngaulu kera regui eh neula. 11 Anui rabe leuh nnui kakgage gigai cai, anui nnui dade kideube taktyei rum kera petau medi zieni? 12 Mi kedame aipau nzeude nnui dade ngaulu lacai, anui au ngaulu kieeki kerabe meni? Dede anui aipau nzeude kie lama. Meliene peu magene de Khrista samlia keyi lampui kekaam tei melu kerane anui ma pelane de lia bamla. 13 Nnui kerecaki ga heta keteime kerecaki mabamdung gade tyei, nah recabam ga heta keteime racabam gudung gade nzi tyei kela nnui ci meni?✝ 14 Cinzwa eh samliakeyi rang kelame samliakeyi de gade penui pok ngau tyei kerabe lie Rampaube sam kaibeu lie.✝ 15 Dede aipau nzeudung de Ih ket de kiema. Nah cidungde a ziemne teibeu lu kerane Ih aidungde raugai ma, kedanemene mide peu Ih hegie kelade tei nggahdi kera swa au Ih tsai kedibe a ziemne yiki. 16 Kedanemene Ih samliakeyi ledeu lade, Ih magede hegie kera kie gah, kedanemene tei maikesia aide acu nlum beudi delu. Ih samliakeyi teu rang ledeu mecai peu a da suisiet gwang lulo! 17 Kedanemene Ih aide neu ngga eh teicai, a ziehi ge bam. Dede neu meliede, pie rengei kera acu nlumbeu dida. 18 Iciucai a ziehi dai no? Cide au Ih samliakeyi rang ledeu kecudau, Ih samliakeyi de pemi tei mene mide pwapeu lu kera deda, iciu eh samliakeyi de ga a nzeu pelane teumelu kerane. 19 Kedanemene Ih au pelane gade suirang keteime ge liede, Ih akatei acu teipwa mina pelane kila tei dida, iciu eh Ih Khrista ziemne mina kekiee ge ngaulu kerane. 20 Jewme dade Ih Jewme ge nzwala, iciu eh Jewme de qulu kerane. Hezaibe kangga kelame dade, Ih de hezaibe kangga kelame ge nzwa dila, Ih hezaibe kangga la meliede, iciu eh hezaibe kangga kelame de qulu kerane. 21 Hezaibe kangga la kemakme dade Ih hezaibe kangga la kemakme ge nzwa la (Ih Tinggwang hezaibe kangga la melie kecube ma, Khrista zaibe kangga la) iciu eh Ih hezaibe kangga la kemakme de qulu kerane. 22 Kemneime dade Ih mnei lula, iciu eh Ih kemneime de qulu kerane. Ih mina pelane ziemne ma pelane tei dida iciu eh Ih ma keheibe gade de mina kangge de kelilu kerane. 23 Ih ma pelane samliakeyi de ziemne teila, iciu eh Ih de cipau samlam ga ncütlu kerane. 24 Hezukemzu ga kepakme pelane pakla, dede hangge rünne ziehi ngaulu kela nnui ci meni? Cine nnui cide ngaulu kerane pak lulo. 25 Kenggwame keheibe de ma pelane gade pekatei pecu kezeu la. Penui cide peurwa rimdi kera ge ngaulu kerane teila, dede anui au rimdi kelakge ziemne teila. 26 Ciziemne Ih pekie kegah nzwa pak lama; Ih tingkai de zum kela nzwa eh regi lama. 27 Dede Ih a pum tei taklwe cide kezeu teula, iciu eh Ih mide ledeu kelucai, acube gikedi teidi melu kerane.