1 Nnui ci meni, a sinamedung (Ih mina hezai ci kelame dage rangla), mige de au pa ring kebamtane hezaibe ne kangpwa bamla lie kecu? 2 Kedanemene meu kedibe pui pe nahpei lungh kebam tingkak hezai gade pe kangga bamla, dede pe nahpei tsai dicai, pecu au laktak zai kang gade lungmpet beula. 3 Cine, pe nahpei lungh kebamdau, magade pa mipei kedage de ngngwa lunghcai, pecu le kemmhapui gelie qu dizie. Dede pe nahpei tsai dicai, pa au hezai kangga bam meda, cine pa au mipei kedage de ngngwa lunghdi liede pecu kemmhapui gelie qu daulak. 4 Ciziemne, a sinamedung, nnuide de Khrista pumteihbe gade hezaibe gage tsai dida. Aide au peu nnuide kedabe de ncütlu kerane, cide cai, pa ketsai gade ringcuhdai kelube da, iciu eh anui Tinggwang ziemne petsi builu kerane. 5 Kedanemene anui pumteihbe ga kebamdau, pumteih lungning kesiadung, hezaibe ne kecung gaibeu eh, ketsai ziemne petsi bui kera anui mzidung ga heta teila. 6 Dede cu au anuide hezaibe gade teumpet dida. Anuide kangpwa kelade gade anui tsai dida. Aide au peu anuide ndaa rauteukela zaibe gade mene Tinggwang Rabe teilung keheci gade hegwatei lu kerane.

7 Iciucai anui dai ranglai? Hezaibe mau lani? Peu madaude cinzwadi helo. Iciuliede, hezaibe gade meliecai, Ih madaude kemau daibi cilak nage. Kedanemene Ih migu kehengin daibi cilak nage, hezaibe, "Nang migu hengin so," degai meliecai.✝ 8 Dede kemau sam kaikebeu gade ziuyi keyi ngaulu eh a da kehengin leune teugwang beu. Kedanemene hezaibe gahcai, kemau au kengkieng gah. 9 Dede piage hezaibe de si mene Ih lungh, dede sam kai kebeude gwang luge, kemaube ringcuh dailu, 10 nah Ih tsaidi. Ringlu kera sam kai kebeude a ziemne ketsai ge di.✝ 11 Kedanemene kemau sam kai kebeude gade zuiyi keyi ngaulu eh acu cwadi, nah sam kai kebeude gade acu teitset di.✝ 12 Cine hezaibe au mci, nah samkai kebeude au mci, nah masang, nah yi.

13 Cine keyide a ziemne ketsai ge dini? Peu madaude cinzwadi helo. Dede kemau, keyibe gade cide kemau lie ngau hecili lu kerane a da ketsai teugwang beu. Aide au peu samkai kebeude gade kemau de mdet canggai kelak mau ge teilu kerane. 14 Kedanemene anui hezaibe au rabe gu lie kecu ci, dede Ih au pumteihbe gu. Acu au kemau baang tei kera zwabeu dida. 15 Kedanemene Ih tei kelabe, Ih ci lama. Kedanemene Ih tei keneube, aide Ih tei lama. Dede Ih ngkau kelabe, aide Ih teila. 16 Dede Ih tei neu kemakbe de Ih teila cai, hezaibe petau lie kecu hezaibe de Ih kesuizwa da. 17 Dede cu au aide teila kelabe au Ih meda, dede kemau a lungga lungh kelade ne dida. 18 Kedanemene a lungga, cide a pumteihbe ga, keyi ketde gah kecu Ih cibam. Kedanemene keyibe tei kera a lungning bam, dede keyi cide teilu kebui a da gah.✝ 19 Kedanemene Ih keyi tei keneube Ih tei lama, dede makesia Ih teineu kemakbe de, Ih teila la. 20 Cu Ih teineu kemakbe tei liecai, cide Ih ne teibam meda, dede kemau a lungga lungh kelade ne dida. 21 Cu, Ih keyi teineu kela, a da hezai kelade, Ih cilu, dede kesiade a da la muila 22 Kedanemene Ih a lung gade Tinggwang ne hezai kai kebeude ga asui lala. 23 Dede Ih a pumteih ga hezai kedage ngau. Cide hezai kehecibe de ngngwa a lungning gade renia la. A pumteih ga kebam kemau zaide ne acu pe baang teilu. 24 Ih mina kemneu ketei kauge da! Caune ketsai pumteih aide gade acu kelibeu zieno? 25 Dede anui Rampaube Jisu Khrista gade Tinggwang de twa! Cine, Ih a lung gade Tinggwang hezai kai kebeude ta teila. Iciuliede, a pumteihbe le Ih kemau zaibe gwatei la.