1 Ih nnui dage anui tipui Phoebe, Cenchrea ga ngqwa ta tei kelabe de nlumgai beula, 2 iciu eh nnui Rampaube gade pecu ngngwalu kerane, kemcime dungde hetwa kepeuzai nzwa, nah pa nnui dade teumai kesia makehei gade pe mapie beulu kera. Kedanemene pa pekatei mina kekiee gede nah acu de ngha kebeupui ge tei kelune.

3 Aquila nah pe nau Priscilla, Khrista Jisu gade acu ngngwa mata tei kelabe kena de kelum gailo, 4 a teilung ziemne penai teilung kerehim gage kaibeu. Ih penaide hetwa peu gaila, nah Ih rünne ma, dede Gentileme ngqwadung pelane desi eh. 5 Penai kiga kebam ngqwa de kelum gailo. Akube Epaenetus de kelum gailo, pa au Asia gade Khrista de ci raitube. 6 Nnui ziuyi ziemne nri eh matei bamkela Mary de kelum gailo. 7 Andronicus nah Junias, a kibaume nah acu ngngwa hebaang keteibe kena de kelum gailo. Penai au langkegaime kakgade kemlangme ge, penai a swade rai eh Khrista da la kedime. 8 Ampliatus, Rampaube gade akube de kelum gailo. 9 Urbanus de, Khrista gade anui ngngwa matei kelabe, nah Stachys, akube de Kelum gailo. 10 Khrista gade luu kelube, Apelles de kelum gailo. Aristobulus kilungme dungde kelum gailo. 11 A kibaume, Herodion de kelum gailo. Narcissus kilungga kebamme, Rampaube da kelamedung de kelum gailo. 12 Rampaube gade mata teinri kela, Tryphaena penai Tryphosa* de kelum gailo. Hungkelabe Persis, Rampaube gade heta tei nrisüt kelabe de kelum gailo. 13 Rampaube gade kedet kelube, Rufus nah, pe pui nah apui de kelum gailo. 14 Asyncritus, Phlegon, Hermes, Patrobas, Hermas nah penuide nzangkela siname dungde kelum gailo. 15 Philologus nah Julia, Nereus nah pe tipui, nah Olympas, nah penuide nzangkela kemcime pelane de kelum gailo. 16 Hangge gede kemci hemam teu eh kelum lo. Khrista ngqwadung pelane nnuide kelum gaila.

17 Cu Ih nnui dade kiela, sinamedung, nnui keledeu gade cikelu dungde renia eh teipang nah kebwak kelamedung ha cet gailo. Penui dade nreutet dilu. 18 Kedanemene mina cikenzwame au anui Rampaube Khrista gwatei lama, dede penui katei penuipok ziemne. Penui sam keyi nah kecwa sam le penui kemzeu medung lung cwa dila. 19 Kedanemene nnui samzai ketei mileune ci. Ciziemne, Ih a sui yibam, nnui ziemne, dede Ih nnuide peu keyibe ga mteulu neu, dede kesiabe ga peu nzeu luneu. 20 Lungciep Tinggwang✝ Satan de nnui pi kang gage tei kecai zette dizie.

Peu anui Rampaube Jisu Khrista ngaugia de nnuide ngngwala kelube tei lulo.✝

21 Timothy, acu ngngwa mata tei kelabe, nnuide nah Lucius, nah Jason, nah a kibaume, Sosipater de kelum gaila. 22 Ih, Tertius, laisiu aide Paul ziemne raukegaibe, Rampaube gade nnuide kelum gaila. 23 Gaius, a ziemne nah ngqwabe pelane ziemne hegiabe, nnuide kelum gaila. Erastus, namdi gu mabam keteube, sinabe Quartus desi eh, nnuide kelum gaila. 24 [Peu anui Rampaube Jisu Khrista ngaugia de nnui pelane de ngngwabam kelube tei lulo. Amen.]

25 Cu Tinggwang nnuide teingkienglu kebuibe a samliakeyi nah Jisu Khrista keledeu de nzwa,

peting ketieege ziemne kebai pwakela macetkecok* keulia kegaide nzwa,

26 dede cu au kelungta kering Tinggwang aja gade, caihakecime raupwa keladung gade heleuh pelane de, keulia nah peu ci luda, kenlum samzai depeu bamlu kerane.

27 Ket rünne kebambe maci Tinggwang dage, Jisu Khrista gade, kelungta ndu kelube tei lulo. Amen.