1 Paul, Tinggwang lungning gade* Khrista Jisu ne langkegaibe zielie qu kelube, nah anui sinabe Sosthenes ne raupwa, 2 Corinth ga Tinggwang ngqwabe, Khrista Jisu gade tei mci kelume, kehei gade anui Rampaube Jisu Khrista zi de, penui nah anui Rampaube lie qu kelame de ngngwa kemcime tei zielie qukelume dage kekai. 3 Peu anui Tinggwang nah Rampaube Jisu Khrista ngaugia nah lungciep de nnui da bam kelube tei lulo.

4 Tinggwang ngaugia Khrista Jisu zi gade nnuide kepeu de ziemne, Ih a Tinggwang de nnui ziemne twa bam muila. 5 Kedanemene pa ne ma pelane ga nnuide tei mahei beu dida, kerang nah maci leune gade de, 6 Khrista ha zierang de nnui kakga kesang lie kecu keulia mcigai da, 7 cine nnui anui Rampaube Jisu Khrista cailigwang kera kwa sünne eh kebam ga nnui rabe kilam mapeudung magede kegah tei meda, 8 Khrista nnuide penli ga kecang teingkieng beuzie, iciu eh peu nnuide anui Rampaube Jisu Khrista cailikegwang tingba benai mmaugai kelakme teilu kerane. 9 Tinggwang nnuide pe Na, anui Rampaube Jisu Khrista kekangbau gage qugai kelube au masang.✝

10 Cu sinamedung, anui Rampaube Jisu Khrista zi gade, Ih nnui dage kie gaila, nnui pelane kesamdaulwe nnui kakga peu pemaa ketsam bam so, dede nnuide lungcet ket nah kakegai ket gage keriangkeu ncüt lulo. 11 Kedanemene a sinamedung, Chloe kilungme nnui kakga kesamlim bam lalie kecu nnui ha acu paubeu. 12 Cu Ih aide de rang kebam au, nnui hangge ge kecu ainzwa rang kelane, "Ih au Paul caisui la", mede "Ih au Apollos caisui la" mede "Ih au Cephas* caisui la" mede "Ih au Khrista caisui la." 13 Khrista de mzi tsam pwa bamni? Paul de nnui ziemne gwaktset dini? Mede nnui Paul zi gade duipum teilu dini? 14 Ih Crispus penai Gaius de gwale nnui migede de duipum tei kemakne Ih Tinggwang de twala, 15 cine migede a zi gade duipum teilu lie kecu rang daulak. 16 (Ih Stephanas kilungme dede duipum teida. Ci gwale, Ih kedame de duipum ketei ci meda.) 17 Kedanemene Khrista acu duipum tei kerane langgai ma, dede samliakeyibe rang kerane—nah maci sam teu ranglo ma, mecai Khrista krus de pe kengkieng kemta teidi zielu.

18 Kedanemene kapdi laizeu kecume ziemne au krus samde au kemta sam ge, dede anui kelikelume ziemne au, cide Tinggwang kengkieng. 19 Kedanemene Kesanglaisiu ga ainzwa raupwala,

"Ih makecime maci de teingkap dizie,

nah Ih kemriakme maci de keugi dizie."✝

20 Daiga makecibe bam no? Daiga laisiukebe bam no? Daiga aipau kideu ga sam rang renia kelabe bam no? Tinggwang kideube maci de tei kemie sam teidi meluini?✝ 21 Tinggwang pe maci gade kideube mina maci gade pecu cigai kelak ngau delwe pa anui kemie samkerang de teu nlum kelume de kelilu kera cetlu. 22 Kedanemene Jewme miswakegah bata rehidung kiela nah Greekme maci peeila. 23 Dede anui au Khrista de gwak kedibe ha rangla, cide Jewme ziemne puikaam ge nah Gentileme ziemne kemie sam ge. 24 Dede Jewme de nah Greekme de, kelikelu gage qukelumedung ziemne au, Khrista au Tinggwang kengkieng nah Tinggwang maci lie. 25 Kedanemene Tinggwang kemie au mina maci swa mteuki, nah Tinggwang kemnei au mina kengkieng swa ngkiengki.

26 Cine nnuide kelikelu gage qugai kelude cet gailo sinamedung, pumteih zai rehi gade cai nnui mina kekiee ge ma kecime ma, kekiee ge ngkieng ma, nah kekiee ge kelak keyi gade lunghlu ma. 27 Dede Tinggwang kecime de tei ngngam gai kerane kideu ga kemiemedung de kedetlu, nah Tinggwang kengkiengme de tei ngngam gai kerane kideu ga kemneime de kedetlu. 28 Tinggwang kideu ga hena nah nneu kelame de, nah magede lie kemakme de kedetlu, iciu eh yi lie kelabe de magede kemak tei dilu kerane. 29 Cine migede Tinggwang dwade ngang daulak. 30 Dede pe ziemne, nnui Khrista Jisu de ngngwa ncüt luda, nah Tinggwang peu pecu anui maci, anui masang nah anuide teimcikelube nah rikelube tei luda, 31 ciziemne Kesanglaisiu ga raupwakela nzwa, "Peu hegie kelabe de Rampaube ziemne hegie lulo."✝