1 Peu keringria keheibede kengkieng keteume samzai tei lulo, kedanemene Tinggwang dade gwang mai kengkieng kedage de gah. Kengkieng teu kebamme de Tinggwang ne kedet pwapeu da.✝ 2 Ciziemne kengkieng cipaude de mlai kelabe Tinggwang aja de renia la; nah cide de renia kelame penui katei penuida tutiak teugwang zie. 3 Kedanemene kengkieng teu kelame au heta keyi tei kelame ziemne kehing ge ma, dede heta kesia dungde ziemne. Nang kengkieng teu kelame da kehing bam neu meni? Keyi ta teilu, iciude nang pe suiyi tei luzie. 4 Kedanemene pa au n ziuyi ziemne Tinggwang kilame ge. Dede nang kesia tadung teicai, ngngi lulo; kedanemene pa pekie kegah gade kiengtiebe pwa lama. Kedanemene pa au Tinggwang kilame ge, kesia teikelame dage pe lunghop teigai kelabe. 5 Ciziemne nnui mzai bilu, lunghop de rünne ziemne ma, dede lungcet ria gade de. 6 Kedanemene aide ziemnede nnui heraha kai beula. Kedanemene penui au Tinggwang kilamedung lu, penui mtakdi mene heta aide tei kelame. 7 Mileune de daige peu kera bambi peu dilu. Heraha peu maikesiame de heraha peu dilu, mabam maha peu maikesiame de maha peu dilu; hing maikesiame de hinglu, herüt peu maikesiame de herüt peulu.

8 Mipau magede pung so, ketket de kereku kecu pau de gwale. Kedanemene pe kidabe de hung kelabe de hezaibe teicang luda. 9 Hezai kai kebeudung rangla: "Kemmha ta teiso, mide teitset so, rega so, migu hengin so," nah hezai kedadung gede bamsi cai, cide hezai aide gage kaincüt pwabam: "Nkatei ncu keku nzwa n kida caina de kulu."✝ 10 Keku au pe kida caina dage petau kemak teigai lama; cine, keku au hezai teicang kebeube da.

11 Aide teilu kedanemene anui peting cibam lu, anui zip kebam gade mraklu kerabe tingsiak dida. Kedanemene anui nlumkelu kerai tingdau swade anuide kelilu kera ting cu au nnaki bam dida. 12 Tingmui tingcang zeuda, nah ting kebaa nna zeuda. Ciziemne anui kemui tadung püt digo, delwe anui kebaa reunet kai lugo. 13 Anui kebaa ga kelanzwa tet sünne lugo, sak kenlwang ta mede sak kemie ta teidi mene; nah anui mipumteih hengin mede kemmha ta ketei gade mbai lugo, nah kesamlim mede miriak ketei gade. 14 Dede Rampaube Jisu Khrista de pwa ngu teilu, nah pumteihbe hengindung tei kera lampui magede peubeu so.