1 Anuide kenlum gade tei masang kelune, anui Rampaube Jisu Khrista gade Tinggwang de ngngwa kezuyi bam. 2 Pe dade anui liede kenlum gade ngaugia aide ga anui sap kebamde ga lütkelu bam, nah Tinggwang kendu regui kelaga anui suiyi bam dida. 3 Dede aide rünne ma, anui reidung ga anui suiyi bam, keherei kecu ga liakelu peukela ci kebamne. 4 Dede liakelu au mizai tei ntip beula, nah mizai kentip dene kelikelu keregui de peula, 5 nah keregui cide mide tei nghetdi lama kedanemene Tinggwang keku de anuide kepeube Kemci Rabe gade anui mlung gage ruigai beu dida. 6 Kedanemene anui mnei eh kengking gah eh kebamdau, peting siakdau Khrista kemaume ziemne tsaibeu. 7 Kedanemene mige makesangme ge ziemne au tsai beulak. Keyime ge ziemne mige tsai gaibeu lubui liede. 8 Dede Tinggwang pe keku anui dage keulia mci gaida, kedanemene anui kemaume lu liede, Khrista anui ziemne tsaibeu. 9 Cipau reude, cu anuide Khrista jai ne tei masang kelune, Tinggwang lunghop gade anuide cide ne kelilu zie. 10 Kedanemene magade, anui pe ngauraume teibam keladau, pe Na tsaigai kebeu gade anui Tinggwang de ngngwa kezuyi lucai, daihia gede, kezuyi kelu caide, pe teilung le anuide kelilu zieno. 11 Dede aide rünne mene, anui Rampaube Jisu Khrista, anui cu kezuyi daikelu aide ngau kelube gada anui liede Tinggwang da anui suiyi bam.

12 Cine, mina hangge* dade kideube ga kemau gwang kecunzwa, ainzwa eh kemau gade ketsai gwangdi. Cine ketsai mina pelane da zangra gwangdi, kedanemene pelane mau kedine.✝ 13 Kedanemene hezaibe dwa, kemau au kideube gala, dede hezaibe kegahdau kemau de maulie swama. 14 Iciuliede, Adam gade gwang Moses kecang ketsai ne di ladi, kemau tei eh Tinggwang aja de mzai luta kedi anui Adam nzwalu meliede, Adam au mige gwanglai eh kelabe Khrista rehi ge da.

15 Dede Tinggwang mapeu au Adam kemau teikedi kenzwage ma. Kedanemene mige hezai gikah kegai ziemne kekieege tsaidi liecai, Tinggwang ngaugia de daihia gede kieeki ziebi mi hange, Jisu Khrista, ngaugia mapeu de, mi kekieege ziemne kepui teilu kera! 16 Kedanemene mtamapeu de au kemau tei kedibe caineu ge nzwa ma. Kedanemene kesang, mige hezai gikah kedine gade tutiak de gwang nah kemmau de teugwang lu, dede mta mapeu de anui hezai gikah kedi kekieege gage kemzuibe teugwang beu. 17 Kedanemene magade, mige hezai gikahkedi ziemne, ketsai pe dade ngkieng lucai, daihia gede ngaugia kedide nah makesang mapeude pe dade, Jisu Khrista gade luu kelume penui teilung reu ngkienglu ziebi. 18 Cine, mige hezai gikahkedi gade mina pelane da kemau gwangdi, cinzwa eh mige makesang bata ziemne kesangbe gage teuswa lula nah mina pelane ziemne teilung keheci peula. 19 Kedanemene mi hangge* samzai teikemak gade mi kekiee ge kemau teidi, iciu liede mi hangge* samzai teikegai gade mina kekiee de tei masang luzie. 20 Dede kemau teingkiee kera hezaibe* gwang. Dede kemau kekiee kebam ga Tinggwang ngaugia de kieeki. 21 Aide teikegai au, kemau ketsai reu di kedinzwa, anui Rampaube Jisu Khrista gade Tinggwang ngaugia de makesang gade peu kelungta teilung reu kengkieng teu lalu kerane.