1 Dede kenlum gade nnei kelame keheibe de ngngwalu, kesamlim kecuga rang reniadi mene. 2 Mige pe kenlum gade keheibe tyei lubui, dede nnei kebam mi kedage au ginei rünne tyeila. 3 Peu maleune tyei kelabe de tyei la kemakbe de ngkau diso; nah peu ma keheibe tyei la kemakbe de maleune tyei kelabe de mmau diso. Kedanemene Tinggwang pecu ngngwalu delu. 4 Nang cauno, mi kedame ge kila ha tiak kera? Pa sap mede kaukecu pekatei pe mpaube dwa gade tiak zie. Dede pecu peu sap luzie, kedanemene Rampaube pecu teucuh saplu builu. 5 Mige tingba ge au tingbazie keda ge swade mlangki lie la. Dede mi kedage au tingba ramsangne nzwakap lie la. Peu mi hangge gede pelung gade ci mci lulo.✝ 6 Tingbazie de mnei kelabe, Rampaube ziemne cide mneila; nah mige tyei kelabe, Rampaube ziemne tyeila, kedanemene pa Tinggwang de hetwa pwapeu kelane. Matyei kemakbe, Rampaube ziemne ketyei ga kezeula, pa de Tinggwang de hetwa pwa peula. 7 Kedanemene anui migede pekatei pe ziemne lungh lama, nah migede pekatei pe ziemne tsai lamah. 8 Kedanemene anui ring lacai, anui Rampaube dage lungh gaila, nah anui tsai dicai, anui Rampaube dage tsai gaila. Cine anui ring de mede tsai liede, anui au Rampaube gu. 9 Kedanemene aide ziemne Khrista tsailu nah ringcuh dailu, iciu eh pa tsai kedime nah ring kebamme Rampaube teilu kerane. 10 Dede nang, daitei eh nang n sinabe tutiak lano? Nah nang, daitei nang n sinabe de mneu lano? Kedanemene anui mileune Tinggwang tutiakbam dwaga sap zielu. 11 Kedanemene Kesanglaisiu ga ainzwa raupwala,

"Ih ring kelanzwa eh," de eh Rampaube ranggai, "A da mina leune koktung miezie,

nah mina leune Tinggwang de twazie."✝

12 Cine, anui hangge gede pekatei pe ha Tinggwang dage pwapeu zie.

13 Ciziemne, anui hangge ge ha tiak tadi go, ciu meliene migede pe sinabe ziemne puikam ge mede hetak ge teigai melu kerane tiak lugo. 14 Ih cibam nah Rampaube Jisu gade, magede pekatei au hera dila kemak Ih cimci luda. Mige pekatei cetpwa ma keheibe de mci melie lacai, pe ziemne cide mci meda. 15 Kedanemene taktyei ziemne n sinabe suisiet teicai, nang au keku gade tetla meda. N taktyei ziemne Khrista pe ziemne tsai kegaide teingkap diso. 16 Cine nang yilie kelade peu rangpwa kesiabe tei diso. 17 Kedanemene Tinggwang hegwang au ketyei kesak au ma, dede cide au makesangbe, nah lungciep, nah Kemci Rabe gade misui keyi. 18 Kedanemene Khrista gwa ainzwa teikelabe de Tinggwang luu lula nah mina de pecu pesui lula. 19 Cine, anui kezuyi peu kelabe nah hangge gede teimmi beukela dungde peei lugo. 20 Ketyeipok ziemne Tinggwang ta de teingkap diso. Ma pelane de mci kesang, dede mige pe taktyei ziemne pe lampui kaam lacai pe ziemne cide au kemau. 21 Heteih tyei kemak, mede zausak kemak, mede n sinabe* lampui kaamdi kela keheibe de, mede kemau gage ngngwa gaidi kela, mede mide tei nneidi kelade tyei kemak au yilie. 22 Kenlum nda kebamde, Tinggwang nnai kakga peu ntip bamlu. Mige pa tei kebamde pekatei pecu mmaula kemakbe au samlam pungtu. 23 Dede mige pa lunghau eh tyeicai pecu mmau zie, kedanemene cide au kenlum gade melu. Nah ma keheibede kenlum gade pet kemakpe au kemau.